Prowerb 10 - Nobonob Baibel

Solomonnu oiyak ehanittaknu nai tutu laa

¹ Oiyak ehanittaknu nai tutu Solomonnu ⌊laa⌋ am inam: Bekka laa doyak dabmak ena ele nug mameg oo gamag ahak medatte; amge bekka laa dabmak tutukku iittappa keeke laa hette ele, nug anig oo uug medatte.

² Na ib eheɗppa en okkai aokkut dayeb amu, en amu ii ehanidma; amge genab tutukku hak kobol am na ehanitteb, laa ag eheɗ hak ahilagppanu mauhtteb, amubia na ii mauhmana.

³ Yawe Nug he, danab genab tutukku hak kobol dim lamidtteb ele, ag enugppa ii daatteb; amge Nug he, nau hak danab ag aɗi keeke aoglagnu oo hak okkai dootteb ele amu, ag keeke amu ii aotteb.

⁴ Am na bahin iitta daan, uɗat ii hekkut dayeb, na daɗek daakkut; amge na yagbak doon uɗat hekkut dayeb, na keeke ele daakkut.

⁵ Nid nug ee oɗue, awaknu daatte haenppa ee aotte amu, nug am mameg bekka doyak dabmak ena ele; amge nid nug ee oɗue, awaknu daatte haenppa niitte amu, nug mameg uɗa nak nau guittak ele medatte.

⁶ Am genab tutukku hak danab ag Kayak eppegppanu itittak ena okkai aotteb; amge nau hak danab amu, laa guittak nau mauhnoak mettaknu nai ag oɗelagppa ambak daatte ⌊amunu, ag itittak ena, Kayak eppegppanu, danab eppelagppanu ele ii aomna⌋.

⁷ Genab tutukku hak danab nug mauhkku amu, dimppa laa ag nug onigppa laa itittak ena medakku; amge nau hak danab mauheb, amu dimugppa, nug onig am beɗakku.

⁸ Laa ag doyak dabmak ena ele, ag Kayak aɗi haknu atte, ag aakku aon hetteb; amge laa nug Kayak dab-ii-maama ii dim lamitta oiyaya, nai hamu hamu mauhnoak maditte, nug na qa, padal mekku.

⁹ Danab nug dabmak oiyak nuhig ele am tutukkuib amu, nug ɠagattag daakku; amge laa nug oiyak nuhig kaliak ele amu, nug bu aokku.

¹⁰ Danab nug laikkud ele heppeg, laa na qekkunu hetteb ele amu, laa amu nug laikkud attem dooglagnu amegppa amuhpapaɗ qetteppa ippunatta he, uug bette; amu laa nug Kayak dab-ii-maama ii dim lamitta oiyaya, nai hamu hamu mauhnoak maditte, nug na qa, padal mekku.

¹¹ Genab tutukku hak danab ag oɗelagppa nai maditteb ele amu, nai amu danab laa ehanatte, ag bau daatteb; amge nau hak danab amu, laa guittak nau mauhnoak mettaknu nai ag oɗelagppa ambak daatte.

¹² Laa dilag nau ninig ele doyak kobolnu amu, kobol amuppa nug qak aakku bette; amge oo mauhak kobolnu amu, kobol amuppa laa nug layag nug hipunin nuhignu heum amu, nug hipunin amu oh uhuqa medatte.

¹³ Danab ag oo maittak awaknu ehah aoppig daatteb, ag doyak dabmak ena elenu nai maditteb; amge danab ag epeɗia ha dabmak ena awak kobol ii dootte ele, ag bu aoglag.

¹⁴ Danab ag doyak dabmak ena ele, ag doyak ena tuɗidna aon, qagmetteb; amge danab ag Kayak dab-ii-mena ii dim lamidna oinna, nai maditteb, ag amu padal mekkulagnu aakku daatteb.

