Nehemaia 6 - Nobonob Baibel

Danab laala ag Nehemaia qeppeg mauhkkunu maidppig

¹ Aria, ig aɗ eɗut babaittutut, Sanbalat, Tobia, Arebia ted Gesem, ihinkad kekeɗ laa oh ele ag da, dahilad ele ig aɗ eɗut heta malaut, giɗo laa ii daye dooppig. Ig uɗat amu oh heut, gogppa teum; uɗat laippuib ig ii heta malamut. Amuam ig od naunau, od okkaippa aihak daaglagnu ii aihadmut.

² Anam daye, Sanbalat, Gesem ele aa dahilnu nai meeh uɗie doomi. Nai amuam inam. “Na uɗippe, uɗem naɗi onig Ono, appa aab laappa qagmeta, nai mattignig.” Aa nai amu meeh uɗiom. Aa nai amu meeh uɗiom, amge aa eheɗ heiɗpeɗ, guittak aokkulnu dabmepiɗ.

³ Aa anam dabmepiɗ amunu, da danab laala ag dahil nai nob aon gona, mataglagnu maatti goppig. Dahil nai aon goppig am inam. “Da imuppa uɗat naɗi hein daattem; da aa madipiɗppa nokkulnu elele iitta. Diig aɗinu da uɗat imu uuppi, hamu dayebeb, aa anatkkulnu gokkul? Am elele iitta.” Da nai amu appeg dooglahnu maatti goppig.

⁴ Amu Sanbalat, Tobia ele aa anam heeh, da nob anam matami, aa haen waɗele aa nai laippu anamib meeh uɗie, da ele haen waɗele nob anamib matami.

⁵ Anam heut ukke, amu dimppa Sanbalat nug nuhig maɗi nid nug baula nai amu awa, da gumiɗa dokkunu me uɗiom. Amuam nai amu me uɗiak tanig ele aakku. Nug nai amu awa uɗia, nug ele eppegppa pas laa ele Sanbalatnu awa uɗiom. Pas amuam qataqak iitta. Matulakib dayom.

⁶ Pas amuppa nai inam dayom. “Wanppan wan laalappan danab ag akka akka, ag Juda, ag hettebnu nai mattinna laala dootteb. Ag maditteb amu, Gesem nug nai amunu, ‘Am nai genab,’ awa atte. Ag maditteb am inam. ‘Nehemaia nug Juda laa ele ag Persia dilag king tappeb neeb, nug waappa ii daamnanu wagai mekkulagnu dabmetteb amunu, ag Jerusalemnu aɗ eɗun hetteb,’ atteb. Amu aakkuib ii maditteb. Iitta! Ag, ‘Nehemaia nug Juda dilag king daakkunu dabmaama,

⁷ nug propet laala ag Jerusalem appa nuhignu, “Juda dilag king nug daatte,” akkulagnu tituanattom,’ atteb. Ag anam atteb amunu, ag nai amu madippeg ukkeb ukkeb, Persia dilag king, nug ig oh gumigtte amu, nug dookku. Nug dookku amunu, na uɗippe, ig oh daat, amunu nai mattignig.” Nai amuam pas laa Sanbalat nug nuhig maɗi nid eppegppa meum amu, amuppa dayom.

⁸ Sanbalat nug pas amu me uɗie, da ebqein malen, da nai imu nug dookkunu mei ukkom. “Na attem am hambuppuak. Aɗinu? Na nakka na nai amu pas amuppa hamu yaame. Danab laa ag dabmak amu aon ii maditteb.” Da nob amu nug mettami.

⁹ Ihinkad kekeɗ ag anam heppignu diig am ag, “Ig hepput, Juda ag baɗan, uɗat ag hetteb amu ag uun, ii hena malamna,” anana, ag anam heppig. Ag amu heppig doomi, amunu da Kayak unuqidmi. “O Kayak, na da ɠagattag meɗakkutnu oɗ medattem,” awe unuqidmi.

¹⁰ Amu deɗ laa da Delaia bekka Semaia laugppa gomi. Semaia alag am Mehetabel. Semaia nug nug laugppanu aha, laih gokkunu elele iitta dayeye, da gomi. Da ukken, nug anitti, nug da amelppa aum. “Danab ag na nittaglagnu dabmena uɗitteb. Ag tuqan uɗin, nidappeg mauhkkut amunu, da na ele i oh, i iya iya i goɗa, Kayak laug, am Kayaknu mettid lag amu, i lag amuppa goɗa, ooppa nug uɗa tewoɗa, od manoɗa daagnih,” awa aum.

¹¹ Semaia nug anam aum, amge da nug amegppa ami. “Danab da bia nug aha oolkku am enate? O laa nug da bia amu, nug laa ii qemanu, nug bau daakkunu nug oola, Kayaknu mettid lag, amuppa gokku am enate? Da appa ii gopa!” awe ami.

¹² Amu da dabmei ukke, da aakku doomi, Kayak Nug nai amu Semaia ii mettom. Iitta. Tobia, Sanbalat ele aa heyaya, men doɗo medapiɗ amunu, nug nai amu mattiom doomi.

¹³ Tobia, Sanbalat ele aa Semaia heeb, da baɗen, nuhig nai dim lamitten, oole lokkumak dayeye, aakku hipunin anam heppilob, Sanbalat, Tobia ele aa dahilnu laa amelagppa nai nau apeɗ, laa ag dahilnu eheɗ dooglagnu, aa men doɗo medapiɗ.

¹⁴ Da anam doomi amunu, da Kayak inam unuqidmi. “O Kayak dahil, Tobia, Sanbalat ele dilah eheɗ hak, amu propet ah Noadiah, propet laala ele ag heppeg, da baɗak dookkulnu henan daappig amu, da na ahilag hak nau amu ele dabmenana, nob madakkutnu unuqidttem,” unuqidmi.

Danab ag Jerusalemnu aɗ eɗun hena malappig

¹⁵ Kekeɗ ag anam heppig, amge ig aɗnu uɗat heut ukke ukke, kalam onig Elul, kalam amunu deɗ 25ppa ig malamut. Ig deɗ 52 uɗat amu hetata, aakku gogppa temut.

¹⁶ Ihinig Kayak ehanikke, ig aɗnu uɗat heut, gogppa teum. Kayak he, gogppa teum amunu, ihinkad kekeɗ, ag wanppan wan laala Juda wan talilidna daatteb, appan danab ah amu, ag amu doon, ag baɗan, akka ahilagnu elele iitta dooppig.

¹⁷ Keeke laa amu, haen amuppa Juda dilag anuqak danab laala ag pas kuɗum Tobianu maatteg ukkaeg, Tobia nug ele hanhan pas amunu nob maatte uɗippig.

¹⁸ Ag amu heppignu diig am, Juda aɗi laala ag Tobia ehanidkkulagnu nai mattin, ahilag nai ɠagattag qettan, anam hekkulagnu appig. Ag amu heppignu diig am, Juda ted Ara bekka Sekania aɗeg am Tobia wau. Laa amu, Tobia bekka Jehohanan wau am Juda ted Berekia bekka Mesulam aɗeg.

¹⁹ Juda dilag anuqak danab ag Tobia ele anam heegeg ukke, Juda danab amu ag hanhan, “Tobia nug ena inam heum,” o “Nug ena anam heum,” aegeg doomi. Ag da amelppa anam aegeg dooiyi, ag eɗun, da aɗi aɗi ami amu, ag nai amu doon, eɗun, Tobia amegppa aeg doyom. Ag anam heegeg, Tobia nug heeb baɗakkulnu pas maatte, dahilppa uɗippig.