Nehemaia 13 - Nobonob Baibel

Ag heeg, laihppan uɗia dayak danab ag eɗun goppig

¹ Amu deɗ ag buk Moses yom ebqeppig amu, ag ebqeegeg, danab ah dooppig. Ag anam ebqeeg doon, ag Amon danab, o Moap danab laa nug, nug buɗub ele ag hanhan Kayaknu danab ah, Israel tamaniak, nug ag ele laippu Kayak laugppa qagmen daaglagnu elele iitta nai dooppig.

² Amon danab, Moap danab ele ag Israel oolagppa laippunab ii daamnanu diig am, haen Israel ag Isip wan uun uɗippig, ag uɗiegeg, Amon danab, Moap danab ele ag ee, le ele aon, Israel ii madappig. Iitta. Ag amu hak uun, Moap dilag king nug Balam heeb, Israel ag eheɗ laa awaknu anak waappa daaglagnu men doɗo mettom. Nug amu he, Balam nug amu hekkunu heum, amge Kayak he, eheɗ laa awaknu anak waappa dayaknu nai amu eɗua, itittak ena dayom.

³ Amu danab ah ag ɗo amu ebqeeg doon, ag digmena heeg, wan laappanu uɗia dayak danab ah, danab ah amu ag Kayaknu mettid lag, amuppa gona, Nug noobppa dup nona binag metteb ele oolagppa daanna, ii goppig.

⁴ Amu ii nak haenppa amu, mana mettak danab onig Eliasip, ag heeg, nug ee bakkalenu maknu oo ihinig Kayak laug, amuppa daappig gumom. Nug am Tobia, ⌊Amon ted laa,⌋ nug nug ele aa ee layam ena.

⁵ Anam amunu, nug Tobia nug aguppa daakkunu Kayaknu mettid lag, amuppa oo okkai laa mettom. Tatam ag oo amuppa ee aeg main, Kayak mettaglagnu, kalu danab ile muttuɗig enanag bette, Kayaknu mettid lakkanu uɗat haknu keeke laala, ee aeg, wain bau, goɗen elenu obatak eblaih tanig ele ooppanu obatak laippu ele aguppa meppig. Obatak laippu amu, keeke amuam Lewi buɗubppan mana mettak danab iitta dilagnu, ahiettak danab dilagnu, od gumak dilag ele daye, aria maha am ele mana mettak danab dilag dayom, amge gemu Tobia nug aguppa daakkunu dayom.

⁶ Amge Eliasip amu heum, haen amuppa am da, Nehemaia, da Jerusalem appa ii daami. Aɗinu? Babilon dilag king Artekserksis nug king dayaya, nuhig king dayaknu maɗ 32ppa da eɗuen, Babilon appa, king toppa gomi. Da ukken daai ukke, dimppa da baula eɗuen Jerusalem gokkulnu oɗ mettai,

⁷ nug “Yo” a, da aakku eɗue Jerusalem uɗimi. Da eɗue uɗien daaiyi, laa ag Eliasip eheɗ heumnu aeg doomi. Ag Eliasip nug Kayak laug, amuppa oo laa Tobia mettom aeg doomi.

⁸ Ag aeg doye, da ena iinab doyen, da Tobianu keeke oh oo amuppanu akkai ukkom.

⁹ Da amu hewoya, da ag oo amu, oo laala ele dubuttid teum daatteppa ele, oo amu oh Kayaknu neekkakppa oppiak ele daaglagnu babaittak hekkulagnunab ami. Da ai, ag hena malaeg, da Kayak laugppan keeke oh eɗue, oo amuppa dayom bia mein, ee aegnu ofanu ee aeg, kalu danab ile muttuɗig enanag bette ele eɗuen, aguppa memi.

¹⁰ Haen amuppa ele amu, da danab ah ag keeke, ag Lewi buɗubppan mana mettak danab iitta, ag ag mattaglagnu ɗo dayom bia ii madappig doomi. Ag ee amu ii madappig amunu, ahiettak danab, Lewi buɗubppan mana mettak danab iitta laa ele ag eɗun, dad ahilagppa gona, ee oppig. ⌊Ag Kayaknu mettid lag, amuppa ii daappig.⌋

¹¹ Da anam doomi amunu, da Juda dilag ehanittak anuqak danab onilagppa ei doeg, da ag daulag bate, amelagppa ami. “Aɗinu danab ah ag Kayak laug, amuppan keeke ii dabmettan, ee keeke aon ii uɗitteb?” oɗ mattami. ⌊Da anam hei, ag eɗun, ahilag gumak uɗat pehettak hekkulagnu aeg,⌋ da Lewi buɗubppan mana mettak danab iitta onilagppa ei uɗieg, da hei, ag eɗun, uɗat abenppa daanna, ahilkad uɗat henan daappig.

