Namba 14 - Nobonob Baibel

Israel danab ah ag Yawe dimettan, nuhig nai tappaeg neum

¹ Lokkumakppa atu italak danab ag oippignu mattieg, Israel danab ah ag doon, ag tuqan amuppa qalananab gaappig.

² Israel danab ah ag Moses, Aron ele dilah naittuɗ menana, ahilahnu appig. “Ig Isip uppa, o iitta, atu taɗakppa ippa mauhlom am ena.

³ Yawe Nug aɗinu omaikkeb, wan amuppa gokkunignu hette? Danab ag appa daatteb, ag am ihinig kekeɗ, ig ag ele ban heta amu, ag ig iqaglag. Ag iqappeg mauhpput amu, ag ihinkad ah, nid naunau ele aɗualadppeg, ag eppelagppa daaglag. Ig wan amuppa gokkunig am ena iitta. Ig eɗut Isip gokkunig amu ena,” aon appig.

⁴ Ag anam mattinna, akka akka nug amegppa appig. “Ig anuqak danab laa noonig awa, eɗua Isip ukkebeb gokkunignu otit gotu!” aon appig.

⁵ Ag anam aeg amu, Moses, Aron ele aa Yawe unuqidkkulahnu, Israel danab ah laa oh daappig noolagppa laippun gatelah qaun o gomelya iɗulah wanppa mepiɗ.

⁶ Aa anam heeheh, Nan bekka Josua, amu Jepune bekka Kalep ele, aa am lokkumakppa atu italak danab wan amuppa goppig ele, aa ele ag oolagppa daayya gopiɗ amu, danab aɗit amu aa lamen ahilti pattiɗya,

⁷ amu Israel danab ah oh amelagppa apiɗ. “Wan ig ooppa nota italta oimut ele am, wan enanagnab.

⁸ Ig Yawenu nai dim lamidpput amu, Nug ihinignu oo ena dookku. Nug oo ena ele doyaya, ig omaikkeb, wan amuppa nota megakku. Wan amuam wan enanag, wan ittag ele, amuppa ee meu huana otte.

⁹ Keeke laippu am okkainab daatte. Amuam, ag Yawe dimettan, nuhig nai aib tabappeg noum. Laa amu, ig geha danab ah wan amuppanu eɗadta autta aognig amunu, ag aib ahilagnu baɗappig. Ag am ehanittak laa iitta, amge Yawe Nug ig ele daattem. Ag ahilagnu aib baɗappig,” aoya apiɗ.

¹⁰ Josua, Kalep ele aa anam apiɗ, amge Israel danab ah laa oh ag Moses, Aron ele menppa makkuɗatkkulagnu madippig. Mattiegeg amu, Yawenu binag amahlak oppiaawak ele mettid haknu peh lag danab ah appa qagmetteb ele, amuppa tuale, Israel danab ah oh ag anidppig.

¹¹ Ag antteg amu, Yawe Nug Moses amegppa aum. “Danab ah imu ag dahilnu, ‘Keeke hamunab,’ dootteb; amu haen gane laa ele ukkeb, ag dabmak amu uuglag? Da ag oolagppa dahilnu dabmettaknu kobol danab haknu elele iitta iɗu iɗu hattami, amge ag dahilnu oolagppa genab ii dootteb. Amu haen gane laa ele ukkeb, ag dabmak amu uun, ag dahilnu oolagppa genab dooglag?

¹² Da geha heppi, oɗe nau danab kuɗum aqe mauhtteb ahilagppa beeb, ag ohnab mauhkkulag, amge da heppi, na buɗunad ag huu ebqak okkainab, daatteb imu eɗittak, ahilag ɠagattag ele am daatteb imu eɗittak, ag am ɠagattagnab daaglag,” awa aum.

¹³ Yawe Nug anam Moses amegppa a, Moses nug aum. “Na nahip ɠagattagppa hee, nahipad danab ah imu ag Isip uun uɗippig amunu, na danab ah imu uug nau anam madappe, Isip ag geha amunu dooglag!

