Namba 18 - Nobonob Baibel

Lewi buɗubppan mana mettak danab, amu Lewi buɗubppan mana mettak danab iitta ele dilag uɗat

¹ Amu Yawe Nug Aron amegppa aum. “Na, na begapad, amu Lewi buɗub laa, ag na buɗun iitta, ag oh dahil mettid haknu peh lagppa uɗat hekkulag, amu appa kobol elele iitta laa beeb, ag oh kobol amunu nob nau aoglagnu daatteb. Amge na, amu na begapad ele, ag am mana mettak danab, amu ahilag uɗatppa kobol elele iitta laa bekku dayeb amu, agib kobol amunu nob nau aoglagnu daatteb.

² Amu Israel dilag huu okkai Lewi, anukkanu uɗie uɗie, gemu ele daatte amu, na, na laipad ele, ag oh huu amun danab, amu na heppe, na laipad, Lewi buɗubppan mana mettak danab iitta ag uɗippeg, na, na begapad ele ag mettid haknu peh lag men maha aɗit ɗo nai yaak niitte ele appa daattep, ag amuppa, dahil ɗo maɗoɗnu uɗat henan daaglag amu, haen amuppa ag appa ag ehanadkkulagnu diieg!

³ Danab amu ag nahip nai waappa daanna, ag appa peh laugppa aɗi uɗat laa ag hekkulagnu ami amu, ag uɗat amu oh hekkulagoitte, amge ag dahil mettid haknu peh lag ooppan keeke daatteb, o qaɗab ele gukkuidna ii wamana. Ag anam hekkulag amu, geha danab amu, ag ele, ag oh mauhkkulag.

⁴ Danab amu ag na ele, dahil mettid haknu peh lakka, danab ah appa qagmetteb ele, ag appa peh amunu atognoattak uɗat oh hekkulag. Danab ag oolagppan iitta amu, amunu laippu laa nug na daattem eleppa appa iinab wama.

⁵ Dahil oppoɗi bak Israel danab ah laa dilagnu baula bemanu amu, ag Lewi buɗubppan mana mettak danab daatteb, ag mettid haknu peh lag ooppa, amu qaɗab ele, ag amuppa uɗat henana atognokkulag. Laal iitta.

⁶ Da Yawe, da dakka, da na laipad Lewi buɗubppan mana mettak danab iitta, ag Israel laa oh oolagppanu, ag ag mana mettak danab, ag ahilag daaglagnu hamu madakkulnu tituanadmi. Lewi buɗubppan mana mettak danab iitta, ag da, Yawe, ag dahilnu tituana meɗak daan, ag dahil mettid haknu peh lag danab ah appa qagmetteb ele, ag appan uɗat hekkulagnu daatteb.

⁷ Ag uɗat amu hekkulagnu tituanadmi, amge na, amu na begapad ele, ag aakkuib mana mettak uɗat qaɗabppanu, amu Oo Gun Eleppanu uɗat hekkulagnu daatteb. Da mana mettak uɗat haknu amu, da uɗat amu ahilag daakkunu hamu madattem. Aun laa nug onig amu iitta ele, nug dahil mettid haknu peh lag guguitta wakku amu, ag qeppeg mauhkkuoitte,” awa aum.

Mana mettak danab ag ahilag maha mana mettaknu Yawe mattom

⁸ Yawe Nug Aron amegppa anam awowa, Nug tuɗitta aum. “Da, Yawe, da dakka, da na, na begapad ele ag mana mettak atten Israel ag da meɗaglagnu hetteb ele amu, ag eppelagppanu aoglagnu, ag manan meɗaglagnu ele tituanadmi. Mana mettak amuam dahilnu tituanak daatteb. Amu mana mettak amunu doɗ, o ee aeg keeke, Israel ag da meɗappeg, laih atten ag ii manan meɗaglag daatte amu, da na, amu na begapad ele madattem. Maha amuam ahilag daatte, ag amu hanhan aoglag.

⁹ Ag mana mettak maha dahilnu tituanaknab daatte laih aab aɗuppa ii managlag, danab ah ag da meɗaglag ele amu, laih amuam ahilag daakku. Israel danab ah ag mana mettak attem attem aon, dahilnu tituanaknab dayebeb meɗaglag, amuam ee aegnu ofa, o iitta ib etta hipunin haknu ofa, o iitta eheɗ haknu ofa amu, ag mana mettak amu laa aon wakkulag dayeb, ag aɗi keeke laa maha laa ii manak ele amu, amuam na, na begapad ele, ahilag.

¹⁰ Ag mana mettak amunu, am Yawenu tituanaknab daatte doon lakkulag. Ag mana mettak danab oolagppan, danab oh ag amu lakkulag. Ag ee amunu, am Yawenu tituanak daatte dooglagoitte.