¹² Da anam hei, Juda danab ah oh ag ee aeg, wain bau, olip goɗen ele aon, obatak eblaih tanig ele ooppanu obatak laippu eɗun digmena aon uɗin, Kayaknu mettid lag, amuppa ee bakkalenu maknu ooppa maadppig.

¹³ Da mana mettak danab Selemia, yaak danab onig Sadok, Lewi buɗubppan mana mettak danab iitta onig Pedaia ele, oo amu gumadkkulagnu tituanatten, amu hekkulagnu maadmi. Da anam hewoya, da Sakur bekka Hanan nug ag ehanadkkunu ele tituanen memi. Sakur mameg am Matania. Da amu heminu diig am, laa ag danab amunu genab elele dooglagnu elele. Ag anam amunu, da uɗat amu hekkulagnu maatti, ag ee keeke ee bakkalenu maknu ooppanu aon, paniadppeg, Lewi buɗubppan mana mettak danab iitta, ag aoglagnu aakku daappig.

¹⁴ O Kayak dahil, da uɗat amu aakku anam hemi amunu, na dahilnu dabmekkutnu oɗ medattem. Da na laut ena daakkunu, appa uɗat na haknu ɗo meme amu, laa ag uɗat nahip amu pehettak, elele hekkulagnu elele daaglagnu ele uɗat heinne daami amu, na amu obippe, ii hemibia daamanu oɗ medattem.

¹⁵ Amu haen amuppa ele amu, da danab laala ag Juda wanppa Sabat deɗppa grep meu, leppu aoglagnu tappaegeg anatte, laa ag ee aeg dad okkaippanu aon uɗin, ee aeg amu, wain doɗ gaɗappa inak, muɗi grepnu meu, ad fig meu, ad meu laala kuɗum ele donki attan mena, ag keeke amu oh aon uɗin, Jerusalem uɗippig ele anadmi. Ag anam heegeg anatten, da baula Sabat deɗppa danab ah ee daden mekkulagnu aon uɗin, dadennu memananu ag amelagppa ami.

¹⁶ Tair danab Jerusalem daatteb ele amu, ag kakai, keeke digdig laa ele Sabat deɗppa aon Jerusalem uɗin, Juda danab ah daden mekkulagnu maattegeg, Juda danab ah ag aakku daden meppig.

¹⁷ Da amu antten, da Juda dilag anuqak danab daulag batami. Da daulag baten, da inam ami. “Ag hetteb imuam kobol nau ag iite dootteb? Aɗinu ag nau anam hetteb? Ag Sabat deɗ am deɗ hamu bia doon hetteb.

¹⁸ Ag mamelkad aɗi ag anamnab iite heppig? Ag anam heegeg, diig amunu ihinig Kayak Nug uug naunab nau ihinigppa, aab okkai imuppa ele iite he beppig. Anam, amge gemu ag tuɗidna, Sabat deɗnu hamu bia doon, ɗo ii dim lamidtteb, amuppa ag heppeg, Kayak Nug baula bu megakkunu oittem.” Da anam ami.

¹⁹ Da anam awoya, da Sabat digmekkunu ha, aam aam eeɗeb, ag hanhan haen amuppa Jerusalem aɗnu od managlagnunab amelagppa ami. Da ag haen amuppa manappeg, manakib dayeb ukkeb, Sabat deɗ malak ag eɗun matulkkulagnunab ami. Da ɗo anam mein, da dahilad danab laala ag od guman daappeg, laa nug keeke Sabat deɗppa awa, aab ooppa domanu otiatti, aguppa daappig.

²⁰ ⌊Da anam hei,⌋ danab laa keeke nuhig Sabat deɗppa awa, aab ooppa dokkunu elele iitta amunu, haen laippu, o haen aɗit danab laala, ag keeke laihnu awa dadennu mak danab, ag ahilkad keeke, daden mekkulagnu aon uɗippig, amge ag uɗieg, ib keldoak daye, ag Jerusalemnu aɗ dimittim tuqan hamu niippig.

