Prowerb 14 - Nobonob Baibel

¹ Ah nug doyak dabmak ena ele, nug nug baekkudppa ɠagattag aqatte. Anam, amge ah nug dabmak tutukku iittappa hak kobol dim lamidtte ele, nug nuhig hakppa nug baekkudppan hatte nauhtteb.

² Aun nug genab tutukku hak kobol dim lamidtte, nug Yawenu ebehi oh bodoetta le mette; amge laa nug oiyak kaliak dim lamidtte amu, nug Yawenu ena iinab dootte.

³ Danab nug Kayak dab-ii-maama ii dim lamidtte ele, nug nai eheɗ maditte amunu, nug bu aotte; amge danab doyak dabmak ena ele nug nai enaib maditte amunu, nug bu ii aotte.

⁴ Danab nug makau okkai ebehi ele laa iitta amu, nug ee aeg huana eppeb beeb, meu aokkunu elele iitta; amge laa makau okkai ebehi ele, nug makau amunu ɠagattagppa ee huana eppeb beeb, meu aokkunu elele.

⁵ Laa nai genabib maditte amu, hettoɗiakppa ele, nug laa aɗi heehe anttomnu mattiak danab dayaya, nug nai genab maditte, nug ham-ii-bubutte; amge laa nai hambuppuak maditte amu, hettoɗiakppa ele, nug laa aɗi heehe anttomnu mattiak danab dayaya, nug nai hambuppuak huanak maditte.

⁶ Laa nug awa awa qettak kobolppa oitte amu, nug doyak dabmak ena ele aokkunu hekku, me nug iinab aoma; amge laa nug diignu doyak tutukku ele amu, doyak ena, nug igippa daakkun uug iitta.

⁷ Danab nug dabmak tutukku iittappa oitte ele, na nug oɗeppan doyak ena laa ii anidmanade; na nuhignu awaidna oiye!

⁸ Eheɗ bemanu dabmak awa dabmak amu dim lamittak danab nug nuhig doyak dabmak ena ele uɗat metta, nug aɗi keeke hette, nug amunu dabma auta aotte; amge danab nug Kayak dab-ii-maama ii dim lamidtte ele, nug Kayak dab-ii-maama hak kobol dim lamittatta, nukka buppuidtte.

⁹ Danab ag Kayak dab-ii-menan ii dim lamidtteb ele, ag laanu keeke yab aoppigtai, guittak madappigtai, aɗi kobol nau anambia laa heppig amu, ag bappaidkkulagnu iinab dabmetteb, ag kobol amunu aon aon qedatteb; amge genab tutukku hak danab ag eppelagppa uug beum daatte amu, ag amu bappaidkkulagnu heegeg, Kayak Nug kobol amunu ena dootte.

¹⁰ Nahip oo gamag ahak, oo uug doyak ele, amuam nakka nahip keeke; laa nug na doottem bianab dookkunu elele iitta.

¹¹ Nau hak danab ah, ag baelkadppan ele ag geha nauhkkulag; amge genab tutukku hak danab ah, ag am geha buɗulkad kuɗum ele daaglag.

¹² Danab laa ib laa andatta, ib amunu nug nukka nuhig dabmakppa, “Ib imuam ib tutukku,” atte; amge ib amunu gog tak am mauhak.

¹³ Deɗ laala danab nug imakku, me ooppa nug guittak doottetai; amu deɗ laala nug oo gamag ahak dootte, me oo gamag ahak amu gogppa uug ele bettetai.

¹⁴ Danab ag Kayak dimedatteb ele, ag ahilag hak amunu nob elele aoglag; danab ena amu, nug ippu enappa oitte amunu, nug amuppa nob ena aokku.

¹⁵ Danab nug doyak ii awak oitte, nug keeke digdignu ooppa genab dootte; amge eheɗ bemanu dabmak awa dabmak amu dim lamittak danab nug am aɗi hekkunu dabmette.

¹⁶ Danab doyak dabmak ena ele nug Yawenu ebehi oh bodoetta le me, nug kobol nau hekkunu uua oitte; amge danab nug Kayak dab-ii-maama ii dim lamidtte ele nug am oppoɗi paha paha beebe, kobol mauhnoak, dabmak iitta ele hette.

¹⁷ Laa nug oppoɗi paha paha bette ele nug keeke digdig dabmak tutukku iittappa hette; amge laa nug diignu doyak tutukku ele, nug oo bodoettak ele daatte.

