Namba 22 - Nobonob Baibel

Balak nug propet danab Balam uɗiaknu nai me ukkom

¹ Amu dimppa Israel danab ah ag Jodannu oolnu noak laih kaɗag uɗitteppanu daatte, ag appa gona, ag haen tutu dayaknu aab kalappig. Wan amuam uɗem, Moap dilag dayom. Aab ag kalappig am laih, Jerikonu ukkakppa dayom.

^2-3 Sipor bekka Balak nug Moap dilag king dayom. Nug Israel ag Amo dilagppa aɗi heppig, amu Israel ag danab ah ganenab ele amu, nug, Moap danab ah ele ag dooppig amunu, ag eheɗ nau baɗappig. Amu genab! Israel danab ah ag kuɗumnab, ag Amo dilagppa attem heppig, amunu ele Moap danab ah ag amu doon, ag baɗak okkainab dooppig.

^4-5 Amu Moap ag huananab baɗana, ag Midian dilag ikki danab amelagppa appig. “Makau okkai ebehi ele laa gikkiɗah latte bia, geha danab ah imu ag keeke talilikkak daatteb imu oh aon malaglag,” aon appig. Amunu Balak, Sipor bekka, nug haen amuppa Moap dilag king dayom, nug nai awa ukkak danab maatte, ag gona Beor bekka Balam gumidna goppig. Balam nug appag diig Peto, le naɗi guguittak appa dayom; amu nai awa ukkaknu danab amu ag nug uɗia, Moap ehanadkkunu appeg dookkunu goppig. Balak nug nai imu nai awa ukkak danab ag Balam appeg dookkunu amelagppa aum. “Danab ah ag Isip uun, ahan uɗin, wan oh tonan malan, ag da gukkuiɗak haen tutu dayaknu aab kalan daatteb.

⁶ Amunu na uɗin, danab ah imu eheɗ laa awaknu anak waappa daaglagnu a! Aɗinu? Ag am ɠagattag huanak ele, dahil ɠagattag am elele iitta. Na anam heppe, da geha ag lamadppi, ag wan imuppanu ahan, oolna gokkulagtai. Na uɗin, amu hekkutnu ool daattenu diig am, da doottem, na laa ag itittak ena madattem amu, ag itittak ena aotteb, amu laa na ag eheɗ laa awaknu anak waappa daaglagnu attem amu, ag eheɗ laa awaknu anak waappa daatteb,” awa aum.

⁷ Balak nug nai awa ukkak danab, ag am Moap dilag, Midian dilag ikki danab ele, nug ag Balam amegppa nai amu appeg dookkunu amelagppa a, ag men doɗo Balam uɗat amu hekkunu daden mettaglagnu ele aon, nug gumidna goppig. Ag Balam toppa tena amu, ag Balak aɗi aum, nug amegppa appig.

⁸ Ag Balak nug aɗi aum amu aeg, amu Balam nug ag amelagppa aum. “Ag tuqan laippu imu ippa niippeg, buttua amu, da geha Yawe Nug da ag appig bia hekkulnu oo daatte, o iitta amu ab doyen, da appi dooglag,” awa aum. Amunu Moap anuqak danab ag nug ele daappig.

⁹ Aria, Moap, Midian ele dilag nai awa ukkak danab ag appa daaegeg, tuqan Kayak Nug Balam gumitta na, nug oɗ metta aum. “Imuam danab aun aɗi na ele daatteb?” awa oɗ mettom.

¹⁰ Kayak Nug Balam anam oɗ metta a, Balam nug Kayak amegppa aum. “Ag am Sipor bekka Balak, Moap dilag king, nug ag maatta, eppelagppa nai imu me uɗiom.

¹¹ ‘Danab ah laa ag Isip uun ahan uɗippig ele, ag wan oh tonan malan daatteb. Amu na uɗin, na dahilnu, ag eheɗ laa awaknu anak waappa daaglagnu a! Na anam heppe amu, da geha ag ele ban hetat, lamadppi, ag wan imu uun, oolna gokkulagtai,’ ” awa aum.