²¹ Ag anam niippig, amge da ag amelagppa nau aomnanu inam ami. “Aɗinu ag aɗ dimittim niitteb? Ag baula anam hekkulag dayeb amu, da heppi, laa uɗat amu hetteb ele ag uɗin aɗualadkkulag,” ami. Da anam ai, ag baula Sabat deɗppa ii uɗippig.

²² Da amu hewoya, da Lewi buɗubppan mana mettak danab iitta, ag Kayak ele ouqa dayaknu elele daaglagnu beɗulag, oolag ele bappaidna gona, od gumak uɗat hekkulagnunab ag amelagppa ami. Ag amu heppeg, Sabat deɗ, deɗ amuam Kayaknu tituanak daatte, deɗ amu anam daakkunu anam hemi. O Kayak dahil, uɗat dahil amunu ele na dahilnu dabmekkutnu oɗ medattem. Na oo mauhaknab kobol nahip dim lamidna, dahilnu oot gai-iitta doon oot meɗan ehaniɗkkutnu oɗ medattem.

²³ Amu haen amuppa ele da Juda danab ag Asdot ah, Amon ah, Moap ah diippig ele anadmi.

²⁴ Ag heppig ele amu, ahilkad nid obatak laa ag Asdot nai, o Amon nai, o Moap nai aakkuib madippig. Ag Hibru nai ii dooppig. ⌊Obatak laa ag Hibru nai dooppig.⌋

²⁵ Juda danab amu ag ah amu diieg, nid amubia daaegeg anatten, da ag daulag baten, ag eheɗ laa awaknu anak waappa daaglagnu nai ami. Da danab amu laala makkuɗatten, laa ikkilkad uɗug eppelppa hiɗami. Da wagai mei, ag dahil nai dim lamidkkulagnu anana, ag nai ahilag Kayak onigppa ɠagattag qettan appig. Dahil nai da ag amelagppa ai doon dim lamidkkulagnu ahilag nai ɠagattag qettan anana, nai ahilag amuam inam. Ag ahilkad nid ah wan amuppan danab ahilkad ah daaglagnu ii mattamnanu, ag wan amuppan ah diin, ag bekkalkad ele ahilkad ah daaglagnu ii mattamnanu, appanu ah ele ag akka ii diimna.

²⁶ Da kobol amunu ag amelagppa ele inam ami. “King Solomon nug wan atu laihnu ah diiom, diig amunu nug hipunin iite heum? Wan atu ohppa king laa nug bia ii dayom, nug okkainab dayom. Kayak, Solomonnu Kayak, Nug Solomonnu oo huana mauhom, Nug Solomon king daakkunu tituane, nug Israel oh dilag king dayom, amge laihnu ah ag heegeg, nug hipunin heum.

²⁷ Anam amunu gemu ag tuɗidna, kobol naunab nau imu henana, ag ihinig Kayak ippunikkomnu oo metta ii uuak kobol ii dim lamidna, laihnu ah diippeg, ig uug anidkkunigoittete?” Da anam ag amelagppa ami.

²⁸ Mana mettak ikki danab Eliasip bekka Joiada bekka, nug tana am Horon danab Sanbalat. Anam amunu, da Joiada ⌊bekka⌋ lamitti ukkom.

²⁹ O dahil Kayak, danab ag amu heppig ele, amuppa ag mana mettak danab ag attem attem daaglagnu ii dabmena heeg, dayak amu nahip neekkakppa dubuttid teum daatte. Na he, mana mettak danab, aria Lewi buɗubppan mana mettak danab iitta, na ag ele, ag nug tituanna nai qagappig, amge ag nug tituanak amu oppatppig; amu na ahilag hak amunu daut atikkunu ool ii daatte.

³⁰ Anam amunu, da hei, Lewi buɗubppan mana mettak danab, Lewi buɗubppan mana mettak danab iitta, ag ele amu, ag oolagppa laihppanu uɗiak danab, o ah laa ii dayom. Da hei, anam daye, da ag anen anen ag ahilkad uɗat anen anen hekkulagnu tituanatten, uɗat amuppa maadmi.

³¹ Laa ele amu, da danab ah ag deɗ deɗppa aab aon meppeg, mana mettak danab ag aab amuppa qaɗabppa doɗ manadna, Kayak mettaglagnu ib bappaidmi. Laa amu, da danab ah ag dattanu ee tatam oɗutte ele aon uɗin, Kayaknu mettid lakka mekkulagnu ele ib bappaidmi. O Kayak dahil, na dahilnu dabmena, ehaniɗkkutnu oɗ medattem.