Prowerb 11 - Nobonob Baibel

¹ Danab nug doyaya, keekenu uug anidkkunu skel uɗat pehettak ii hettep-ppa mette amu, Yawe Nug amunu ooppa uuaknab dootte; amge danab nug uug doyaknu keeke pehettak skelppa uɗat mattak amu, Yawe Nug amunu ooppa enanagnab dootte.

² Danab nug dada kobol dim lamidtte, nug uɗa nak nau guittak ele aokku; amge danab nug nukka onig qe ne oitte, nug danab doyak dabmak ena ele bekku.

³ Genab tutukku hak danab ag oolagppa dabmak oiyak ele tutukkuib dayaknu kobol dootteb, ag amuppa ulum aon oitteb; amge danab ag Yawe ippuanattom bia Nug dim lamidkkulagnu uun hetteb amu, ag hambuppuak hena, padal metteb.

⁴ Kayak Nug danab ah hipunin heegeg bu madatte, haen amuppa en okkai am danab ah ii ehanadma; amge genab tutukku hak kobol am danab ehanitte, danab ii mauhtte.

⁵ Kayaknu neekkakppa danab ooppa kaliak laa iitta ele amu, genab tutukku hak kobol nuhig he, nug ib enappa oitte; amge nau hak danab ag nau heeg, kobol amu he, ag nauhtteb.

⁶ Danab ooppa kaliak laa iitta, nuhig genab tutukku hak kobol am he, nug pelemppa ii tette; amge danab nug Yawe ippunittom bia Nug dim lamidkkunu uua hette amu, nug oo hak eheɗ nuhignu pelemppa daatte.

⁷ Haen nau hak danab laa nug mauhtte, haen amuppa nug aɗi aɗi nuhigppa ena bekkunu dabmak aɗa oiyom ele, dabmak amu oh iitta mette. Ao, nug keeke aɗi aɗi nuhig ɠagattagppa bekkunu dabmeum ele, haen amuppa dabmak amu oh iitta mette.

⁸ Kayak Nug genab tutukku hak danab ehanitte, nug qagaiettakppa ii daatte; amge Nug nau hak danab paɗe, nug uug waappa daatte.

⁹ Danab Kayaknu, nuhig haknu ele uuak dootte amu, nug oɗeppan nai mattiak am mudippan laa he nauhtte; amge genab tutukku hak danab amu, nuhig doyak ena ehanitte, nug qagaiettakppa ii daatte.

¹⁰ Haen genab tutukku hak danab ag elele, ena daaegeg, aab okkaippanu danab ah ag oo gamag ahak okkai ele daatteb; nau hak danab ag mauheg amu, danab ah ag oo gamag ahak doon etteb.

¹¹ Haen Kayak Nug nuhikkud danab ah, ag genab tutukku hak danab ah amu, haen Nug ag itadtte, ahilag aab okkai ena daatte; amge nau hak danab ag ahilag naippa heeg, aab nauhtte.

¹² Danab nug epeɗia ha dabmak ena awak kobol ii dootte ele oitte, nug mudippan laippu awa awa qedatte; amge danab nug diignu doyak tutukku ele oitte, nug anam ii hette.

¹³ Dimug nai mattiak danab nug layagnu nai nug ii mattilo amu, nug maditte; amge danab, laa ag nuhignu genab elele dooglagnu elele amu, nug layagnu nai bam ele ma takkom, nug nai amu ii mattima.

¹⁴ Ulum mettak ena iittappa wanppan wan laa na qette; amge ulum mettak danab kuɗum daatteb dayeb amu, ag heeg, wan ɠagattag daatte.

¹⁵ Aun laa nug laa ehanitta, keeke lonnu onig awak daatte, nug amu mette amu, nug am genab guittak aokku; amge aun laa nug amu genab hekkunu ii maditte amu, nug eheɗ ii aoma.

¹⁶ Ah nug oo bodoette enanag maɗoɗ ele hak kobol dim lamidtte amu, nug binag aotte; amge oo doyak ii doyaya nau hak danab, ag enulag aakkuib aotteb.