¹¹ Amu ee keeke, amuppa Israel danab ah ag huma epponitta mettaknu ofa hekkulag, laih ag ii manan meɗaglag amu, amu ele ahilag. Da na, amu na begapad, amu na aɗenad ele, ag hanhan aoglagnu, ahilag daakkunu madattem. Aun aɗi ag na lautppanu, ag da ele ouqak daagnignu elele amu, ag lakkulagnu ele.

¹² Am Israel ag olip goɗen enanag, aria wain bau tatamnu enanag, ee aeg tatam oɗutte enanag, ag da Yawe, ag da meɗatteb amu, da amu oh na, na begapad ele madattem.

¹³ Wanppan ee tatam oɗutte oh ag da, Yawe, ag da meɗatteb amu, amu oh am nahip, na begapad dilag eleib. Aun aɗi ag laulkadppanu, ag da ele ouqak daagnignu elele daatteb amu, ag amu lakkulag.

¹⁴ Israel oolagppa amu, aɗi am da Yawe dahilnuib dahil pelemppa daatte amu, amuam na, na begapad ele, ahilag daatte.

¹⁵ Israel dilag nid ⌊danab⌋ tatamnu, amu ag Israel, ag ahilkad doɗ nalkad ⌊dawai⌋ tatamnu oh ele, ag dahil daatteb. Ag dahil daatteb amunu, da na, na begapad ele madattem. Ag dahil daatteb amunu, Israel ag da meɗaglagnu henana, ag doɗ amu lanaknu epeɗiak daatteb meɗaglagnu, ag manan, da meɗaglag. Amge nid danab, doɗ ii lanaknu epeɗiak daatteb ele amu, ag amu manan meɗaglagnu aib daatte amunu, ag da meɗaglagnu henana, ag ahilkad nid danab tatamnu, ag ahilkad doɗ dawai tatamnu ii lanaknu epeɗiak daatteb ele, ag nid, doɗ amu ele tituanakppanu eɗua uhuqak dayaknu hekkulagoitte.

¹⁶ Ag tituanakppanu eɗua uhuqak amu hekkulagnu, haen nid ag kalam laippu aweb, ag uhuqak amu hekkulagnu, ag daden nob 55 gram silwa, ag amuppa uhuqadkkulag. Silwa amunu uug am, mana mettak lagnu melemel bia dayaɗ! Sekel laippu, aria gera 20 ele, aa oh ahilah uug am laippu.

¹⁷ Amge ag makau okkai ebehi ele, o iitta sipsip, o iitta meeme nalkad ⌊dawai⌋ tatamnu manan, da meɗaglagnu henana amu, ag doɗ amu tituanakppanu eɗua uhuqak hekkulagnu elele iitta. Amu oh am dahilnu tituanak daatteb. Ag doɗ amu manan, da meɗaglag. Ag mana mettak hekkulagnu amu, ag tiilkad qaɗabppa tauɗna, ittalkad manadkkulag. Mana mettak amuam aab aɗunu ofa, nuhig muttuɗignu da, Yawe, da oolppa ena doottem.

¹⁸ Doɗ amu teppulkad amu, mana mettak laappa ag momolkad, amu tuɗilkad naɗiap ele huma epponitta mettaknu ofa heeg, teppu amu ahilag daatte, amubia doɗ imu teppu oh am, ahilag daakku.

¹⁹ Gemu digma ukkak, Israel ag mana mettak hena, ag amu aon, da, Yawe, ag da meɗatteb, mana mettak amu ag dahilnu tituanak daatteb ele amu, geha laih ahilag daakkunu ami ele amu, laih amuam da ag, ag bekkalkad, amu ag aɗelkad ele, ahilag hanhan daakkunu madattem. Nai imuam dahil nug tituana nai qakkak tuqa awak laa iitta ele, amu ag, ag buɗulkad ele, ahilagppa daakku, am iitta ii mema,” awa aum.

Keeke Lewi buɗub ag aoglag

²⁰ Yawe Nug Aron amegppa anam awowa, Nug tuɗitta aum. “Israel laa ag wan da ag madattem, ag appa ag aulag daakkunu wan laa aoglag, amge ag Lewi buɗub amu, ag wan amuppa wan laa, ag aulag daakkunu ii aomna. Israel laa, ag wan ag aulag daakkunu aoglag, amge ag Lewi buɗub, ag wan laa amubia ag oolagppa ii aomna. Iitta. Da, Yawe, da ahilagnu anambia daakkul.

²¹ Anam amu, da Israel danab ah, ag ahilkad keeke ohnu obatak eblaih tanig ele ooppanu obatak laippu, da Lewi buɗubppan mana mettak danab iitta, da ag madattem. Lewi buɗubppan mana mettak danab iitta, ag dahil mettid haknu peh lag danab ah appa qagmetteb ele, ag amuppa uɗat hetteb, amu uɗat amunu nob, daden mattaglagnu, da ɗo iikku mettem. Amuam ag aulag bia daakku.

