Nehemaia 10 - Nobonob Baibel

¹ Laa nai qakkakppan pepappa ahilkad at stemp-ppa daappig ele meppig am inam: Hakalia bekka Nehemaia, nug Juda dilag gawana. Aria laa am Sedekaia,

² Seraia, Asaria, Jeremaia,

³ Pasur, Amaraia, Malkiya,

⁴ Hatus, Sebania, Maluk,

⁵ Harim, Meremot, Obadaia,

⁶ Daniel, Gineton, Baruk,

⁷ Mesulam, Abaiya, Miyamin,

⁸ Masia, Bilgai am Semaia ele. Danab amu oh ag mana mettak danab, ag onilkad nai qakkak amuppa yaappig.

⁹ Lewi buɗubppan mana mettak danab iitta, ag onilkad nai qakkak amuppa yaappig amu, ag onilag am: Asania bekka Jesua, Binui, nug Henadad bekkod oolagppanu, amu Katmiel ele.

¹⁰ Lewi buɗub laa, ag amu dilag uɗat laippu ele amu, ag am Sebania, Hodia, Kelita, Pelaia, Hanan,

¹¹ Mika, Rehop, Hasabia,

¹² Sakur, Serebia, Sebania,

¹³ Hodia, Bani amu Beninu ele.

¹⁴ Aria, ⌊Juda dilag⌋ ikki danab onilkad ag nai qakkakppa yaappig, ag onilkad am inam. Paros, Pahatmoap, Elam, Satu, Bani,

¹⁵ Buni, Asgat, Bebai,

¹⁶ Adonaiya, Bigwai, Adin,

¹⁷ Ater, Hesekaia, Asur,

¹⁸ Hodia, Hasum, Besai,

¹⁹ Harip, Anatot, Nebai,

²⁰ Makpias, Mesulam, Hesir,

²¹ Mesesabel, Sadok, Jadua,

²² Pelatia, Hanan, Anaia,

²³ Hosea, Hanania, Hasup,

²⁴ Halohes, Pilha, Sobek,

²⁵ Rehum, Hasabna, Masea,

²⁶ Ahaiya, Hanan, Anan,

²⁷ Maluk, Harim am Bana ele. Amuam ⌊Juda dilag⌋ ikki danab, ag onilag nai qakkak amuppa yaappig.

²⁸ Nai qakkaknu nai, danab ag amuppa onilag yaappig am inam. “Ig oh, ig Lewi buɗubppan mana mettak danab, ig Lewi buɗubppan mana mettak danab iitta ele, ig Kayaknu mettid lagnu od gumak danab, ig ahiettak danab, ig Kayaknu mettid lagnu maɗi nid, ig danab laa, ihinkad ah ele, amu ihinkad nid ag nakok okkai meppig, nai doon diig dooglagnu elele daatteb, ig oh ig Kayaknu ɗo dabmetat, wan laihnu danab, ag uɗin, ihinig wanppa daatteb amu, ig amu dilagnu, ig awaidta, ig ikka daattem amu,

²⁹ ig oh, anuqak danab ele ig oh laippu daat, ig genabnab genab Kayaknu ɗo, Nug nuhig uɗat danab Moses oɗeppa ɗo mekkom amu, ɗo amu ig dim lamidkkunignu nai qakkat attem. Ig Yawe, nuhig haknunab nai, ɗo iɗu iɗu oh ele dim lamidkkunig. Ig ihinig nai imu ig ɠagattag qeta atata, ig ii dim lamidkkunig dayeb amu, ig eheɗ laa awaknu anak waappa daagnignu oonig daatte attem.

³⁰ Keeke laala ig ii hematanu, keeke laala ig hekkunignu nai ata qagattem am inam. Ig ihinkad nid ahin wan ig taliligna daattebppan danab bekkalkad ahilkad ah daaglagnu ii mattamta; ig ele ahilkad nid ahin ihinkad nid danab waalkad daaglagnu ii diimta. Iitta.

³¹ Wan laalappan danab ag ig talililgna daatteb amu, ag keeke laala, o ee aeg aon uɗin, Sabat deɗppa mena daden mekkunignu hebeppeg, ig Sabat deɗppa, o deɗ laa Kayaknu tituanak daatte, amuppa ig daden ii memata. Ig ee wanppa ebapput ukkeb ukkeb, maɗ eblaih laippu ele teeb, maɗ eblaih aɗitppa ig keeke laa wanppa ii eppamta. Maɗ amuppa ele ig Israel buɗub laa ihinigppa lon awa, eɗua ii daden meum dayeb amu, ig megakkunu baula ii amata.

