Namba 16 - Nobonob Baibel

Kora, Datan, Abiram, On ele, ag Mosesnu nai tappaeg ne, laa nug nuhig aben aokkunu heppig

¹ Kora, Datan, Abiram amu On ele ag oh Mosesnu eheɗ doon, nuhig nai tappaeg neum. Kora nug am Ishar bekka. Ishar nug am Kohat bekka. Kohat nug am Lewi bekka. Datan, Abiram ele aa amu Eliap bekoɗ, mamelah nug am Israel dilag huu okkai Ruben danab. On, nug am Pelet bekka, nug ele Ruben buɗub.

² Ag Moses abenabppanu lamidkkulagnu hena, nuhig nai tappaeg ne heegeg, Israel danab 250 laa, Israel ag, ag ikki danab daaglagnu otiadppig ele amu, ag ahan, danab waɗele amu dim lamadna ehanadppig.

³ Danab amu ag qagmena, Moses, Aron ele aa ahilag dabmakppa eheɗ hepiɗ amu appeg dooglahnu gumatna tena, ag amelahppa appig. “Aa ena haknu tom tippalya, eheɗ hepiɗ! Aɗinu? Tamaniak danab ah imu oh ag Yawenu tituanak daatteb; Yawe Nug ag oolagppa aakku daatte. Aa aɗinu, Yawenu danab ah imu tippalattak attannab daattep doottep?” aon appig.

⁴ Ag anam aeg, Moses nug doya, nug laippun gateg qaun o, gomela, iɗu wanppa ma, ⌊Kayak unuqittom⌋.

⁵ Nug hewowa amu, nug Kora laikkud ele amelagppa aum. “Butti amu, Yawe Nug aun am nuhig, aun am nuhignu tituanak daatte ele ippunigkku. Yawe Nug heeb, danab amu nug Yawe guguitta wakku. Ao, danab aun Yawe nug tituantte amu, Yawe Nug heeb, danab amu nug, Nug guguitta wakku.

^6-7 Kora, na laipad ele, ag am inam hekkulag; butti buttua ag bras tappiɗ, mana mettak danab ag amuppa uɗat hetteb ele, ag anen anen amu aon, ag Yawe noobppa aab, amu kalu danab ile muttuɗig enanag bette ele aguppa mekkulag. Auntai laa Yawe Nug danab amu tituankku amu, danab amu nug Yawenu tituanak daatte. Ag Lewi buɗubppan mana mettak danab iitta ag ena haknu tom tippalna, eheɗ hetteb!” awa aum.

⁸ Moses nug anam awowa, nug tuɗitta, imu ele Kora amegppa aum. “Aria, ag Lewi buɗubppan mana mettak danab iitta ag doyeg!

⁹ Israel dilag Kayak Nug ag Israel laa oh oolagppanu tituanatte, ag nuhikkud, piɗe laa daatteb. Nug ag diia he, ag Nug Yawe, nuhig peh laugppa uɗat hekkulagnu Nug guguittak daatteb. Ag am Israel laa oh noolagppa daanna, Kayaknu ehanittak mattaglagnu, ag Nug guguittak daatteb. Anam amu, amuam ahilagnu elele iittate?

¹⁰ Yawe Nug na, amu na laipad Lewi buɗubppan mana mettak danab iitta, ag diia he, Nug guguittak daatteb, amge gemu amu, ag mana mettak danab ele daaglagnu hetteb.

¹¹ Haen ag Aronnu naittuɗ metteb amu, ag naippa nugnab ii yaatteb. Iitta. Ag Yawe dimettan, nuhig nai tappaeg ne, Nug waappa ii daamnanu hetteb,” awa aum.

¹² Moses nug nai anam Kora amegppa awowa amu, nug Eliap bekoɗ, Datan, Abiram ele onilahppa eum. Nug aa onilahppa eum, amge aa ii gumidya uɗipiɗ. Iitta aa nai imu Moses dookkunu meeh ukkom. “I na gumidɗa ii gomaɗa!

