Namba 3 - Nobonob Baibel

Aron, Moses ele buɗulti dilag nai

¹ Yawe Nug Moses ele qauko Sinai appa nai madipiɗ amu, haen amuppa Moses, Aron ele, aa buɗultinu nai inam iikku dayom.

² Aron bekkod onilag amu inam. Nug bekka naanaeg am onig Nadap. Nug dimugppa amu Abihu, Eleasar Itamar ele.

³ Amuam Aron bekkod. Ag aakku mana mettak danab goɗen gokkaɗakppa tituanak daatteb; Moses ag mana mettak danab daaglagnu baɗ mattom.

⁴ Amge haen ag Sinai atu taɗakppa daanna amu, Nadap nug Abihu ele aa aab, Yawe Nug aa amuppa ii ilaglahnu aum ele mana mettak laa ileh, Yawe Nug he, aa Nug noobppa mauhpiɗ. Nadap nug Abihu ele aa bekkalti laa iitta amunu, haen mamelag Aron nug bau dayeye, Eleasar, Itamar ele, aa aakkuib mana mettak uɗat hedapiɗ.

⁵ Amu Yawe Nug Moses amegppa aum.

⁶ “Na Israel dilag huu okkai Lewi, na ag diin, mana mettak danab Aron gumidna dona, ag aguppa maadppe daappeg, na ag nuhig ehanittak daaglagnu tituanadkkut.

⁷ Tituanadppe, ag dahil mettid haknu peh lag danab ah appa qagmetteb ele, ag dahil lag, lag amuppan uɗat henana, ag Aron, Israel danab ah laa oh ele dabmattan, ehanadkkut.

⁸ Lewi buɗub amu, ag dahil mettid haknu peh lag danab ah appa qagmetteb ele, ag appanu keeke oh atognoadkkulag. Israel danab ah oh ag dahil mettid haknu peh lagppa daana, ag uɗat amu hekkulagnu elele iitta amunu, Lewi buɗub ag, ag oulag daaglagnu ehanadna, uɗat amu hekkulag.

⁹ Na Lewi buɗubppan mana mettak danab iitta ag Aron, nug bekkod ele ehanadkkulagnu tituanatte! Israel oolagppanu Lewi buɗubppan mana mettak danab iitta ag Aron ehanidkkulagnu tituanak daatteb.

¹⁰ Aron, nug bekkod ele amu, ag mana mettak danab daaglagnu otiatte! Ag aakkuib amu hekkulagnu daatteb. Danab laa nug amu heeb amu, ag qeppeg mauhkkuoitte,” awa aum.

¹¹ Yawe Nug anam anana, Nug tuɗitta Moses amegppa aum.

¹² “Israel oolagppa nid danab tatamnu, baelkad anen anenppan am dahil, amge da Lewi buɗubppan danab ag oulag daaglagnu tituanadmi. Lewi buɗub ag am dahilad.

¹³ Aɗinu? Haen da Isip appa Isip dilag nid ⌊danab⌋ tatamnu oh aqadmi amu, da Israel dilag nid ⌊danab⌋ tatamnu ag dahilad daaglagnu tituanadmi. Danabnu nid ⌊danab⌋ tatamnu, o iitta doɗnu ⌊dawai⌋ tatamnu, amu oh am dahilad. Ag dahilad daatteb. Da am Yawe.” Yawe Nug anam aum.

¹⁴ Israel danab ah ag Sinai Atu Taɗakppa daaegeg, Yawe Nug Moses anam amegppa aum. Nug nai amu Moses amegppa anana amu, Nug tuɗitta aum.

¹⁵ “Lewi buɗubppan nid danab oh ag ena mak kalam ahilag laippu, o iitta laippu eɗittak amu ebaqe! Ag onilag am ag baelkadppan onilag, amu ahilag aab ikki ele waappa yaaladkkut,” awa aum.

¹⁶ Yawe Nug Moses amegppa anam hekkununab aum amunu, nug Yawe aum, amubia aakku ebaqom.

¹⁷ Lewi nug bekkod onilag amu inam; Gerson, Kohat, Merari ele.

¹⁸ Gerson bekoɗ onilah Libini, Simei ele. Amu Gerson buɗub dilag aab ikki onilah ele am Lipni, Simei ele.

