Pilipai 4 - Nobonob Baibel

Dabmettaknu nai

¹ Amunu O lailad, da ahilagnu ool mauhe, anadkkulnu ool daye, da ahilagnu dabmeinne, maɗoɗppan gamag ahak dooi, ittag ele iutte amu, ag da ami bia ag Naɗi toppa ɠagattag hippaidna dayeg!

² Amu aa Yuodia, Sintike ele, aa nai imu dooya autya aoglahnu unuqat-ttem. Aa Naɗi onigppa aa oo mak laippu aoya dayeɗ!

³ Amu Sisigos, na oo metta ii uuak kobol dim lamidttem, amu da na amenppa attem,. Na ah aɗit amu, aa Nai Ena mehuqak uɗat haknu da ehaniɗeh, ig oh heut ukkom amunu, na aa ehanatna autna awe! Ah aɗit amu aa Klemen, amu dahilad uɗat laippu laa oh ele, Kayak Nug ag oh ag onilkad buk laa, amuam buk onig Bauklel Awa Onig Yaaknu buk, Nug buk amuppa ag onilkad yom ele amu, aa ag ele Kayaknu uɗat amu ɠagattag heppig.

⁴ Ag Pilipai daatteb amu, ag hanhan Naɗinu maɗoɗppan gamag ahak doyeg! Yo, da baula ag amelagppa attem, ag hanhan maɗoɗppan gamag ahak doyeg!

⁵ Naɗi uɗikkunu haen aakku malom daatte amunu, ag heppeg, danab oh ag ahilagnu, ag am oolag bodoette wagai ii mak danab daatteb doyatteg!

⁶ Ele amu, ag aɗi keeke laippunu dabmak qak aib doon daappig. Iitta! Ag keeke ohnu unuqittak digdigppa, “Ena heme,” anakppa ele, ag Kayak Nug ahilagnu aɗi aɗi hekkunu oolag daatte amu, ag oo hak amu Kayak amegppa aig!

⁷ Ag anam heppeg, maɗoɗ, Kayak Nug maɗoɗ amu ig megatte ele, maɗoɗ amu danab dilag doyak oh eɗadtte, maɗoɗ amuam ag Kristus Jesusnu daaegeg, ag oolag, dabmak ahilag ele atognoateb daaglah.

⁸ O lailad, da nai laa ele ag amelagppa attem. Ag kobol doyak diig genabibppanu bette, kobol anuqak, kobol tutukku, kobol oppiak ele, kobol neekkak enanag ele, kobol elelenab, kobol enanagnab, kobol binag ele amu, ag kobol amu oh aon dabmenana oinna, oolagppa meig!

⁹ Amu kobol oh da ag ippuanatti aoppig amu, kobol oh dahilppa ag anidna dooppig ele amu, ag hanhan heig! Ag anam heppeg amu Kayak, Nug am maɗoɗnu diig, Nug ag ele daaglag.

Pol keeke medappignu, “Ena heme,” aum

¹⁰ Gemu amu, ag dahilnu dabmak ahilag baula maɗedappig amunu, da Naɗinu maɗoɗppan gamag ahak okkai doottem. Amu genab haen gamagppa ag da ehaniɗkkulagnu dabmeppig, amge ag ib iitta.

¹¹ Da madittem imu amu, da keekenu tutu mein ii madittem. Iitta. Da am doyak inam aomi. Kobol iɗu iɗu dahilppa bette am keeke hamu, da ool keeke amu ohnu eleleib dootte.

¹² Da deɗ laala tutu mak daami, deɗ laala da keeke kuɗum ele daami; da amu oh doyen malami. Haen, da ee elelenab daattemppa, o iitta da enug iwewe daattemppa, o iitta da keeke kuɗum ele daattemppa, o iitta da keekenu tutu mak daattemppa amu, da haen amu oh eleleib dookkulnu ib antten malami.

¹³ Ib amuam Kristus Nug da ɠagattag meɗe, nuhig ɠagattagppa da keeke oh eleleib hekkulnu elele.

¹⁴ Amge ag da ou iun, dahil uug ag ele maoppig amu, amuam kobol ena.

¹⁵ Amu ag Pilipai danab ag imu dootteb; ag Nai Ena tatam dooppig, haen gamag amuppa amu, da uɗat amu ahilagppa, ⌊laa dilagppa ele⌋ hei ukke, da Makedonianu ahami amu, haen amuppa Kristen tamaniak attentai laa da ehaniɗa, keeke nob tuɗittak ele laa ii meɗom. Iitta. Ag Pilipai akka aakkuib ehaniɗppig.

¹⁶ Haen da Tesalonaika appa tutu mein daaiyi amu, ag da ehaniɗeg, haen aɗit batom.

¹⁷ Amu da keeke ahilagppanu aokkulnu ii attem. Iitta. Da ahilagppa kobol ena naɗi dayebeb, ag Kayak noobppa onig ena aoglagnu ool daatte.

¹⁸ Ag Epaproditus eppegppa keeke meeg dahilppa uɗiom amu, da awen, da keeke kuɗumnab, elelenab daattem. Keeke ag meɗappig ele, keeke amuam mana mettak muttuɗig ena ele ag Kayak medappig bia daatteb. Kayak Nug mana mettak anam awa amu, Nug oo enanag ele daatte.

¹⁹ Amu Kayak dahil, Nug ag keeke laa nuhig neekkakppa ag aoglagnunab daattenu tutu meppeg antta, Nug keeke ena ena oh Kristus Jesusnu uɗatppa nuhigppa daatte amu, Nug amuppa elelenab madakku.

²⁰ Kayak, ig Mamenig amu, binag amahlak oppiaawak ele nuhigppa hanhan alet ele dayaɗ! Genab.

Gamanattak nai

²¹ Da Kayaknu danab ah oppiaawak ele Kristus Jesusnu daatteb amu, da ag humadttem. Amu da lailad, da ele daattem imu, ag ele humadtteb.

²² Kayaknu danab ah oppiaawak ele oh ippanu, ag ag Pilipai daatteb ele humadtteb, amge Kristen danab ag Sisar laugppa uɗat hetteb ele, ag humattak amu hekkulagnunab hetteb.

²³ Naɗi Jesus Kristusnu ehanittak okkai hamu mettak ahilagppa dayaɗ!