Namba 5 - Nobonob Baibel

Haen tutu dayaknu aab kalak, Yawe noobppa ena dayaknu ɗo

¹ Amu Yawe Nug Moses amegppa aum.

² “Na Israel haknunab nai madappe, ag aun laa nug gaɗa oɗe nau ele, o iitta beɗunu leppu nau laa nette, o iitta laa nug danab mauhe gaɗa aɗom, nug Kayak ele ouqa dayaknu elele iitta amu, ag gona, aben laih aab dimittim kalan daaglagnu maadppeg gokkulag.

³ Ag danabte, o iitta ahte ag uug amu laa ele amu, ag oh maadppeg, aab dimittim gokkulag. Ag aab kalakppa daanna amu, geha heppeg, dahil neekkakppa ahilag aab am dubuttid tak ele daakku. Da ag Israel, ag oolagppa daattem amunu, danab ah amu ag aab heppeg, dahil neekkakppa dubuttid tak ele daamanu amu, ag maadppeg, aab dimittim gona dayeg!” awa aum.

⁴ Yawe Nug anam hekkulagnu a, Israel danab ah ag anam heppig. Ag heeg, danab o ah uug amu ele amu, ag aab dimittim gona daappig. Yawe Nug Moses amegppa ag hekkulagnu aum amu, ag anamnab heppig.

Eheɗ haknu nob mettak

⁵ Amu Yawe, Moses amegppa aum.

⁶ “Na Israel inam appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Haen danabte, o iitta ahte layagppa eheɗ laa hette amu, kobol amuppa nug Yawe ippunittomnu oo metta ii uuak kobol ii dim lamidtte. Haen laa nug eheɗ anam hette amu, nug Yawe oo niitte ele amu ii hette. Laa nug kobol amu hette amu, nug beɗuppa aab ele.

⁷ Nug beɗuppa aab ele amunu, nug hipunin amu miagib madikkuoitte. Laa hipunin heum ele amu, nug kobol amu bappaidkkunu, nug nob oh tutukku, laa nuhigppa hipunin amu heum, nug nob amu nug medakkuoitte. Nug medakkun haaha, nug nob amu awa, laih 20 pesent laa ele awa, keeke amu oh danab nug nuhigppa heum ele amu medakku.

⁸ Amge danab amu, laa nug nuhigppa eheɗ heum ele amu, nug mauhom dayeb, nug baekkudppan tiig laippu laa nug nob amu aokkunu laa ii daatte dayeb amu, amuam da Yawe, dahil, geha nob amuam mana mettak danab nug aokku. Nob amu tuɗittak amu, laa nug hipunin heum ele, nug sipsip dawai laa, sipsip amuam eheɗ haknu nob nau doɗ tiigppa iitta meeb elele medakkunu daakku, amu nug doɗ amu ele awa, mana mettak danab metteb, mana mettak danab nug doɗ amu tiigppa, danab amunu eheɗ haknu nob nau iitta mekkunu heeb iitta meeb elele medakku.

⁹ Ofa Kayaknu tituanak daatteb ele oh Israel danab ah ag aon dona, mana mettak danab medatteb ele, amu ohnu amu, maha laa mana mettak danab dilag daatte. Anam amu, amuam mana mettak danab aun nug mettaglag amu, nuhigppa daatte.

¹⁰ Haen danab ag ofa Kayaknu tituanak daatteb ele Yawe medatteb amu, amuam anen anen ahilag daatte, amge ag aɗi keeke mana mettak danab anen anen medatteb amu, amuam mana mettak danab, ahilag daakku,” awa aum.

Danab wau eheɗ heum o iitta, amunu ma anttak mettaknu nai

¹¹ Amu Yawe Nug Moses amegppa aum.

¹² “Na Israel amelagppa nai inam appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Danab laa nug wau, nug gamunu oo metta ii uuak kobol ii dim lamitteb, gamu nugib ele ii oiglahtai;

¹³ nug danab laa ele oiglahtai. Nug anam ha, nug gamu doomanu, nug nuhig hipunin amu lokkumeb, gamu nug hipunin heum ii dookkutai. Auntai laa ii anttom amunu, ah nug pelemppa ii teum oittetai.

¹⁴ Anam bekkutai, amge anam beeb, ah amu gamu nug oiyaya, wau nug genab anam heum, o anam ii heum, me gamu nug waunu nug anam heum dabmak awawa, waunu dahil doya laa aomanu doyak aɗa daakku dayeb, nug inam hekkun elele.

¹⁵ Nug wau omala, mana mettak danab toppa wakku. Nug Yawe aum, amubia nug ah amunu mana mettak haknu 1 kilogram bali plaua awa wakkuoitte. Amge amuam nai atten am genab doyaknu ee aegnu ofa, danab nug hette ele amu, nug waunu, dahil doya laa aomanu doyak aɗa daatte amunu, nug olip goɗen amuppa ii gokkaɗma, nug kalu danab ile muttuɗig enanag bette ele amuppa ele ii mema.

¹⁶ Mana mettak danab nug ah amu omala, wana heeb, nug Yawe noobppa hibaitta daakku.

¹⁷ Dayebeb amu, nug le Kayaknu tituanak daatte nippudppa ma, nug mettid haknu peh lagppanu gappud wanppanu amu awa, le ooppa mekku.

