Nehemaia 8 - Nobonob Baibel

¹ ag ahan Jerusalem uɗin, ag aɗnu od onig Lenu Od, ag haɗap laa amu guguittak dayomppa qagmena daappig. Ag qagmen daanna, ag yaak danab Esra, nug Ɗo Nai Buk, Yawe Nug nai amu Israel danab ah dim lamidkkulagnunab Moses amegppa a, Moses nug bukppa yom amu, ag Esra nug Mosesnu buk amu awa uɗia, ebqeeb dooglagnu appig.

² Ag anam appig amunu, kalam ebqak eblaih aɗit ele, kalam amunu deɗ digmakppa amu, mana mettak danab Esra nug ɗonu buk amu awa uɗia, danab, ah, nid ag nakok okkai mak, nai doon diig dooglagnu elele daappig, ag ele oh noolagppa hibaitta dayom.

³ Nug ag noolagppa hibaitta daya, nug buttuanab digma, ɗo nai buk amu ebqe ukke ukke, aam ameg tutukku dayom. Nug haɗap Lenu Od guguittak daatte, nug haɗap amu neekkakka, danab, ah, nid ag nakok okkai mak, nai doon diig dooglagnu elele daappig, ag ele daaegeg ebqeum. Nug ebqeeqe, amu oh ag daulag human, Ɗo Nai Buk amunu nai dooppig.

⁴ Yaak danab Esra nug aguppa dayaya, nai amu ebqekkunu, ag balal laa attan tak adppa heppig. Ag amu heeg, nug aguppa buk amu ebqekkunu dayeye, nug eppeg naɗiap-ppa Matitia, Sema, Anaia, Uraia, Hilkaia, Masea ele hippaidna daappig. Nug eppeg nanehppa am, Pedaia, Misael, Malkiya, Hasum, Hasbadana, Sekaraia, Mesulam ele hippaidna daappig.

⁵ Amu Esra nug buk amu ebqekkunu dayaya, nug balal attan amuppa dayom amunu, danab ah oh ag nug anidkkulagnu elele daappig. Ag nug anidkkulagnu elele anam daappig amunu, Esra nug buk kole anidna, ag oh hippaidna daappig.

⁶ Esra nug buk kole, danab ah ahaeg, Esra nug Yawe, Nug Kayak onig, ɠagattag ele, Esra Nug binag me, danab ah oh ag eppelag human appig. “Genab, anam dayaɗ! Genab, anam dayaɗ!” appig. Ag anam awona, ag Yawe noobppa gatelag qaun ona gomelna iɗulag wanppa mena, dup noa binag mak heppig.

⁷ Ag amu hewona, ag eɗun hippaidna daaegeg, Esra ɗo nai maha maha ebqa male, Lewi buɗubppan mana mettak danab iitta, Jesua, Bani, Serebia, Jamin, Akup, Sabetai, Hodia, Masea, Kelita, Asaria, Josabat, Hanan, Pelaia ele, ag nai amunu meu mehuqppig.

⁸ Esra Nug Kayaknu Ɗo Nai Buk ebqeeqe, Lewi buɗub laa amu ag danab ah daappig ele ag tutukku dooglagnu, ag nai amu aon, eɗunna, ag nai amunu meu keeke, pehettaknab laa oh ippunadppig.

⁹ Esra nug nai amu ebqeeqe, danab, ah, nid daappig ele amu, ⌊ag ɗo nai doon, elele ii heppig anidna,⌋ ag oh gaappig. Ag gaappig amunu, Juda dilag gawana Nehemaia, mana mettak danab Esra, nug ele yaak danab amu, aria Lewi buɗubppan mana mettak danab iitta, ag danab ah nai amunu meu tutukku ippunadppig, ag ele, ag oh appig. “Imuam deɗ Yawe, ahilag Kayak, Nug amunu, nuhignu tituanak daatte anidtte. Ag aib mahippig, aib gaappig,” aon appig.

