Pilipai 1 - Nobonob Baibel

Pol nug Kayak amegppa, “Ena heme,” aum

¹ Da Pol, amu Timoti ele, i oh am Kristus Jesusnu maɗi nid, i uɗug imu Kayaknu danab ah oppiaawak ele oh Jesus Kristusnu daan Pilipai daatteb, amu ahilkad gumak ikki danab, amu ahilkad toliak danab oh ele, ahilagnu yaattep.

² Kayak ig Mamenig, amu ihinig Naɗi Jesus Kristus ele, ahilah ehanittak okkai hamu mettak, amu ahilah maɗoɗ ele ahilagppa hanhan daaglahnu oonih daatte.

³ Da hanhan ahilagnu dabmein, dahil Kayak amegppa, “Ena heme,” awe attem.

⁴ Da ag oh, ahilagnu unuqittette, da hanhan maɗoɗppan gamag ahak doyeye unuqidttem.

⁵ Aɗinu? Ag i ele oh Nai Enanu uɗat laippu digmakppanu heut, otala ukke, gemu ele ig iikku anam daattem amunu, unuqittak dahilppa da maɗoɗppan gamag ahak huan doyeye, da Kayak ag ehanadkkunu unuqittette,

⁶ da imu am genabib genab doottem. Kayak Nug ahilagppa uɗat enanag digmeum amu, Nug uɗat amu tuɗitta heeb ukkeb ukkeb, Kristus Jesusnu deɗppa gog tekku.

⁷ Amu haen laa da maniguittakppa dayeye, haen laa da dimittim dayeye, da danab laala Jesusnu nai tabappeg nekkunu hetteb amu, nuhig nai nemanu da wagai mein, da ele nuhig nai ɠagattag qedette, Jesusnu Nai Ena ele madittem, haen amu oh amu da ag ele, ig oh Kayaknu ehanittak okkai hamu megatte ele amu aomut amunu, da oolppa ahilagnu enanag doottem am kobol ena; kobol tutukku.

⁸ Kayak Nug Jesus Kristus ihinignu oo mauhak dootte, amubia da ahilagnu oo mauhak doye, da ag anadkkulnu ool okkai daatte amu, Nug dootte; Nug ab dooglagnu elele.

⁹ Amu da ahilag oo mauhak kobol am okkai meebeb, amu ahilag doyak, ahilag diignu doyak tutukku ele aa ele okkai mepeɗ daaglagnu Kayak unuqidttem.

¹⁰ Amunu diig am, ag amuppa geha kobol atten am enanagnab daatte epeɗidkkulagnu elele daaglag. Ag anam heppeg ukkeb ukkeb, Kristusnu deɗppa ag oppiak, Kayaknu neekkakppa danab oolagppa kaliak laa iitta ele daaglag.

¹¹ Oo mauhak kobol ahilag am okkai dayebeb, haen ag wan imuppa oitteb ele, genab tutukku hak kobolppan meu, Jesus Kristus he betteb ele amu, meu amu oh ahilagppa naɗi daaglag. Amuppa ag Kayak Nug binag amahlak oppiaawak ele okkai medappeg, Nug binag naɗi ele daakku.

Bau dayak enanu diig am Kristus

¹² O lailad, da ag imu tutukku dooglagnu ool daatte. Kobol da beɗulppa beum ele am Nai Ena ii tappe nette. Iitta. Amu he, Kristusnu nai naɗi mette.

¹³ Amunu daup oh, Sisarnu lag enanagnab gumatteb ele, amu danab laala oh ele, ag da Kristusnu dayeye, diig amunu da hippalak daattem amu, ag aakku dootteb.

¹⁴ Amu da lailad kuɗum, ag Naɗinu oolagppa genab dootteb ele, ag da hippalakppa daattemnu dabmeeg, ag oolag ɠagattag qette, ag oolagppa ɠagattag doon, baɗak iitta Kayak nai mehuqtteb.

¹⁵ Amu genab, laa ag Kayak ehaniɗe, da Kristusnu Nai Ena mehuqttem anidna, ag amelag qe oolag elele ii daye, ag onilag attan ta daakkunu, layag ele kekeɗ mettakppa ele ag Kristusnu nai mehuqtteb. Laa ag anam hetteb, amge laala ag dabmak ena ele nai mehuqtteb.

¹⁶ Danab dabmak ena ele amu, ag am da Nai Ena ɠagattag qedakkulnu ippa maniguittakppa daattem dootteb amunu, ag dahilnu oolag mauhe, ag nai mehuqtteb.

