Nehemaia 9 - Nobonob Baibel

Israel danab ah ag ahilag hipunin Kayak amegppa miagib madippig

¹ Aria, kalam ebqak eblaih aɗit ele, kalam amunu deɗ 24ppa Israel oh ag qagmeppig. Ag qagmena, ag ee ohnu kud mena daanna, ag lamen heɗiag ele takkan, ag gappud aon, ikkilkadppa meppig.

² Israel buɗub qagmeppig ele ag, ag wan laihnu danab dilagnu, ag akka ag awaidna daappig. Ag amu hena, ag qagmena, hippaidna daanna, hipunin ag heppig, ag mamelkad aɗi nau aɗi heppig, amu ele ag Kayak amegppa miagib madippig.

³ Ag qagmena, hippaidna daanna, tatam laa Yawenu ɗo nai bukppa yaak niitte ebqeeg doyegeg, haen aua ewam ukke, amu dimppa ag aua ewam laappa ag ahilag hipunin miagib mattina, Yawe amegppa anan, ag ele Yawe, ahilag Kayak, ag Nug noobppa dup nona binag meppig.

⁴ Lewi buɗubppan mana mettak danab iitta laa ag balal attan hippaidna daappig, amu ag onilag am Jesua, Bani, Katmiel, Sebania, Buni, Serebia, Bani, am Kenani. Ag aguppa daan, ag baalag okkaippa Yawe, ahilag Kayak, unuqidppig.

⁵ Ag anam heeg, Lewi buɗubppan mana mettak danab iitta, ag oolagppan laa onilag Jesua, Katmiel, Bani, Hasapnea, Serebia, Hodia, Sebania, Petahia ele, ag appig. “Ag oh ahan hippaidna daan, ag Yawe, ahilag Kayak, ag Nug binag meig! Nug hanhan daatte. Nug digmak iitta, batak ele iitta,” appig. Ag anam awona, ag tuɗidna, Yawe amegppa appig. “O Yawe, na binan amahlak oppiaawak ele, amu danab ag na onin dabmenan humappeg, attannab, itittak ena oh, binag mak oh eɗittak daakkunu oonig daatte,” aon appig.

⁶ Ag nai amu ana malaeg, ⌊Esra aha, inam Yawe unuqittom.⌋ “Na nakka am Yawe. Na hab, hab waappa, hab attan ukke ukke, adekku batatte ele, na amu oh hattame. Na habppan hoɗopai oh, wan, wanppa aɗi aɗi keeke daatte, yu, yuppan keeke oh ele hattame. Na keeke oh bau daatteb ele bau madattem. Hab aabppan daup, ag kuɗumnab ele, ag oh na noomppa dup nona binan metteb.

⁷ Na Yawe Kayak daattem; na Abram tituanna, Kaldia wanppan aab onig Ur, appanu na Abram aon uɗime. Na Abram onig baolin, Abraham ataɗme.

⁸ Abraham nug oo na metta, ii uua dim lamittette, na hee, na nug ele nug tituanya nai qagapiɗ. Na nai qakkak amuppa na Kanan danab, Hit danab, Amo danab, Peres danab, Jebus danab, Girgas danab ele dilag wan aon, Abraham buɗuppud madakkutnu ame. Keeke oh na hettem amu, na kobol genab tutukku dim lamidna hettem amunu, nai na qakkame ele amu, na hee meu oum.

⁹ Anukka ig mamenkad aɗi ag Isip wanppa daan, guittak okkai dooppig amu, na amu anidme. Ag gonana, Le Kokoɗ appa qagaiettak daan, ehanittak aoglagnu unuqidppig amu, na unuqittak amu doome.

¹⁰ Nahipnu dabmettaknu kobol danab haknu elele iitta, amu uɗat ɠagattagnab ele na hee, Paro, nuhikkud ehanittak anuqak danab, nuhikkud danab ah ele anattegeg, uug aqom. Isip danab ag beɗuppa tak danab dilag kobol henana, ag ig mamenkad aɗi eheɗ hattegeg anidme amunu, na anam aakku heme. Na kobol digdig amu hee, danab ah wan atu kuɗumnabnu doon, ag na onin okkai daatte aakku dooppig, gemu ele, ag dootteb.

