Namba 31 - Nobonob Baibel

Israel, Midian ele ban heppig

¹ Amu Yawe Nug Moses amegppa aum.

² “Midian danab ah ag Israel eheɗ hadappig amunu, na ag bu matte! Amu dimppa na mauhkkut,” awa aum.

³ Yawe anam aum amunu, Moses nug Israel amelagppa aum. “Ahilkad danab laala ag goppeg, Midian ele ban hekkulagnu bappaidkkulag. Yawe Nug danab amu bu madakkunu dabmedatta, Israel dilag daup eppelagppa anam hekku.

⁴ Ag heppeg, Israel huu anen anenppanu danab 1,000 ag Midian danab ele ban hekkulagnu ukkeg!” awa aum.

⁵ Yawe anam aum amunu, Israel dilag huu okkai anen anenppanu danab 1,000 otiadppig; danab 12,000 amu ag ban hekkulagnu babaittak daappig.

⁶ Ag babaittak daaeg amu, Moses nug maatte, bannu goppig. Amuam Israel dilag huu okkai anen anenppanu danab 1,000 otialattak ele. Nug he, mana mettak danab Eleasar bekka Pinias, nug ele oh goppig. Pinias nug mettid haknu peh lagppanu keeke laala, amu trampet, attem attem iwaladppeg ban danab ag dooglagnu am awe ele goppig.

⁷ Yawe Moses amegppa ag anam hekkulagnunab aum bia, ag hena gona, ag Midian ban daup ele ban hena, ag Midian danab okkai oh ⌊appa daappig amu⌋, ag aqappig.

⁸ Danab aqappig oolagppa amu Ewi, Rekem, Sur, Hur, Reba ele. Danab amu, ag am Midian ooppanu king tanig ele. Ag Balam, Beor bekka, ag nug ele qep elabppa qeeg mauhom.

⁹ Israel ban daup ag amu hewona, ag ah, nid ele aɗualadna, makau, meeme, sipsip, donki, amu keeke laala Midian dilag oh ele diippig.

¹⁰ Ag aab oh Midian danab ah daappig ele, ag amu manadnana, ahilkad haen tutu dayak aab kaladppig ele manadppig.

^11-12 Amu ag Midian dilag keeke oh, aria ah, nid naunau, nid, nid ahin ele, ag ag aɗalatteg, ag eppelagppa daappig, amu doɗ ele oh ag akkan, Moses, mana mettak danab Eleasar, amu Israel danab ah oh ele dilagppa goppig. Israel danab ah ag am Moap wan uɗemppa, Jodan le ihippa, laih, Jerikonu ukkakppa, appa haen tutu dayak aab kalan daappig.

¹³ Ag keeke amu oh akkan ukkaegeg, Moses, mana mettak danab Eleasar, amu Israel danab ah dilag ikki danab ele ag haen tutu dayaknu aab kalan daappigppanu ahan, ag uɗalag tekkulagnu, aab kalak amu dimittim goppig.

¹⁴ Moses nug ban daup 1,000 dilag ikkilkad, amu ban daup 100 dilag ikkilkad ag banppanu eɗun uɗippig amu, nug amu dilagnu oo nauhom.

¹⁵ ⌊Nug ban daup ikki danab amu, ahilagnu oo nauhaknu diig am; ag Midian ah ii aqappig, amunu nug ag oɗ mattom.⌋ “Ag Midian ah oh am bau daaglagnu appigte?

¹⁶ Ah amu ag aakku, ag Balamnu ulum nai dim lamidna, ag Peor appa ⌊Israel kobol nau hekkulagnu oolag eeɗna⌋ heeg, Israel danab ah Yawenu oo metta ii uuak kobol ii dim lamidna, hipunin heppig. Ag anam heppig amu, ag amu iite dootteb? Ah amu ag anam heeg amu, oɗe nau danab kuɗum aqe mauhtteb ele, oɗe amu Yawenu danab ah dilagppa beum.

¹⁷ Anam be, ag aakku gona, Midian danab okkai oh aakku aqan malappig, amge gemu amu, ag nid naunau, nid danab daatteb, aria ah aun aɗi ag danab ele niippig ele amu, ag ag oh ele aqeg!

