Namba 23 - Nobonob Baibel

Nai meunab ele digmak, Yawe Nug Balam mettom

¹ Balak nug Balam omale, Israel daappigppa goya anatta, nug aum. “Qaɗab eblaih aɗit ele doɗ mana mettaknu aqana meɗana, makau gaiɗ eblaih aɗit ele, amu sipsip dawai eblaih aɗit ele, qaɗab amuppa manattaknu babaitte!” awa aum.

² Balam anam a, Balak nug nai amu dim lamitte, aria Balak, Balam ele aa makau dawai, amu sipsip dawai ele babaittak daappig, aa qaɗab anen anenppa makau gaiɗ laippu, sipsip dawai laippu ele mana mettak hepiɗ.

³ Aa makau dawai, sipsip dawai ele mana mettak hewoya amu, Balam nug Balak amegppa aum. “Na inam manaknu ofa nahip guman daappe, da dakka am laih wakkul. Da anam wain daappi, Yawe geha da gumiɗa nekkutai. Nug gumiɗa na, Nug aɗi keeke laa ippuniɗkku amu, da na amenppa akkul,” awa aum. Balam nug anam awowa, nug qauko laa attannab haɗaettak amuppa teum.

⁴ Balam nug ukke amu, Kayak gumitta do, Balam nug Kayak amegppa aum. “Da qaɗab eblaih aɗit bappaidmi, amu qaɗab anen anenppa da makau gaiɗ laippu, sipsip dawai laippu manami,” awa aum.

⁵ Balam nug nai amu mattia male, Yawe Nug nai laa amegppa aum. Nug nai amu amegppa ana amu, Nug aum. “Na eɗun, Balak toppa gona, nai imu appe doyaɗ!” awa aum.

⁶ Yawe Nug nai amu Balam amegppa aum amunu, Balam nug eɗua, Balak dayomppa ukkom. Nug eɗua ukka, nug Balak manaknu ofa nuhig guguittak hibaitta dayeye, Moap anuqak danab ag nug ele oh hippaidna daaegeg anattom.

⁷ Balam eɗua uɗia, Balak hibaitta dayeye antta, nug digma, Yawe aɗi nai amegppa aum amu, nug nai meunab ele amu mattiom. Nug aum. “Balak nug da appal Aramnu ahe, ippa uɗikkulnu aum. Yo, Moap dilag king nug he, da qauko, kaɗag uɗitteppanu daatteb, da appanu ippa uɗimi. ‘Na uɗin, dahilnu Jakop buɗub ag eheɗ laa awaknu anak waappa daaglagnu a!’ awa aum. ‘Ao, na uɗin, Israel ag nauhkkulagnu a!’ awa aum.

⁸ Balak nug da anam hekkulnu aum, amge Kayak Nug laa ag eheɗ laa awaknu anak waappa daaglagnu ii aum ele amu, da ahilagnu ag eheɗ laa awaknu anak waappa daaglagnu akkulnu elele iitta. Ao, Yawe Nug laa, ag nauhkkulagnu ii aum ele amu, da ahilagnu ag nauhkkulagnu akkulnu elele iitta.

⁹ Da qauko laa imu, aria qauko laala guguittak daatteb ele, ag oh ikkilagppa men eleib, amu da qauko imu igippanab hibaitte daye, da Israel danab ah anadttem. Yo, da qauko imu, amu qauko laala guguittak daatteb ele, ag oh attannab, amu da qauko imuppa hibaitte dayeye, Israel danab ah anadttem. Da Israel danab ah anadttem, me ag am danab ah ameg laa; ag wanppanu danab ah oolagppa ii daatteb. Iitta. Ag amu, ag akkanab awaittak laih daatteb. Ao, ag am wanppan huu laa oh ele dilagnu, ‘Ig ag ele oh laippu daatteb,’ ag amu ii dabmetteb. ⌊Iitta. Ag Yawe dim lamidtteb.⌋

¹⁰ Auntai laa Jakop buɗub ebqekkunu elele? Laa iitta! Aɗinu? Ag amu kuɗumnab. Yo, auntai laa, Israel danab ah maha laa ebqekkunu elele? Laa iitta! Aɗinu? Ag am kuɗumnab! Da mauhkkulnu amu, da genab tutukku hak danab mauhtteb bia mauhkkulnu ool daatte! Yo, da mauhkkulnu amu, da ag mauhtteb bia mauhkkulnu ool hette!” awa aum.

¹¹ Balam nug Yawe nug anam akkunu aum, nug amu mattia male, amu Balak nug aum. “Na dahilnu aɗi heme? Na dahil kekeɗ dilagnu na appe, ag eheɗ laa awaknu anak waappa daaglagnu omaitte uɗimi, amge na amu haknu aɗitai laa ahilagnu ii heme. Iitta! Na ag itittak ena mattame!” awa aum.

¹² Balak nug anam a, Balam nug nob ma aum. “Da aɗitai keeke laa hekkulnu elele iitta. Yawe Nug da aɗi akkulnu atte amu, da akkuloitte. Ib laa iitta,” awa aum.

Nai meunab ele ebqak aɗit, Yawe Nug Balam mettom

¹³ Aria, Balak nug Balam amegppa aum. “Na da ele laih goɗa, appa na Israel danab ah anadkkut, amge na ag oh ii anadmana. Geha na ag laa aakkuib anadkkut. Na ag aben amuppa anadna amu, na ag eheɗ laa awaknu anak waappa daaglagnu nai a!” awa aum.

