Nehemaia 5 - Nobonob Baibel

Nehemaia nug daɗek danab dilag dabmeum

¹ Amu ⌊ig uɗat amu heutut,⌋ uug laa ele beum. Am inam. Juda huu laa ag ahan, Juda huu laa dilag nai hena, naippa yaaladppig.

² Huu ag lailkad naippa yaaladppig ele, ag oolagppanu laa ag appig. “Ig, ig bekkankad, aɗenkad ele, ig ebqak kuɗum. Ig ee latata, bau daagnignu ig ee aeg aognigoitte,” aon appig.

³ Laa amu ag anam aegeg, laa ag appig. “Gemu am ee kuɗum iitta amunu, ig lon aot, ee daden mekkunignu, ig ihinkad wan, ihinkad lag, ihinkad grep dad ele keeke lonnu onig awak daaglagnu mettem,” aon appig.

⁴ Laa amu ag anam appig, amge laa ag inam appig. “King nug wan ihinkadnu takis mekkunignu, nug ihinkad grep dadnu ele takis mekkunignu aum amunu, ig men doɗo amu aot mettagnignu, ig Juda dilag okkainu lon aot medattem,” aon appig.

⁵ Ag anam anam anana, ag tuɗidna appig. “Juda dilag okkai, ig ele oh am tiinig laippu. Ig oh Juda. Ig bekkankad am Juda buɗub, ahilkad bia, amge Juda okkai ag eheɗ heegeg, ig Juda, amge daɗek bia daattem, ig ihinkad nid danab, ihinkad nid ahin hepput, begbeg maɗi nid daaglagnu daattem. Ig oonigppan laala ag aɗelkad aakku meeg, laa daden meeg, ahilkad begbeg maɗi nid aakku daatteb. Anam, amge am ig keeke laa haknu ib iitta. Ig am ɠagattag iitta. Aɗinu? Laa ag ihinkad wan aon, ihinkad grep dad ele aon malappig,” aon appig.

⁶ Juda dilag daɗek bia daappig ag anam aeg doye, da ool huana nauhom.

⁷ Da ool huana nauhe, da dabmei ukke, da anuqak danab, Juda dilag ehanittak anuqak danab ele amelagppa naippa yaalatten, da ami. “Ag eheɗ hetteb. Ag laa imu, ag oh tiilag laippu, amu ag lon mattanna, ag eɗun men doɗo amuib mattaglagnu ii atteb. Iitta! Ag lon gane madappig amu, ag amu eɗun mattanna, lonnu intres, ag amu ele mattaglagnu atteb.” Da anam ag amelagppa ami. Da anam awoya, da uug amu ib atten anidta bappaidkkunignu danab kuɗum onilagppa ei uɗieg,

⁸ da anuqak danab, Juda dilag ehanittak anuqak danab ele amelagppa ami. “Ig lainkad laa, ag am Juda danab ah, ag daɗeknab daaeg, laa heeg, iitta aɗi laa ag ahilkad maɗi nid daaglagnu daden maadppig amu, ig ahilagppan eɗut diignignu ahilkad okkai men doɗo mattaut heeg, ig maɗi nid maɗi ah ele amu ag aɗualadppig ele laala aakku eɗut diimut. Ig men doɗo amu haknu elele aɗat anidmut amu, ig anam hemut. Amge ag anuqak danab, ag Juda dilag ehanittak anuqak danab okkai ele, ag eheɗ henana, ag ig uɗat okkai amu eɗuta hekkunignu hetteb. Ag heeg, maɗi nid daaglagnu gotteb, ig laa men doɗo epput, ag eɗun uɗiglagnu daatte,” awe ami. Da nai amuppa yaalatti, ag oɗelag qamutna daappig. Ag nai laa iitta.

⁹ Ag anam oɗelag qamutna, nai iitta daaegeg, da tuɗitten ami. “Ag hetteb ele amu, ag amuppa kobol genab tutukku ii hetteb. Ag ihinig kekeɗ, ag am iitta aɗi amu, ag anigna, aon aon iqaglagnu ib laa ii anidmananu, ag Kayaknu ebehilag oh bodoetta le meeb, oɗe dim lamidlob am ena.

¹⁰ Da, da awalad amalad ele, danab da ehaniɗtteb ele amu, ig oh ele daɗek amu ehanadtata, men doɗo, ee aeg ele lon madattem. Amge aun nug daɗek ag eɗun lonnu keeke mettaglagnu elele iitta daatteb haenppa, nug ahilkad keeke lonnu onig awak daatte, nug keeke amu baula aib awom!

