Namba 32 - Nobonob Baibel

Israel laala, Jodan le laih kaɗag uɗitteppanu daaglagnu appig

¹ Ruben buɗub, Gad buɗub, ele amu, ag makau, sipsip ele huana bekkadppig. Ag neegna amu, wan onig Jaser, am wan laa onig Gileat ele, wan aɗit amu aa gikkiɗah huana ele anatppig. Aben amuppa makau, sipsip ele daaglagnu enanag anidppig.

² Ag anam anidna, Moses, mana mettak danab Eleasar, amu Israel danab ah dilag ikki danab ele gumadna gona appig.

^3-4 “Yawe, danab ah wan imuppa daappig ele amu eɗadkkunignu ig Israel ehanikkom. Aab okkai wan imuppa daappig ele onilkad amu inam; Atarot, Dibon, Jaser, Nimra, Hesbon, Eleale, Sebam, Nebo amu Beon ele. Wan aab okkai amu taliliattak amu makau, sipsip ele ag gikkiɗah lakkulagnu enanag ele. Ig, nahip maɗi nid, ihinkad makau, sipsip am doɗ laala kuɗum ele daattem,

⁵ amunu na ootppa ihinignu ena doottem dayeb amu, na wan imu, ig, ig am nahipad maɗi nid amu, na ig megakkutnu oonig huana hette. Megappe, ihinig dayebeb, ig wan amuppa daagnig. Na heppe, ig Jodan le mataɗta, laih wata, appa daagnignu oonig ii daatte.” Ruben buɗub, Gad buɗub ele, danab amu ag anam aakku appig.

⁶ Gad, Ruben danab ele ag anam aeg amu, Moses nug nai ahilag nob ma aum. “Ag lailkad ban hekkulagnu gobeppeg, ag imuppa daaglag am enate?

⁷ Yawe Nug wan Jodan le mataɗak, laih umu Israel danab ah ig mekkom amunu, ag aɗinu Israel danab ah laala oh, Yawe Nug ag gona, ban hena, wan aoglagnu mattom, ag amu aoglagnu dabmetteb amu, aɗinu ag ahilag dabmak qeppeg neeb, appa ii gomananu hetteb?

⁸ Haen ig Kades Barnea daatta, da ag mamelkad laala wan italkkulagnu maatti goppig amu, ag eɗun uɗin, ag heppig amubiaib ag gemu hetteb.

⁹ Ag ahan gona, oolnu noak onig Eskol, appa batak gonana, wan amu italna oiyona, ag eɗun uɗina, ag Israel danab ah laa oh, ag Yawe wan ag aoglagnu mattom ele, ag amuppa nokkulagnu dabmenan daappig, ag ahilag dabmak amu qeeg neum.

¹⁰ Kobol amu heeg, deɗ amuppa Yawe Nug oo nauhe, Nug imu heeb bekkunu nuhig nai ɠagattag qetta inam aum.

^11-12 Danab ah imu ag meulkad ohppa ele, ag da dim ii lamiɗppig amunu, danab oh ag maɗ 20, o iitta maɗ 20 eɗittak, ag Isipnu uɗippig ele, amu oolagppanu aɗit aakkuib, wan da ag madakkulnu ami ele, amuppa wakkulah. Danab amuam Jepune bekka Kalep, Kenis buɗubppan danab, amu Nan bekka Josua ele; aa aakkuib wan amuppa wakkulah. Auntai laa da wan amunu dahil nai ɠagattag qette, Abraham, Aisak, amu Jakop ele ag, am ag buɗulkad ele madakkulnu ami amu, ag oolagppan laa ag wan amu iinab anidmana. Kalep, Josua ele aa aakkuib wan amuppa tekkulah. Aa wan amuppa tekkulahnu diig am, aa da Yawe, aa da meulah ohppa ele dim lamiɗpiɗ.

¹³ Yawe Nug Israel dilagnu oo huana nauhe, Nug he, ag atu taɗakppa maɗ 40 oh yawaina oippig. Ag anam oinna, Yawe he, laa kobol eheɗ heppig ele, ag mauhadna iitta meppig.