¹⁹ Kohat bekkod onilag am Amram, Ishar, Hebron, Usiel ele. Amu Kohat buɗub dilag aab ikki onilag ele am Amram, Ishar, Hebron, Ussiel ele.

²⁰ Merari bekoɗ onilah amu Mali, Musi ele. Merari buɗub dilag aab ikki onilah ele am Mali, Musi ele. Amu oh ag Lewi buɗub dilag aab ikki onilag. Lewi buɗub aab ikki am aakku. Lista amuam, ag baelkad anen anen dim lamidtte.

^21-22 Gerson buɗubppan aab ikki am Lipni, Simei ele. Gersonnu aab ikki aɗit amuppa amu, nid danab ena mak ahilag kalam laippu, o iitta laippu eɗittak, ahilag ebqak ohnu amu 7,500 dayom.

²³ Aab ikki Gerson buɗubppanu, ag mettid haknu peh lag laih qaban uɗitteppanu haen tutu dayaknu aab kalan daaglagnu daappig. Aben amuam mettid haknu peh lag bitobppa daatte.

²⁴ Gerson buɗubppan aab ikki, ahilag okkai am Lael bekka Eliasap.

^25-26 Gerson buɗubppan aab ikki ag mettid haknu peh lag danab ah appa qagmetteb ele, ag amu dabmedattappig. Amuam ag mettid haknu peh lag amunu ooppan hautak keeke, dimittimnu hautak keeke ele, peh lag amu od oɗeppanu lamen, aria mettid haknu peh lag, qaɗab qak ele taliliatak haɗap daatte, haɗap amunu taliliaknu lamen, amu lamen amunu odnu lamen, amu muɗi ele, ag keeke amu oh dabmettalagnu daadttappig.

^27-28 Kohat buɗubppan aab ikki am Amram, Ishar, Hebron, Usiel ele. Kohatnu aab ikki waɗele, amuppa amu, nid danab, ena mak ahilag kalam laippu, o iitta laippu eɗittak, ahilag ebqak oh amu 8,600 daappig. Ag amu Kayaknu mettid haknu peh lag dabmettaglagnu daadttappig.

²⁹ Aab ikki Kohat buɗubppanu, ag mettid haknu peh lag laih yau uɗitteppanu haen tutu dayaknu aab kalan daaglagnu daappig.

³⁰ Kohat buɗubppan aab ikki, ahilag okkai am Elisapan bekka Usiel.

³¹ Kohat buɗubppan aab ikki, ag Tituanak Nainu Kunup, balal mettid haknu peh lag ooppa dayom, amu lam maattaknu balal, qaɗab oh, amu keeke mana mettak danab ag Yawenu ɗo maɗoɗnu uɗat hekkulagnu uɗat madappig, amu lamen Aben Gunnab Ele hautaknu dayom ele, ag keeke amu oh dabmettaglagnu daadttappig.

³² Lewi buɗub dilag okkai, ahilag anuqak am Aron bekka Eleasar. Aron nug mana mettak danab dayom. Eleasar nug danab ag Yawenu mettid haknu peh lag, amu amunu keeke ohnu ele dabmedattappig, nug ag anattatta italadttom.

^33-34 Merari buɗubppan aab ikki amu Mali, Musi ele. Merarinu aab ikki aɗit, amuppa amu nid danab, ena mak ahilag kalam laippu, o iitta laippu eɗittak, ahilag ebqak oh am 6,200 dayom.

³⁵ Merari buɗubppan aab ikki, ahilag okkai am Abihail bekka Suriel. Ag am mettid haknu peh lag laih yawalti uɗitteppanu haen tutu dayaknu aab kalan daaglagnu daappig.

^36-37 Ag mettid haknu peh lagnu ebehi, nuhig ebehi emaitak daappig, biidod, amu biidod ɠagattag eppaknu tatap, nuhig keeke naunau laa oh, amu keeke naunau amu oh uɗat mettaglagnu keeke ele, aria lag amunu talilittaknu haɗapnu biidod, amu biidod ɠagattag eppaknu tatap, amu pin elab, nuhig peh taietteb ɠagattag qadakkunu, amu muɗi aɗ dimittimnu, ag keeke amu oh dabmattaglagnu daadttappig.

