Nehemaia 1 - Nobonob Baibel

Nehemaianu unuqittak

¹ Nai imuam Hakalia bekka Nehemaianu nai. Amu Artekserksis nug Persia dilag king dayaya, nuhig king dayaknu maɗ 20ppa, maɗ amunu kalam Kisleb, kalam amuppa da aab okkai Susa ooppa aben aɗ ɠagattagnab ele, da appa daaiyi,

² da awalag amalag oolagppan laa, Hanani, nug danab laala ele Judanu uɗippig. Ag uɗieg, da Juda danab ah Juda appa daatteb ele, ag attem attem daappignu, Jerusalem aab attem attem dayomnu ele oɗ mattami.

³ Da amunu oɗ mattai, ag da amelppa appig. “Kekeɗ ag Jerusalemnu aɗ loppaɗeg, nauhakib dayeye, aɗnu od ele aab aɗuppa manappig amunu, Juda ag appa daatteb amu, ag uug nau doon, uɗa nak guittak ele, ag amu ele dootteb,” aon appig.

⁴ Ag anam aeg, haen da amu doyen amu, da uug okkai doyeye, da heɗep nein dayeye, da gaami. Da amu hein, deɗ gane da mahiak heinne, da ee ohnu kud mein dayeye, da Kayak hab attannu unuqidmi.

⁵ Da unuqitten, da inam ami. “O Yawe Kayak, na hab attan daattem. Na ɠagattag okkai ele, danab na anitta, nug ebehi oh bodoetta le mette elenu Kayak. Na danab ah ag nahipnu oo mauhak dootteb, ag nahip ɗo nai dim lamittegeg, na hee, na danab ah amu ele ag nug oo mauhaknab doyaknu nug tituana nai qakkak hetteb amu, na nug tituana nai qakkak amu ii okkulttem.

⁶ O Yawe da, nahip maɗi nid, da na dahil unuqittak da deɗ oh amun tuqan ele unuqittitti doon, nob ena meɗakkutnu oɗ medattem. Da Israel danab ah, ag nahipad maɗi nid maɗi ah ele amu, da amu dilagnu na unuqidttem. Amu da ii lokkumttem. Iitta. Da ig Israel danab ah, da ele, amu da mamel baekkudppan ele, ig oh nahip-ppa hipunin hemut amu, da miagib na amenppa madittem.

⁷ Ig nahip haknunab anak, nahip ɗo iɗu iɗu ele, na nahip maɗi nid Moses mettame amu, ig nai amu oh dim ii lamidtata, ig na noomppa naunab hemut.

⁸ Anam, amge gemu na eɗun, aɗi keeke laala hekkutnu nahip maɗi nid Moses amegppa ame amu, na amu dabmekkutnu oɗ medattem. Na inam ame. ‘Ag da ippunadminu oo metta ii uuak kobol ii dim lamidkkulag dayeb amu, da heppi, ag wan atu laalappa matatun gona, appa daaglag,

⁹ amge ag eɗun, dahilppa dona, dahil haknunab anak dim lamidkkulag dayeb, kekeɗ ag heppeg, ag diia ukka laih me dayak danab ah wan batakppa gona daaglagnu dayeb amu, appanu ele da diiatten uɗien, wan da onil aguppa meppi daakkunu tituanmi ele amu, da aguppa maadppi daaglag.’ Na anam ame.

¹⁰ O Yawe, Israel danab ah ag am nahipad maɗi nid maɗi ah ele. Na eppen bahin, na nahip ɠagattag okkaippa na ag laa eppelkadppan qagaiettakppanu eɗua uhuqak daakkunu heme.

¹¹ O Naɗi, da am nahip maɗi nid daattem, laa ele ag na oninnu ebehilag oh bodoetta le mekkunu enanagnab doon, ag nahipad maɗi nid daatteb, ag amu, da gemu, na ig oh, ihinig unuqittak imu dookkutnu oɗ medattem. Gemu da king noobppa daakkul amu, haen amuppa na heppe, king nug dahilnu ena dookkunu oɗ medattem.” Da anam unuqidmi, amu haen amuppa da kingnu wain mettak danab daami.