Namba 25 - Nobonob Baibel

Moap ah ag heeg, Israel danab ag nena qeppig

¹ Amu Israel ag Sitim appa daanna, Israel danab ag digmena, Moap ah ele niippig.

² Moap ah ag Israel danab ele niiona amu, ag danab amu gona, ag kayak hambuppuak ahilkadnu mana mettak hekkulagppa oh daaglagnu appig. Moap ah ag anam aeg, Israel danab ah kuɗum ag ele oh gona, ag appa ee lanana, kayak hambuppuak amu noolagppa dup nona binalag meppig.

³ Ib anamppa Israel ag Moap danab ah ele wana, qauko Peornu kayak hambuppuak Bal noobppa dup nona binag meegeg, Yawe Nug Israel danab dilag oo huana nauhom.

⁴ Israel ag anam heegeg, Yawe Nug ahilagnu oo huanak nauhe, Nug Moses amegppa aum. “Danab aun aɗi ag Peornu hambuppuak kayak Bal noobppa dup nona binag meppig ele amu, na amu dilag ikki danab oh diin aqappe mauheg! Aqan, danab ah oh anadkkulagnu gaɗalkad amu miagib amahlakppa, da Yawe, da noolppa aihatteg! Na anam heppe amu, da, Yawe, dahil oo nauhak huanaknab ele am iitta meeb, amu geha da Israel oh ii hadappi nauhmana,” awa aum.

⁵ Yawe Nug anam aum amunu, Moses nug Israel epeɗiak danab amelagppa aum. “Danab aun aɗi ag Peornu kayak hambuppuak Bal noobppa dup nona binag meppig ele amu, ag anen anen ag diin, aqappeg mauheg!” awa aum.

⁶ Nug anam aawo amu, Israel danab laa nug Midian ah laa omala, nug baekkudppa daappigppa uɗiom. Moses nug danab ah oh ele ag mettid haknu peh lag danab ah appa qagmetteb ele, ag appa gaanna daaegeg, danab nug ah amu omala waum. Nug omala, ag oh noolagppa waum.

^7-8 Ukkaeheh, mana mettak danab Aron bekka Eleasar, nug bekka Pinias, nug danab ah amu omala, nug baekkudppa daappigppa ukke antta, nug Israel laa oh, mettid haknu peh lag danab ah appa qagmetteb ele, nug lag amu odppanu aha uuatta ukka, ban laa awa, nug danab amu dim lamitta, peh lagppa noum. Nug dim lamatta noa, ban ewa, aɗit oh yaalatom; danab atula ukka, ah amu ele oh atulatom. Nug anam he, oɗe nau danab kuɗum aqe mauhtteb ele, Kayak he, Israel dilagppa ba, ag aqaaqa dayom ele, oɗe amu aakku malom.

⁹ Oɗe nau danab kuɗum aqe mauhtteb ele baula danab ah ii aqom, amge ebqak gane ag oɗe nau amu aqe mauhppig ele amu, danab ah amuam 24,000.

¹⁰ Amu Yawe Nug Moses amegppa aum.

¹¹ “Mana mettak danab Aron bekka Eleasar, nug bekka Pinias amu, nug Israel danab, Midian ah ele aa kobol nau heeheh aqate mauhpiɗ amunu, da dahil oo nauhak bodoettom. Da danab ah ag da diil am nau doomnanu yag-nab-bak doyen hettem, amubia nug ele anam doya heum amunu, da dahil oo nauhak tuɗitten, ag oh ii hatti nauhppig.

¹² Amunu na nug amegppa da nug ele maɗoɗ daagnihnu, da heppi, da nug ele nug tituana nai qakkak laa hekkunih appe doyaɗ! Amu nug tituana nai qakkak amuam geha iinab iitta mema,

¹³ amu tituanak amuam iikku. Nug danab ah ag da, Kayak, da diilnu eheɗ doomnanu yag-nab-bak doya heum amu, nug anam heumppa nug Israel danab ah dilag eheɗ haknu nob nau iitta mekkunu he elele mettom amunu, nug, amu nug buɗub ele, ag geha hanhan mana mettak danab daaglagib,” awa aum.

¹⁴ Israel danab, Pinias nug Midian ah ele aqatom amu, danab amu nug onig Simri. Nug Salu bekka. Simri nug am Israel dilag huu okkai Simeonnu, amu nug baegppan ikki danab dayom.

¹⁵ Amu ah qe mauhom amu, nug am Midian ah onig Kosbi. Nug am Sur aɗeg. Sur nug am Midian ted, amu nug baegppan okkai laa dayom.

¹⁶ Amu Yawe Nug Moses amegppa aum.

^17-18 “Ag Israel, ag Midian danab dilagnu, ‘Ag am ihinig kekeɗ,’ doon aqeg! Aɗinu? Midian ag, ag Israel danab ah, ahilagnu kekeɗ doon, eheɗ hadappig. Ag ag Israel kuɗum buppualattegeg, ag Peornu hambuppuak kayak Bal noobppa dup nona binag meppig. Ele amu Kosbi, nug ag tiilag laa, nug am Midian danab okkai laa aɗeg, nug aɗi kobol heum, amuppa ag Israel, ag ahilagnu ‘Kekeɗ ihinig’ doon, aqeg! Nuhignu amu, haen Israel ag Peornu hambuppuak kayak Bal noobppa dup nona binag meppig, dimppa oɗe nau danab kuɗum aqe mauhtteb ele amu, oɗe amu beum, amu Pinias nug haen amuppa ah amu qe mauhom,” awa aum.