³² Maɗ anen anen ohppa laa ag Kayaknu mettid lag, amuppa maɗi ahilkad hekkulagnu elele daaglagnu, ig 4 gram silwa ɗo mak daatte bia mekkunig.

³³ Men doɗo amuppa Lewi buɗub ag bret henan, balalppa hanhan maknu hetteb ele amu, ag amu hekkulag; ag deɗ anen anen oh ee aegnu ofa, manaknu ofa ele hetteb, ag amu hekkulag; ag Sabat deɗppa, kalam baunu qagmak gamag ahak elenu deɗppa, amu ag hobul dayaknu haen Kayak epeɗiatta maattom, deɗ amuppa ele ag mana mettak hekkulagnu daatte hekkulag; ag mana mettak Kayaknu tituanak daatteb hekkulag; ag Israel dilag ib etta hipunin haknu ofa hena, amuppa ag heeg, eheɗ haknu nob nau doɗ tiigppa iitta mekkunu elele medakkunu hekkulag; aria, ag aɗi keeke laa Kayaknu mettid lag, amuppa henana, keeke daden metteb amu, ag men doɗo amuppa keeke amu oh daden mena hekkulag.

³⁴ Ig Lewi buɗubppan mana mettak danab, ig Lewi buɗubppan mana mettak danab iitta, amu ig danab ah laa oh ele, ig Yawe, ihinig Kayak, ig nuhig qaɗabppa aab ilak daakkunu, ig, ig baenkadppa ele, ig maɗ maɗppa ihinig haen adekkuppa aab aot uɗit, Kayaknu mettid lag, amuppa mekkunignu om ena yaat anidmut amunu, ig amu dim lamidkkunig. Qaɗabppa maiglagnu Yawe Nug ig anam hekkunignu ɗo mekke, Moses bukppa yom amu, yaak amu niitte bia, ig aakku hekkunignu bappaidmut.

³⁵ Maɗ anen anen ohppa ig digmeta, dattanu ee, ad meu digdig oh ele aottem amu, ig ee, meu amu tatam oɗutte laa aot uɗit, Yawe laugppa mekkunignu attem.

³⁶ Ɗoppa yaak niitte bia amu, ig ihinkad nid danab tatam dotteb, ihinkad makau, sipsip, meeme, doɗ laa ele dawai tatam dotteb amu ele, ig amu aot, ihinig Kayak laug, amuppa mana mettak danab ag laa Kayaknu ehanittak madatteb amu, ig appa aot uɗit, ag eppelagppa mekkunig.

³⁷ Laa amu ig ee aeg bau ganuɗe, kalu nette, ee aeg ofanu ee aeg, ad meu digdig, wain bau, olip goɗen ele ig aottem ooppan laa am aot, Kayak laug, amuppa keeke amu ee bakkalenu maknu oo daattebppa amu, ig aguppa mekkunig. Ig amu hetata, ig aɗi ee dattanu keeke aottem, amunu obatak eblaih tanig ele ooppanu obatak laippu ig aot, Lewi buɗubppan mana mettak danab iitta, ig ag mattagnig. Ig aab atten attenppa daat, ihinig uɗat heutut, Lewi buɗub ag keeke amu aoglagnu daatteb amu, diig amunu ig ag appa mattagnig.

³⁸ Ig keekenu obatak eblaih tanig ele ooppanu obatak laippu Lewi buɗubppan mana mettak danab iitta, ig amu ag madappupput, mana mettak danab laa, nug Aron buɗub amu, nug Lewi buɗubppan mana mettak danab iitta, nug ag ele daaglagoitte. Ig mattata malapput amu, Lewi buɗubppan mana mettak danab iitta, ag aoppignu obatak eblaih tanig ele ooppanu obatak laippu aon gona, ihinig Kayak laug, amuppa ee bakkalenu maknu oo laala, en keeke uppa maknu daatteb amu, ag aguppa mekkulag.

³⁹ Aɗinu? Ig Israel buɗub, amu Lewi buɗubppan mana mettak danab iitta, ag ele, ig oh ee aeg, wain bau, goɗen ele Kayaknu mettid lag, amuppa ee bakkalenu maknu oo laalappa keeke amu maknu daatteb, ig aguppa mekkunig. Oo amuppa amu, Kayak laugppan uɗat haknu keeke maattak daatteb. Mana mettak danab, od gumak danab, ahiettak danab ele, ag oh uɗatppa daanna, aguppa daatteb. Ig genab, ig ihinig Kayak laug, amuppa keeke laanu tutu memanu dabmekkunig.” Nai amuam nai qakkak amuppa dayom.