Namba 9 - Nobonob Baibel

Pasowa Hobulnu nai

¹ Aria, Israel ag Isip uun ahan uɗieg, maɗ laippu uue, maɗ laappa, maɗ amunu kalam digmakppa, Israel ag Sinai atu taɗakppa daappig. Ag appa daaegeg, Yawe Nug Moses amegppa aum.

² “Na heppe, Israel ag Pasowanu Hobul heig! Ag haen da amippa hekkulag.

³ Haen da amippa ag Pasowanu Hobul daan hekkulagnu amu, kalam imuppa, deɗ 14ppa ag tuebnab, haen amuppa ag digmena hekkulag. Ag ɗo da ag mattami, ag ɗo amu oh dim lamidna, Pasowanu Hobul daan hekkulag,” awa aum.

⁴ Yawe Nug Moses amegppa aum amunu, Moses nug Israel amelagppa, ag Pasowa gamag ahak ele hekkulagnu aum.

⁵ Nug ag amelagppa a, ag Pasowanu Hobul daan, Sinai atu taɗakppa heppig. Ag kalam tatamnu deɗ 14ppa, tuebnab, haen amuppa ag digmena heppig. Israel ag Yawe Nug Moses amegppa ag anamnab hekkulagnunab aum amu, ag anamnab aakku heppig.

^6-7 Amge laala ag Pasowanu Hobul dayaknu deɗ, ag deɗ amuppa Pasowanu Hobul dayak hekkulagnu elele ii daappig. Aɗinu? Ag Kayak ele ouqa dayaknu elele iitta. Amunu diig am, ag mauhak gaɗa laa aɗappig amunu, ag deɗ amuppaib Moses, Aron ele gumatna gona, ag Moses amegppa appig. “Ig mauhak gaɗa laa aɗamut amunu, ig Kayak ele ouqa dayaknu elele iitta. Amge imuam Pasowa haen, am ig haen imuppa Israel laa oh ele Pasowanu doɗ aot, Yawe gumidta wata, Nug mettagnignu ib laa iitai daatte?” aon oɗ medappig.

⁸ Ag anam oɗ mettaeg, Moses nug nob ma aum. “Ag daappeg, Yawe Nug amunu aɗi akku amu, Nug ab doye, da appi dooglag,” awa aum.

⁹ Aria, Yawe Nug Moses amegppa aum.

¹⁰ “Na inam Israel danab ah amelagppa appe doyeg!” awa aum. ⌊Nug anam a amu, Moses nug Israel amelagppa aum.⌋ “Haen Yawe aumppa, Pasowanu Hobul dayak deɗ aweb, laa ag oolagppanute, iitta ag buɗulkadte, ag mauhak gaɗa laa aɗappig dayeb, diig amunu ag Kayak ele ouqa dayaknu elele iitta, o iitta, aun laa laih ukka, eɗua ii uɗiom dayeb amu, ag Pasowanu Hobul dayaknu deɗnu Pasowanu Hobul dayak ii hemana. Ag deɗ amuppa Yawenu Pasowanu Hobul dayak ii hemana, amge ag deɗ laa dimppa hekkulag.

¹¹ Aun aɗi ag mauhak laate aɗappig, iitta laihte gona, eɗun ii uɗippig dayeb amu, ag Pasowanu Hobul daan hekkulagnu amu dimppa, kalam tatamnu uueb, kalam amu dim lamidtte ele, kalam amunu deɗ 14ppa tuebnab hekkulag. Ag sipsip lanana, bret yis iitta, amu keh mua ele amu lakkulag.

¹² Amu ag doɗ teppu laih laa iinab uuppeg dayebeb wakkaɗma; ebehi laippu laa ele ii qiimna. Haen ag Pasowanu Hobul gamag ahak ele hekkulag amu, ag amunu ɗo oh dim lamidkkulag.