¹¹ Na hee, yu obata, laih laih dayom amunu, ig mamenkad aɗi ag wan qaɗaiettakppa le amu mataɗna goppig, amge na hee, Isip dilag daup lamadppig ele ag waeg, yu eɗua abenppa ukka, tonatta auta autanab awom. Ag men yu unuqagnab notte bia nona, yu ooppa daappig.

¹² Amunppa na lombig teppu ele attan takppa daan, noolag aon gonana, tuqan na aab ewak okkai attan takppa daan, noolag aonna, amahlak mattan, atten atten oiglagnu daye ippunadnana, noolag aon gome.

¹³ Qauko Sinai appa amu, na hab attannu neme; na hab attan daan, ag amelagppa nai mattime. Appa na ɗo tutukku, elele elele ele mattame. Ao, na ɗo ena, haknunab anak ena ele mattame.

¹⁴ Na ig mamenkad aɗi ag nahip deɗ, nahipnu tituanak daatte, am Sabat, na ag nahip deɗ amu ippunatte doon, na nahip haknunab nai, ɗo iɗu iɗu ele, na nahip maɗi nid Moses amegppa ae, nug ag amelagppa a dooppig.

¹⁵ Haen ag enug aqom amu, na habppanu bret me ne lappig. Ag le baalag diie, na hee, le menppanu ne, ag aon lappig. Amu wan laa, na wan amu ag madakkutnu na eppen human, madakkutnu anana, nahip nai am ɠagattag qettan ame amu, na ag gona, wan amu aoglagnu amelagppa ame.

¹⁶ Na amu heme, amge ig mamenkad aɗi, ag beɗuppa tak danab kobol dim lamidna, ag na oɗen dim lamidmananu dabmak ahilag ɠagattag eppom. Ag nahip haknunab nai ii dim lamidppig.

¹⁷ Ag nahip nai dooglagnu uuppig. Ag hak kuɗum laa, danab hekkunu elele iitta, hak amu na ag noolagppa heme anidppig ele, ag hak amu daulag atiom. Ag na oɗen dim lamidmananu dabmak ahilag ɠagattag eppe henan, ag nahip nai tappaeg neene, ag danab laa nug ag noolag awa diieb, ag eɗun, Isip wanppa gona, eɗun ahilkad begbeg maɗi nid daaglagnu tituanppig. Ag amu oh heppig, amge na Kayak, ⌊na am kayak laa bia iitta. Iitta!⌋ Na danab hipunin hette ele, ⌊nug oo eɗueb,⌋ na hipunin amu uhuqna medattem. Na oo bodoette enanag maɗoɗ ele hak kobol dim lamidttem. Na danab ah dilagnu oot bodoetta, le mette. Na oot paha ii nauhtte. Nahip oo mauhaknab kobol am amba, leta nette. Na anam daattem amunu, na ig mamenkad aɗi amu, na ag ii uuadme.

¹⁸ Ig mamenkad aɗi ag heeg, Aron nug makau gaiɗ dottog ha, ag amelagppa, ‘Imuam ahilag kayak, nug ag ehanatte, ag Isip uun uɗippig,’ a, ag oh anam dabmeppig, amge haen amuppa ele na ag ii uuadme. O ag dabittak nai nau laala ele madippig haenppa amu, na haen amuppa ele ii uuadme.

¹⁹ Kayak, na nahipad danab ah dilagnu oo bodoetta le mak kobol dim lamidna, atu taɗakppa danab ah amu uuatte, hamu ii oippig. Amunppa na hee, lombig teppu ele attan takppa ag ib ippuanattette, tuqan aab ewak okkai attan tak ib atten aon gokkulagnu ippuanattom.

²⁰ Na nahip Ouɗi, Nug Ouɗi enaib, Nug ag ulum madakkunu ag mattame. Ag ee lakkulagnu amu, na maana mattana, ag le baalag diieye, na le ele mattame.

²¹ Ag atu taɗakppa maɗ 40 oiyegeg, na atognoadna autna aome amunu, ag keeke laanu tutu ii meppig. Lamen ahilag alag ii me, ag baelkad ele ii titiɗadppig.