¹⁷ Danab nug oo bodoettak danab daatte amu, nug nukka, nug ehanidtte; amge danab nug laa guittak madakkunu uug laa ii dootte amu, nug nukka nug uug he, beɗuppa bette.

¹⁸ Nau hak danab nug keeke aotte me, nug keeke diig genab ele ii aotte; amge danab nug genab tutukku hak kobol hette amu, nug meu ena genab aotte.

¹⁹ Genab tutukku hak danab nug bau daakku; amge aun laa nug kobol eheɗ haaha oitte, nug mauhkku.

²⁰ Yawe Nug danab ag eheɗ haknu ag tiilagppa daatte amu, Nug ahilagnu ena iinab dootte; amge Nug aun aɗi ag nuhig neekkakppa ag danab oolagppa kaliak laa iitta ele, Nug ahilagnu enanagnab dootte.

²¹ Imuam na genabnab genab dookkutnu elele, Kayak Nug nau hak danab bu madakku; amge aun aɗi ag genab tutukku hak danab daan oitteb, ag am bu ii mattama.

²² Ah laa iɗu tuqak ele, nug laanu neekkakppa nug dabmak eheɗ ii aomanu kobol ii dim lamidtte amu; kobol amuam ring, golppa hak bo noobppa mak daatte, amubia.

²³ Genab tutukku hak danab ag aɗi kobolnu oolag hette, ag aɗi keekenu oolag hette amu, ahilag oo hak amu oh am diig enappaib bette, gogppa tak ele am enaib; amge nau hak danab ag aɗi kobolnu, aɗi keekenu ena bekkulagnu dabmak aɗan oitteb amu, dabmak amu oh am diig nauppa ba tette, gog takppa am oppoɗi bak daatte.

²⁴ Danab laa amu, nug laa ehanatta, nug nuhig keeke hamu madatte, me ⌊Kayak Nug danab amu ititte,⌋ nug keeke kuɗum baula ele nuhignu aotte; amge danab laa amu, nug laa ehanattaknu kobol daatte bia ii madatte, nug nuhig keeke aɗatte, me nug eɗua, daɗeknab daatte.

²⁵ Keeke mettaknu oo qak iitta danab, nug am keekenu elelenab daakku. Ao, danab nug laa ehanadtte, nug geha ehanittak aokku.

²⁶ Enug nau haenppa, danab ah ag ee iitta ele, ag danab laa nug ee oo qe, laa ag daden mekkulagnu uua aɗatte amu, ag nug eheɗ laa awaknu anak waappa daakkunu atteb; amge ag danab nug ag ee daden mekkulagnu mette ele, ag nug itidtteb.

²⁷ Laa nug kobol ena laa dilagppa hekkunu tuɗid hette amu, laa ag nuhignu ena dooglag; amge aun nug laa eheɗ anidkkunu mattia oitte amu, nug eheɗ aokku.

²⁸ Aun laa nug enubnu ooppa genab dootte, nug ad uɗug qaɗaiettak bia na qekku; amge genab tutukku hak danab, ag am ad uɗug bau daatteb bia bau daaglag.

²⁹ Danab ag baelkadppa oolagppa, ag Kayak dab-ii-menan ii dim lamidna oin, uug madatteb, ag keeke iitta ele daaglag. Ge, ag geha laa doyak dabmak ena ele, ag amu dilag maɗi nid daaglag.

³⁰ Danab ag genab tutukku hak kobol dim lamidtteb amu, amuppa ag heeg, danab laa ag bau daatteb; amu danab doyak dabmak ena ele, nug kobol attem attem, laa ag aon bau oiglagnu ippunadtte.

³¹ Antte! Genab tutukku hak danab ag wan imuppa daanna, ahilag nob ena aotteb; amunu genabnab genab, Kayaknu nuhig haknu ele uuak danab, hipunin danab ele, ag wan imuppa ahilag nob nau aoglag.