¹⁴ Balak nug nai amu Balam amegppa awowa amu, nug omale, qauko Pisga, appa uɗem laa onig Sopim, aa appa tepiɗ. Appa amu, nug qaɗab eblaih aɗit ele aqa, nug makau gaiɗ laippu, amu sipsip dawai laippu ele qaɗab anen anenppa mana mettak heum.

¹⁵ Balak nug doɗ manatte, Balam amegppa aum. “Na inam nahip manaknu ofa guman daappe, da wappi, Yawe da ele, i appa nug uɗa tekkunih,” awa aum.

¹⁶ Balam nug anam awowa, nug nukka laih ukke, Yawe nug uɗa ta, Nug nai laa amegppa aum. Nug nai amu amegppa ana amu, Nug aum. “Na eɗun, Balak toppa gona, nai imu appe doyaɗ!” awa aum.

¹⁷ Yawe Nug anam aum amunu, Balam nug eɗua, Balak dayomppa ukkom. Nug eɗua ukka amu, nug Balak manaknu ofa nuhig guguittak hibaitta dayeye, Moap dilag anuqak danab, ag nug ele oh daaegeg anatte, Balak nug Balam oɗ mettom. “Yawe Nug aɗi aum?” awa oɗ mettom.

¹⁸ Balak nug Balam anam oɗ mette amu, Balam nug digma, Yawe oɗeppanu nai meunab ele mattiom. Nug aum. “Balak, na ahan, na nai doye! Ao, Sipor bekka, na da doiɗe!

¹⁹ Danab ag hambubutteb, amge Kayak Nug am danab iitta, amu Nug ham-ii-bubutte. Ao, danab ag ahilag dabmak baolitteb, amge Nug am danab bekka iitta, amu nug nuhig dabmak ii baolitte. Yawe Nug keeke hekkunu atte amu, Nug hette. Nug keeke hekkunu nai ana qagatte amu, Nug genab anamib aakku hette.

²⁰ Yawe Nug da Israel danab ah ena itadkkulnunab aum. Ge, Nug ag matu itattom, amu da itittak ena amu baolikkulnu elele iitta.

²¹ Nauhak laa Jakop buɗub dilagppa bekkunu gemu ii daatte. Ao, Israel danab ah ag qagaiettak laa anidkkulagnu ii daatte. Yawe, ahilag Kayak, Nug ag ele daatteb. Yo, Nug ahilag king daatte, amu ewak amu ahilagppa daatte.

²² Kayak Nug ag Isipnu diia, omalatte uɗippig; makau okkai ebehi ele dakkuɗ am ɠagattagnab, amu ahilag ɠagattag am amubia daatte.

²³ Emaɗ hak laa Jakop buɗub qeeb nekkunu elele iitta. Ao, eman laa Israel danab ah aqakkunu elele iitta. Danab ah laa ag Yawe Nug Jakop buɗub, am Israel danab ah ele amu, Nug amu dilagppa hette anidna, ag akkulag. ‘Kayak heum umu antteg!’ aon akkulag.

²⁴ Danab ah ag laion anig laa ahe anidna baɗatteb amu, Israel danab ah, ag am laion amu laa bia. Yo, danab ah ag laion laa niiom ahe anidna baɗatteb amu, Israel danab ah ag am laion amubia. Laion ag doɗ laa qena lawona, ag hik aotteb. Genab, laion ag doɗ laa qena lawona, ag toettan daatteb amu, Israel ag anam daatteb.” Balam nug anam awa aum.

²⁵ Balam nug Kayak oɗeppanu nai mattie amu, Balak nug amegppa aum. “Na Israel danab ah ag eheɗ laa awaknu anak waappa daaglagnu nai laa madikkutnu elele iitta daattem dayeb amu, na itittak ena mattamnanu, na nai laa aib mattime!” awa aum.

²⁶ Balak anam a, Balam nai nob ma aum. “Yawe Nug da aɗi hekkulnu aum amu, da amu aakkuib hekkuloitte, da ai iite doome!” awa aum.

Nai meunab ele ebqak ewam, Yawe Nug Balam mettom

²⁷ Balam nug anam a amu, Balak nug Balam amegppa aum. “Doppe, da na awitte, aben laappa ukkei, appatai Kayak Nug na dahilnu ag eheɗ laa awaknu anak waappa daaglagnu nai akkutnu oo ena dookkutai,” awa aum.

²⁸ Nug anam a amu, Balak nug Balam omala ukka, qauko onig Peor appa teum. Danab nug qauko amuppa ta dayaya amu, nug neekke ukke, wan meu waknu nakokib elele am anidtte.

²⁹ Aa appa teya daayya amu, Balam nug Balak amegppa aum. “Qaɗab eblaih aɗit ele dahilnu ippa aqana, makau gaiɗ eblaih aɗit ele, amu sipsip dawai eblaih aɗit ele da qaɗab amuppa manadkkulnu babaitte!” awa aum.

³⁰ Balam nug anam a amu, Balak nug, nug aum bia ha, Balak nug makau gaiɗ, amu sipsip dawai ele qaɗab anen anenppa manattom.