Namba 20 - Nobonob Baibel

Le menppanu doum

¹ Amu kalam digmakppa Israel oh ag atu taɗak onig Sin, ag appa wana, ag aab onig Kades guguittak daappig. Ag appa daaegeg, Miriam mauhe, appa amu ag nug boumppig.

² Ag haen tutu dayaknu aab kalan daappigppa amu, appa le lanaknu laa ii dayeye amunu, danab ah ag qagmena daanna, ag Moses, Aron ele amelahppa naittuɗ meppig.

³ Ag Moses ele aeg ona aeg do, ag appig. “Ig Yawe noobppa, ig lainkad laala ele oh mauhlom amu ena!

⁴ Aɗinu na ig Yawenu danab ah, na ig atu taɗak imuppa aikke neut, ig, amu ihinkad doɗ ele ippa mauhkkunignu hettem.

⁵ Na aɗinu, ig Isipnu aigna omaikke, atu naunab imuppa uɗimut? Ippa amu wit, o ad fig, o muɗi grep, o pomigranet keeke iitta. Amu le lanaknu ele iitta!” aon appig.

⁶ Aon aeg amu, Moses, Aron ele aa ahaya, danab ah uuadya, mettid haknu peh lag danab ah appa qagmetteb ele, aa lag amu odppa noya, aa laippun gatelah qaun oya, gomelya, aa iɗulah wanppa meya daaeheh, Yawenu binag amahlak oppiaawak ele aa noolahppa tulom.

⁷ Amu Yawe Nug Moses amegppa aum.

⁸ “Ahan, nahip dudqak hokkat aoppe, na amap Aron ele oh, aa danab ah qagmatteɗ! Aa ag noolagppa na men ⌊umu⌋ amegppa appe, men nug nuhig le ana gokkaɗeb nekku. Ib amuppa amu, na heppe, le, danab, am ahilkad doɗ ele, ag oh lakkulagnu menppanu elele nekku,” awa aum.

⁹ Yawe Nug Moses amegppa anam aum amunu, nug nuhig dudqak hokkat, Yawe hekkununab aum bia, Yawe noobppanu awom.

¹⁰ Nug awe, nug Aron ele aa danab ah men dayomppa qagmaadya, Moses nug ag amelagppa aum. “Ag nai tappe nak danab aɗi, ag doyeg! Da Aron ele, i men imuppanu le aoɗ, ag mattagnihte?” awa aum.

¹¹ Aria, Moses nug anam awowa, nug eppeg huma, nuhig dudqak hokkatppa men o, haen aɗit batom. Nug anam he, le naɗi tula do, danab ah, amu ahilkad doɗ ele ag le lappig.

¹² Amge Yawe Nug Moses, Aron ele amelahppa aum. “Aa Israel danab ah da am Kayak oppiaawak ele daattem Israel danab ah ippunadkkulahnu dahilnu oolahppa elele genab ii doopiɗ amunu, aa geha da wan Israel danab ah madakkulnu hettemnu ami amu, aa appa ii diiya nomaya,” awa aum.

¹³ Kobol imu Meriba appa beum; appa amu Israel ag Yawenu naittuɗ meeg, Nug am oppiaawak daatte ag ippuanattom.

Edom dilag king nug Israel ag nuhig wanppa wana gomananu uuom

¹⁴ Amu dimppa amu, Moses nug nai awa ukkak danab Kades appanu maatte, ag Edom dilag king toppa gona appig. “Ig, Israel danab amu, ig na laipad. Ihinigppa uug oh beum amu, na amunu doottem.

¹⁵ Ig mamenkad aɗi ag Isip noeg, ig appa maɗ kuɗumnab daamut. Isip danab ag ig, amu ig mamenkad aɗi ele eheɗ heigppig.

¹⁶ Heikkegeg, ig amunu Yawe ehanigkkunu unuqittut, Nug doya, engel laa ig ehanikka, wan amuppanu awikka omaigkkunu me ne, nug awikka, omaikka uɗiom. Gemu amu, ig nahip wan tomppa, Kades aab okkai guguittak, haen tutu dayaknu aab kalakppa daattem.

¹⁷ Na ig uuigppe, nahip wanppa wata gokkunignu oonig okkai daatte. Ig geha nahip dad laala, o iitta grep dadte ooppa iinab wamata. Ig le moɗppanu laa iinab aot lamata. Ig am ib man okkai, onig kingnu ib, ig amuppa aakkuib gokkunig, laih naɗiappanu, o iitta nanehppanu wata dotata, ii gomata; tutukku gota gota, nahip wan uuidkkunig.” Moses nug nai amu me ukkom.

¹⁸ Moses nug nai amu me, Edom dilag king toppa ukkom, amge nug nob ma aum. “Ag wan imu ooppa iinab wana gomana; ag doonna gokkulag amu, ig geha ahat, banelag gota, ag qep elabppa aqagnig,” awa aum.

¹⁹ Edom dilag king nug nai amu aum amunu, Moses nug Israel oh oɗelag awa, nug nai imu eɗua me, nuhigppa ukkom. “Geha ig ib manib gota, igte, iitta doɗ ihinkadte laa le laa lappeg amu, ig amunu daden mekkunig. Ig tutukkuib baenigppa gota gota, gokkunignu oonig daatte. Ig aɗitai laa hekkunignu iitta,” awa aum.

²⁰ Moses nug nai amu me ukke, Edom dilag king nug nai imu eɗua me ukkom. “Ag wan ihinigppa iinab wana gomana,” awa aum. Aria, Edom dilag king nug nuhig ban daup, daup amu ag am kuɗum, amu ag ɠagattag ele, nug ag maatte, ag Israel ag Edom dilag wan ooppa wana gomananu ib oo nak goppig.

²¹ Edomnu king nug ag Edom wanppa wana gokkulagnu uua auta awa, nuhig ban daup ib keldokkulagnu maatte goppig amunu, Israel danab ah ag eɗun aon, ib laa goppig.

Aron mauhomnu nai

²² Edom dilag king nug ag nuhig wanppa ii wana gomananu heum dimppa amu, Israel danab ah oh ag Kades uun, ahan Hor qaukoppa goppig.

²³ Ag Hor qaukoppa Edomnu tom guguittak appa teeg amu, Yawe Nug Moses, Aron ele amelahppa aum.

²⁴ “Aa oh Meriba appa dahil haknunab nai tappaeh neum amunu Aron, nug wan da Israel madakkulnu hettem ele, nug amuppa ii noma. Nug geha ippa mauhkku.

²⁵ Moses, na Aron, nug bekka Eleasar ele diiatppe, ag Hor qaukoppa teig!

²⁶ Aron nug appa mauhkku amunu, na mana mettak uɗatnu bala nuhig amu uɗidna, nug bekka Eleasar aɗuidppe taɗ!” awa aum.

²⁷ Yawe Nug anam aum amunu, Moses nug Yawe hekkununab aum bia heum. Moses, Aron, amu Elieser ele ag danab ah ag neekkadna daaegeg, Hor qauko teppig.

²⁸ Ag Hor qauko igippa tena amu, Moses nug Aronnu mana mettak uɗat lamen uɗitta awa, nug bekka Eleasar aɗuitte teum. Aron nug qauko igippa appa mauhom. Nug mauhe amu, Moses, Eleasar ele aa qaukoppanu nepiɗ.

²⁹ Haen aa qaukoppanu neya, Aron mauhomnu Israel danab ah amelagppa aeh, Israel danab ah oh ag deɗ 30, nug mahittak heppig.