Nehemaia 4 - Nobonob Baibel

Kekeɗ ag Nehemaia aɗi ag aɗ eɗun bappaidmananu heppig

¹ Aria, ig uɗat amu heutut, Sanbalat nug ig aɗ anam eɗut babaittutut doya, nug oo aeg huan be, oo nauhe, nug ig Juda awa awa iqom.

² Nug awa awa iqaaqa, nug laikkud amelagppa, Samaria dilag daup ele amelagppa aum. “Juda danab imu, ebehilag iitta ele, ag attem dabmena hetteb? Ag eɗun, aɗ hekkulagte? Ag eɗun, doɗ manadna, ahilag Kayak mettaglagte? Ag uɗat dabmetteb ele am paha malaglagte? Ag men kekeɗ loppaɗeg nena, aab ewakppa nauhppig, kinipan ameg okkai hume tak niitteb amu, ag amu eɗun aon, keeke laa hekkulagte?” awa aum.

³ Amon ted Tobia nug Sanbalat heqoppa dayeye, Sanbalat nug amu mattiom. Nug anam mattie, Tobia doya, nug ele ig Juda awa awa iqa aum. “Ag hetteb umu amu, qai nakok laa onig foks, nug men aɗ amu attan telo amu, aɗ amuam eɗua, na qelo,” awa aum.

⁴ Aa anam apiɗ, amge da, Nehemaia, da Kayak unuqitten, inam ami. “O Kayak, danab imu, aa lailti ele ag ihinignu ena iinab dootteb amunu, na ihinig unuqittak dookkutnu oɗ medattem. Na heppe, awa awa qettak naunab aa madittep amu, nai amu eɗua, ahilahppa gokkunu unuqidttem. Na heppe, kekeɗ ag wana, danab amu eɗadna, ag aa, amu aa lailti ele eppelkad hippaladna diin, wan laappa gokkulagnu oɗ medattem.

⁵ Danab aɗit amu aa awa awa qettak nai naunab danab uɗat imu hetteb dilagnu mattiya malapiɗ amunu, na aab aa beɗulahppa daatte daut atimanu, na ahilah hipunin ii uhuqna matamnanu oɗ medattem.” Da anam Kayak unuqidmi.

⁶ Ag anam appig, amge Juda danab ag uɗat amu hekkulagnu meulag oh medappig amunu, ag wagai meegeg, aɗ amu oh attan taata, gamagppa teum.

⁷ Ig anam heut, Sanbalat, Tobia, nug Arebia danab, Amon danab, aab Asdot danab ele, ag ig Jerusalemnu aɗnu anam heutut, aɗ attan teete, aɗ giɗo am ele heut qelakkak daaglagnu hemut ele doon, ag oolag huana nauhom.

⁸ Ag oolag huana nauhe, ag qagmena, ag banenig uɗin heppeg, ig danab ah Jerusalem daattem ele ootot daagnignu maittak aoppig.

⁹ Ag maittak amu aoppig, amge ig ihinig Kayak unuqittatta, ig danab laala ag amun, laala tuqan kekeɗ uɗippeg anadna eppeg, ig oh ahat ban hekkunignu otiadmut.

¹⁰ Anam, amge haen amuppa Juda laa ag appig. “Danab uɗat hetteb ele amu, ag ebehilag bodoedatte. Kinipan, men aoɗak keeke, kinipan amu huanak daatte amunu, ig aɗ eɗut bappaidkkunignu am ib iitta,” appig.

¹¹ Ag amu aegeg, kekeɗ ag ihinignu, “Ag ii anigppeppeg, ig lokkumta wata, ag oolagppa gota oitta, ag aqapput mauhppeg, uɗat imu na qekku,” aon appig.

¹² Ag anam aegeg, haen eblaih laih ele Juda danab ag kekeɗ guguittak daatteb ele, ag ahan uɗin appig. “Danab amu ag aben ohppanu banenig uɗiglag,” aon appig.