²² Gemu digma ukkak amu, Israel laa oh ag dahil mettid haknu peh lag danab ah appa qagmetteb ele, amuppa appa uɗat hekkulagnu gukkuidna iinab wamana. Ag anam hekkulag dayeb, ag eheɗ hena, ag amunu bu aona, ag mauhadkkulag.

²³ Lewi buɗubppan mana mettak danab iitta, ag am dahil mettid haknu peh lag danab ah appa qagmetteb ele, ag amuppa uɗat henana, ag ɗo laa tippalkkulag dayeb, ag eheɗ aakku hena bu aoglag. Buɗub buɗub doobob, ɗo imuam nug alet anam hanhan daakku. Lewi buɗub ag amu, ag Israel oolagppa wan laa, ag aulag daakkunu ii aomna.

²⁴ Aɗinu? Da Lewi buɗubppan mana mettak danab iitta amu, da keeke obatak eblaih tanig ele ooppanu obatak laippu, Israel ag ofa daakkunu aon, da, Yawe, da meɗatteb amu, da amu, ag aulag bia daakkunu madattem. Diig amunu amu, da anam aakku ahilagnu ami. ‘Israel oolagppa ag wan maha laa, ag aulag daakkunu ii aomna,’ ” awa aum.

²⁵ Amu Yawe Nug Aron amegppa ana mala, Nug eɗua, Moses amegppa aum.

²⁶ “Na Lewi buɗubppan mana mettak danab iitta, na ag nai imu mattana, appe doyeg!” awa aum. ⌊Nug anam a amu, Moses Nug ag amelagppa inam aum.⌋ “Israel ag keeke laa, amuam ag Lewi buɗubppan mana mettak danab iitta, ag aulag bia, Yawe Nug ag mattom amu, ag amu madappeg, ag amunu obatak eblaih tanig ele ooppanu obatak laippu ofa daakkunu aon, Yawe mettaglagoitte.

²⁷ Israel danab laa aun nug ee aeg mumuɗaknu abenppanu ee aeg bau, o iitta, grep meu tappa leppu awaknu abenppanu wain bau Yawe mette aotte, amubia ag Lewi buɗub, Israel laa ag ag keeke madatteb, ag amu oolagppan maha laippu Yawe mettaglag, am anambia daakku.

²⁸ Ib amuppa, Israel laala ag hetteb bia, ag ele ofa hena, Yawe mettaglag. Israel ag ahilkad keekenu obatak eblaih tanig ele ooppanu obatak laippu Yawe mettaglagnu hena, ag ag madatteb, ag Lewi buɗubppan mana mettak danab iitta, ag ele keeke aoppignu obatak eblaih tanig ele ooppanu obatak laippu Yawe mettaglag. Israel madattebppanu, ag obatak eblaih tanig ele ooppanu obatak laippu Yawe mettaglagnu, ag obatak amu mana mettak danab Aron mettaglagoitte.

²⁹ Israel ag ag madatteb, ag amunu obatak eblaih tanig ele ooppanu obatak laippu, amuam Yawenu laih, ag laih amu Aron mettaglag amu, ag laih enanag, Yawenu tituanaknab daatte nug mettaglagoitte,” awa aum.

³⁰ Amu Yawe Nug nai imu ele Moses amegppa aum. “Imu ele amu, na Lewi buɗubppan mana mettak danab iitta, na ag amelagppa appe doyeg!” awa aum. ⌊Nug anam a amu, Moses nug ag amelagppa inam aum.⌋ “Haen ag keeke enanag ofa daakkunu aon, Yawe medatteb amu, Nug ee aeg mumuɗaknu abenppanu ee aeg bau, grep meu tappa leppu awaknu abenppanu wain bau ele danab laa ag aon dona mettaeg aotte bia aokku.

³¹ Ag maha laippu Nug mettona, laih eblaih waɗele daatteb amu, ag, ag baelkadppa ele ag mettid haknu peh lag guguittak, appate, o iitta laulagppate, o iitta adeppa amu ag lakkulag. Amuam ag mettid haknu peh lag danab ah appa qagmetteb ele, ag amuppa uɗat hettebnu nob aakku amunu, ag mettid haknu peh lag guguittak appate, o iitta lakkate, o iitta adeppa amu, ag lakkulag.

³² Ag laih enanag aon, Yawe mettaglag, amuppa ag beɗulagppa aab laa ii daama. Ib amuppa ag heppeg, ofa Yawenu tituanak daatteb, Israel ag aon uɗitteb ele amu, ofa amuam Kayaknu neekkakppa dubuttid tak ele ii daama. Anam amu, ag ii mauhmana,” awa aum.