¹⁴ Amu gemu daatteb ele imu ag, ag am hipunin danab bekkod; ag amu, ag mamelkad heppig bia hetteb. Kobol ag hetteb, amuppa ag heeg, Yawe Nug Israel dilagnu tuɗid, oo huanak nauhtte.

¹⁵ Ag Nug ii dim lamidppeg amu, Nug baula danab imu ag atu taɗakppa uuatteb oippeg, hadappeg nauhkkulag. Amu ag ahilag padal mak amu, am ag beɗulagppa padal meppig daakku.” Moses nug Gad buɗub, Ruben buɗub ele, nug ag amelagppa anam aum.

¹⁶ Moses nug anam amelagppa a amu, ag nug gumidna uɗin appig. “Ig Gad, Ruben ele buɗulti danab, ig doɗ ihinkad dilag aɗ, amu ah, nid, nid ahin ihinkad ele dilag aab okkai kalagnignu oonig hette.

¹⁷ Amge ig danab amu, ig bannu keeke aɗat, Israel laa oh ele noolag aot diit, aben ag daaglagppa gopput, ag aben amu aon malan daaglag. Ig anam hekkunignu dabmettem, amge haen gamag imuppa, wan imuppan danab ag ihinkad ah, nid ele aqamnanu, ihinkad ah, nid ele ag aab okkai ɠagattag aɗ eleppa daaglagnu dabmettem.

¹⁸ Ig paha ii uɗimta, iitta. Ig daapput ukkeb, Israel oh ag wan, Yawe ag aulag daakkunu madakkunu aum ele amu, ag amu aon malan daappeg, ig eɗut uɗignig.

¹⁹ Aɗinu? Yawe Nug ig wan aunig, ippa Jodan laih kaɗag uɗitteppanu mekkom amunu, ig wan aunig Israel laala ele oh laih Jodannu qaban nedeppanu amu, ig amu ii aomta,” aon appig.

²⁰ Ag anam aeg, aria Moses ag amelagppa aum. “Ag appig bia genab heppeg, amuam enanag. Amuam ag ban hekkulagnu bannu keeke oh Yawe noobppa aɗualadna,

²¹ amu ag oh Yawe noobppa ban haknu babaittak ele Jodan le mataɗna gona, ban heppeg ukkeb, Yawe Nug heeb, ag kekeɗ lamadppeg,

²² ag Yawenu ehanittakppa wan Israel danab umu dilag oh eɗadna malona, ag eɗun uɗin, wan imuppa ena daaglagnu elele. Ag uɗat amu genab hekkulag dayeb amu, Yawe Nug ahilagnu, ‘Ag imu imu ele hekkulagnu daappig, amge ii heppig,’ ii dabmema. Israel laa oh ele am anamib. Anam dayeb, Yawe noobppa wan imuam ahilag aakku daakku.

²³ Amge ag keeke, da ag hekkulagnunab ippunadmi imu, ag ii heppeg amu, ag aakku Yawe, nuhigppa hipunin hekkulag. Ag aibnab dabmak hambuppuak aoppig! Ag hipunin qewona amu, ag hipuninnu nob nau aoglag.

²⁴ Amunu ag ahilkad ah, ahilkad nid ele, ag aguppa daaglagnu, ag aab okkai kaladnana, amu sipsip bekkadkkulagnu aɗ ele bappaidkkulag, amge ag aɗi hekkulagnu nai anan qagappig amu, amuam hekkulagnab daatte!” Moses nug anam awa aum.

²⁵ Moses nug anam a amu, Gad buɗub, Ruben buɗub ele, danab amu ag Moses amegppa appig. “Ig am nahip maɗi nid. Ig geha na, ihinig naɗi, na ig aɗi hekkunignunab ame bianab hekkunig.

²⁶ Ig geha ihinkad nid naunau, ah, amu ihinkad makau sipsip keeke aab okkaippa, Gileat wanppa ippa uuadpput daaglag.