¹³ Na ig atu taɗak imuppa mauhkkunignu he, ig wan enanag, wan ittag ele, amuppa ee meu huana otte ele amu, ig wan amu uut uɗimut. Amuppa na kobol eheɗ elele iite heme? Na amu heme, gemu amu, na ig ihinig okkai daan, ig aɗi aɗi hekkunignu duttunigkkutnu ele hettem. Amuam eheɗ.

¹⁴ Na omaigppe, wan enanag, wan ittag ele, appa ee meu huana otte eleppa gokkunignu ame, amge na amu iinab heme. Na ig dad okkai, amu grep dad ele megappe aopput, ig aunig daaglagnu ame, amge na amu ele iinab heme. Na danab imu hambuppualadna, amelag hautkkutnu elele daanna, anam hekkutnu dabmettemte? I ii wamaɗa!” aoya apiɗ.

¹⁵ Aa nai anam aeh, Moses nug oo huana nauhe, nug Yawe amegppa aum. “Ag nahipnu mana mettak heppeg amu, na aib aome. Da eheɗ ahilagnu laa iinab hemi, ahilagppanu doɗ donki keeke, da amu laa ahilag iinab aomi,” awa aum.

¹⁶ Moses nug Yawe amegppa anam awowa, nug Kora amegppa aum. “Na amu, na laipad ele, ag oh butti Yawe noobppa wakkulag. Ag, amu Aron ele oh.

¹⁷ Danab anen anen ag bras tappiɗ, mana mettak danab ag amuppa uɗat hetteb amu, ag tappiɗ ahilkad aon, kalu danab ile muttuɗig enanag bette ele amuppa maadkkulag. Geha bras tappiɗ 250, na laipad ag amuppa uɗat hekkulagnu daaglag. Ag maadna aɗualadna, ag aon, Yawe gumidna wana, Nug mettaglag. Aria, na, Aron ele, aa ele anam hekkulah.” Moses nug Kora amegppa anam aum.

¹⁸ Moses nug anam aum amunu, buttua danab anen anen ag bras tappiɗ ahilkad akkan, aab aɗu, amu kalu danab ile muttuɗig enanag bette ele amu inadna, ag, Moses, Aron ele oh mettid haknu peh lag danab ah appa qagmetteb ele, lag amu odppa, appa hippaidna daappig.

¹⁹ Amu Kora nug heehe, Israel danab ah oh ag Moses, Aron ele dimatan, ahilah nai ele tappaeg neum amu, nug he, danab ah ag mettid haknu peh lag danab ah appa qagmetteb ele, ag lag amu odppa daaegeg, Yawenu binag amahlak oppiaawak ele Israel danab ah oh noolagppa ne anidppig.

²⁰ Anam be amu, Yawe, Nug Moses, Aron ele amelahppa aum.

²¹ “Da danab imu pahanab hadappi nauhkkulagnu, aa awaidya laih dayeɗ!” awa aum.

²² Yawe Nug anam aum, amge Moses, Aron ele aa laippun gatelah qaun o gomelya iɗulah wanppa meya, aa Kayak unuqidya apiɗ. “O Kayak, na danab ah oh dilag Kayak. Na danab laippuib hipunin heeb amu, danab ah oh imu dilagnu oo nauhak doon, eheɗ hadakkutte?” aoya apiɗ.

²³ Aa anam aeh, Yawe Nug Moses amegppa aum.

²⁴ “Na Israel danab ah oh amelagppa inam appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Ag Kora, Datan, Abiram ele dilag pehppanu qe meig!” awa aum.

