Namba 8 - Nobonob Baibel

Aron nug gol lam eblaih aɗit ele abenppa maattom

¹ Amu Yawe Moses amegppa aum.

² “Na nai imu Aron amegppa a! ‘Na lam eblaih aɗit ele amu lam maattaknu balal amuppa maadppe, amahlak ahilag amu lam balal noobppa amahlaɗ!’ ” awa aum.

³ Moses nug Aron amegppa anam hekkunu aum amunu, nug anam aakku heum. Nug Yawe Moses amegppa haknunab aum bia, lam ahilag abenppa, lam maattaknu balal noobppa amahalkkunu maattom.

⁴ Lam maattaknu balal amu haknu amu, ag gol aon, hamappa qenan, lam maattaknu balal amu diigppan ta ukka, bala daatteppa batak heppig. Amuam Yawe Nug Moses amegppa ag anamnab aakku hekkulagnu ippunittom.

Levi buɗubppan danab ag Yawenu otiadppig

⁵ Amu Yawe, Moses amegppa aum.

⁶ “Na Lewi buɗubppan mana mettak danab iitta Israel laa oh oolagppanu diin heppe, ag oppiak ele dayeg!

⁷ Ag oppiak ele daaglagnu amu, na inam iikkude he! Na le, amuam le heeb danab nug da Yawe, da ele ouqa dayaknu elelenu le amu, na le amu tauɗ qadakkut. Na amu hewona, na heppe, ag beɗulagppan uɗig oh aagppeg ukkeb, ag lamen ahilkad ele ihaladkkulag. Ib amuppa ag oppiak ele daaglag.

⁸ Ag anam hewona amu, ag makau gaiɗ laa, amu ee aegnu ofanu keeke ele, ag keeke amu, doɗ amu ele manan da meɗaglagnu amu, ag aon, peh laugppa wakkulag. Ee aegnu ofa haknu am plaua enanag, olip goɗen ele kaboliak daakku. Amu mana mettak laa, amuam ib etta hipunin haknu ofa, mana mettak amu haknu amu, na makau gaiɗ laa ele aon uɗie!

⁹ Amu na Lewi buɗubppan mana mettak danab iitta diin, dahil mettid haknu peh lag danab ah appa qagmetteb ele, ag peh amu odppa dona, maadppe daappeg, amu na heppe, Israel danab ah oh ele laippu tamanin dayeg!

¹⁰ Na Lewi buɗubppan mana mettak danab iitta diin, da noolppa, dahil mettid haknu peh lag odppa maadppe daappeg amu, na heppe, Israel ag eppelkad Lewi buɗubppan mana mettak danab iitta, ag ag qaɗelkadppa maadkkulag.

¹¹ Amu Aron nug Lewi buɗubppan mana mettak danab iitta, nug Israel danab ah ag danab ah amu ofa mettak bia meɗaglagnu, ag da Yawe, dahil uɗat hekkulagnu, nug Lewi buɗub amu diiatta, da Yawe, nug da gumiɗa uɗia, da noolppa maadkku.

¹² Amu Lewi buɗubppan mana mettak danab iitta ag eppelkad makau gaiɗ aɗit ikkiltippa meppeg, na makau dawai laa aon, ib etta hipunin haknu ofa hena, da Yawe, da meɗakkut. Na anam hewona amu, na makau dawai laa amu aon, manaknu ofa hekkut. Na mana mettak amu henana, na heppe, Lewi buɗubppan mana mettak danab iitta, ahilag eheɗ haknu nob nau doɗ amu tiiltippa iitta mekkunu elele medakku.

¹³ Na anam hewona, na heppe, Lewi buɗubppan mana mettak danab iitta ag Aron, bekkod ele noolkadppa hippaidna daappeg, amu danab nug ee keeke, nug amuppa huma epponitta mettaknu ofa hette, amubia na Lewi buɗubppan mana mettak danab iitta, na ag diiadna, da Yawe, da gumiɗna uɗin, da meɗakkut.

¹⁴ Amu ib amuppa na heppe, Lewi buɗubppan mana mettak danab iitta ag Israel laa oh bia ii daamna. Amu Israel danab ah laa oh amu, ag dahilad daatteb, amge Lewi buɗubppan mana mettak danab iitta ag amu dahil maɗi nid maɗi ah ele daaglagnu, ag dahiladnab daaglag.