²² Na ehanatte, ag wan laala king gumappig, amu ɗo maɗoɗ laala ele eɗadna aoppig. Ag wan amu ohnab, tom umanab ukkak oh aoppig. Ag King Sihonnu wan, King Ognu wan ele anam aoppig. Sihon nug Hesbon appa king dayeye, Og nug Basan dilag king dayom.

²³ Ge, na hee, ig mamenkad aɗi ag huana appategeg, ag bekkalkad am huanak, hoɗoppai dilag ebqak bia daaeg, wan laa, na wan amu ag mamelkad aɗi mattan, ag gona aon daaglagnu ame amu, na diie, wan amuppa goppig.

²⁴ Ag bekkalkad amu, ag wan amuppa wana, appan danab eɗadna, wan amu aoppig. Na ehanatte, ag Kanan danab wan amuppa daappig eɗatteg, danab amu ag, ag eppelagppa daappig. Na ehanatte, Kanan danab ah amu, ahilkad king ele ag Israel, ag ahilagnu attem hekkulagnu dabmeppig ele, ag ag eppelagppa aakku daappig.

²⁵ Ig mamenkad aɗi bekkalkad ag aab okkai ɠagattag aɗ ele eɗadna aona, ag wan ittag ele aoppig. Ag lag kuɗumnab, wan amuppa daappig, appa keeke ena ena ele ambak dayom amu, ag amu aoppig. Le moɗ laa buuppig, grep dad, olip dad, ad meu otteb digdig huanak ele aoppig. Ag keeke amu oh aona, ag ee laeg, oolag aɗom. Ag ee elelenab amunu, ag enaib daappig. ⌊O Kayak,⌋ ag keeke ena ena na ag mattamenu ag gamag ahak eheɗ nau aoppig.

²⁶ Na ahilagnu enanag anam heme, amge ag na oɗen ii dim lamidna, nahip nai tappaeg ne, ag nahip ɗo ag dimulagppa meppig. Ag nahipad propet danab, danab amu ag ag eɗun, na waatppa daaglagnu ag amelagppa madippig amu, ag ag aqaeg mauhppig. Ag dabittak nai nau ele madippig.

²⁷ Ag nau amu oh heppig amunu, na uuatte, ahilkad kekeɗ ag eɗatteg, ag kekeɗ eppelagppa daappig. Daaegeg, kekeɗ ag eheɗ hadappig. Kekeɗ ag anam eheɗ hadappig, amge haen amuppa ag nahipnu gaaeg, hab attan, na appa daattem amu, appa na ahilag gayak doon, na ahilagnu oot bodoetta auta autanab awa, le me, na hee, ehanittak danab ahan heeg, ag ahilkad kekeɗ eppelagppa ii daappig.

²⁸ Na ag ehanatte, ag ahilkad kekeɗ eppelagppa ii daan, ag eɗun, kobol laala, kobol amuam nahip neekkakppa kobol eheɗ daatteb ele amu, ag kobol amu heppig. Ag anam heeg, na baula uuatte, ahilag kekeɗ ag eɗatteg, ag kekeɗ eppelagppa eɗun daaeg, kekeɗ ag ahilkad okkai daan, aɗi haknu appig ag aakku heppig. Ag anam daaeg ukke, nahipnu baula gaaeg, na hab attan daanna doon, ahilagnu oot bodoetta, le me, na hee, ag ahilkad kekeɗ eppelagppa ii daappig. Haen kuɗum ag anam anamib heppig

²⁹ Na ag nau aomnanu dabmettak nai mattana, ag eɗun nahip ɗo waappa daaglagnu ag amelagppa ame, amge ag beɗuppa tak danab dilag kobol dim lamidna, ag nahip haknunab nai ii dim lamidppig. Ɗo nahip, danab nug dim lamidtte ele nug bau daakku amu, ag ɗo amu tippaladna, ii dim lamidna, hipunin heppig. Ag na oɗen dim lamidmananu dabmak ahilag ɠagattag eppe, ag na dimettana, ag dabmak eɗukkunu uun autna aona, ag nahip nai dooglagnu uun, ii dooppig.

