Namba 24 - Nobonob Baibel

¹ Aria, Yawe Nug haen aɗit kobol heum dimppa Balam nug doyom, Yawe Nug Israel itittak ena madakkunu ena doyom. Balam nug amu doyom amunu, nug tatam haen aɗit piɗe ukka, eman hak kobol heum bia baula ii heum. Iitta. Nug atu taɗakppa, Israel ag daappigppa neekke ukkom.

² Haen Nug neekke ukke, Israel ag ahilag huu okkai anen anenppa haen tutu dayaknu aab kaladna daaegeg anattette amu, Kayak Ouɗi nuhigppa uɗiom.

^3-4 Kayak Ouɗi nuhigppa uɗie amu, nug nai meunab ele mattiom. Nug inam aum. “Laa ag amelagppa keeke miagib anidtteb. Ao, laa ag Kayak nai mattieye dootteb. Laa ag Kayak Nukka ɠagattag Oh Ele tulegleg ippunatte anidtteb. Ao, laa ag Kayak noobppa gateg qaun ona, gomelna, iɗulag wanppa meeg, Kayak he, ag amelag obat-tte. Laa dilagnu anam daatte, amu ag oolagppan laa nug nai meunab ele imu maditte. Amu laa amuam da Balam, Beor bekka.

⁵ O Jakop buɗuppud, danab laa nug peh lag oh, ag Israel, ag amuppa daatteb ele amu anadtte amu, nug enanag anadtte. Yo, danab laa nug peh lag oh, ag appa daan oitteb ele amu anadtte am, nug keeke enanag anadtte.

⁶ Peh lag amuam uttu kuɗum eppak daatteb bia anadttem. Yo, ag am dad enanag, le laa ihippa daatte bia daatteb. Amu genab, ag am Yawe Nug keeke onig alo, sinamon, o wanila bia eppalatte bena daatteb bia daatteb. Ao ag ad sida le daugppa bena daatteb, ag amubia daatteb.

⁷ Israel danab ah ag ahilagppa gu huana nekku. Ao, ahilkad ee, keh ele, keeke amu geha le huana aoglag. Geha ahilag king nug king laa onig Agag, nug eɗittak daakku. Ao, geha ahilag ɗo maɗoɗ am okkainab daakku.

⁸ Kayak Nug ag Isipnu diia, omalatte uɗippig; makau okkai ebehi ele dakkuɗ am ɠagattagnab, amu ahilag ɠagattag am amubia daatte. Ag huu laala, ahilkad kekeɗ amu, ag heeg nauhadtteb. Ao, ag ebehilkad qiialatteg, naunau netteb. Ag latppa aqatteb.

⁹ Israel danab ah ag amu laion laa bia; laion nug doɗ laa qa lawowa amu, nug niitte. Ao, Israel danab ag amu laion anig bia. Danab oh ag laion anam niieye maɗettaknu baɗatteb, amubia danab oh ag, ag Israel, ag ahilagnu anam dootteb. Auntai laa nug aɗalatteb ahaglagnu am laa iitta. O Israel danab, danab laa ag ag itadtteb amu, ag itittak ena aoglagnu ool daatte. Ao, danab laa ag ag eheɗ laa awaknu anak waappa daaglagnu nai atteb amu, ag am eheɗ laa awaknu anak waappa daaglagnu ool daatte.” Balam nug nai anam aakku mattiom.

¹⁰ Balam nug nai amu mattie, Balak nug nuhignu oo huana nauhom. Nug eppeg bitakka, eppeg oo laih oa, nug aum. “Na uɗin, dahil kekeɗ dilag appe, ag eheɗ laa awaknu anak waappa daaglagnu, da ai uɗime, amge na haen ewam imu oh, na ag itittak ena mattame.

¹¹ Na anam heme amunu, na appanppa pahanab ukke! Da ami, na uɗin, dahil kekeɗ dilagnu ag eheɗ laa anak waappa daaglagnu akkut amu, da na nob okkainab medakkul ami, amge Yawe Nug na nob okkai aomnanu ib keldoum,” awa aum.