¹¹ Amge anamib iitta. Ag laa ag amu heppig ele amu, ag paha eɗun, ahilkad wan, ahilkad grep dad, ahilkad olip dad, ag laulkad ele, ag amu dilag keeke amu lonnu onig awak daye aoppig ele amu, ag eɗun paha matteg! Ag amu mattanna, ag aɗi lon mattan, dimppa eɗun, lonnu intres, ag amu ele aoppig, ag tuɗittak amu ele eɗun matteg! Ag tuɗittak amu men doɗoppanu aoppigtai, o ee aegppanu aoppigtai, o wain bauppanu aoppigtai, o goɗenppanu aoppigte amu, ag men doɗo, o ee aeg, o wain bau, o goɗen amu oh, ag amu eɗun, daɗek matteg!” awe ami.

¹² Da anam ai, ag appig. “Ig keeke amu oh eɗut mattagnig. Ig mattota, ig aɗi keeke laa ag eppelagppa aognignu ii hemata. Na ame amu, ig anamib hekkunig,” aon appig. Ag anam aeg doyen, da mana mettak danab onilagppa ei doeg, da hei, anuqak danab, Juda dilag ehanittak anuqak danab ele, ag mana mettak danab amelagppa aɗi keeke hekkulagnu nai anan qagappig, ag nai amu dim lamidkkulagnu Kayak onigppa ahilag nai ɠagattag qettan appig.

¹³ Ag amu hena malaeg, da lamen elab dahil aɗe uɗale, da ami. “Da lamen aɗe uɗali, aɗi keeke lamenppa daatte gotte, amubia ag anuqak danab oh, ag nai Kayak onigppa ɠagattag qedappig, ag amu ii dim lamidkkulag dayeb, Kayak Nug ahilagppa da hettem bia ahilagppa heeb, ag keeke iitta ele daaglagnu ool daatte. Ge, danab aun nug nuhig nai amu ii dim lamidkku amu, nuhigppa anam baɗ!” awe ami. Da anam ai, danab oh daappig ele, amu oh ag, “Genab, anam dayaɗ!” anana, ag Yawe binag meppig. Anam amunu, anuqak danab, Juda dilag ehanittak anuqak danab ele, ag appig bia heppig.

Nehemaia nug Juda dilagppanu keeke ii awom

¹⁴ Amu King Artekserksis nug Persia dilag king dayaya, nuhig king dayaknu maɗ 20ppa nug da Juda dilag gawana daakkulnu otiɗom. Nug maɗ amuppa otiɗe daaiyi ukke ukke, nuhig king dayaknu maɗ 32ppa da uɗat amu batami. Da maɗ 12 Juda dilag gawana aakku daami. Amu kingnu ɗo daatte bia, haen amuppa, da deɗ anen anen aɗi ee meɗaglagnu ɗo atte bia aokkulnu elele daami, amge da maɗ 12 amu ohppa da, da awalad amalad ele, ig oh ahilagppanu keeke nakok laa anam ii aomut. Iitta.

¹⁵ Juda dilag gawana tatam daappig, da ahilag okkai ii bemi haenppa amu, okkai amu ag Juda danab ah uug okkai madappig. Ag deɗ anen anen 500 gram silwa, ee digdig, wain ele mattaglagnu aeg madappig. Okkai amu dilag ehanittak anuqak ele ag eheɗ heegeg, Juda danab ah ag ahilkad maɗi nid bia daappig. Laa da okkai ii daami haenppa okkai daappig amu, ag anam heppig, amge da Kayaknu ebehil oh bodoetta le meum amunu, da anam ii hemi.

¹⁶ Da kobol nau amu ii hemi. Iitta. Da aɗ eɗue bappaidkkulnu anuqak doyen hein, da wan ahilag laa daden mekkulnu ii hemi. Laa da ele uɗat hemut ele, ag ele anamib heppig.

¹⁷ Da anam hemi, amge amuib iitta, Juda danab okkai, Juda dilag ehanittak anuqak danab ele, ahilag ebqak am 150, ag deɗ ohppa dahil balalppa ee lappig. Ag anam laegeg, danab wan atu Juda wan talilidna daattebppanu amu, ag ele deɗ laala uɗin, ag dahil balalppa ee lappig.

¹⁸ Ag anam uɗin, dahil balalppa ee lappig amunu, deɗ anen anen ohppa da hei, ee babaittak danab ag uɗatnu makau okkai ebehi ele laippu, sipsip eblaih laippu ele, matuk laala ele lakkunignu bappaidppig. Da anam heiyi, deɗ eblaih laih ele uue, da wain kuɗum daden mein, lakkulagnu bakkale lakka memi. Aria, deɗ eblaih laih laa ele uue, da baula anam hemi. Da anam anam aakku hanhan hettami. Da dakka da amu hemi. Da kingnu ɗo atte bia, da ee, keeke, Juda danab ah eppelagppanu aokkulnu elele daami, amge da ag uug kuɗum doon oippig doomi amunu, da ag eppelagppanu aokkulnu ii hemi. Iitta!

¹⁹ O Kayak dahil, da danab ah imu ib anamppa ehanadkkulnu aakku hemi amunu, na dahilnu dabmenana, ena aniɗkkutnu oɗ medattem.