¹⁸ Mana mettak danab nug heeb, ah amu nug Yawe noobppa dayeb ukkeb, mana mettak danab nug heeb, ah ikki uɗug uhuqak dayeb, mana mettak danab nug bali plaua, mana mettak haknu ah eppegppa mekku. Amuam nai atten am genab doyaknu ee aegnu ofa, danab nug hette ele amu, nug waunu dahil doya laa aomanu doyak aɗa daatte. Mana mettak danab nug nukka nug le ninig ele, le amuam heeb, ah latte ele nug eheɗ laa awaknu anak waappa daakkunu elele, nug amu aɗakku.

^19-21 Anam dayeb, mana mettak danab nug akku. ‘Haen na gamut ele aa ewau daaeh uɗieye, danab laa nug na ele laa ii niipiɗ, na eheɗ laa ii hee, danab laa ele gappai ii aopiɗ dayeb, na le ninig ele imu, le imuam ah nug beɗuppa aab ele am he, ah nug eheɗ laa awaknu anak waappa daatte amu, na amu lappe heeb, na eheɗ laa ii aomnanu da ool daatte.’ Anam awowa amu, mana mettak danab nug tuɗitta, ah amegppa akku. ‘Amge na gamut ele ewau daayya, na eheɗ hee, danab laa ele gappai aoya, na gamut ele niiak bia, na danab laa ele niipiɗ dayeb, na anam heme dayeb amu, amuppa na nakka na hee, na Kayaknu neekkakppa na ootppa dubuttid teum daatte. Amu anam dayeb, na le ninig ele imu lappe, Yawe heeb, nahipad danab ah laa ag nahipnu eheɗ nau dooppeg, na oot titiɗeb, tuɗin laih laih ebehi teeb, na ah mattoi oikkutnu ool daatte.

²² Yo, le ninig imu, am he, ah nug eheɗ laa awaknu anak waappa daatte amu, na ootppa noa heeb, na oot titiɗeb, tuɗin laih laih ebehi teeb, na ah mattoi, meunuak laa iitta oikkut.’ Mana mettak danab nug anam awowa, nug heeb, ah nug Yawe onigppa nuhig nai ɠagattag qetta, nug, ‘Genab, anam dayaɗ!’ awa akku.

²³ Mana mettak danab nug eheɗ laa awaknu anak waappa dayaknu nai imu buk itoɗiak laappa ya, nug yaak amu iheb, le ninig ele amuppa nokku.

²⁴ Amu dimugppa amu, mana mettak danab nug heeb, ah amu nug le ninig ele, am he, ah nug eheɗ laa awaknu anak waappa daatte amu, ah amu nug lab, le amu ooppa noa heeb, ah nug beɗuppa aab ele daatte dayeb, nug guittak, ninig nau dookku.

²⁵ ⌊Amge ii lanak haenppa, tatam⌋ le babaitta malak dimppa amu, mana mettak danab nug nai atten am genab doyaknu ee aegnu ofa, danab hette ele nug waunu dahil doya laa aomanu doyak aɗa daatte amu, mana mettak danab nug mana mettak amu ah eppegppanu awa, Yawe noobppa huma, epponitta mettowa, nug awa ukka, qaɗabppa gokku.

²⁶ Amu mana mettak danab nug ee aegnu ofanu eppeg laippuppan appuak awa, maha laa oh ou daakkunu, Yawe dabmekkulagnu mana mettak ha, qaɗabppa maikku. Amu dimppa amu, nug heeb, ah nug le lakku.

²⁷ Lab, ah nug gamunu oo metta ii uuak kobol ii dim lamitte, gamu eleib ii niiya, nug danab laa ele gappai aopiɗ dayeb, nug anam heum dayeb, aakku nug ooppa dubuttid teum daatte, amu le ninig ele am he, ah nug eheɗ laa awaknu anak waappa daatte amu, haen ah amu nug lab, le amu ooppa noa heeb, ah nug guittak, ninig nau ele dookku. Nuhigppa anam ele dayebeb, nug oo titiɗeb, tuɗi laih laih oh ebehi teeb, nuhikkud danab ah laa ag nuhignu eheɗ nau dooglag.

²⁸ Amge ah nug danab laa ele ii niipiɗ, nug gamu eleib daapiɗ dayeb, aakku Kayaknu neekkakppa nug ooppa dubuttid iitta, nug beɗuppa aab iitta, amu nug nid menukkunu elele daakku.

²⁹ Imuam gamu waunu dahil doya laa aomanu doyak aɗaɗa daya, babaittaknu nai. Ah nug gamu ele aa ewau daayya, nug danab laa ele aa gappai aopiɗ dayeb amu, inam iikku haknu daatte.

³⁰ Ah nug gamu eleib ii niiglahtai, o ah nug danab laa ele ii oimyatai, amge gamu nug ah nuhignu, nug danab laa ele oittep dabmekku. Kobol aɗit amu oh bekkulahnu elele, amu haen gamu nug waunu dahil doya laa aomanu doyak aɗeɗe daya, nug nuhig dabmakppa nug wau eheɗ heum dabmekku amu, mana mettak danab nug heeb, ah nug Yawe noobppa hibaitta dayebeb, nug keeke amu oh ɗo nai atte bia hekku.

³¹ Amu danab nug wau danab laa ele oipiɗ, nug anam dabmaama, nug mana mettak danab kobol anam haknu mana mettak danab amegppa anana amu, nug eheɗ laa ii hema. Wau nug eheɗ laa ii heum dayeb, gamu nug mana mettak danab kobol anam haknu amegppa anana amu, nug eheɗ laa ii hema; bu laa ii aoma. Amge ah nug gamu eleib ii niipiɗ, nug danab laa ele niipiɗ dayeb amu, nug eheɗ aakku ha, nug amunu bu aokku,” awa aum.