Namba 19 - Nobonob Baibel

Israel danab ah ag danab laa mauhom ele aɗona, ag Kayak ele ouqak dayaknu elele bekkulagnu le

¹ Amu Yawe Nug Moses, Aron ele amelahppa inam aum.

² “Da Yawe, da ag Israel, ag ɗo imu dim lamidkkulagnunab attem. Aa apeɗ, Israel danab ah ag makau balat laa, ag na, Moses, ag na mettaglagnu aon uɗieg! Makau balat amuam kokoɗ, nug beɗuppa eheɗ laa iitta daakkuoitte. Amu ele, nug keeke eeɗkkunu nug doɗnu duugppan tuqai nug duugppa ii qakkak ele daakkuoitte.

³ Ag na medappeg amu, na mana mettak danab Eleasar medakkut. Nug heeb, danab laa makau amu awa, haen tutu dayaknu aab kalak dimittim ukkeb, Elieser nug anttebeb baag otaɗeb mauhkku.

⁴ Anam amu, mana mettak danab Eleasar nug tiig laa eppeg doɗoppa awa, nug haen eblaih aɗit ele tauɗeb, laih mettid haknu peh lag danab ah appa qagmetteb ele, lag amu ameg odppa gokku.

⁵ Elieser nug neekkebeb amu, laa nug makau balat am maneb eokku. Nug gaɗa, teppu, oo, biig ele, tiig, keeke ele oh manatteb eokku.

⁶ Ewebeb amu, mana mettak danab nug ad sida, uud laa onig hisop, amu muɗi kokoɗnab ele diia akkeb, makau balat qaɗeppa teeb, oh eoglag.

⁷ Amu dimppa mana mettak danab nug lamen nuhig iha, nug ele le laakku. Nug anam hewowa amu, nug haen tutu dayaknu aab kalakppa eɗua dokku, amge nug da, Yawe, nug da ele ouqa dayaknu elele iitta dayeb ukkeb, tueb mekku. Tueb meeb amu, nug da ele ouqa dayaknu elele.

⁸ Danab nug makau balat maitte, nug ele lamen miha, nug le laakku. Amu nug ele da ele ouqa dayaknu elele iitta dayeb ukkeb, tueb meeb, nug da ele ouqa dayaknu elele daakku.

⁹ Danab laa nug da ele ouqa dayaknu elele, nug makau balat ewom, nug uhuɗ amu awa, ⌊waa, keekeppa ina,⌋ haen tutu dayaknu aab kalak amu dimittim, aben Kayaknu neekkakppa dubuttid iitta, nug appa mekku. Amunu Israel danab ah ag makau uhuɗ amu le, amuam le heeb danab nug da Yawe, da ele ouqa dayaknu elelenu le amu, ag le amu bappaidkkulagnu uhuɗ aɗappeg daakku. Le amunu uɗat am, heeb, hipunin iitta mekkunu daatte.

¹⁰ Danab nug makau balat mane ewak uhuɗ aotte amu, nug lamen nuhig ihakku, amu nug ele da, Yawe, nug da ele ouqa dayaknu elele iitta dayeb ukkeb, tueb meeb, nug da ele ouqa dayaknu elele daakku. Ɗo imuam hanhan, alet anamib daakku. Ɗo imuam Israel danab, amu wan laihnu danab, ag uɗin, ag oolagppa daatteb ele, ahilag ohnu daatte.

¹¹ Aun laa nug danab mauhak gaɗalag aɗatte amu, nug deɗ eblaih aɗit ele da Kayak ele ouqa dayaknu elele iitta daakku.

¹² Deɗ ewamppa, amu deɗ eblaih aɗitppa ele nug le, amuam le heeb danab nug da Yawe, da ele ouqa dayaknu elelenu le amu, nug le amuppa da, Yawe, nug da ele ouqa dayaknu elele daakkunu hekku. Nug anam ha mala amu, nug da ele ouqa dayaknu elele daakku. Amge nug nukka deɗ ewamppa, amu deɗ eblaih aɗitppa ele le amuppa nug da, Yawe, nug da ele ouqa dayaknu elele daakkunu ii hekku amu, nug da ele ouqa dayaknu elele ii daama.