¹⁸ Amge ah makkun ag danab ele ii niippig ele amu, ahilkad ah, o iitta maɗi ah daaglagnu uuadppeg dayeg!

¹⁹ Ag aun aɗi ag laa aqappig, o iitta laa mauhppig ele gaɗalag aɗualadppig ele, ag oh, deɗ eblaih aɗit ele haen tutu dayaknu aab kalak imu dimittim daaglag. Deɗ ewamppa amu, deɗ eblaih aɗitppa ele ag, aria Midiannu ag aɗualadna, ag eppelagppa daatteb ele, ag ahilagppa ele hena, ag Kayak ele ouqa dayaknu elele daaglagnu beɗulag, oolag ele babaitteg!

²⁰ Ag lamen oh, aria keeke laa doɗ gaɗappa hattak, o meeme uɗilkadppa hattak, o iitta adppate hattak, ag amu oh ele heppeg, oppiak dayeg!” Moses nug nai amu Israel daup amelagppa aum.

²¹ Moses nug nai amu mattia male amu, mana mettak danab Eleasar nug daup danab banppa goppig amelagppa aum. “Yawe Nug Moses ɗo mettom ele, amu inam haknu ippunigtte.

^22-23 Keeke gol, silwa, brans, aen, tin, led, amu keeke laala eleppa hak aab aɗuppa meppeg, aab nug ii heeb nauhma amu, ag keeke amu aabppa meppeg, am oppiak bekku. Amge oppiak dayaknu gogppa tekkunu amu, ag aab aɗuppanu diin amu, ag le, amuam le heeb danab nug Kayak ele ouqa dayaknu elelenu le amu, ag le amu aon, keeke le amuppa tauɗ aqadppeg, oppia dayaknu am gogppa tekku. Amu keeke ag aab aɗuppa meppeg nauhkkulag ele amu, ag keeke amu le amuppa heppeg, oppiak daaglag; ag aib aab ewakppa meppig.

²⁴ Deɗ eblaih aɗitppa amu ag lamen ahilkad ihaladna, ag Kayak ele ouqa dayaknu elele bekkulag. Ag anam hena, haen tutu dayaknu aab kalakppa nokkulag.” Elieser nug nai amu Israel dilag ban daup amelagppa mattiom.

Kayak, Israel amelagppa keeke oh Midian dilagppa awak amu attem paniaknu aum

²⁵ Amu Yawe, Moses amegppa aum.

²⁶ “Na, mana mettak danab Eleasar, amu Israel ooppa baelkadppanu ikki danab ele ag Midian ah oh ag aɗualatteg, ag eppelkadppa daatteb, doɗ ele diippig, am keeke laa oh ele ebaqadkkulag.

²⁷ Doɗ, am ah amu ele, daup ag Midiannu diippig amu, ag otippeg ameg aɗit daaglag. Obatak laa amu daup ag banppa goppig ele mattaglag, laa amu Israel danab laa oh ele mattaglag.

²⁸ Ag keeke oh otin malana amu, ag daup danab, ag ahilkad keeke ii mattak haenppa amu, ag makau 500 ebaqadna, laippu da, Yawe, da meɗaglagnu otieg! Anam heppeg ukkeb ukkeb, makau oh am ebaqak daaglag. Sipsip ele anamib hekkulag, donki ele anamib hekkulag, meeme ele anamib hekkulag, amu ah ele anamib hekkulag. Keeke ag da, Yawe, ag da meɗaglag, amuam takis daden mak bia aakku.

²⁹ Takis bia daden mak amu daup dilagppanu aona amu, mana mettak danab Eleasar mettaglag. Amuam da, Yawe, dahilnu laih aakku.