¹⁰ Amu Nehemaia nug aum. “Gemu deɗ imunu amu, ihinig Naɗi Nug amunu, dahilnu tituanak daatte anidtte amunu, ag ahan gona, ag ee ena, le ubuhi ele lanana, ag laa keeke anam iitta ele madappeg, ag ele laig! Ag aib gaappig. Aɗinu? Yawenu gamag ahak doyak am aab aɗ ɠagattagnab ele ahilag bia daatte,” awa aum.

¹¹ Lewi buɗubppan mana mettak danab iitta, ag danab ah ⌊ag ɗo nai doon, elele ii heppig anidna gaappig ele⌋ ehanadppeg, oolagppa maɗoɗ dooglagnu inam amelagppa appig. “Deɗ imuam Yawenu tituanak daatte! Ag aib gaappig. Ag aib mahippig,” aon appig.

¹² Lewi buɗub amu ag anam appig amunu, danab ah ag ee, le ele lakkulagnu, ag laa ee, le iitta ele ag ee, le ele mattaglagnu, ag hobul, gamag ahak okkai ele doon hekkulagnu ahan goppig. Aɗinu? Ag gemu Kayaknu ɗo laa ebqe doon, diig dooglagnu elele daan dooppig.

Juda danab ah ag Peh Dayaknu hobulppa daappig

¹³ Juda aɗi ag kalam ebqak eblaih aɗit ele, kalam amunu deɗ digmakppa anam hena, deɗ ebqak aɗitppa amu, Israelnu baekkudppan ikki danab, Lewi buɗubppan mana mettak danab, Lewi buɗubppan mana mettak danab iitta ele ag oh gona, yaak danab Esra gumidna ukkaeg, nug Kayaknu ɗo nai mehuqebeb dooglagnu daappig.

¹⁴ Ag anam uɗin daaegeg, Esra ɗo nai amu mehuqeqe, ag Yawe Nug Moses oɗeppa Israel danab ah ag kalam eblaih aɗitppa hobul laa henana, ag peh lagppa daaglagnunab ippuanattom anidppig.

¹⁵ Ag amu anidna, Yawe Nug ag nai laa imu Israel danab ah dilag aab ohppa, Jerusalem appa ele inam meppeg gokkunu aum ele anidppig. Nai am inam. “Ag Israel danab ah oh, Pehppa Dayaknu Hobulppa daaglagnu haenppa ag ahan, aab dimittim qauko qaukoppa gona, appa ag olip ad ebekkud, olip dakkuɗ ebekkud, ad mirtel ebekkud, ad pam ebekkud, amu ad laala lokko ena ele eppelkad okkuladna, peh hekkulagnu aon uɗieg!” Kayak nai amu Moses bukppa yom amu, ag eɗun anidppig.

¹⁶ Yawe anukka Moses anam ippunitte ye anidppig amunu, ag qagmeppig ele, ag danab ah oh amelagppa aeg doon, ag gona, ad eppelkad amubia aon uɗin, ahilkad lag koɗokko uɗem mettakppa, o lag od haɗap-ppa, o Kayak laugnu haɗap-ppa, o Lenu Od guguittak, haɗap daatteppa, o aɗnu od laa onig Epraimnu Od, od amu guguittak, haɗap daatteppa peh hadappig.

¹⁷ Laa ohnab ag Babilonnu eɗun uɗippig ele amu, ag peh hena, aguppa daappig. Nan bekka Josua daye, Israel danab ah ag peh hena daappig, amu dimppa Israel danab ah ag baula gamag ahak ele anamnab ii heppig. Iitta. Gemuib ag Josua aɗi heppig bia aakku heppig. Ag anam hena, amu ag gamag ahak naɗinab dooppig.

¹⁸ Ag Pehppa Dayaknu Hobul gamag ahak ele deɗ eblaih aɗit ele daappig, amu deɗ deɗppa Esra nug Kayaknu ɗo nai bukppa yaak niitte amu, nug buk amuppa ebqe dooppig. Ag deɗ eblaih aɗit anam hobul hewona, deɗ eblaih ewamppa, Kayak ɗo mattom bia, ag oh qagmeppig.