Namba 27 - Nobonob Baibel

Heper bekka Selopehad aɗekkud

¹ ⌊Danab laa Selopehad nug am nid ahib; nug bekka laa iitta.⌋ Selopehad, nug am Heper bekka. Heper nug am Gileat Bekka. Gileat nug am Makir bekka. Makir nug am Manase bekka. Manase nug am Josep bekka. Aria, Selopehadnu nid ah tanig ele amu, ag am Josep bekka Manase buɗub, ag am amunu aab ikki laa, amuppanu. Aɗekkud onilag amu Malah, Noa, Hoglah, Milkah, Tirsah ele. Amu ah amu ag wana,

² ag mettid haknu peh lag danab ah appa qagmetteb ele, ag lag amu odppa nona, Moses, mana mettak danab Eleasar, amu Israel oh dilag ikki danab ele noolagppa hippaidna daanna, ag appig.

³ “Ig mamenig am atu taɗakppa mauhom. Nug am Koranu huuppa ii dayom. Danab amu ag Yawe waappa daaglagnu uun, nuhig nai tappaeg neum. Nug am ahilag huuppan iitta. Iitta. Nug nuhig hipunin, diig amunu nug mauhom. Nug mauhom, amge nug bekkod iitta.

⁴ Nug bekka laa iitta, amge diig amunu ig mamenig nug onig, nuhig aab ikki ooppa qettoɗkku am ena iitta amunu, ig mamenignu aab ikki ooppan, nuhigppan ig, na ig nug aug, keeke megakkutnu oɗ medattem,” aon appig.

⁵ Ag anam appig amunu, Moses nug ahilag oɗmak amu awa, Yawe amegppa aum.

⁶ Nug nai amu Yawe amegppa a amu, Yawe Nug Moses amegppa aum.

⁷ “Selopehad aɗekkud ag atteb am tutukkunab. Na ag wan, ag mamelag aug, amu nuhigppan ag madakkut. Ag ag lailkad oolagppa daappeg, mameg aug ag ahilag daakku.

⁸ Na Israel appe doyeg! ‘Danab laa nug bekka laa iitta dayaya mauheb amu, nug aug nug aɗeg metteg!

⁹ Nug aɗeg laa iitta dayeb amu, nug aug nug awakkud amakkud matteg!

¹⁰ Nug awakkud amakkud laa iitta dayeb amu, nug aug amu nug mameg awakkud amakkud matteg!

¹¹ Nug mameg nug awakkud amakkud laa iitta dayeb amu, nug aug nuhig aab ikkippan, nug buɗub ukkakppan, nuhigppan laa miag daatte amu, metteg!’ Da Yawe, da Moses amegppa haknunab ami bia amu, da ɗo imu, Israel danab ag aɗan dim lamidna hekkulagnu madattem,” awa aum.

Josua nug Israel dilag ikki danab daakkunu epeɗiak

¹² Aria, Yawe Nug Moses amegppa aum. “Na Abarim qauko ukkakppa, qauko laa imu tena, na neegppe ukkeb, wan da Israel danab ah mattami amu antte!

¹³ Na ⌊piɗe appa daanna⌋ anttona amu, na ele na amap Aron mauhom bia mauhkut.

¹⁴ Na Aron ele oh, aa Sin atu taɗakppa appa dahil nai tappaeh neum. Haen danab ah ag le moɗ Meriba appa naittuɗ menan heegeg amu, aa da am Yawe oppiaawak daattem, aa da haknunab ami bia Israel ippunadkkulahnu ii hepiɗ. Amuam Sin atu taɗakppa, le moɗ Meriba, Kades guguittak, appa anam beum,” awa aum.

¹⁵ Yawe anam Moses amegppa a amu, Moses nug Yawe amegppa aum.

^16-17 “O Yawe, na aakkuib am Kayak danab oh bauklel madattem. Danab ah nahipad imu, ag sipsip laa ii gumadtte ele bia daamnanu, na danab laa nug ag dabmadakkunu epeɗikkutnu, da na oɗ medattem,” awa aum.

^18-19 Moses nug anam Yawe amegppa a amu, Nug Moses amegppa aum. “Da Ouɗil amu Nan bekka Josua, nuhigppa daatte amunu, nug onigppa eppe uɗiaɗ! Nug uɗieb amu, na heppe, nug mana mettak danab Eleasar, amu danab ah oh ele noolagppa hibaitta dayebeb, baɗ mette! Amu na anam hekkutnu amu, na nug aakku nahip aben aokku ippunattak henana, nug gukka laplap eppen mekkut.

²⁰ Amu ele, Israel danab ah ag nug oɗe dooglagnu, na ehah nahip ⌊da eppelppanu aome ele amu,⌋ na amu laala heppe, nuhigppa ukkaɗ!

²¹ Dimppa na mauhppe, nug attem attem hekkunu doyak aokkunu amu, nug mana mettak danab Eleasar noobppa hippaidkku, amu Elieser nug ehanittak amu aokkunu nug Urim, ⌊Tumim ele,⌋ keeke aɗit amuppa aokku. Josua, nuhig haknunab naippaib Israel danab ah oh ag keeke hekkulagnu ahan hekkulag; aria, nuhig haknunab naippaib ag keeke hekkulagnu uun ii hemana. Nug, Israel danab ah laa oh ele, ag oh anamib hekkulag.” Yawe Nug Moses amegppa anam aum.

²² Yawe anam amegppa a amu, Moses nug Yawe hekkununab aum bia heum. Nug Josua onigppa e uɗie he, Josua nug mana mettak danab Eleasar, Israel danab ah oh ele noolagppa hibaittom.

²³ Nug anam hibaitta dayeye, Yawe aum bia, Moses nug eppeg qaɗeppa ma, baɗ mettom.