Prowerb 1 - Nobonob Baibel

Oiyak ehanittaknu nai tutu imu ib kuɗumppa ehanigkkunu elele

¹ Oiyak ehanittaknu nai tutu, Dawit bekka Solomon, Israel dilag king, nug yom am iikku.

² Solomon nug oiyak ehanittaknu nai tutu yaalattom amu, nug diig piɗe piɗenu yom. Amuam: danab nug doyak dabmak ena ele aokkunu, nug nuhig oiyak atognoa enaib oikkunu, nug nai unuqagnab daattenu meu, nug amu diignu doyak tutukku anidkkunu,

³ nug attem ha, nug nuhig oiyak atognoa enaib oikkunu, nug eheɗ bemanu dabmak awa dabmak amu dim lamittak kobolppa oikkunu, nug genab tutukku hak kobol, nai doya mala hettoɗia epeɗia elele mettak kobol ele dilahnu dabmak pehettak awa dim lamatkkunu,

⁴ nug doyak ii awak ele daatte dayeb, nug eheɗ bemanu dabmak awa dabmak amu dim lamittak kobolnu doyak aokkunu, nid o nid ahin bau nug doyak, aria laanu neekkakppa nug dabmak eheɗ ii aomanu kobol ele aokkunu,

^5-6 danab nug oiyak ehanittaknu nai tutu, aria keeke danab ag dootteb ii dootteb ele ouaqata ippuanattak nai ele dookkunu, diig amu ohnu amu, oiyak ehanittaknu nai tutu imu am amunu daatte. Aria, danab nug doyak dabmak ena ele, nug daug huma doya, nug nuhig doyak dabmak ena ele nai imuppanu tuɗitta awaɗ! Ge, danab nug oo maittak awaknu ehah ele amu, nug ele nai imuppa ulum awaɗ!

⁷ Amu Yawenu ebehi oh bodoetta le mak kobol am doyak digma awak aakku; amge danab ag Kayak dab-ii-menan ii dim lamidtteb ele ag doyak dabmak ena elenu, aria tolittak awaknu ele, ag amu dilahnu ena iinab dootteb.

Doyak dabmak ena ele, amuib dim lamittaknu nai

⁸ O bekkal, na mamen da, na dahil tolittak nai doye! Ao, na anin toppan ippunittak ena aome amu, na amu aib uume.

⁹ Aɗinu? Tolittak nai dahil, aninnu ippunittak nai ele amu, amu oh am baɗi, ikkin bala mettaknu bia daakku; am kalele, na baat bala medakkunu bia daakku.

¹⁰ Da bekkal, hipunin danab ag na eeɗidkkulag dayeb amu, na aib dim lamadna, ag atteb bia heme.

¹¹ Ag inam akkulagtai. “Na doppe, ig ele, ig laa meidta daatta, qepput mauhaɗ! Ao, ig danab nug beɗuppa aab iitta, ig nug hamu qepput mauhaɗ!” akkulag.

¹² Ag anam awona amu, ag inamtai tuɗidna akkulag. “Danab nug bau dayaya, laippun oɗe awa mauha, gaɗa moɗppa notte, amubia ig moɗ bia daat, danab aotu! Ao, mauhak danab moɗppa noa daatte, amubia ig laa aopput, ig eppenigppaib dayaɗ!” akkulagtai.

¹³ Ag na amenppa anam awona amu, ag akkulag. “Ig keeke digdig, danab keeke amu oh awaknu nug men doɗo okkai ekku amu, ig amu aognig. Ge, ig yabhokppa anam aot, ig launkadppa mepput, ig launkad am en amuppa ambak daaglag.

¹⁴ Ig anam hekkunig amunu, na doppe, ig ele tamanit, keeke ig aognig amu, ig panit diignig.” Ag anam aakku akkulagtai.

¹⁵ Amu genab, ag anam aakku na amenppa akkulagtai, amge da bekkal, na aib ag ouaqame. Ao, na aibnab ib ag gokkulag ele mattan gome.

¹⁶ Na ag ele oh ii gomananu diig am inam. Ag pahaettak hipunin hekkulagnu hetteb. Ao, ag laa qeppeg mauhkkunu oolag huana hette.

¹⁷ Ai awaknu uhui laa mauhnoak otalppeg, ai ag miagib anidkkulag, amuam uɗat meu ele iitta, ⌊amunu hipunin danab amubia kobol nau hena, miag atiakib nauhkkulagnu hetteb amu, na amubia aib heme.⌋

¹⁸ Hipunin danab ag aakku akka ahilkad pelem maadtteb. Ao, ag pelem maadtteb, ag amuppa nona mauhadkkulag.