²⁷ Amge ig nahipad maɗi nid amu, ig oh, ig geha Yawe noobppa ban hekkunignu bannu keeke aɗualadta, Jodan le mataɗta, laih uppa gokkunig. Ig geha na ame bianab hekkunig. Na am ihinig naɗi, ig amu nahip maɗi nid,” aon appig.

²⁸ Ag anam aeg amu, Moses nug mana mettak danab Eleasar, Nan bekka Josua, amu Israel dilag huu okkai ooppan baelkadppan anen anen dilag ikki danab ag Gad buɗub, amu Ruben buɗub ele, danab amu ag attem attem hekkulagnu amu amelagppa aum.

²⁹ Nug nai imu amelagppa aum. “Gad buɗub, Ruben buɗub ele, danab amu oh ag Yawe noobppa bannu keeke aɗualadna, ag ban hekkulagnu ag noolagppa Jodan le mataɗna goppeg, ag oh, haen ag danab ag gemu appa daatteb ele eɗadna, ahilag wan aona amu, ag Gileat wan amu, ag wan amu Gad buɗub, Ruben buɗub ele, ahilag daakkunu mattaglag.

³⁰ Amge ag ban hekkulagnu bannu keeke ii aɗualadppeg, ag ele Jodan le ii mataɗna, laih wakkulag dayeb amu, ag ag ele oh Kanan appa ahilag wan daakkunu wan aoglag,” awa aum.

³¹ ⌊Gat, Ruben ele huuppan danab ag appa Moses guguittak daaegeg, nug Elieser, Josua, amu Israel dilag ikki danab ele amelagppa aawo, Gad, Ruben ele huuppan danab ag dooppig.⌋ Ag Moses nai aum amu doona, ag appig, “Nahip maɗi nid ig, ig geha Yawe aɗi aum amu hekkunig.

³² Ig geha Yawe noobppa ban hekkunignu bannu keeke aɗualadta, ig le mataɗta, laih Kanan wakkunig, amge keeke aulag ig aognig ele, amuam Jodan le laih ippanu daakku,” aon appig.

³³ Ag anam aeg amu, Moses nug Amo dilag king Sihon, amu Basan dilag king Og ele, ahilti wan amu Gad buɗub, Ruben buɗub, amu Israel dilag huu okkai Manase mahaib, Manase nug Josep bekka amu, nug ag mattom. Nug wan amu, wan amunu aab okkai, amu wan aab okkai amu taliliattom ele ag mattom.

^34-36 Gad danab ag aab Dibon, Atarot, Aroer, Atrot Sopan, Jaser, Jogbeha, Betnimra amu Betharan ele eɗun bappalatteg, ag aab okkai ɠagattag aɗ ele daaegeg, ag ahilkad sipsip, meeme ele dilag aɗ ele italadppig.

^37-38 Ruben danab ag am, Hesbon, Eleale, Kiriataim, Nibo, Balmeon amu Sibma ele eɗun bappaladppig. Ag aab okkai aɗit Nebo, Balmeon ele bappalatppig haenppa amu ag onilti laa ataɗatppig.

³⁹ Manase bekka Makir buɗub ag Gileat wanppa goppig. Ag gona, aab amu aona, ag Amo danab ag appa daappig ele lamadppig.

⁴⁰ Ag anam heppig amunu, Moses nug Makir buɗub, ag am Manase buɗub amu, nug ag Gileat matte, ag aguppa wana daappig.

⁴¹ Jair, Manase buɗub laa, nug Gileat ooppan aab naunauppan danab lamatte ahaeg, nug aab amu onilag Jair Aab ataɗattom

⁴² Amu danab laa, nug onig Noba, nug ban ha, danab aab Kenat, amu aab laala talilittak daappig oh eɗattom. Nug danab Kenet aabppa daappig, nug amu oh eɗatta, nug nukka onig awa, aab amu onig Noba ataɗom.