¹³ Ɗo amuam aun aɗi ag Kayak ele ouqa dayaknu elele iitta, o aun aɗi ag laih ukka, eɗua ii uɗiak ele, ag Pasowanu Hobul dayak haknu haen dayeye, ahilagnuib. Amu danab laa nug da ele ouqa dayaknu elele, o iitta, laa nug laih ukka, eɗua ii uɗiak ii hak ele amu, nug haenppa Pasowanu Hobul hekkunu tippalkku dayeb amu, nug Israel oolagppanu geɗittak daakkuoitte. Anam daakkun diig am, nug haen da ag ippunadmi, nug haen amuppa doɗ amu awa, da gumiɗa ii uɗia, da ii meɗom. Danab nug anam hekku amu, nug eheɗ hekku, nug amunu bu aokku.

¹⁴ Aria, wan laihnu danab, ag uɗin, ag oolagppa daatteb amu, ag oolagppanu laa nug ag ele oh Pasowanu Hobul gamag ahak ele hekkulagnu oo daakku dayeb amu, nug hekkun elele, amge nug Yawenu Pasowa haknu ɗo oh dim lamidkku. Israel danab, o wan laihnu danab ele oh, ag ɗo laippu amuib dim lamidkkulag,” awa aum.

Lombig Kayaknu peh laug hautom

¹⁵ Deɗ ag mettid haknu peh lag, amuam peh lag men maha aɗit ɗo nai yaak niitte ele appa daattep, ag amu qabappig, haen amuppa lombig na tonom. Anam tone ukke, tuebnu ukka wakkaɗak amu, lombig mettid haknu peh lag attan daye, aab dittiak bia dayom.

¹⁶ Anam haaha, tuɗid ele haaha dayom. Lombig nug amunppa mettid haknu peh lag haute, tuqan amu aab ewak bia dayom.

¹⁷ Haen lombig nug mettid haknu peh lag ikkippanu aha ukke anidna amu, Israel danab ah ag aben amu uun, ahan dim lamidna godappig. Haen lombig nug aben adekkuppa dayeye amu, Israel ag haen tutu dayaknu aab kalattappig.

¹⁸ Yawe Nug lombig amuppa he, Israel danab ah ag ahan godappig, amu lombig amuppaib Nug he, ag haen tutu dayaknu aab kalattappig. Haen lombig nug aben amuppaib mettid haknu peh lag ikkippa dayeye amu, ag aben amuppaib daattappig. Amuam Yawenu haknunab anak dayeye, ag anam heppig.

¹⁹ Haen lombig nug haen elab mettid haknu peh lag igippa dayeye amu, Israel ag Yawe oɗe doon, ag ahan laih ii godappig.

²⁰ Haen laala amu lombig nug mettid haknu peh lag igippa deɗ kuɗum ii dayom amunu, Yawe Nug lombigppa ag daaglagnunab ippuanatom bia, ag aben amuppa deɗ kuɗum ii daadppig. Amge Yawe Nug lombigppa ag gokkulagnunab ippuanatte, ag ahan godappig.

²¹ Haen laala amu lombig nug tueb ukka, buttua batak aakkuib daattom, amu buttua aha ukke amu, ag ahan dim lamidttappig. O lombig nug tuqante laippu, amun laippu ele dayomte, lombig nug aha ukke anidna amu, ag ahan godappig.

²² Haen lombig nug mettid haknu peh lag igippa deɗ aɗit, o iitta kalam laippu, o iitta maɗ laippu keeke daattom amu, Israel ag haen tutu dayaknu aab kalappig, ag aguppaib daadppig, ag ahan laih laa ii godappig. Amge haen lombig nug aha ukkom amu, ag ahan godappig.

²³ Yawe ag haen tutu dayaknu aab kalaglagnu, Nug amu haknunab ippuanattom amu, ag haen tutu dayaknu aab kalattappig. O Nug ag haen tutu dayaknu aabppanu ahan gokkulagnu haknunab ippuanattom amu, ag haen tutu dayaknu aabppanu ahan godappig. Moses nug Yawenu haknunab ippunittak aawo, ag Yawe oɗe dim lamidttappig.