²⁵ Yawe Nug anam a, Moses nug aha, Datan, Abiram ele gukkuata ukke, Israel dilag ikki danab ag nug dim lamitteg,

²⁶ Nug Israel danab ah amelagppa aum. “Ag danab nau imu dilag peh lag awaidna, laih piɗe dayeg! Ahilag keeke laippu laa aibnab lauɗidppig. Ag hipunin heppig, ag amunu mauhkkulag. Ag uuadna ii gokkulag, o iitta ag ahilkad keeke laa lauɗidkkulag dayeb amu, ag ele mauhkkulag,” awa aum.

²⁷ Moses nug anam aum amunu, Israel danab ag Kora, Datan amu Abiram ele dilag pehppanu qe meppig. Datan, Abiram ele aa matu, aa waalti, amu nid naunau ahilti ele dimittim dona, ag pehnu odppa hippaidna daappig.

²⁸ Aria, Israel laa ag Kora, Datan, amu Abiram ele dilagnu peh lag awaidna wana, laih piɗe daaegeg amu, Moses nug aum. “Ib imuppa da uɗat digdig hettem amu, ag Yawe Nug da meiɗe uɗien hettem, da dahil dabmakppa ii uɗien hettem dooglag.

²⁹ Am danab imu aa danab laa oh bia kaino mena mauhtteb, ag amubia kaino mena mauhkkulag dayeb amu, amuam Yawe Nug da ii meiɗe uɗimi ippunigkku.

³⁰ Amge Yawe Nug genab kobol bau heeb, wan oɗe matuleb, danab imu ag bau daanna, ahilkad keeke ele oh moɗppa noppeg, ag danab ah, ag danab imu ag Yawenu, ‘Am hamunab,’ dooppig dooglag,” awa aum.

³¹ Moses nug nai amu oh mattia male, haen amuppanab wan danab amu aa tappaya daapiɗ ele amu obate,

³² oɗe metta, moɗ daye, aa amuppa nopiɗ. Datan, Abiram ele, aa baeltippa ⌊qe-ii-meppig ele⌋, amu ahilkad keeke ele, amu Koranu, ahilkad keeke oh ele moɗ ooppa noppig.

³³ Ag bau daanna, ahilkad keeke mameg meppig, amu oh ele moɗ ooppa nona wappig. Ag moɗ ooppa noeg amu, wan oɗe eɗua keldoa, ag tonatte, ag mauhna, Israel danab ah oolagppa baula ii daappig.

³⁴ Haen ag wan ooppa nonana amu, ag gayak nau heegeg, Israel danab ah laa oh daappig amu, ag oolppig. Aɗinu? Ag oolna gonan, ag enan appig. “Wan obata, oɗe metteb, ig ele nomata!” aon eppig.

³⁵ Amu ag wan ooppa noeg, Yawe Nug he, danab 250 ag kalu danab ile muttuɗig enanag bette ele maippig, ag aab ewatte mauhppig.

³⁶ Amu Yawe Nug Moses amegppa aum.

³⁷ “Na mana mettak danab Aron bekka Eleasar appe, nug danab ag aab ewatte mauhppig ele dilag bras tappiɗ amu daattebppanu, aben amuam gakkaɗak daatte amu, nug aben amuppanu diia, nug aab ottag, kalu eotte ele awa ukka, laih nakok uma, appa gokkaɗatteb ukkaɗ! Anam hekkunu diig am, ag bras tappiɗ amuppa ag kalu danab ile muttuɗig enanag bette ele manan, da meɗappig amunu, bras tappiɗ amuam dahilnu tituanak daatteb.

³⁸ Bras tappiɗ amu, danab ag hipunin qeppig ele, ag aɗappig. Ag hipunin qeppig amunu, mauhppig. Bras tappiɗ amu danab mauhppig ele, ag amuppa mana mettak hena, ag aon, da, Yawe, da gumiɗna uɗina, da meɗappig amunu, tappiɗ amu ag dahilnu tituanak daatteb amunu, na heppe, hamappa oadppeg, otalna, teppu iitta beppeg, ag qaɗab dahil qaɗeppa maatteg! Na anam heppe, amuam Israel danab ah dilag at dayebeb anidna, ag hipunin hemananu dabmekkulag,” awa aum.