^12-13 Balak anam a amu, Balam nug nai nob ma aum. “Da nai awa ukkak danab, na maatte goppig ele amu, da ag amelagppa ami. ‘Balak nug heeb, nuhig lag enanagnab, lag amuam silwa, gol ele ambak dayeb, nug da meɗakkutai, me da Yawe, dahil Kayak, da nuhig haknunab nai tippalen, dahil dabmak dim lamitten, keeke ena laa, oo iitta keeke nau laa hekkulnu elele iitta. Laa amu, Yawe Nug da aɗi akkulnu aum aakkuib akkuloitte,’ awe ami.

¹⁴ Gemu da aakku dahilad danab gumatte gokkulnu hettem, amge doye, geha dimppa Israel danab ag nahip danab dilagppa attem hekkulag amu, da appi doye!” awa aum.

Nai meunab ele ebqak waɗele, Yawe Nug Balam mettom

^15-16 Amu Balam nug nai meunab ele imu mattiom. Nug inam aum. “Laa ag amelagppa keeke miagib anidtteb; Ao, laa ag Kayak nai mattieye dootteb; Ge, ag Laa Attannab Laa Oh Eɗattak, ag Nug eppegppanu doyak aotteb; Laa ag Kayak Nukka ɠagattag Oh Ele tulegleg ippunatte anidtteb; Ao, laa ag Kayak noobppa gatelag qaun ona, gomelna, iɗulag wanppa meeg, Kayak he, ag amelag obat-tte. Laa dilagnu anam daatte, amu ag oolagppan laa nug nai meunab ele imu maditte. Amu laa amuam da Balam, Beor bekka.

¹⁷ Da laa anidttem, amge gemu iitta. Ao, da nug anidttem, amge umanab daatte. King naɗi laa hoɗoppai bia, geha Jakop buɗubppanu uɗikku. Yo, king naɗi laa geha Israel danab ah dilagppanu uɗikku. Nug geha Moap danab uɗalkad aoɗadkku. Yo, nug geha Set buɗubppan danab ⌊am Moap danab, nug ag⌋ ikkilkad oh aoɗadkku.

¹⁸ Nug geha Edom danab eɗadkku. Yo, nug geha Seir danab, ag am nuhikkud kekeɗ, nug ag oh eɗadkku. Amge Israel am ɠagattag daaglag.

¹⁹ Amu gumitta danab Jakop buɗubppanu amu, nug ba heeb, Seir ooppanu, danab aab okkaippa lokkumna daatteb bia, ag oh padal mekkulag,” awa aum.

Nai meunab ele dimnab, Yawe Nug Balam mettom

²⁰ Aria, Balam nug neekka, nug Amalek danab ah anatta, nug nai meunab ele imu mattiom. “Amalek amu, nug danab laa oh oolagppanu anuqak dayom, amge nug geha nauha, iitta mekku,” awa aum.

^21-22 Aria, nug neekka, Ken buɗub danab anatta, nug nai meunab ele imu mattiom. “Ahilag dayak ena am ai ag attannab, men laa qaɗeppa teɗ metteb, am amubia, amge geha Asiria ag uɗin, ag eɗadna aɗualadppeg, ag eppelagppa daappeg, ag Ken buɗuppud, ag aakku nauhkkulag,” awa aum.

^23-24 Balam nug nai meunab ele amu mattia mala amu, nug nai meunab ele imu mattiom. “Geha uub okkai okkai ag yu ihi laih, Kitim appanu uɗiglag. Ag geha uɗin, Asiria, Eber ele hadappeg nauhkkulag, amge geha ahilkad kekeɗ ag hadappeg nauhkkulag. O gadon! Kayak anam heebeb amu, aun nug bau daakku?” Balam nug anam aum.

²⁵ Balam nug Kayak nai meunab ele amu oh mattia mala, nug appag diigppa ugekke, Balak nug ele eɗua, appag diigppa ukkom.