³⁸ Moses, Aron, am Aron bekkod ele ag mettid haknu peh lag laih kaɗag uɗitteppanu, amuam aam bedeppanu, ag appa haen tutu dayaknu aab kalan daaglagnu daappig. Aben amuam mettid haknu peh lag danab ah appa qagmetteb ele, peh amu amegppa daatte. Danab amu ag mettid haknu peh lagppa, Israel dilag mana mattak uɗat oh hekkulagnu daappig. Amuam ahilag uɗat aakku. Aun aɗi laa oh ag mettid haknu peh lag amu guguittaknab, appa ukkaknu aib anak daatte amu, ag appa nokkulag amu, laa ag heppeg mauhkkulag.

³⁹ Moses, Aron ele aa Lewi buɗubppan nid danab ahilag ena mak kalam laippu, o iitta laippu eɗittak, amu oh ebaqadpiɗ. Aa aab ikki anen anennu ebaqaeh 22,000 dayom. Aa Yawe Nug anam ebaqaglahnunab aum amu, aa aakku anam hepiɗ.

Lewi buɗub ag nid danab naanaeg oulag daappig

⁴⁰ Amu Yawe Nug Moses amegppa aum. “Israel nid danab tatamnu, ahilag ena mak kalam laippu awom, o iitta laippu eɗittak, na amu oh ebaqana, onilag ele yaan babaitte!

⁴¹ Da am Yawe, amu Israel nid ⌊danab⌋ tatamnu oh, ag am dahilad, amge da Lewi buɗubppan nid ⌊danab⌋, ag ag oulag daaglagnu diippi daappeg, amu Lewi buɗub dilag makau ⌊dawai⌋ amu, ag Israel dilag makau ⌊dawai⌋ tatamnu, ag amu oulkad daaglag,” awa aum.

⁴² Yawe anam Moses amegppa aum amunu, nug Israel dilag nid ⌊danab⌋ tatamnu, nug amu oh Yawe Nug, nug ebaqakkununab aumbia, nug aakku ebaqom.

⁴³ Israel nid danab tatamnu, ahilag ena mak kalam laippu awak, o iitta amu eɗittak, ahilag ebqak oh am 22,273 dayom. Moses nug ag onilag dim lamittak huu laippu ye noum.

⁴⁴ Amu Yawe Nug Moses amegppa inam ele aum.

⁴⁵ “Da am Yawe. Lewi buɗub ag dahilad daatteb, amu geha ag Israel oh dilag nid ⌊danab⌋ tatamnu oulkad daaglag; Lewi buɗub dilag makau ele amu, geha ag Israel dilag makau ⌊dawai⌋ tatamnu amu, ag ag oulkad daaglag.

⁴⁶ Amge Israel laa oh nid ⌊danab⌋ tatamnu ebqak amu 22,273. Lewi buɗubnu ebqak amu 22,000 aakkuib amunu, Israel laa oh dilag ebqak, am Lewi buɗub dilag ebqak anam danab 273ppa eɗidtte. Aria, danab amu ag tituanakppanu eɗua uhuqak dayak aoglagnu,

⁴⁷ na danab 273 amu anen anen dilagnu 55 gram silwa Israel danab eppelagppanu awe! Silwa amunu uug am, mana mettak lagnu melemel bia dayaɗ! Sekel laippu, aria gera 20 ele, aa oh ahilah uug am laippu.

⁴⁸ Na silwa amu aon, Aron, bekoɗ ele matte! Silwa amuam Israel nid ⌊danab⌋ tatamnu, ag ahilag ebqak Lewi buɗub eɗittak, am nid danab tatamnu amu tituanakppanu eɗua uhuqak aakku,” awa aum.

⁴⁹ Yawe Nug Moses anam hekkunu aum amunu, Moses nug silwa amu, am Israel nid ⌊danab⌋ tatamnu, ag ahilag ebqak Lewi buɗubnu ebqak eɗittak, danab amu ag tituanakppanu eɗua uhuqak awaknu daatte, nug silwa amu Israel eppelagppanu awom.

⁵⁰ Moses nug Israel eppelagppanu silwa amu awom amu, uug nuhig amu 15.5 kilogram. Silwa amunu uug am, mana mettak lagnu melemel bia dayom.

⁵¹ Moses nug aakku silwa, danab amunu tituanakppanu eɗua uhuqak daakkunu awa, nug Aron, bekoɗ ele mattom. Yawe Nug anam hekkununab aum amunu, nug anam aakku heum.