¹³ Anam amunu, da danab ag baelkadppa anen anenppanu maatti, ag ban, qep elab, lat ele aɗan, ag aben laala aɗ heeg attan ii teumppa, kekeɗ ag aben amuppa aɗ letan, aab ooppa nokkulagnu ib ena daatte, ag appa daappig.

¹⁴ Da amu hein maloya, da keeke oh antte, itale malen, da anuqak danab, Juda dilag ehanittak anuqak danab, amu danab ah laa oh ele amelagppa ami. “Ag kekeɗ dilagnu aib baɗappig. Naɗi, Nug ɠagattag okkai ele, danab Nug antta, ebehi oh bodoetta le mette elenu Kayak, Nug daatte amunu, ag Nug dabmenana, ag, ag awalkad amalkad, ag bekkalkad aɗelkad, ag waalkad, ag laulkad ele ena daaglagnu ban heig!” awe ami.

¹⁵ Da anam ai, ig anam daaut, kekeɗ ag ig ahilag maittak doot malamut doon, Kayak he, ag ahilag maittak dim lamidkkulagnu elele iitta daappig ele doon uueg, ig eɗut, aben aben ihinigppa gota, aɗ eɗua babaittak uɗat tuɗidta hemut.

¹⁶ Amge haen amuppanu dahiladnab danab laih gane ag uɗat henana daappig amu, laih gane amubianab ag ban, guppiɗ, lat, ban bala laala ele aɗan daappig. Okkai danab ag ele Juda danab aɗ uɗat heppig ehanadppig.

¹⁷ Amu laa ag keeke maon, uɗatppa goppig amu, ag eppelag laplap-ppa uɗat hekkulagnu, ban ele hekkulagnu daappig.

¹⁸ Amu danab ag aɗ hak uɗat hetteb ele amu, ag ahilkad qep elab imualagppa qakkak daaegeg, danab ag daanna uɗat heppig. Ag amu heppig, amge danab nug kekeɗ uɗippeg, trampet iwalkkunu dayom ele, nug haen oh da ele daamuɗ.

¹⁹ Anam amu, da anuqak danab, Juda dilag ehanittak anuqak danab, amu danab laa oh ele amelagppa ami. “Aɗ uɗat ig hettem imu, am uɗat okkai, aben laippuppa ele ii daatte; ig nug guguittak ii daattem. Iitta. Ig piɗe piɗenab daattem.

²⁰ Anam amunu ag trampet gayeb doon, ag danab adeppa dayaya iwaltte daulagppa doon, ag paha uɗippeg, appa ig oh qagmekkunig. Ig oh qagmeta, ban hebupput, Kayak Nug ig ehanigkku,” awe ami.

²¹ Ig anam bappaidmut amunu, ig uɗat ii uumut. Iitta. Ig huu laa aɗ hak uɗat hetata, huu laa bannu keeke aɗat daamut. Ig buttuanab, aam diigppan bette, haen amuppa ig uɗat digmeut ukke ukke, gatatu ne, hoɗopai amahalegeg ig bat-ttamut.

²² Amu haen amuppa da danab ah amelagppa ami. “Ag amu ahilkad maɗi nid ele ag tuqan, uɗat dimppa Jerusalem dimittim gona aib niippig. Iitta. Ag aab ooppa daan, tuqan ele laa ag aab italnan daappeg, laa niiglag. Amunppa amu, ig oh uɗat hekkunig,” ami.

²³ Amu tuqan da, da awalad amalad, dahilad maɗi nid, amu ban danab da ele daamut ele, ig oh niignignu hetata, ig uɗatnu lamen ii uɗamut. Iitta! Anam ele niimut. Ig anam hetata, ig oh hanhan bannu keeke eppenigppa aɗat oimut. Leppa gomut, haen amuppa ele ig anam ele gomut.