Prowerb 13 - Nobonob Baibel

¹ Bekka nug doyak dabmak ena ele, nug ippunittak nai mameg toppanu awa dim lamidtte; amge awa awa qettak nid nug daug batak awaknu dab-ii-mette.

² Danab laa nug Kayak binag mak nai, ehanittak nai ena ele madittenu nob ena anidkku; amge danab ag Kayak ippunattom bia Nug dim lamidkkulagnu uun hetteb amu, laa guittak nau mauhnoak mettak kobol ag tiilagppa daatte.

³ Aun laa nug aɗi attenu dabmetta auta aotte, nug am bau daakku; amge aun laa nug nai doyak iitta, diignu doyak tutukku iitta ele maditte amu, nug am nauhkku.

⁴ Danab bahi iittanab ele nug keeke aokkunu dabmak okkai aotte, me nug aɗitai laa ii aotte; amge danab nug yagbak doya uɗat hette, nug keeke oh oo hette ele, nug elele aotte.

⁵ Genab tutukku hak danab ag hambuppuak kobolnu ag oolagppa nau ninig ele dootteb; amge nau hak danab ag uɗa nak kobol, amu uɗa nak nau guittak ele kobol hetteb.

⁶ Genab tutukku hak kobol, amuam danab ag Kayaknu neekkakppa danab ooppa kaliak laa iitta dilag guppiɗ daatte; amge nau hak kobol am hipunin danab heeg, ag padal metteb.

⁷ Danab laa nug enub okkai ele bia ippu hak hette, me nug keeke ele ii daatte; amge danab laa nug daɗek daatte bia ippu hak hette, me nug am keeke kuɗum ele daatte.

⁸ Danab nau ag enub danab aɗan heppeg, nug qagaiettakppa daamanu nuhig en ag madakkunu akkutai. Nug anam heeb amu, en nuhig ehanadkkutai; amge danab nau amu, ag daɗek danab amu hekkulagnu ii aɗamna amunu, daɗek danab nug uug amunu ii anidtte.

⁹ Genab tutukku hak danab ag am lam elelenab amahaltte bia daatteb; amge nau hak danab ag lam qauhom bia nauhtteb.

¹⁰ Dada hak danab nug laa oɗeppanu ulum ena awaknu uutte amunu, nug laa ele, ag nug uɗa aoɗtteb; amge laa nug ulum ena awa, ooppa mette amu, nug am doyak dabmak ena ele.

¹¹ Am danab nug ib ena iittappa men doɗo aokku dayeb amu, men doɗo amu iitta mekku; amge danab laa nug uɗat haaha, men doɗo hubhub qagmekku dayeb amu, men doɗo amuam okkai mekku.

¹² Danab nug keeke ena laa aokkun daatte, me nug ii aotte amu, nug uug okkai dootte; amge danab nug aɗi keeke aokkun oo huana daatte, nug aotte amu, amuam bauklel adnu meu lanaknu bia aakku.

¹³ Aun nug Kayaknu ippunittak nai dimedakku amu, nug eheɗ hak amunu uug maokku; amge aun nug Kayaknu ɗonu ena doya, nai dim lamidkku amu, nug amunu nob ena aokku.

¹⁴ Danab dabmak ena ele dilag ippunittak am le danab bauklel madatte, am amubia daatte; doyak dabmak ena elenu nai am he, danab nug paha mauhaknu pelemppa ii tette.

¹⁵ Danab ah ag diignu doyak tutukku ele ag laa dilag neekkakppa ena daatteb; amge laa ag Yawe ippuanattom bia Nug dim lamidkkulagnu uun hetteb ele, ag uug anidtteb.

¹⁶ Danab nug eheɗ bemanu dabmak awa dabmak amu dim lamittak kobol dim lamidtte amu, nug doyak enappa keeke hette; amge danab Kayak dab-ii-maama ii dim lamidtte ele, nug he, nug Kayak dab-ii-maama hak kobol dim lamitta oitte miag atitte.

¹⁷ Nai awa ukkak danab nau nug uug he bette; amge nai awa ukkak danab, laa ag nuhignu genab elele dooglagnu elele, nug he, maɗoɗ bette.

¹⁸ Danab nug tolittak awaknu uutte ele, gogtak nuhig am uɗa nak awa, daɗek ele daakkunu daatte; amge aun nug tolittak ena aotte, nug binag aotte.

¹⁹ Danab nug keeke ena bekkunu oo dayeb ukkeb ukkeb, nug meu andatta, am enanag dootte; amge danab ag Kayak dab-ii-menan ii dim lamidtteb ele, ag ahilag eheɗ hak uuglagnu oolagppa uuaknab dootteb.

²⁰ Aun nug danab doyak dabmak ena ele oitte, nug doyak dabmak ena ele awa oitte; amge aun nug danab ag Kayak dab-ii-menan ii dim lamitteb ele oitteb, nug nau anidkku.

²¹ Uug nug hipunin danab ah dim lamatta, aben oh ag gottebppa ele gotte; amge genab tutukku hak danab ag ena aon daatteb.

²² Danab ena, nuhig aug amu, nug mauhakppa ukkeb, aug amu paha ii iitta mema. Dayeb ukkeb, alakkud aoglag; amge hipunin danab aulag ag qagmetteb ele, genab tutukku hak danab ag aoglag.

²³ Daɗek danabnu dad am ee kuɗumnab eletai; amge laa ag nai doya mala hettoɗia epeɗia elele mettak kobol ii dim lamidtteb ele, ag nuhig ee aɗidna aotteb.

²⁴ Laa nug nid naunau nuhikkud, nug eheɗ hak ahilagnu toliatta, bu ii madatte amu, nug danab nug laanu nau ninig ele dootte, nug ahilagnu anambia hette; amge laa nug nid naunau nuhikkud dilagnu oo mauhtte amu, nug ag toliatta, bu mattak ii uutte.

²⁵ Genab tutukku hak danab ag ee laeg ukke, oolag diditte; amge nau hak danab ag am enug aqatte.