³⁰ Ig mamenkad aɗi ag anam heegeg, maɗ kuɗum na oot bodoette, bu ii mattame. Ag oolag eɗueb, na dim lamidkkulagnu haen mattame. Nahip Ouɗi Nug propet danab ehanatte, na propet danab amu oɗelagppa danab amu daulag batame. Na anam heme, amge ag dab-ii-medappig amunu, na hee, ag kekeɗ ag taliliadna daappig ele eppelagppa daappig.

³¹ Amge O Kayak, na oo bodoette enanag maɗoɗ ele hak kobol dim lamidna, na danab ah dilagnu oo gai-iitta doya oo matta ehanittak kobol ele dim lamidttem amunu, na ig mamenkad aɗi dilagnu oot gai-iitta doon oot mattan ehanadna, na hee, ag ii padal meppig; na ag ii uuatte hamu daappig.

³² O Kayak, na ihinig Kayak, na ɠagattag okkai ele, danab na anitta, nug ebehi oh bodoetta le mette elenu Kayak, na danab ah aun aɗi ele, na hee, na danab ah amu ele ag nug oo mauhaknab doyaknu nug tituana nai qakkak hetteb amu, na nug tituana nai qakkak amu ii okkulttem. Na anam henan daattem amunu, O Kayak, uug digdig ig gemu daattem, ihinigppa beppig amu, ig na uug amunu, ‘Am keeke hamu, keeke okkai iitta,’ ii doomnanu oɗ medattem. Uug amuam, ig, ihinkad king, ihinkad ikki danab, ihinkad mana mettak danab, ihinkad propet danab, ig mamenkad aɗi, ig laa oh ele, ig oh ihinigppa beppig. Asiria dilag king ag digmena, uug amu ig mekkaeg uɗie uɗie, gemu ele ig uug amu anidttem.

³³ Na ihinigppa aɗi aɗi heme amu, na oo metta ii uuak kobol aakkuib dim lamidna heme. Ig, ig nau hemut amunu, uug oh ihinigppa beppig amu, amuppa na nai doya mala hettoɗia epeɗia elele mettak kobol dim lamidme.

³⁴ Ihinkad king, ihinkad ikki danab, ihinkad mana mettak danab, ig mamenkad aɗi ele, ag oh ag nahip ɗo ii dim lamidppig. Ag nahip haknunab nai ii dabmeppig. Nau aomnanu nai na ag mattame ele amu, ag ii dabmeppig.

³⁵ Ig mamenkad aɗi ag ahilag wan, am ahilag ɗo maɗoɗ am, ag appa daanna, keeke ena ena na eppenppanu aon daanna, ag wan naɗi, ittag okkainab ele na ag mattameppa daanna, haen amuppanab ag keeke ena ena amu oh aɗan, gamag ahak dooppig, amge ag na noomppa dup nona binan ii meppig. Ag hipunin hak ahilag ii dimedappig.

³⁶ Ag amu heppig amunu, gemu ig ihinig wanppa daattem, amge ig wan imuppa laa dilag begbeg maɗi nid daattem. Na ig mamenkad aɗi ag ad meu, ee laa ele wan imuppa betteb lakkulagnu mattame, amge gadon, gemu ig iguppa laa dilag begbeg maɗi nid daattem.

³⁷ Ig hipunin hemut amunu, king laa ig gumigkkulagnu na maadme amu, ag wan imuppan ee wak okkai, ag aotteb. Ag ig gumignana, ihinigppa, ihinkad doɗ manan ele amu, ag aɗi aɗi hekkulagnu oo hak ahilag dim lamidna hetteb. Uug okkainab tonikke, ig nauhmut daattem.” ⌊Esra⌋ anam unuqittom.

Juda danab ah ag nai qagappignu nai

³⁸ Anam amunu ig Israel danab ah, ig ⌊na Kayak, ig na dim lamidkkunignu⌋ nai qagattem amu, ig nai qakkak amu pepappa yaat, ihinkad ikki danab, ihinkad mana mettak danab, ihinkad Lewi buɗubppan mana mettak danab iitta ele amu, ag ig genab nai amu dim lamidkkunignu ahilkad at stemp-ppa daatteb pepa amuppa yaatteb.