¹⁹ Amuam danab ag keeke kuɗumnu oolag he, kobol eheɗppa aoglagnu hetteb ele, ahilagppa bette; oo hak nau ahilag amu he, ag mauhtteb.

Doyak dabmak ena elenu nai

²⁰ Ah laa onig, Doyak Dabmak Ena Ele, nug aab okkainu ibppa dayaya, ewa nai atte. Ao, nug tamaniak aben naɗippa baag okkaippa nai maditte.

²¹ Nug aab okkai ooppa, ib laalappa, aben danab ah kuɗum ag keeke meegeg, laa ag daden metteb ele, nug aben aguppa ukka, nai nuhig doyak dabmak ena ele ag dooglagnu baag okkaippa maditte. Ao, nug aab okkainu od oɗeppa dayaya, nai nuhig maditte.

²² Nug atte. “Ag danab ah ag doyak ii awak ele, haen gane laa ele ukkeb, ag doyak ii awak kobol ahilag uun oiglag? Ao, ag danab ah ag awa awa qettak nai mattiglagnu enanagnab dootteb ele amu, haen gane laa ele ukkeb, ag kobol amu uuglag? Ge, ag danab ah ag Kayaknu ii dabmena, ii dim lamidtteb ele, ag doyaknu nau ninig ele dootteb amu; haen gane laa ele ukkeb, ag kobol amu uuglag?

²³ Ag danab ah anam amu, ag da Doyak Dabmak Ena Ele, ag matu daug batak dahil imu dabmena dim lamidlob amu, da dahil doyak dabmak ena ele imu oh ag mattalom. Ao, da dahil dabmak appi, ag doolob.

²⁴ Amge da ei, ag uun, da uuiɗppig. Ao, ag dahil nai dooglagnu da eppel bahimi amu, auntai laa ii doum.

²⁵ Amu genab, ag dahil ulum nai ena, ag amu oh dooglagnu uuppig. Ao, ag daug batak nai da hemi amu, ag amu uuppig.

²⁶ Ag amu heppig amunu, da haen aɗi keeke heeb, ag uug naunab dooglag amu, da haen amuppa imadkkul. Ao, haen padal mak haen laa ahilagppa beeb amu, da ag awe awe aqadkkul.

²⁷ Ulah naɗi laa uɗia keeke oh he nauhtte, padal mak amubia ahilagppa bekku haenppa amu, da anam hekkul. Ao, kilibob okkai keeke he nauhtte, uug naunab amubia ag tonadkku haenppa amu, da anam hekkul. Ge, ahilagppa uug, amu uug nau ele beya tonadya hepeɗ, ag elele iittanab iitta dooglag haenppa amu, da anam hekkul.

²⁸ Amu da Doyak Dabmak Ena ele anam hekkul, amu haen amuppa aun aɗi ag dahil nai ii doon dim lamidppig ele amu, ag dahilnu ekkulag, amge da nob laa ii madapa. Ag da mattiɗkkulag, amge ag da ii aniɗmana.

²⁹ Ag doyaknu nau ninig ele dooppig. Ao, ag Yawenu ebehilag oh bodoetta le mekkunu uuppig.

³⁰ Ag dahil ulum nai ena doon, dim lamidkkulagnu uuppig. Ge, ag daug batak nai dahilnu am keeke hamu bia dooppig.

³¹ Ag amu heppig amunu, ag ahilag oiyaknu meu heeg beum, am meu nau ninig ele amu, ag aakku lakkulag. Ao, ag keeke laala hekkulagnu lokkumakppa dabmena, maittak eheɗ aoppig amu, maittak amunu meu nau, ninig ele, ag lappeg, oolag didikku.

³² Aɗinu? Danab ah ag doyak ii awak ele daatteb amu, ag ahilag eheɗ hakppa mauhkkulag. Ao, danab ah ag Kayak dab-ii-menan ii dim lamidtteb ele, ag kaaka bia oinna, uug laa iinab bema anana oitteb ele amu, ahilagppa padal mak aakku bekku.

³³ Anam aakku, amge aun nug Doyak Dabmak Ena ele da, nug da oɗel dootte, nug baɗak iittappa daakku. Ao, aun amu hette ele amu, nug manin, baɗak iitta ele daakku,” awa atte.