Namba 2 - Nobonob Baibel

Israel dilag huu okkai anen anen dilag dayak aben

¹ Amu Yawe Nug Moses, Aron ele amelahppa aum.

² “Israel dilag huu okkai anen anen ag dahil mettid haknu peh lag danab ah appa qagmetteb ele, ag amu taliliattak haen tutu dayaknu aab kalaglag, amge nakok piɗe, guguittak iitta. Danab anen anen oh ag dayak aben ahilkad, ag mamelkad baelkadppan pilak guguittak kalan daaglag,” awa aum. ⌊Yawe Nug Moses, Aron ele amelahppa anam a dooya, aa Israel amelagppa inam apiɗ.⌋

^3-4 Mettid haknu peh lagnu, laih kaɗag uɗitteppanu, amuam aam bedeppanu amu, Juda huuppanu danab ag huu naunau anen anen ag ahilag pilak guguittak aben aon, haen tutu dayaknu aab kalan daaglag. Juda dilag ikki danab am, Aminadap bekka Nason. Nuhig huunu ebqak am 74,600.

^5-6 Israel dilag huu okkai Isakar, ag Judanu huu heqo laih haen tutu dayaknu aab kalan daaglag. Isakar dilag ikki danab am, Suar bekka, Netanel. Nuhig huunu ebqak am 54,400.

^7-8 Israel dilag huu okkai Seblon, ag Isakarnu huu heqo laih haen tutu dayaknu aab kalan daaglag. Seblon dilag ikki danab am, Helon bekka Eliap. Nuhig huunu ebqak am 57,400.

⁹ Juda danab oh, Isakar danab oh, amu Seblon danab oh ele, ag am ameg laippuppan, ag ahilag ohnu Juda anak amu, ebqak amu oh dilag am 186,400. Aha oiyak haenppa ag anuqna, ahan gokkulag.

^10-11 Aria, mettid haknu peh lagnu, laih yau uɗitteppanu, Ruben huuppanu danab ag huu naunau anen anen ag ahilag pilak guguittak aben aon, haen tutu dayaknu aab kalan daaglag. Ruben huu dilag ikki danab am, Sedeur bekka Elisur. Nuhig huunu ebqak am 46,500.

^12-13 Israel dilag huu okkai Simeon, ag Rubennu huu heqo laih haen tutu dayaknu aab kalan daaglag. Simeon dilag ikki danab am, Surisadai bekka Selumiel. Nuhig huunu ebqak amu 59,300.

^14-15 Israel dilag huu okkai Gad, ag Simeonnu huu heqo laih haen tutu dayaknu aab kalan daaglag. Gad dilag ikki danab am, Deuel bekka Eliasap. Nuhig huu ebqak amu 45,650.

¹⁶ Ruben danab oh, Simeon danab oh, amu Gad danab oh ele, ag amu ameg laippuppan, ag ahilag ohnu Ruben anak amu, ebqak amu oh dilag am 151,450. Aha oiyak haenppa, ag ahan, Juda dim lamadna gokkulag.

¹⁷ Aria, ag ahan goppeg amu, Lewi buɗub ag ahan, peh lag, danab ah ag appa qagmetteb, ag amu maon dim lamadna gokkulag. Ag Israel dilag huu okkai laala gamalagppa daaglag. Israel ag dayak aben ahilag ippu laippu anamnab aakku bappaidna daaglag, anamib aha ukkak haenppa ag nug dim lamittak amu dim lamidkkulag. Huu anen anen ag haen tutu dayaknu aben ahilag kalan, ahilag pilak guguittak daaglag.

^18-19 Mettid haknu peh lagnu, laih qaban uɗitteppanu, Epraimnu huuppanu danab ag huu naunau anen anen ag ahilag pilak guguittak aben aon, haen tutu dayaknu aab kalan daaglag. Epraim huu dilag ikki danab am, Amihut bekka Elisama. Nuhig huunu ebqak amu 40,500.

^20-21 Israel dilag huu okkai Manase ag Epraimnu huu heqo laih haen tutu dayaknu aab kalan daaglag. Manase dilag ikki danab am, Pedasur bekka Gamaliel. Nuhig huunu ebqak amu 32,200.

^22-23 Israel dilag huu okkai Benyamin ag Manasenu huu heqo laih haen tutu dayaknu aab kalan daaglag. Benyamin dilag ikki danab am, Gidoni bekka Abidan. Nuhig huunu ebqak amu 35,400.

²⁴ Epraim danab oh, Manase danab oh, amu Benyamin danab oh ele, ag am ameg laippuppan, ag ahilag ohnu Epraim anak amu, ebqak amu oh dilag am 108,100. Aha oiyak haenppa ag ahan, Lewi buɗub Reben dim lamidtteb ele, ag ag dim lamadna gokkulag.

^25-26 Mettid haknu peh lagnu, laih yawalti uɗitteppanu, Dannu huuppanu danab ag huu naunau anen anen ag ahilag pilak guguittak aben aon, haen tutu dayaknu aab kalan daaglag. Dan huu dilag ikki danab am, Amisadai bekka Ahieser. Nuhig huunu ebqak amu 62,700.

^27-28 Israel dilag huu okkai Aser, ag Dannu huu heqo laih haen tutu dayaknu aab kalan daaglag. Aser dilag ikki danab am, Okran bekka Pagiel. Nuhig huunu ebqak am 41,500.

^29-30 Israel dilag huu okkai Naptali, ag Asernu huu heqo laih haen tutu dayaknu aab kalan daaglag. Naptali dilag ikki danab am, Enan bekka Ahira. Nuhig huunu ebqak am 53,400.

³¹ Dan danab oh, Aser danab oh, amu Naptali danab oh ele, ag am ameg laippuppan, ag ahilag ohnu Dan anak amu, ebqak amu oh dilag am 157,600. Aha oiyak haenppa ag ahan, dimnab, Epraim dim lamadna gokkulag.

³² Israel ag mamelkad alalkad onilkad waappa, Moses, amu ikki danab ele amelagppa aegeg, ag ebaqappig. Ahilag ebqak oh am 603,550 dayom. Ebqak amuam huu okkai waɗele amuppanu. Huu okkai waɗele anen anenppa amu, huu ewam daappig.

³³ Amge Yawe Nug Moses amegppa Lewi buɗub ebaqaaqa, ahilag ebqak laappa ii tuɗidmanu haknunab aum amunu Moses, ikki danab ele ag, ag ebaqadna Israel danab ah laala oh ele, ahilag ebqak amuppa ii tuɗidppig.

³⁴ Aakku Israel ag keeke oh Yawe Nug Moses anam hekkununab amegppa aum amu, ag heppig. Yawe Nug ag dayak aben ahilag attem hekkulagnu aum, ag ahilag pilak guguittak daaglagnu aum, amu ag anam aakku heppig. Ag aben laih goppig, haen amu ag attemnab gokkulagnu Yawe Nug aum amu, ag anam aakku goppig. Danab ah anen anen ag aab ikki ahilag, amu nug baekkudppa ele anamppa daanna goppig.