³⁹ Yawe Nug anam aum amunu, Moses nug a, mana mettak danab Eleasar nug danab mauhppig ele dilag bras tappiɗ akka he, ag qaɗab qaɗeppa qata-aqadkkulagnu hamappa qeegeg, teppu iitta otalattom.

⁴⁰ Yawe Nug Moses amegppa a, Moses nug amelagppa nug anamnab hekkunu aum bianab heum. Anam haknu diig am, at amuam Israel danab ag amelagppa hanhan daakku. Anam dayeb amu, ag anidna, auntai laal iitta, Aron buɗubppan ag aakkuib Yawe noobppa kalu danab ile, muttuɗig enanag bette ele amu amotkkulag. Kora laikkud ele ag anam hena mauhppig, am laa ag ele anam helob amu, ag ele mauhlob.

Israel ag Yawe dimettan, nuhignu eheɗ dooppig amu, ag nob nau anidppig

⁴¹ Aria, wagɗe deɗ amuppa, Israel danab ah ag baula Moses, Aron ele dilahppa naittuɗ mena appig. “Aa Yawenu danab laala aqapiɗ,” aon appig.

⁴² Amge haen Israel danab ah ag Moses, Aron ele amelahppa nai hekkulagnu qagmeppig amu, ag mettid haknu peh lag danab ah appa qagmetteb ele, ag amuppa neekkeg ukke, lombig tone, Yawe binag amahlak oppiaawak ele tula neum anidppig.

⁴³ Anam daye, Moses, Aron ele aa mettid haknu peh lag danab ah appa qagmetteb ele, aa lag amu odppa waeh,

⁴⁴ amu Yawe, Moses amegppa aum.

⁴⁵ “Aa qe meya, danab ah imu uuadya waya, laih daapeɗ, da laippun heppi, danab ah imu mauhkkulag,” awa aum. Yawe Nug anam aum, amge Moses, Aron ele aa gatelah qaun o gomelya iɗulah wanppa mepiɗ.

⁴⁶ Anam heya amu, Moses, Aron amegppa aum. “Na bras tappiɗ nahip aon, kalu danab ile muttuɗig enanag bette ele amu ooppa inan, qaɗabnu aab ele aon, pahanab Israel danab ah daattebppa gona, eheɗ haknu noob nau amuppa iitta mekkunu na amu he! Aɗinu? Yawe Nug ahilagnu oppoɗi huana be, Nug he, oɗe nau danab kuɗum aqe mauhtteb ele aakku digma, aqe mauhtteb. Laa mauhmananu amu, na amu he!” awa aum.

^47-48 Moses anam haknu aum amunu, Aron nug Moses aum bia heum. Nug bras tappiɗ nuhig awa, pahanab danab ah daappig oolagppa ukkom. Oɗe nau danab kuɗum aqe mauhtteb ele amu, matu danab ah dilagppa digmeum, amge Aron nug danab ah bau daappig, amu mauhppig ele, amu oolagppa hibaitta dayaya, nug kalu danab ile muttuɗig enanag bette ele amu mana, amuppa nug danab ah dilag eheɗ haknu noob nau iitta meeb elele medakkunu heum, amu oɗe nau danab kuɗum aqe mauhtteb ele, amu ele aakku iitta meum.

⁴⁹ Oɗe danab kuɗum aqe mauhtteb ele amu malom, amge ii malom haenppa amu 14,700 danab ah ag oɗe amuppa mauhppig. Danab ag Kora, nuhig hak nau amuppa mauhppig ele, ag amu ebqak amuppa ii daatteb.

⁵⁰ Oɗe danab kuɗum aqe mauhtteb ele amu male amu, Aron nug eɗua, mettid haknu peh lag danab ah appa qagmetteb ele, nug lag amu odppa, appa Moses gumitta ukkom.