³⁰ Ag anam hena malana amu, ag Israel danab ah dilag amu ii mattak haenppa, ag makau 50 ebaqana, laippu am da, Yawe, ag da meɗaglagnu otieg! Anam heppeg ukkeb ukkeb, makau oh am ebaqak daakku. Sipsip ele anamib hekkulag, donki ele anamib hekkulag, meeme ele anamib hekkulag, amu ah ele anamib hekkulag. Keeke amu oh am Lewi buɗub mattaglag. Ag aakku da, Yawe, ag dahil mettid haknu peh lag dabmedatteb.” Yawe anam aum.

³¹ Yawe anam aum amunu, Moses, mana mettak danab Eleasar ele aa Yawe, Moses anam hekkununab aum bia hepiɗ.

^32-35 Doɗ, amu ah ag deɗ laa danab laa ele ii niippig, Israel dilag daup ag Midiannu diin goppig ele am, ahilag ebqak am inam; sipsip 675,000, makau 72,000, donki 61,000, ah 32,000 ele. Ah amu ag danab laa ele ii niippig.

^36-40 Aria, daup ag ban heppig ele, ahilagnu otiadppig amu, sipsip 337,500, makau 36,000, donki 30,500 amu ah 16,000 ele. Amuppanu Yawenu takis daden bia otieg waum am inam; sipsip 675, makau 72, donki 61, amu ah 32 ele.

⁴¹ Moses nug mana mettak danab Eleasar keeke imu takis daden mak bia Yawenu daakkunu otia mettom. Amuam Yawe Nug Moses amegppa anam hekkununab aum bia heum.

^42-46 Moses nug doɗ, ah danab ele ii niippig ele, Israel danab ah dilagnu amu epeɗiak ameg laa piɗe ma, ameg laa epeɗiak daup banppa goppig ele dilagnu piɗe meum. Israel danab ah dilag epeɗia otia mattom am inam; sipsip 337,500, makau 36,000, donki 30,500, ah 16,000 ele. Ah amu ag danab ele ii niippig.

⁴⁷ Moses nug ah amu, doɗ ele Israel mattak amuppanu 50 ebaqa, laippu awa, Yawenu daakkunu otiom. Nug Yawe, anam hekkununab aum bia heum. Nug oh ebaqa mala amu, nug tituanattom ele, amu Lewi buɗub mattom. Lewi buɗub ag amu mettid haknu peh lag dabmedattappig.

⁴⁸ Anam hak daye amu, ban daup 1,000 dilag ikkilkad, amu ban daup 100 dilag ikkilkad ag Moses gumidna gona,

⁴⁹ ag nug amegppa appig. “Ig nahip maɗi nid amu, ig daup ihinig, ig ag gumadttem ele amu, ig ag ebaqadmut, amu laippu laa ii qettoɗom.

⁵⁰ Amunu ig anen anen golnu keeke Midian dilagppan aomut ele amu, ig Yawe mettagnignu akkat uɗimut. Keeke amuam nuhignu mana mettak bia aakku. Keeke ig Midian dilagppan aomut ele amu inam; eɗi, eppelag baagppan eɗi, ahilkad doyaknu at ringppa daatteb, daulagppan bala, am kalele ele. Ig keeke amu ihinig eheɗ haknu nob nau amuppa iitta mekkunu hepput, elele medakkunu aakku Yawe noobppa hettem,” aon appig.

⁵¹ Ag anam aeg amu Moses, mana mettak danab Eleasar ele aa ag eppelagppan gol amu aopiɗ. Keeke oh golppa kobol kobol ele hattak.

⁵² Ban daup 1,000 dilag ikkilkad, amu ban daup 100 dilag ikkilkad dilagppa gol, Moses, Eleasar ele diiya meya, Yawe medapiɗ ele, amunu uug amu 190 kilogram.

⁵³ Ban daup ikki danab ag anam heppig, amge daup danab hamu ag ele keeke laala diippig amu, keeke amuam imu ooppa ii dayom.

⁵⁴ Moses, mana mettak danab Eleasar ele aa ban daup ikki danab dilagppan gol amu diiya, mettid haknu peh lag danab ah appa qagmetteb ele, aa amuppa aoya nopiɗ. Amuam Yawe aɗi heum, amu Israel ag anidppeg, dabmak ahilagppa daakkunu at daakkunu mepiɗ.