Namba 35 - Nobonob Baibel

Lewi buɗub dilag aab okkai

¹ Israel danab ah ag haen tutu dayaknu aab, Moap uɗemppa, Jodan le ihippa, laih Jerikonu ukkakppa kalan daaegeg amu, Yawe Nug Moses amegppa aum.

² “Ag imu hekkulagnunab Israel danab ah amelagppa appe, ag aab okkai, Lewi buɗub madappeg, ag amuppa dayeg! Kanan wanppa amu, aab okkai kuɗumnab daatteb. Da geha aulag wan amu, Israel madakkul amunu, Lewi buɗub ag wan amuppa daaglagnu, ag Lewi buɗub aab okkai laala madappeg, ag amuppa daaglag. Ag aab okkai, amu aab amunu taliliattak gikkiɗah dad okkai daatteb, ag amu ele Lewi buɗub mattaglag.

³ Israel ag Lewi buɗub keeke amu madappeg amu, ag aab okkai amuppa daanna, ag gikkiɗah dad, ag amuppa makau, sipsip, amu doɗ laala oh ele ahilkad, ag doɗ amu dad amuppa maadppeg daaglag.

⁴ Aab okkai ag Lewi buɗub mattaglag amu, aab amu anen anennu gikkiɗah dad okkai taliliattak amu, uma ukkak ahilkad amu 450 mita batak aab okkainu aɗppan digma ukkak daakku.

⁵ Ib amuppa amu, wannu uma ukkak daug laih laih waɗele oh amu 900 mita daakku. Aab okkai am, wan amu gamagppa daakku. Wan amuam gikkiɗah dad ahilagnu amu, amuppa doɗ ag daan lakkulagnu daakku.

⁶ Ag aab okkai 48 amu Lewi buɗub mattaglag. Aab okkai eblaih laippu ele amu ii doyaya laa qe mauhomnu ehanittak aab okkai daaglag. Israel ooppa danabte, o ahte nug ii doyaya laa qeeb mauheb, danabte, o iitta ahte nug aab okkai laa amuppa ukka, nug ena daakku. Amu tuɗittak amu, ag baula aab okkai 42, gikkiɗah dad okkai ele matteg! Amu oohoak am 48 oh.

⁷ Aab okkai 48 amu taliliattak, ag gikkiɗah dad okkai ele ag matteg!

⁸ Israel danab ag Israel dilag huu okkai anen anen dilag wan am, aab okkai gane daatteb, ag amu anidnana, aug wan amu, nuhig aab okkai gane daatteb, melemel amuppa ag huu amunu aab gane Lewi buɗub mattaglag, ag amu dabmekkulag. Israel dilag huu okkai laa nug nuhig wanppa aab okkai kuɗum ele amu, amuppanu ag aab kuɗum mattaglag; laa am nuhig wanppa aab okkai kuɗum iitta ele amu, ag amuppanu kuɗum iitta mattaglag,” awa aum.

Ii doyaya laa qe mauhomnu ehanittaknu aab

⁹ Yawe Nug nai amu Moses amegppa awowa amu, Nug tuɗitta, imu ele aum.

¹⁰ “Na Israel danab ah amelagppa appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Haen ag Jodan le mataɗna Kanan wanppa nona amu,

¹¹ ag aab okkai eblaih laippu ele, laa nug laa ii doyaya qe mauhomnu ehanittak aab okkai daaglagnu tituankkulagoitte. Ag anam hekkulag amunu, aun laa nug ii doyaya, laa qeeb mauhkku amu, nug qaietta ukka, aab amuppa ena daakkunu gokku.

¹² Aab okkai amuam, laa nug laa qe mauhom ele, mauhak layag laa nug qe mauhak danab qeeb mauhkkunu daatte amu, nug wana qeeb mauhmanu, laa layag qe mauhom amu, nug aab amuppa, guppiɗ dimugppa lokkumak dayak bia, nug appa nuhig hettoɗiak ii hak haenppa daakkunu daaglag.

¹³ Israel danab ag aab okkai eblaih laippu ele amu tituanppeg, aab amu ag Israel, ahilag aab, aun laa nug ii doyaya laa qe mauhomnu ehanittak aab okkai daaglag.

¹⁴ Jodan laih ippanu amu, ewam mattanna, amu Kanan appanu ag ewam laa nug ii doyaya laa qe mauhomnu ehanittak aab okkai mattaglag.

¹⁵ Aab okkai eblaih laippu amu, ag am Israel danab, wan laihnu danab aun aɗi laa ele, ag uɗin, ag oolagppa daatteb, am ag ahilag ii doyaya laa qe mauhomnu ehanittak aab okkai aakku. Aab amuam ahilag ii doyaya laa qe mauhomnu ehanittak aab okkai daaglag amunu, aun nug laa ii doyaya qeeb mauheb amu, nug appa qaietta ukka daakku.

¹⁶ Qe mauhak danab dilag aab okkai am, aun nug ii doyaya laa qe mauhom ele, nug ena daakkunu aab, amge aun laa nug aen mahappa laa qe mauhom dayeb amu, nug am qe mauhak danab aakku daatte. Ag danab duug wak amu heum amu, ag nug qeppeg mauhkku.

¹⁷ Aun nug men laa bannu keeke bia awa, laa amuppa qe mauhtte amu, nug am qe mauhak danab. Ag danab duug wak amu heum, ag nug qeppeg mauhkku

¹⁸ O iitta, aun laa nug ad maha laate bannu keeke bia awa, laa makkuɗe mauhtte amu, nug am qe mauhak danab. Ag danab duug wak amu heum, ag nug qeppeg mauhkku.

