Nehemaia 12 - Nobonob Baibel

Lewi buɗubppanu mana mettak danab, Lewi buɗubppanu mana mettak danab iitta ele

¹ Amu mana mettak danab, aria Lewi buɗubppan mana mettak danab iitta ele, ag Sealtiel bekka Serubabel, ⌊mana mettak ikki danab⌋ Jesua ele oh eɗun uɗippig amu, ag onilkad amu iikku. ⌊Mana mettak danab ag am,⌋ Seraia, Jeremaia, Esra,

² Amaraia, Maluk, Hatus,

³ Sekania, Rehum, Meremot,

⁴ Ido, Gineton, Abaiya,

⁵ Miyamin, Madia, Bilga,

⁶ Semaia, Joiarip, Jedaia,

⁷ Salu, Amok, Hilkaia, amu Jedaia ele. Haen Jesua nug mana mettak ⌊ikki⌋ danab dayeye, huu amu ag, ag lailkad mana mettak danab oh dilag anuqak daappig.

⁸ Lewi buɗubppan mana mettak danab iitta amu, ag onilkad am inam: Jesua, Binui, Katmiel, Serebia, Juda am Matania ele. Matania, nuhikkud uɗat laippu ele ag Kayak binag maknu ahi ettaglagnu gumak danab daappig.

⁹ Aria, ag anam heegeg, Bakbukia, Uni ele, aa laa amu dilag uɗat laippu ele, aa laih daaeh, Jesua aɗi ele ag laih daaeg, ag laih laih daan, ag nug neekkidna daan, ag oh ahi edappig.

¹⁰ ⌊Mana mettak ikki danab⌋ Jesua bekka am Joiakim. Joiakim bekka am Eliasip. Eliasip bekka am Joiada.

¹¹ Joiada bekka am Jonatan. Jonatan bekka am Jadua.

¹² Joiakim, ⌊nug mana mettak ikki danab dayom,⌋ nuhig haenppa amu mana mettak danab oolagppanu ag baelkad anen anen dilag okkai daappig am inam. Seraia baegppan okkai am Meraia. Jeremaia baegppan okkai am Hanania.

¹³ Esra baegppan okkai am Mesulam. Amaraia baegppan okkai am Jehohanan.

¹⁴ Maluk baegppan okkai am Jonatan. Sebania baegppan okkai am Josep.

¹⁵ Harim baegppan okkai am Atna. Meraiot baegppan okkai am Helkai.

¹⁶ Ido baegppan okkai am Sekaraia. Gineton baegppan okkai am Mesulam.

¹⁷ Abaiya baegppan okkai am Sikri. Miniamin, Moadia ele baeltippan okkai am Piltai.

¹⁸ Bilga baegppan okkai am Samua. Semaia baegppan okkai am Jehonatan.

¹⁹ Joiarip baegppan okkai am Matenai. Jedaia baegppan okkai am Usi.

²⁰ Salu baegppan okkai am Kalai. Amok baegppan okkai am Eber.

²¹ Hilkaia baegppan okkai am Hasabia. Aria, Jedaia baegppan okkai am Netanel.

²² Haen Eliasip, Joiada, Johanan amu Jadua ele ag anen anen ahilag haenppa mana mettak ikki danab daappig, haen amu ohppa aun ag mana mettak danab baelkadppan ikki danab daaegeg, aun ag Lewi buɗubppan mana mettak danab iitta, ag baelkadppan ikki danab ele daappig amu, nai yaak danab ag amu Darius nug Persia dilag king dayeye, ag haen amuppa amu ahilag kayanu bukppa yaappig.

²³ Ag anam heppig, amge ag Lewi buɗubppan mana mettak danab iitta, ag amu dilag baelkadppan ikki danab onilkad Eliasip bekka Johanan, nug uɗat digmekkunu dayom, haen amuppa batak aakkuib ag buk amuppa yaappig.

²⁴ Haen amuppa amu, Lewi buɗubppan mana mettak danab iitta, ag baelkadppan ikki danab am Hasabia, Serebia, Katmiel bekka Jesua ele. Aria, ikki danab amu ag laih daaegeg, ahilkad uɗat laippu ele ag laih daaegeg, ag nug neekkidna daan, ag oh Kayak amegppa, “Ena heme,” anan, Nug binag mekkulagnu daan, ameg laa ag ahi maha tutu ettan malaeg, ameg laa ag nai amunu noob ahi edappig. Ag anam anam aakku heppig. Ag Kayaknu danab Dawit, nug ag anam hekkulagnu ana, ɗo mattom, amubia ag aakku heppig.

²⁵ Lewi buɗub laa ag amu heegeg, laa amu ag ee bakkalenu maknu oo laala, aɗ od guguittak daappig ele amu, laa amuppanu keeke yab aomnanu ag oo amu gumappig. Ag onilag am Matania, Bakbukia, Obadaia, Mesulam, Talmon, Akup ele.