¹⁸ Danab ag doyak ii awak ele ag Kayak dab-ii-maama hak kobol dim lamidtteb; amge eheɗ bemanu dabmak awa dabmak amu dim lamittak danab ag tuɗidna, doyak ena baubau aotteb.

¹⁹ Eheɗ hak danab ag danab ena noolagppa dup nokkulag; amu nau hak danab ag genab tutukku hak danab dilag aɗnu od oɗeppa dup nokkulag.

²⁰ Laa kuɗum, aria daɗek dilag mudippan laippu ele, ag daɗek danab guhuɗadtteb; amge danab enulag ele ag amu lailkad kuɗum ele.

²¹ Danab nug mudippan laippunu ena iinab dootte amu, nug aakku hipunin hette; amge danab nug daɗek ehanadtte, nug itittak ena awom daatte.

²² Danab ag kobol eheɗ hekkulagnu dabmetteb, ag padal metteb; amge laa ag kobol ena hekkulagnu maittak aotteb, ag oo mauhaknab kobol, oo metta ii uuak kobol ele, ag kobol aɗit amuppa daatteb.

²³ Danab uɗat ɠagattag hetteb, ag ee, keeke ele daatteb; amge danab ag naiib maditteb, ag am daɗek daaglag.

²⁴ Danab doyak dabmak ena ele, doyak dabmak ena ele amuam ahilag en, amu ahilag en amu, am ahilkad igippan haɗ bia daatte; amge danab ag Kayak dab-ii-mettan ii dim lamidtteb ele ag Kayak dab-ii-maama hak henana, ag kobol amuib tuɗidna hetteb.

²⁵ Hettoɗiakppa laa aɗi heehe anttomnu mattiak danab nai genabib maditte amu, nug he, danab laa eheɗ laa ii heum nug bau daatte; amge laa aɗi heehe anttomnu mattiak danab nug hettoɗiakppa nai hambubutte, nug he, danab mauhtteb.

²⁶ Danab nug Yawenu ebehi oh bodoetta le mette amu, kobol amuam danab amunu aab aɗ ɠagattagnab, loppaɗaknu iitta ele bia daatte; danab amunu kobol amu, kobol amuam nug bekkod dilag padal mak eɗitteb ena dayaknu aben bia daatte.

²⁷ Yawenu ebehi oh bodoetta le mak kobol am le danab bauklel madatte, am amubia daatte; doyak dabmak ena elenu nai am he, danab nug paha mauhaknu pelemppa ii tette.

²⁸ King laa nug danab kuɗum nuhig ɗo waappa daatteb amu, nug am binag amahlak oppiaawak ele daatte; amge king tiigppan laa nug nuhig ɗo maɗoɗppa danab ah laa ii daatteb dayeb amu, nug nauhkku.

²⁹ Danab oo maɗoɗ ele dayak kobol dim lamidtte ele, nug am diignu doyak tutukku okkai ele daatte; amge danab nug oppoɗi bak paha dootte ele, nug am Kayak dab-ii-maama hak kobol dim lamitta oitte.

³⁰ Ooppa maɗoɗ ele dayak am beɗu ena daakkunu ehanidtte; amge laanu ameg qe oo elele ii dayak kobol am he, danab beɗu nauhtte.

³¹ Danab nug daɗek dilag eheɗ hadatte amu, nug laa Nug nug heum ele, nug nuhignu, “Keeke hamunab,” aakku dootte; amge aun nug daɗek ehanadtte, nug kobol amuppa Kayak binag mette.

³² Haen uug naunab laa uɗitte amu, nau hak danab ag padal metteb; amge genab tutukku hak danab ag ahilag mauhak haenppa, Kayak Nug padal mak eɗitteb ena dayaknu aben bia ahilag daatte.

³³ Danab ag oo maittak awaknu ehah aoppig daatteb amu, doyak dabmak ena ele ahilagppa daatte; amge danab ag Kayak dab-ii-menan ii dim lamidtteb, ag doyak dabmak ena ele iitta.

³⁴ Genab tutukku hak kobol he, wanppan wan laappan danab ag binalag ele daatteb; amge hipunin he, wanppan wan laappan danab ag uɗa nak guittak ele aotteb.

³⁵ King nug maɗi nid nuhig laa, nug doyak dabmak ena ele, nug nuhignu oo enanagnab dootte; amge nug maɗi nid laa, nug uɗa nak keeke laa hette amu, nug nuhignu oppoɗi bette.