¹³ Aun laa nug danab mauhak gaɗa aɗa, nug le, amuam le heeb danab nug da Yawe, da ele ouqa dayaknu elelenu le amu, amuppa nug da ele ouqa dayaknu elele daakkunu ii hekku dayeb, nug aakku heeb, dahil neekkakppa dahil mettid haknu peh lag am dubuttid tak ele daakku. Nug Israel oolagppanu geɗittak daakkuoitte. Amuam le heeb, danab nug da, Yawe, da ele ouqa dayaknu elelenu le amu, le amu nug ii tauɗ qettak amunu, nug da ele ouqa dayaknu elele iitta. Nug da ele ouqa dayaknu elele iitta amunu, nug anam aakku daakku.

¹⁴ Amu haknu amu, ɗo inam daatte. Haen danab laa nug pehppa mauhtte, aun nug haen amuppa peh ooppa daatte, o mauhak dimppa aun nug peh ooppa notte amu, geha nug deɗ eblaih aɗit ele nug da ele ouqa dayaknu elele iitta daakku.

¹⁵ Amu tappiɗ, hinai keeke, laa oh ag peh amuppa amelkad ii aqak ele daatteb, ag ele Kayaknu neekkakppa dubuttid ele daaglag.

¹⁶ Peh dimittim amu, aun laa nug appa qep elabppa qe mauhak gaɗa aɗatte, o iitta nug laa hamu mauhom gaɗa aɗatte, o iitta mauhak ebehi laa aɗatte, o iitta mauhaknu moɗ amu, nug deɗ eblaih aɗit ele nug da ele ouqa dayaknu elele iitta daakku.

¹⁷ Danab, o ah aun laa nug da ele ouqa dayaknu elele iitta amu, laa ag ib etta hipunin haknu ofanu makau manakppanu uhuɗ nakok laa aon, nippud laappa mena, le godeppanu itak ele amu, ag qodippeg noaɗ!

¹⁸ Anam dayeb, danab laa nug da ele ouqa dayaknu elele daatte amu, nug uud onig hisop awa, le uhuɗ ele kaboliak amu, nug amuppa ma, nug peh tauɗ qedatta, amu nug keeke peh ooppa daatteb, danab appa daaegeg danab mauhom, amu ele tauɗ qadakku. Amu nug ele aun laa mauhak ebehi aɗom, o iitta qe mauhak gaɗa aɗom, o iitta hamu mauhak gaɗa aɗom, o iitta mauhaknu moɗ aɗom amu, nug nug ele tauɗ qedakku.

¹⁹ Am danab nug da ele ouqa dayaknu elele daatte amu, nug deɗ ewamppa, amu deɗ eblaih aɗitppa ele, nug danab nug da ele ouqa dayaknu elele iitta, nug nug le amu tauɗ qedakku. Nug anam heeb ukkeb, deɗ eblaih aɗitppa nug nug tauɗ qetteb, nug da ele ouqak dayaknu elele daakku. Danab nug da ele ouqa dayaknu elele bette amu, nug lamen iha, nug le layowa, tueb amu nug da ele ouqa dayaknu elele daakku.

²⁰ Amge danab laa nug keeke laa he, nug da ele ouqa dayaknu elele iitta daatte, amge nug da ele ouqa dayaknu ɗo ii dim lamidtte dayeb, nug da ele ouqa dayaknu elele iitta daatte dayeb, amuppa nug he, da, Yawe, dahil neekkakppa dahil mettid haknu peh lag dubuttid tak ele daatte amunu, nug Israel oolagppanu geɗittak daakkuoitte. Amunu diig am, le heeb, danab nug da, Yawe, da ele ouqa dayaknu elelenu le amu, laa nug le amu nuhigppa ii tauɗ qettom amunu, nug da ele ouqa dayaknu elele iitta.

²¹ Israel danab ah ag ɗo imu alet hanhan dim lamidkkulagoitte. Danab nug le, amuam le heeb, danab nug da, Yawe, da ele ouqa dayaknu elelenu le, nug le amu tauɗtte amu, nug ele lamen nuhikkud mihakku; amu aun nug le amu, amuam le heeb danab nug da Yawe, da ele ouqa dayaknu elelenu le amu, nug amu aɗatte amu, nug geha da ele ouqa dayaknu elele iitta dayeb ukkeb, tueb meeb, nug da ele ouqa dayaknu elele daakku.

²² Keeke aɗitai laa danab nug da ele ouqa dayaknu elele iitta lauɗidtte amu, keeke amu ele dahil neekkakppa dubuttid ele daatte, amu auntai nug keeke amu aɗatte amu, nug ele da ele ouqa dayaknu elele iitta dayeb ukkeb, tueb meeb, nug eɗua, da ele ouqa dayaknu elele daakku,” awa aum.