¹⁹ Hettoɗiak danab ag laa nug layag qe mauhom ele tutukku hettoɗidna malan, danab amu nug doyaya, laa qe mauhom anidna, ag heppeg, danab nug layag doyaya, qe mauhom ele amu, ag nug eɗua, aab digppa ukkeb, laa nug qe mauhak danab nob ma qeeb mauhkkunu daatte amu, nug qeeb mauhkku. Ao, laa nug qe mauhak danab qeeb mauhkkunu daatte amu, nug antta, amu qeeb mauhkku.

^20-21 Danabte, o ahte nug oo aeg bak doyaya oiyaya, laa ehaleb, o keeke laa buɗieb ukka, laa qeeb mauhkku, o iitta nug laa kekeɗ metta, eppeg bitakka, laa makkuɗeb mauhkku amu, nug amu, nug aakku qe mauhak danab daatte. Ag laa nug amu heum, ag nug qeppeg mauhaɗ! Laa nug qe mauhak danab nob ma qeeb mauhkkunu daatte ele, nug antta, qe mauhak danab amu qeeb mauhkku.

²² Amge laa nug kekeɗ ii metta, layag ehaleb na qa mauhkku, o iitta keeke laa ii doyaya buɗieb ukka, layag qeeb mauhkku,

²³ o iitta, nug layag ii andatta, men okkai laa qeeb mauhkkunu elele am paɗeb noa, layag qeeb mauhkku amu, nug am danab qe mauhak danab iitta. Nug am laanu kekeɗ iitta. Nug laa guittak medakkunu ii dabmeum.

²⁴ Nug am laa qeeb mauhkkunu dabma ii heum amunu, nuhikkud mudippan laippu ikki danab, ag nug keeke amunu hettoɗidtteb ele, ag ɗo amuppa nug hettoɗidna, ⌊nug ii mauhmanu⌋ ehanidkkulag.

²⁵ Ag amu hena, ⌊genab⌋ nug ii doyaya anam heum ⌊anidkkulag dayeb amu, ag anam⌋ anana, ag heppeg, layag nug qe mauhak danab nob ma qeeb mauhkkunu daatte ele amu, nug aib qe mauhak danab qeum. Ag qe mauhak danab amu, nug laa nug layag ii doyaya qe mauhomnu ehanittak aab okkaippa qaietta ukkom amu, ag heppeg, nug eɗua, appaib ukka, laa nug qe mauhak danab qeeb mauhkkunu dabmette ele, nuhignu awaittak daakku. Ag nug appa meppeg ukka dayebeb, mana mettak ikki danab, Kayaknu tituanak daattenu goɗen gokkaɗakppa tituanppig ele amu, nug mauheb, danab amu nug eɗua appag diigppa dokku.

²⁶ Amge danab nug ii doyaya layag qe mauhom ele, nug haen adekkuppa ii doyaya laa qe mauhomnu ehanittak aab okkaippan dimittim wab amu,

²⁷ laa nug qe mauhak danab nob ma qeeb mauhkkunu daatte amu, nug qe mauhak danab aab okkai dimittim anidkku amu, nug qeeb mauhkku. Nug anam hekku amu, nuhignu, ‘Nug am qe mauhak danab,’ dabmak amu ii daama.

²⁸ Aɗinu? Laa nug ii doyaya laa qe mauhom, nug ii doyaya laa qe mauhomnu ehanittak aab okkaippa dayebeb ukkeb, mana mettak ikki danab mauhkkuoitte. Nug eɗua aabppa gokkunu amu, mana mettak ikki danab mauheb amu, haen amuppa aakkuib nug gokkun daatte.

²⁹ Dahil ɗo imu amu, ag, amu ag buɗulkad buɗub buɗub dokkulag ele, ag oh hanhan dim lamidkkulagnu daatte. Ag adeppa daaglag amu, ag dim lamidkkulagib.

³⁰ Amu laa nug laa doyaya qeeb mauhkku dayeb, hettoɗiakppa aɗi heehe anttomnu mattiak danab ag aɗi anidppig hettoɗiak danab amelagppa appeg, laa nug genab anam heum dayeb amu, ag qe mauhak danab amu qeppeg mauhkku; amge danab aɗit, o iitta ewam, ag nug genab anam heum amelagppa anidppig daakkun daatte. Laippu anttom dayeb, amuam elele iitta.

³¹ Ag aun nug genabnab laa doyaya qe mauhom dayeb anidna amu, ag nug qeppeg mauhkku. Ag aib heppeg, nug qagaiettakppa daamanu men doɗoppa uhuqak awom. Iitta! Ag doyaya qe mauhak danab genab qeppeg mauhaɗ!

³² Amu ele, laa nug laa qe mauhom, nug ii doyaya laa qe mauhomnu ehanittak aab okkaippa qaietta ukka dayebeb, hettoɗiak danab ag nug hettoɗin, nug ii doyaya heum anidna amu, ag nug uuidppeg, aab okkai amuppa dayeb ukkeb, mana mettak ikki danab mauhkku. Ag aib mana mettak ikki danab ii mauhom dayebeb heppeg, qagaiettakppa daamanu men doɗoppa uhuqak awa, eɗua dayomppa ukkom.

³³ Doyaya laa hamu qe mauhak am wan dubuttid mettak amunu, ag wan ag daatteb, ag amuppa aib heppeg, dubuttid ele dayom! Wan dubuttid mettak dayeb, eɗua heeb ena daakkunu amu, qe mauhak danab amu, ag qeppeg mauhkku. Amu bekkunu, am ib laa iitta.

³⁴ Da, Yawe, da ag Israel danab ah oolagppa daattem amunu, ag wan ag daattebppa, da ele daattemppa, ag wan amu aib heppeg, dahil neekkakppa dubuttid tak ele dayom.” Yawe Nug anam aum.