¹⁵ Amu oh hak dimppa, Lewi buɗubppan mana mettak danab iitta ag aakku ahilag uɗat hekkulagnu dahil mettid haknu peh lag danab ah appa qagmetteb ele, ag appa dahil uɗat hekkulagnu uɗin, daan hekkulag. Aɗinu? Na he, ag oppiak daaeg, na ele ahilagppa huma epponitta mettaknu ofa bia hena, da meɗame.

¹⁶ Amu aɗinu ⌊ag uɗin, dahil mettid haknu peh lagppa dahil uɗat hekkulag⌋? Ag amu Israel buɗub oolagppanu dahiladnab daaglagnu daatteb. Da hei, ag nid danab tatamnu Israel ah oh oolkadppanu, ag abenlag awak daatteb; ag dahiladnab daatteb.

¹⁷ Israel ooppa nid danab tatamnu, doɗ dawai tatamnu ele amu dahilad. Haen da Isip dilag nid ⌊danab⌋ tatamnu, doɗ amu ele oh aqadmi amu, da ag Israel, da ag oolagppanu nid danab tatamnu, doɗ dawai tatamnu ele oh dahilad daaglagnu anam tituanadmi.

¹⁸ Amge da gemu amu, Israel ooppan nid danab tatamnu oh abenlag aoglagnu, da Lewi buɗub ag diimi.

¹⁹ Da Lewi buɗubppan mana mettak danab iitta ag Israel danab ah oolagppanu diien, da ag uɗat henan, Aron bekkod ele ehanadppeg, Aron, bekkod ele ag dahil mettid haknu peh lag danab ah appa qagmetteb ele, ag heppeg, appa Israel dilag eheɗ haknu nob nau doɗ tiigppa iitta mekkunu elele medappeg, Israel ag mettid haknu peh lag dahilppa gukkuidna wappeg, oɗe nau danab kuɗum aqe mauhtteb ele, ahilagppa bemanu mattami,” awa aum.

²⁰ Moses, Aron, amu Israel oh ele ag Yawe Nug Moses amegppa Lewi buɗubppan mana mettak danab iitta ag amu dilag anam hekkulagnunab aum amu, ag anamnab aakku heppig.

²¹ Amu Lewi buɗubppan mana mettak danab iitta ag oolag ihan oppiak daan, ag lamen ahilag ihalatteg, amu Aron nug ag diiatta, danab nug ee keeke, amuppa nug huma epponitta mettaknu ofa hette, amubia Aron, nug ag diiatta, Yawe gumitta wana, Nug mettom. Anam ha, ag oolag oppiak ele daaglagnu, nug he, ahilag eheɗ haknu nob nau makau dawai aɗit tiiltippa iitta mekkunu elele mettom.

²² Nug anam ha male amu, Lewi buɗubppan mana mettak danab iitta ag mettid haknu peh lag danab ah appa qagmetteb ele, ag appa ahilag uɗatnu uɗippig. Ag appa uɗat heegeg amu, Aron, nug bekkod ele ag aɗi aɗi uɗat hekkulagnu amelagppa aeg, ag heppig. Lewi buɗubppan mana mettak danab iitta, amu dilagnu amu, Israel danab ah ag Yawe, Nug Moses amegppa attem attem haknunab aum amu, ag anamnab aakku heppig.

²³ Amu Yawe Moses amegppa aum.

²⁴ “Nai imuam Lewi buɗub dilag. Lewi buɗub ag ahilag maɗ 25, o iitta 25 eɗittak, ag dahil mettid haknu peh lag danab ah appa qagmetteb ele, ag appa ahilag uɗat hekkulag,

²⁵ amge aun aɗi ag ahilag maɗ 50 aweb amu, ag uɗat, dahil mettid haknu peh lagppa hanhan hekkulag ele amu malaglag. Ag uɗat amu baula ii hemana.

²⁶ Ag lailkad, dahil mettid haknu peh lag danab ah appa qagmetteb ele, ag appa uɗat hetteb ele, ag ag ehanadkkulag, amge ag akka amu, ag uɗat iinab hemana. Na ɗo imuppa, Lewi buɗubppan mana mettak danab iitta ag uɗat atten atten hekkulagnu ippunadkkut,” awa aum.