²⁶ Danab amu ag Jesua bekka Joiakim, nug Josadak alag, amu nug dayeye, Juda dilag gawana Nehemaia ele dayeye, mana mettak danab Esra, nug am yaak danab ele, nug ele dayeye, danab amu oh ag haen amuppa daanna, ag ahilag uɗat amu heppig.

Nehemaia, Juda danab ele ag aabnu aɗ malan, Kayaknu daakkunu tituana, Nug mettaknu mettid hak

²⁷ Aria Nehemaia, Juda laa ele ag uɗat amu heppig ele amu, ag Jerusalem aabnu aɗ hena malona, ag Kayaknu daakkunu tituanna, Nug mettaglagnu mettid hekkulagnu dabmena, ag Lewi buɗub laala adeppa adeppa daappigppa, ag nai meeg ukke, ag Jerusalem uɗin, ag gamag ahak doon, ag Kayak amegppa, “Ena hen mekkame,” anana, ag musik haknu keeke digdig, amuam simbal, harp, laia ele, ag amu henana, aɗ amu Kayaknu tituana mettak daakkunu Nug mettaglagnu mettid hekkulagnu nai dooppig. Ag nai amu doon, ag aakku uɗippig.

^28-29 Ag nai meeg uɗieg, ag heeg, Lewi buɗub laa ahiettak danab daan, ag aabaab Jerusalemnu laih laih ukkak daappig, ag ele appanu uɗinna, ag aab naunau aab Netopa talilittak daappignu, Betgilgalnu, Geba amu Asmawet guguittaknu ele uɗippig. Aɗinu? Ahiettak danab ag appa daaglagnu aab naunau Jerusalemnu laih laih ukkak aab kalan daappig.

³⁰ Anam amu, Lewi buɗubppan mana mettak danab, Lewi buɗubppan mana mettak danab iitta, ag tatam Kayak ele ouqak daaglagnu elele daaglagnu ag beɗulag, oolag ele babaittak amu hewona, ag danab ah ele ag ele anamib daaglagnu babaittak amu heppig. Ag anam hena malaeg, ag aɗ amunu, od ele, ag amu Kayaknu neekkakppa oppia mettak daakkunu ele heppig.

^31-32 Amu hak malak amu, da Nehemaia, da hei, Juda dilag okkai laa ag aɗ attan tena, ameg aɗit daappig. Danab ameg laappa daappig, ahilag ebqak am danab ameg laappa daappig ele laippu. Da anam hein, da hei, ahiettak danab ele ameg okkai aɗit daan, ag Kayak amegppa ahiettakppa, “Ena hen mekkame,” akkulagnu ag ele aɗ attan teppig. Ag tena, ameg laa ag naɗiap-ppa, aɗnu od onig Kinipan Od daatte, ag appa ukkaegeg, Hosaia amu Juda dilag ikki obatak laa ag ag dim lamadppig.

³³ Ag ukkaegeg amu, Asaria, Esra, Mesulam,

³⁴ Juda, Benyamin, Semaia, Jeremaia,

^35-36 amu mana mettak danab laala ag trampet iwalppig ele, ag amu iwalegeg, ag ele oh goppig. Ag ukkaegeg, Jonatan bekka Sekaraia, nuhikkud uɗat laippu ele, ag ele oh goppig. Jonatan mameg am Semaia. Semaia mameg am Matania. Matania mameg am Mikaia. Mikaia mameg am Sakur. Sakur mameg am Asap. Amu Sekaraia, nuhikkud ehanittak ele oh ag ag dim lamadna goppig. Nuhikkud ehanittak onilag am inam: Semaia, Asarel, Milalai, Gilalai, Mai, Netanel, Juda am Hanani. Ag dim lamadna, ag musik haknu keeke anukka Kayaknu danab Dawit ag hekkulagnu ana, ɗo mattom bia aɗappig. Ag oh anam gonana, yaak danab Esra nug anuqa ugakka, ag oh noolag awa ukkom.

³⁷ Obatak amu ag anam oin gona gona, ag aɗ od laa onig Le Qeppuɗia Bettenu Od, ag od amuppa gona wana, qe-eɗidna, aɗ am Dawitnu Aabppa ukkakkunu adqaɗ bia daye, ag appa tena gona, Dawit laug heqo laih qe-eɗidna gona, aɗnu od laa onig Lenu Od, ag amuppa goppig. Od amuam aɗnu kaɗag uɗitteppanu daatte.