¹⁵ Danab ah enulag ele ag ahilkad keekenu, “Imuam ihinig aab ɠagattag aɗ ele,” atteb; amge daɗeknab dayak am uug ele, danab ag daɗeknab anam daatteb ele, ag nena qena autna aotteb.

¹⁶ Genab tutukku hak danab dilag nob am bau dayak; amge nau hak danab dilag nob am ahilag hipuninnu bu awak.

¹⁷ Laa nug tolitta bu mettak awawa oo eɗutte, nug laa ag ib attenppa bau daaglag, nug ag amu ippunadtte; amge laa nug nai ii dootte, nug bu awawa oo ii eɗutte, nug laa ag padal mekkulagnu ib ippunadtte.

¹⁸ Am laa nug laanu, nug layag bia hette, amge nug ooppa, nug nuhignu nau ninig ele dootte, nug am hambuppuak danab; danab nug laa onig nauhkkunu nai maditte, nug am Kayak dab-ii-maama ii dim lamitta oiyak danab.

¹⁹ Nai huana mattiakppa amu, hipunin ele appa ana daatte; amge laa nug nai huana ii maditte, nug am doyak dabmak ena ele.

²⁰ Genab tutukku hak danabnu nai am silwa enanag bia; amge nau hak danabnu dabmak am keeke hamu, amuppa nob ena laa awaknu am iitta.

²¹ Genab tutukku hak danab dilag nai am kuɗum laa ehanadtte; amge danab ag Kayak dab-ii-mena ii dim lamidna oitteb ele, ag am epeɗia ha dabmak ena awak kobol ii dootteb amunu, ag geha mauhkkulag.

²² Yawenu itittak ena he, danab nug elelenab daatte; amuppa uug laa ii daatte.

²³ Danab nug Kayak dab-ii-maama ii dim lamitta oitte, nug eheɗ haknu ena dootte; amge danab nug diignu doyak tutukku ele, nug doyak dabmak ena elenu nai doya, nug enanagnab dootte.

²⁴ Nau hak danab nug aɗi keekenu baɗak okkai dootte amu, keeke amu aakkuib nuhigppa bekku; amge Kayak Nug genab tutukku hak danab nug aɗi keekenu oo hette ele amu, Kayak Nug keeke amu aakku nug medakku.

²⁵ Am ulah naɗi laa keeke hatte nauhtteb bia, nau hak danab ag nauhtteb; amge genab tutukku hak danab ag ukku hanhannuppa daatteb.

²⁶ Bahi iittanab danab nug laan maɗi nid daatte dayeb, nuhig danab okkai nug nuhignu am ena ii dooma; danab okkai amu nug nid amunu keeke ninig elenab laa lawowa, aeg nak dootte bia dootte, o iitta, nug ameg aab kah qe dootte, nug amubia dootte.

²⁷ Yawenu ebehi oh bodoetta le mak kobol am he, danab nug paha ii mauhtte, nug tuɗitta bauklel daatte; amge nau hak danab ag haen tutuib daatteb.

²⁸ Genab tutukku hak danab ag oo gamag ahak anidkkulag; amge nau hak danab ag aɗi keeke laa ena bekkunu dabmak aɗan oitteb amu, ag amu ii anidmana.

²⁹ Yawenu ib am genab tutukku hak danab dilag padal mak eɗitta ena dayaknu aben daatte; amge eheɗ hak danab ag ib amuppa nauhtteb.

³⁰ Genab tutukku hak danab ag ɠagattag daaglag; amge nau hak danab ag wanppa ii daamna, ag iitta mekkulag.

³¹ Genab tutukku hak danab ag oɗelagppa doyak dabmak ena ele nai maditteb; amge danab nug nai eheɗ tutukku iitta maditte amu, laa heeb, nug oɗe qamutak daakku.

³² Genab tutukku hak danab ag haen adekkuppa aɗi nai mattiglagnu daatte, ag dootteb; amge nau hak danab ag nai eheɗ tutukku iitta aakkuib maditteb.