¹² Balam nug anam Kayak amegppa aum, amge Kayak Nug eɗua Balam amegppa aum. “Na aib ag dim lamadme. Danab huanaknab Moap wan daugppa daatteb amu, da ag itittak ena mattamide amunu, na aib ag eheɗ laa awaknu anak waappa daaglagnu ame!” awa aum.

¹³ Yawe Nug anam a amu, buttua Balam nug aha, anuqak danab Balak maatte goppig ele amelagppa aum. “Ag eɗun, ahilag wanppa ukkeg! Aɗinu? Yawe Nug da ag dim lamadkkulnu uua, aib aum,” awa aum.

¹⁴ Balam nug ag amelagppa anam a amu, Moap anuqak danab ag eɗun, Balak toppa gona appig. “Balam nug ig ele oh uɗiaknu uuom,” aon appig.

¹⁵ Ag anam amegppa aeg amu, Balak nug anuqak danab laa, ag am anuqak danab tatam maatte goppig eɗattak, ahilag ebqak ele am tatam matte goppig ele eɗittak amu, nug ag maatte goppig.

^16-17 Ag Balam gumidna gona appig. “Balak, Sipor bekka inam atte. ‘Da geha nob enanag, okkainab ele medakkul. Da na aɗi hekkulnu appe amu, da hekkul amunu, keeke laa heeb, na dahilppa ii uɗimnanu amu aibnab. Na dahilppa uɗikkutnab. Na uɗin, danab huanak uɗippig daatteb amu, na dahilnu ag eheɗ laa awaknu anak waappa daaglagnu a!’ awa atte,” aon appig.

¹⁸ Ag gona anam amegppa appig, amge Balam nug nai nob ma aum. “Balak nug heeb, nuhig lag enanagnab, lag amuam silwa, gol ele ambak dayeb, nug da meɗakkutai, me da Yawe, Nug am dahil Kayak, da nuhig haknunab nai tippalen, keeke okkai laa, oo iitta keeke nakok laa hekkulnu elele iitta.

¹⁹ Amge ag tuqan imu, laa ag uɗin daappig bia daappeg, da Yawe Nug tatam aum aakkuib baula akkutai, o iitta keeke laa akkutai, da amu dookkul,” awa aum.

²⁰ Balam nug anam a amu, nai awa ukkak danab ag appa daaegeg, Kayak Nug Balam gumitta na aum. “Danab imu ag na ele oh gokkulagnu appeg dookkutnu uɗippig dayeb amu, na bappaidppe oh ukkeg, amge da na aɗi keeke hekkutnu akkul amu, aakkuib hekkut,” awa aum.

Balam Moap ukkom

²¹ Kayak anam aum amunu, buttua Balam nug aha, dayaknu keeke donki anig nuhig gomeppa ma, nug donki nuhig attan te, Moap anuqak danab ele goppig.

²² ⌊Amu Balam nug Kayak aɗi hekkunu aum amu ii dim lamitta, eheɗ hekkunu dabmeum⌋ amunu, nug ugekke, Kayak Nug Balamnu oo huana nauhe, Yawenu engel na, nug kekeɗab ib gamagppa dayom. Balam nug donki nuhigppa ugekke, nuhig maɗi nid aɗit laa nug ele oh goppig.

²³ Balam nug engel ii anttom, amge donki nuhig nug am anttom. Haen donki nug Yawenu engel ibppa qep elab naɗi laa aɗa dayeye antta amu, nug eɗua, dad laa ib giginppa dayom, amuppa waum. Nug anam he, Balam nug donki eɗua ib manppa wakkunu makkuɗom.

²⁴ Balam nug donki awa, nug ib gokku eleppa me, amu Yawenu engel nug wana, grep dad aɗit ib daug laplap daapiɗppa, ib hogogdoakppa, appa, laih laih am men aɗ ele daaeheh gamagppa hibaitta dayom.

²⁵ Balam nug engel ii anttom, amge donki nug am anttom. Haen nug Yawenu engel antta amu, nug engel qe-eɗidkkunu nug aɗ guguitta wa, Balam baeg men aɗppa oɗoɗom amunu, Balam nug baula donki makkuɗom.