³⁸ Aria, obatak laa, ag nanehppa goppig. Ag anam ukkaegeg, da, Israel dilag obatak laa ele ig aɗ attan ag dim lamadmut. Ig aɗ attan oit gota gota, lag attan ta ukkak menppa hak laa onig Bret Manaknu Lag, ig lag amu qe-eɗidta, ig aɗ amu gamag laappa onig Teppu Okkainab Aɗ eleppa gota gota,

³⁹ ig od laa onig Epraimnu Od qe-eɗidta gota, od onig Jasernanu Od qe-eɗidta gota gota, od laa onig Kakainu Od qe-eɗidta gota, ig lag attan ta ukkak menppa hak aɗit laa, laa onig Hananelnu Lag, laa onig am Danab 100 Dilag Lag, ig lag aɗit amu eɗata, ig od laa onig Sipsipnu Od, ig amuppa wata, od laa onig Aab Gumak Danab Dilag Od, ig amuppa batamut.

⁴⁰ Ig piɗe piɗe anam oimut amunu, ig oh gota teta, danab obatak aɗit ahi ettan, Kayak amegppa, “Ena hen mekkame” heppig ele, amu ag Kayak laug ooppa goppig. Ag ooppa ukkaeg, da, Juda dilag ehanittak anuqak danab obatak laippu ele oh ooppa gomut.

⁴¹ Ig Kayak laug ooppa ukkautut, mana mettak danab ag trampet ele iwalppig ele, ag ele lag ooppa goppig. Laa ooppa goppig am Eliakim, Masea, Miniamin, Mikaia, Elioenai, Sekaraia, Hanania ele.

⁴² Anam heeg, aria Masea, Semaia, Eleasar, Usi, Jehohanan, Malkiya, Elam, Eser ele, ag ele appa wana daaegeg, Jesrahia nug ahiettak danab oh ag kobol aɗippa ahi ettaglagnu ippuanattatta gumattom.

⁴³ Kayak Nug he, ag gamag ahak huanaknab dooppig amunu, ag doɗ kuɗum manadna Kayak medappig. Danab ag gamag ahak okkainab doyeg, ah, nid naunau ele, ag ele oolag gamag ahom. Ag oh oolag gamag ahe, Jerusalem appa daanna, heegeg oqotti amuam uma ukke dooppig.

⁴⁴ Haen amuppa amu, laa ag danab laala ee bakkalenu maknu oo gumadkkulagnu tituanadppig. Ag danab ah men doɗo, ee tatam oɗuak, obatak eblaih tanig ele ooppanu obatak laippu ele, ag amu aon uɗin, Kayak medappeg, oo amuppa maadkkulag amu, danab amu ag keeke amu oh gumappig. Kayak Nug Moses ɗo mettom bia danab amu ag danab ah dad ahilkad aab taliliadna daappigppanu ee keeke aon uɗin, Kayak mettaglagnu ag eppelagppa maadppeg, oo amuppa meppeg dayeb, Lewi buɗubppan mana mettak danab, Lewi buɗubppan mana mettak danab iitta ele, ag amuppa ahilkad ee keeke aoglagnu daappig. Ɗo anam ippunattom, amu Juda danab ah oh ag mana mettak danab ag Kayaknu ehanittak ag madappig, Lewi buɗubppan mana mettak danab iitta, ag amu dilag uɗatnu ele oolagppa ena dooppig amunu, ag danab amu uɗat amu gumaglagnu tituanattom.

⁴⁵ Lewi buɗub ag Dawit, nug bekka Solomon ele ɗo madapiɗ bia, ag ahilag Kayak noobppa daan, nuhig uɗat henana, ag Kayak Nug ag attem attem heppeg, danab ah ag Kayak ele ouqak daaglagnu elele daaglagnu aum amu, ag babaittak amu ele heppig. Ahiettak danab, od gumak danab ele, ag ele ahilag uɗat henana, ɗo dim lamidna, anamib heppig.

⁴⁶ Aɗinu? Dawit, Asap ele daapiɗ, haen amuppa danab ag ahiettak gumaegeg, danab ahi edappig ele ag ahi ettan, Kayak amegppa, “Ena heme,” anana, Nug binag mekkulagnu tituanak daappig. Dawit, Asap ele daapiɗ, haen amuppa kobol amu digmeum.

⁴⁷ Amu haen Serubabel, amu haen da Nehemaia ele, haen i Juda dilag okkai daamuɗ amu, haen amu ohppa Israel danab ah oh ag ee keeke elele aon uɗin, ahiettak danab, od gumak danab ele mattaeg, ag tutu ii meppig. Israel oh ag anam mattanna, ag ele maha laala Lewi buɗubppan mana mettak danab iitta, ag amu dilagnu otiadna mattaegeg, Lewi buɗub laa amu ag ee amu oppateg ne, mana mettak danab, ag Aron buɗub amu, ag ahilkad maha ele ag madappig.