Namba 17 - Nobonob Baibel

Aronnu dud qa oiyak hokkat haɗag qa, meu almon, kanaɗ bia, oum

¹ Amu Yawe Moses amegppa aum.

² “Na Israel danab ah amelagppa inam appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Israel dilag huu okkai anen anen, huu ag tatam beppig daatteb amu, ag ahilkad ikki danab appeg, ag dudqak hokkat ahilkad na mettaglag. Dud qak hokkat amu ebqak am 12 daakku, amu ikki danab anen anen dilag hokkatppa ag onilkad yaak dayaɗ!

³ Lewi buɗub dilag hokkatppa amu Aron onig ye! Aɗinu? Israel dilag huu okkai anen anen, ag tatam beppig daatteb amu, ag oh ahilkad dudqak hokkat anen anen laippu daakkuoitte.

⁴ Aria, Israel dilag huu okkai anen anenppanu ikki danab anen anen ag hokkat medappeg amu, na hokkat amu dahil mettid haknu peh lag danab ah appa qagmetteb ele, na peh amuppa Tituanak Nainu Kunup kontrak inak ele noobppa maatte! Appa amu da ag ele qagmettem.

⁵ Na anam maadppe daappeg, danab laa da nug mana mettak danab daakkunu tituanmi ele amu, nuhig dudqak hokkat amu qaɗu bekku. Ib amuppa da heppi, Israel danab ag nahipnu naittuɗ heegeg da doottem ele amu uuglag,” awa aum.

⁶ Amunu Moses nug Israel danab amelagppa a, Israel dilag huu okkai, huu amu ag tatam beppig daatteb amu, huu 12 amu anen anen ohppanu ikki danab ag dudqak hokkat ahilag nug medappig. Aron nug ele huu ebqak 12 amu oolagppa dayom.

⁷ Aria, Moses nug peh lag men maha aɗit ɗo nai yaak niitte ele appa daattep, nug amuppa Yawe noobppa hokkat oh qagmaattom.

⁸ Nug appa qagmaatte daaegeg, wagɗe deɗ amuppa Moses nug peh lag men maha aɗit ɗo nai yaak niitte ele appa daattep, nug amuppa noum. Nug amuppa noa amu, nug Aronnu hokkat am qaɗu bak aakkuib ii anttom. Iitta! Qaɗu bena, haɗag qena, haɗag mappateg, hokkat am meu almon oeg anttom. Aronnu hokkat am Lewi buɗubppanu dayom.

⁹ Anam daye amu, Moses nug Yawe noobppanu dudqak hokkat oh diia, Israel danab oh ippuanattom. Ag anadna, danab anen anen ag ahilkad hokkat eɗun diin goppig.

¹⁰ Anam heeg, Yawe Moses amegppa aum. “Na Aronnu dudqak hokkat amu eɗun, Tituanak Nainu Kunup kontrak inak ele noobppa me! Na appa meppe, at aakku dayebeb, da aɗi nai attemnu, danab, ag nai tappe nak danab amu, ag dahilnu naittuɗ ii memananu dabmekkulag. Ag at amu dabmena ag dahilnu naittuɗ ii hena, ag ii mauhmana,” awa aum.

¹¹ Amu Moses nug Yawe hekkununab aum amu, nug anamnab aakku heum.

¹² Israel danab ah ag ⌊Aronnu hokkat haɗag qa, mappata meu oum anidna, ag hipunin heppig dooppig amunu, ag baɗan,⌋ Moses amegppa appig. “Antteg! Ig geha mauhkkunig! Ig geha padal mekkunig! Genab, ig ohnab geha padal mekkunig!

¹³ Aun laa nug ⌊ooppa aab ele oiyaya,⌋ Yawenu mettid haknu peh lag guguittak doa amu, nug mauhkku amunu, ig oh mauhkkunigtai?” aon appig.