Pilemon 1 - Nobonob Baibel

Pilemon Naɗinu oo mauhom, amu ooppa genab ele doyom

¹ Da am Pol, da Kristus Jesusnu nai mehuqeqe, diig amunu da maniguittakppa daattem. Da ig lainig Timoti ele, i ad uɗug imu Pilemon, nahipnu yaattep. Na i lainih, i nahipnu oonih mauhtte, amu na ihinih uɗat laippu ele daattem.

² Aria, i Kristen tamaniak na lautppa qagmetteb, i appinanih Apia, amu Arkipus, nug i ele uɗat imuppa laippu hettem amu, i ahilag ohnu nai imu yaattep.

³ Ig Mamenig Kayak, amu ihinig Naɗi Jesus Kristus ele, ahilah ehanittak okkai hamu mettak, amu ahilah maɗoɗ ele ahilagppa daaglahnu oonih daatte.

⁴ ⌊O layal Pilemon,⌋ haen da unuqidttem amu, da haen oh nahipnu unuqittette, nahipnu ele Kayak amegppa, “Ena heme,” awe attem.

⁵ Aɗinu? Na Naɗi Jesusnu oot mauhe, nuhignu ootppa genab doon, na Kayaknu danab ah oppiaawak ele dilagnu oot mauhtte, da nai amu doyeye daattem.

⁶ Am da nahipnu unuqittette, da Kayak amegppa na ig ele oh, ig Jesusnu ooppa genab doyak dim lamidttem ele amu, ig itittak ena digdig oh, ig Kristusnu aottem amu, na amunu diig tutukku dookkutnu ele unuqidttem.

⁷ O layal, na Kayaknu danab ah oppiaawak ele dilagnu oot mauhe ehanadna, ɠagattag aqame amunu, da maɗoɗppan gamag ahak, okkai oo ɠagattag qak ele nahipnu doottem.

Pilemon nug Onesimus amag bia eɗua aokku

⁸ Amunu Onesimus imu, nug anukka nahip begbeg maɗi nid dayaya oolom amu, na nug oot mettan daakkutnu iikku unuqidttem. Da am Kristusnu maɗi nid amunu da, “Na anam hekkutnab!” akkulnu elele doottem,

⁹ amge da oo mauhak kobol dabmein, anam hekkulnu uumi. Da na nahip oo mettak kobol dabmenana, amu hekkutnu iikku unuqidttem. Yo, da Pol, da kaino mein oittem, da gemu Kristus Jesus onignu hippalak danab daattem amu da, “Na he!” akkulnu uuen, iikku amunu unuqidttem.

¹⁰ Da na Onesimus, nug Jesusnu ooppa genab doyakppa da bekkal daatte, amunu na nug dabmedakkutnu unuqidttem. Da maniguittakppa dayeye, nug Jesusnu ooppa genab dookkunu ib am da ippunitti, nug am dahil nid bia daatte.

¹¹ Anukka amu nug nahip uɗat pehetta elele ii heum, amge gemu nug na da ele oh ehanitkkunu elele.

¹² Gemu da nug, da nuhignu ool huana mauhtte amu, da nug mei, nug eɗua na gumitta gotte.

¹³ Da Jesusnu Nai Ena mehuqiqi, ag da hippaliɗppig daattem amunu, da maniguittakppa haen imuppa daabppi, Onesimus nug na out dayaya, nug da ehaniɗebeb daagnihnu ool dayom.

¹⁴ Amge na aɗi ehanittak hekkut amu, na oot niitte amu hekkut, na duttunak doon hekkutnu iitta, kobol anam daakkunu amu, da na keeke laanu, “Yo,” ii ame amu, da amu hekkulnu ool ii dayom.

¹⁵ Nug haen tutu na uuittom amunu, geha na nug eɗun aoppe, nug hanhan na ele daaglah, amunutai Kayak Nug matu nuhig oolaknu ib ii oo neum.

¹⁶ Nug tatam nahip begbeg maɗi nidib dayaya uɗat heum, amge gemu nug am nahip begbeg maɗi nid aakkuib ii daatte. Iitta. Gemu amu nug na ele, aa oh Jesusnu oolahppa genab doottep amunu, nug na amap ele daatte. Da nuhignu ool mauhtte, amge gemu na nuhignu oot huana mauhkku. Aɗinu? Nug gemu danab, amge danab hamu iitta, nug Kristen danab daatte amunu, nug nahip uɗat pehettak haaha, ooppa genab doyakppa nug am na amap ele daatte.

¹⁷ Amunu Kristusnu oo mauhakppa na dahilnu layam enanag dooiɗttem dayeb amu, aria na da ele laippu dayaknu ootppa eleleib dookkut bia, na Onesimus amubia na ele laippu dayaknu ootppa eleleib doye!

¹⁸ Nug nahip-ppa keeke eheɗ laa heum dayeb, o nug keeke nahip laa nob ii meum dayeb amu, na amunu nug onig oppin, da onil yaappe dayaɗ!

¹⁹ Da Pol, da dakka da eppelppa nai imu uɗug imuppa iikku yaattem. Nug nahip keeke awom dayeb amu, nob amu da geha na medakkul, amge diigppanab, na nob okkainab laa da meɗakkutnu daattenu ii apa.

²⁰ Ao layal, Naɗi onigppa na dahil dabmak dim lamidkkutnu oɗ medattem. I oh am Kristusnu daattep amunu, na kobol amuib heppe, da ool ena daakku.

²¹ Da imu am genab daatte doottem; na geha da nai yaami imu oh na hekkut amunu, da uɗugppa nai imu aakku yaami. Amge da doottem, na gemu kobol hekkutnu, da na amenppa attem ele imu amu, na amuib ii hemana. Iitta. Na amu eɗittak, enanagnab hekkut.

²² Keeke laippu laa ele. Geha ag Kayak unuqidppeg doya, Nug da awiɗa eɗua ag matteb, da goppi, na ele daagnihnu dabmettem amunu, na lag oo laa dahilnu bappaidkkutnu ele oɗ medattem.

Bagqak nai

²³ Epapras nug ele na humidtte. Da nug ele Kristus Jesusnu daaɗa, amu i oh maniguittakppa laippu daattep.

²⁴ Dahilad uɗat laippu Mak, Aristarkus, Demas amu Luk ele ag na humidtteb.

²⁵ Naɗi Jesus Kristusnu ehanittak okkai hamu mettak nahip-ppa dayaɗ!