¹⁷ Amge laala, ag dabmak ahilag tutukku iitta, ag onilag naɗi daakkunu henana, ag Kristusnu nai mehuqnana, ag da hippalakppa daattemppanu uug laala ele heppeg bekkulagnu hetteb.

¹⁸ Amge amunu am nai iitta. Kobol ohppa, hambuppuak kobolppa, kobol genabppa ele, ag Kristusnu nai mehuqtteb amunu, da maɗoɗppan gamag ahak doottem. Yo, da geha maɗoɗppan gamag ahak eleib doyeye daakkul.

¹⁹ Aɗinu? Da doottem, ag Pilipai daatteb amu, unuqittak ahilkad, amu Jesus Kristus Ouɗi, nuhig ehanittak ele, keeke aɗit amu aa hepeɗ, da maniguittakppanu uhuqak aokkul.

²⁰ Amu da keeke laa hekkulnu dabmak aɗe daattem, am keeke amu ele da genab hekkulnu maittak aomi daattem amu, amuam da uɗat, Kayak da hekkulnu meɗom amu, da uɗat amu eleleib hein maloya, da uɗat heminu uɗa nak laa ii doopa. Yo, da geha iikkunab, am haen oh ele, da aɗi hekkul amu, da ii baɗeɗe heinne, da amuppa Kristus Nug binag okkai medakkulnu ool naɗi daatte. Da bau daakkulte, iitta da mauhkkulte, amuam keeke okkai iitta, amge da beɗulppa keeke oh bekku ele amu, da keeke amu ohppa Kristus binag okkai medakkulnu ool daatte.

²¹ Dabmak dahil amunu am inam. Da bau daakkul dayeb amu, da Kristus Nugib dim lamidkkulnu ool okkai daatte, o iitta da mauhkkul dayeb amu, geha da enanag, Kristus ele ouqeɗa daagnih.

²² Da bau daakkul dayeb amu, da geha danab kuɗumnab ehanadkkul, amge da mauhkkul dayeb amu, da Kristus ele, Nug daatteppa ouqeɗa daagnih amunu, da aɗi ib dim lamidkkulnu am ena amu, da ii doottem; ib aɗit oh am ena.

²³ Da keeke amunu ool aɗit ele daattem. Amu da goppi, Kristus ele daagnih, amuam keeke enanagnab, da amunu ool hette.

²⁴ Amge da wanppa dayeye, ag ehanadkkulnu am keeke okkainab.

²⁵ Da anam genab doottem amunu, da doottem, geha da daakkul. Da geha dayeye, ahilagppa uɗat hebippi, ag oolagppa genab ɠagattag doonna, ag ooppa genab doyak ahilagnu ele maɗoɗppan gamag ahak dooglag.

²⁶ Amunu diig am, ag Kristus Jesusnu daatteb, amu haen da eɗue ag gumatte wappi, ag Kayak Nug ehaniɗe, da ahilagppa eɗue gomi anidna, ag amunu maɗoɗppan gamag ahak okkai dooglag.

²⁷ Anam, amge aɗi kobol bekku amu, ahilagnu keeke anuqak daatte am, ag oiyak ahilagppa, ag Kristusnu Nai Ena ag amu attem oiglagnu ippunadtte amu, ag anam dim lamidnana tutukku eleleppa oiyeg! Ag anam heppeg amu, da ag anadkkulnu gokkultai, iitta da naippulagib dookkultai am keeke okkai iitta, amge da ag oolag laippu ele daanna, ag dabmak laippu tamanin, ag nug ehanidnana, Jesusnu ooppa genab doyak ahilag aɗan daatteb dookkul.

^28-29 Amu Kayak Nug ag Kristusnu oolagppa genab dooglagnu ehah mattom, amge Nug ag Kristusnu oolagppa genab dooglagnu ehah amu aakkuib ii mattom. Iitta. Ag Nug onignu uug maoglagnu ele ehah mattom amunu, kekeɗ ahilkad dilagnu aib baɗappig. Ag ii baɗaglag amu, amuppa kekeɗ ahilag ag geha padal mekkulagnu doonna, Kayak Nug nukka ag Pilipai daatteb, Nug geha ag eɗua diiadkku ele dooglag.

³⁰ Amu ag uug da haen matu matu maomi anidppig, gemu ele da uug amuib mawewe daaiyi, ag dootteb amunu, ag da ele layam ena daat, uug amuib maotu!