Namba 30 - Nobonob Baibel

Keeke genabnab haknu nai anan qakkak

¹ Moses nug nai imu Israel dilag huu okkai dilag ikki danab amelagppa aum. “Yawe ag inam hekkulagnunab atte.

² ‘Haen danab laa nug Yawe amegppa keeke genabnab hekkunu nai ana qagatte, o iitta nug keeke hekkunu Kayak onigppa nuhig nai ɠagattag qetta atte amu, nug nuhig nai amunu hamu bia doya, iinab okkulma. Nug keeke hekkununab aum am hekkuoitte.

³ Haen ah makkun laa danab ii awom dayaya, nug mameg laugppa daatte, nug Yawe amegppa keeke genabnab hekkunu nai ana qagatte, o iitta nug keeke genab hekkunu maditte amu,

⁴ mameg nug aɗeg keeke genabnab hekkunu nai ana qakkom, o iitta nug keeke genab hekkunu mattiom, mameg nug aumnu doya, aɗeg amegppa, “Na ame am, na ii hemana,” ii akku dayeb, ah makkun amu, nug aɗi keeke genabnab hekkunu nai ana qakkom, o iitta nug keeke genab hekkunu mattiom amu, nug keeke amu hekkuoitte. Nug nai nuhig qe-eɗitta, ii hemanu ib laa iitta.

⁵ Amge haen mameg nug aɗeg aɗi hekkunu aum doya, haen amuppa aɗeg nug keeke genab hekkununab aum amu ii hemanu ab, aɗeg nug aɗi keeke genabnab hekkunu nai ana qakkom, o iitta nug keeke laa genab hekkunu mattiom amu, nug amu ii hema. Nug mameg anam hemanu aib aum amunu, Yawe Nug ah amu anak nuhignu uhuqkku.

⁶ Ah makkun nug keeke genabnab hekkunu nai ana qakkom, o iitta nug dabmak ii awa, keeke hekkunu nai ana qakkom dayebeb, dimppa nug danab aokku amu,

⁷ gamu nug doya, haen amuppa nuhigppa aɗitai laa ii akku dayeb amu, ah nug keeke genabnab hekkunu nai ana qakkom, o iitta, nug keeke genab hekkunu mattiom amu, nug amu hekku.

⁸ Amge haen gamu nug wau aɗi keeke hekkunu aum amu doya, haen amuppa nug ii hemanu ab amu, nug aɗi keeke genabnab hekkunu nai ana qakkom, o iitta nug aɗi keeke dabmak ii awa, keeke hekkunu nai ana qakkom amu, nug ii hema. Nug gamu anam hemanu aib aum amunu, Yawe Nug ah amu anak nuhignu uhuqkku.

⁹ Amge ah qabte, o iitta ah gamu uuittakte laa, nug keeke genabnab hekkunu nai ana qagakku, o iitta nug keeke hekkununab akku amu, nug aakku hekkuoitte. Ib laa iitta.

¹⁰ Am ah laa nug gamu ele daattep, nug keeke genabnab hekkununab nai ana qagakkutai, o iitta nug keeke hekkunu Kayak onigppa nuhig nai ɠagattag qetta akkutai.

¹¹ Nug anam heum dayeb amu, gamu doya, nuhignu aɗitai laa ii akku dayeb, ah nug keeke genabnab hekkunu nai ana qakkom, o iitta nug keeke hekkunu Kayak onigppa nuhig nai ɠagattag qetta aum amu, nug hekkuoitte.

¹² Amge haen gamu, nug aɗi keeke hekkununab aum amu doya, amegppa ii hemanu ab amu, nug aɗi keeke genabnab hekkunu nai ana qakkom, o iitta nug keeke hekkunu Kayak onigppa nuhig nai ɠagattag qetta aum amu, nug ii hema. Nug gamu aakku ii hemanu aum amunu, Yawe Nug ah amu anak nuhignu uhuqkku.

¹³ Aria, ah nug keeke hekkunu oo daye, nug genabnab hekkunu nai ana qagakkutai, o iitta, nug nukka keeke laa ii hemanu Kayak onigppa nuhig nai ɠagattag qetta akkutai. Nug anam hekku dayeb, gamu nug hekkunu akkutai, o iitta nug anam hemanu aibtai akku, amu anam aakku daakku.

¹⁴ Ah gamu nug anam aakku hekku, amge nug wau aɗi aum doya, deɗ amuppa nug aɗi nai laa wau amegppa ii akku dayeb amu, ah nug aɗi keeke genabnab hekkunu nai ana qakkom, o iitta nug aɗi keeke genab hekkunu mattiom amu, nug hekkuib. Am gamu nug wau anam hekkunu oo ii daalo amu, aib alo, amge nug ii aum amunu, ah nug aɗi hekkunu aum amu, nug hekkuib.

¹⁵ Amge danab nug wau aɗi nai aum doyowa, haen laa dimppa, nug, “Aib,” akku dayeb amu, wau nug aakku keeke amu ii hekku amu, keeke amu ii haknu aab, amuam gamu, nug beɗuppa aakku daakku.’ ” Yawe Nug anam aum.

¹⁶ Amuam gamu, wau ele, aria mameg, amu aɗeg nug ele oh daattep, am amu dilag ɗo, Yawe Nug Moses mettom aakku.