²⁶ Aria, donki nug anam ha, engel qe-eɗitta ukke, amu Yawenu engel nug anuqa ukka, ib hogogdoak laa aben eɗuaknu iitta, nanehppate, o iitta naɗiap-ppate ukkaknu ib laa iitta eleppa appa dayom.

²⁷ Donki nug Yawenu engel haen imuppa antta amu, Balam gomeppa dayeye, nug ibppa nona niieye, Balam nug oo nauhe, donki amu dudqak hokkatppa makkuɗom.

²⁸ Anam he amu, Yawe Nug he, donki amu oɗe obate, danab laa nai mattiak bia Balam amegppa nai mattia aum. “Da aɗi eheɗ laa hemi amunu, na da haen ewam imu bu iume?” awa aum.

²⁹ Awa a amu, Balam nug donki oɗeppa awa aum, “Aɗinu? Na aon aon iume! Da eppelppa qep elab laa aɗalomlob am ena. Aɗinu? Da na geha iikkunab nidappi mauhlom,” awa aum.

³⁰ Anam a amu, donki nug Balam amegppa aum. “Da nahip donki iittate? Na anukka digmena, haen oh da gomelppa daanna oiyeye uɗie, gemu ele da gomelppa anamib iite daanna oittem? Kobol da gemu hemi imu bia amu, da deɗ laa hemite?” awa aum. Donki nug anam a amu, Balam nug nai nob ma, “Iitta,” awa aum.

³¹ Balam nug donki nai nob me amu, Yawe Nug he, nuhig engel, nug nuhig qep elab aɗaɗa, ibppa hibaitta dayeye anttom. Antta, nug laippun gateg qaun o, gomela auta awa, nug iɗu wanppa meum.

³² Balam nug engel antte, Yawenu engel nug Balam oɗ mettom. “Na aɗi diignu nahip donki haen ewam imu bu qeme? Na doonna, eheɗ hekkutnu hettem, da anidttem amunu, da heppi, nahip ib keldoak daakkunu uɗimi daattem.

³³ Donki nug da aakku haen ewam amuppa aniɗaɗa eɗuom. Nug ii qe melo amu, da gemu na nittalom, amge da donki nug ii oppatlom,” awa aum.

³⁴ Engel anam a amu, Balam nug Yawenu engel amegppa aum. “Da hipunin qemi. Aɗinu? Na da eheɗ hepanu ibppa daanna, dahil ib keldona daame amu, da ii doomi. Gemu, na da gokkulnu ootppa ena ii doottem dayeb amu, da eɗue gokkul,” awa aum.

³⁵ Balam nug anam aum, amge Yawenu engel nug amegppa aum. “Na danab imu ele gokkulag, amge na aɗi madikkutnu akkul ele aakkuib mattie!” awa aum. Awa a amu, Balam nug anuqak danab Balaknu ele oh goppig.

³⁶ Amu haen Balak nug Balam uɗitte doya, nug aha, aab laa onig Ar, nug appa Balam uɗa tekkunu ukkom. Ar am le Arnon daugppa, Moap wannu tomppa dayom.

³⁷ Aa nug uɗa teya amu, Balak nug Balam amegppa aum. “Da na paha uɗikkutnu matu ami. Na aɗinu ii uɗime? Da na keeke enanag, nob okkai ele medakkulnu elele iite daattem,” awa aum.

³⁸ Balak nug anam a, Balam nug nob ma aum. “Aakku, amge da iikku na gemu gumitte uɗimi. Da uɗimi, amge da aɗitai laala ii apa. Kayak Nug da aɗi akkulnu akku aakkuib akkuloitte,” awa aum.

³⁹ Aa nai anam mattiya maloya amu, Balak Kiriat Husot ugekke, Balam nug ele oh gopiɗ.

⁴⁰ Aa goya, Kiriat Husot teya amu, appa Balak nug makau, sipsip ele mana, nuhig kayak mettom. Nug anam hewowa, nug teppu amunu laa Balam, amu anuqak danab oh goppig ele, amu mattom.

⁴¹ Aria, deɗ amu uue, wagɗe buttua Balak nug Balam omale, aab okkai Bamotbal, appa tepiɗ. ⌊Aben amuam nakok attan amunu⌋ appanu amu, Balam nug Israel laala anadkkunu elele.