Prowerb 12 - Nobonob Baibel

¹ Aun laa nug tolittak awaknu oo mauhtte, nug doyak enanu oo mauhtte; amge aun laa nug tolittak awaknu nau ninig ele dootte, nug am doɗ dabmak iitta ele bia.

² Yawe Nug danab ena dilagnu oo ena dootte; amge danab lokkumakppa kobol kobol hekkulagnu doon autna aotteb ele amu, Nug ag naippa maadtte.

³ Danab nug nau hak haaha, nug ena, ɠagattag daakkunu elele iitta; amge genab tutukku hak danab nug am ad diɗi ena ele, ɠagattag daatte, amubia daatte.

⁴ Danab wau nug ah diig ena daatte dayeb, nug gamu haɗ bia aakku daatte; amge ah nug gamu uɗa nak nau guittak ele medatte amu, kobol amuppa nug gamunu ɠagattag he nauhtte.

⁵ Genab tutukku hak danabnu maittak awak am nai doya mala hettoɗia epeɗia elele mettak kobol dim lamidtte; amge nau hak danabnu ulum nai am hambuppuak ele.

⁶ Nau hak danab ag laa guittak madappeg mauhkkulagnu nai maditteb; amge genab tutukku hak danab ag laa uugppa daatteb, ag amu ehanadppeg, qagaiettakppa ii daamnanu nai maditteb.

⁷ Nau hak danab ag padal mena, baula ii daatteb; amge genab tutukku hak danab, nug baekkudppa, ag ɠagattag daatteb.

⁸ Danab ag laa nug doyak dabmak ena ele, ag nug binag metteb; amge danab nug dabmak kaliaknu kobol hette, laa nuhignu ena iinab dootteb.

⁹ Na danab onin iitta daanna, heɗianppa ee aon lakkut am ena, amu uɗa nak iitta; amge na nakka, “Da iikku onil ele, uɗat laa ii hepa,” anana, enug nittebeb oikkut, amuam ena iitta.

¹⁰ Genab tutukku hak danab ag ahilkad doɗ keeke atognoadtteb; amge nau hak danab ag ahilag atognoak am laa guittak mattaknu uug laa ii doyakppa bette.

¹¹ Aun laa nug dad uɗat nuhig pehettak hette ele, nug ee elelenab ele daakku; amge laa nug dabmak hamu hamu dim lamitta oitte amu, nug epeɗia ha dabmak ena awak kobol ii dootte ele, ⌊amunu nug ee iitta daakku⌋.

¹² Eheɗ hak danab ag keeke yabhok ibuppa aotteb, amu nau hak danab ag keeke amu ag eppelagppanu aoglagnu oolag hette; amge Kayak he, genab tutukku hak danab ag ɠagattag, ad diɗi ɠagattag daatte, ag amubia daatteb.

¹³ Eheɗ hak danab ag nai nau mattinna, pelemppa tetteb; amge genab tutukku hak danab ag anam iitta, ag uugppa ii notteb.

¹⁴ Danab laa nug Kayak binag mak nai, ehanittak nai ena ele madittenu nob ena ambak anidkku; ele amu, danab nug eppegppa uɗat haaha daya, nug keeke aotte.

¹⁵ Danab nug Kayak dab-ii-maama ii dim lamidtte ele, nug anam oittenu nug, “Ib imuam ena,” dootte; amge danab nug ulum nai ena aokkunu daug humatte, nug doyak dabmak ena ele.

¹⁶ Danab ag Kayak dab-ii-menan ii dim lamidtteb ele ag laa aɗi ag oolag ii hette heeg, ag laippun oo nauhak dootteb; amge danab nug eheɗ bemanu dabmak awa dabmak amu dim lamittak kobol dim lamidtte amu, nug laa ag awa awa qettak nai nuhignu atteb, nug amunu ii dabmette.

¹⁷ Danab nug hanhan nai genabib maditte amu, nug hettoɗiakppa, appa ele genabib maditte; amge hambuppuak danab nug hettoɗiakppa nai hambuppuak maditte.

¹⁸ Nai mauhnoak, dabmak iitta ele mattiak am laa nug layag qep-ppa yaatte bia hette; amge danab doyak dabmak ena ele, nug amunu nai maditte amu, nug laa ehanadtte.

¹⁹ Doyak diig genabib amu hanhan enaib daatte; amge hambuppuak nai am pahanab iitta mette.

²⁰ Danab ag eheɗ hekkulagnu maittak aotteb amu, hambuppuak ag oolagppa daatte; amge laa ag maɗoɗ bekkun hetteb ele amu, gamag ahak ag oolagppa daatte.

²¹ Nau hak kobol am genab tutukku hak danab ii aɗama; amge nau hak danab ag hak nau kuɗumnab hetteb.

²² Yawe Nug danab ag nai hambubutteb ele, Nug ahilagnu ooppa uuaknab dootte; amge nai genabib mattiak danab dilagnu amu, Nug ahilagnu enanagnab dootte.

²³ Eheɗ bemanu dabmak awak, dabmak amu dim lamittak danab nug haenppaib nuhig doyak laala madatte; amge danab ag Kayak dab-ii-menan ii dim lamidtteb ele, ag Kayak dab-ii-maama haknu ge iitta maditteb.

²⁴ Danab ag yagbak doon uɗat hetteb ele, ag am anuqak danab daaglag; amge danab ag bahilkad iitta ele, ag am begbeg maɗi nid daaglag.

²⁵ Am butti, laatu keeke, aɗi uug bekkunu daattenu uug doyak, amuam danab uug okkai qak medatte; amge ehanittak nai nug danab he, oo gamag ahatte.

²⁶ Genab tutukku hak danab nug dabmak elelenab awa, laa ele layam batatte; amge nau hak danab ag mauhnoak henana, ag nauppa watteb.

²⁷ Danab bahi iitta ele nug doɗ laa lakkunu ii aotte; amge danab nug nuhig uɗat hekkunu yagbak doya uɗat hette amu, nug nuhig keekeppa ehanittak aotte.

²⁸ Genab tutukku ha oiyak am bau dayaknu ib aakku. Ge, ib amuam mauhakppa ii notte.