¹⁴ Na danab ah imu heppe, padal mekkulag dayeb amu, Isip ag danab ah wan ig gottemppa daatteb, ag amu amelagppa nahip ɠagattag okkaippa danab ah imu ehanatte, ag Isip uun uɗieg, ippa na hee, padal mena, iitta meppig appeg dooglag. O Yawe, ig gottem ele, danab wan amuppanu ag na danab ah imu ag ele daattem amu, ag dooppig daatteb. O Yawe, danab wan amuppanu, ag na Israel, na ahilagppa tulan wae anidttebnu amu, ag dooppig. Nahip lombig am Israel, ag tonatta daattenu amu, ag dooppig. Na amunppa lombig teppu ele attan tak amuppa daanna, noolag aon omaladna gonana, tuqanppa na aab ewak okkai attan takppa daanna, ag noolag aon omaladna gottem amu, ag dooppig.

¹⁵ Na danab ah imu haen laippu oh aqappe mauhppeg amu, danab ah laihnu ag nahip hak okkainu dooppig ele ag akkulag.

¹⁶ ‘Yawe Nug Israel omalatta ukka heeb, ag wan laappan danab ah aqappeg mauhppeg, Israel ag aguppa daaglagnu amelagppa nai ɠagattag qetta aum, amge Nug amu hekkunu ɠagattag elele iitta amunu, Nug aqe, ag ohnab atu taɗakppa mauhadna malappig,’ aon akkulag. Na ag oh aqappe mauhppeg amu, ag geha anam aakku akkulag.

¹⁷ Amunu, O Yawe, dahil Naɗi, da na nahip ɠagattagppa, na aɗi keeke hekkutnu nahip nai ɠagattag qettan ame amu, na amu hekkutnu oɗ medattem. Na inam ame.

¹⁸ ‘Da, da Yawe, da paha oo nauhak ii doottem. Dahil oo mauhaknab kobol am amba, leta nette. Da ele hipunin, nai dahil tappe nak ele uhuqa mettak hettem. Amge da danab ah ag hipunin hetteb ele bu madattem; uuatti hamu ii gotteb. Ge, danab ag hipunin hetteb ele amu, da ag bu aqatti ukke, ag buɗulkad menuattak huu laippu bia ewam o waɗele batak amu, bu qak amunu uug ag ele aqadtte,’ aon ame.

¹⁹ O Yawe, na ame amubia, na danab ah dilagnu oo mauhaknab doon autna aottem amunu, da na danab ah imu dilag hipunin uhuqna madakkutnu oɗ medattem. Danab ah ag Isip uun uɗippig uɗie, gemu batak, na ahilag hipunin uhuqna madattem amunu, na anamib hekkutnu oɗ medattem.” Moses nug Yawe anam unuqittom.

²⁰ Moses nug anam unuqitte amu, Yawe Nug oɗeppa awa aum. “Na oɗ meɗame, amubia da hipunin ahilag aakku uhuqen madattem.

²¹ Da uhuqe madattem, amge da genab bau daattem, binag amahlak oppiaawak ele dahil ele genab wanppa ambak daatte amu, genab amubia

^22-23 danab ag binag amahlak oppiaawak ele dahil anidna, dahilnu dabmettaknu kobol danab haknu elele iitta, da Isip appa, atu taɗakppa ele hemi, amu ele ag anidna, ag wan imu da ag mamelkad aɗi amelagppa dahil nai ɠagattag qetten madakkulnu ami amu, ag wan amu iinab anidmana. Ag hak dahil, keeke anidppig, amge ag da oɗel ii doona, ag haen kuɗum ma anttak meɗan, ag dahilnu, ‘Keeke hamunab’ dooiɗppig amunu, ag wan amu iinab anidmana.

²⁴ Amge dahil maɗi nid Kalep, nug am diig laa; nug oo unuqag eleppa genab da dim lamiɗtte amunu, da geha nug omale, wan nug ukkom eleppa gokkul. Amu nug buɗub ag geha wan amu aon daaglag.

²⁵ Amalek danab, amu Kanan danab ele ag Kanan wanppanu oolnu noakppa daatteb. ⌊Israel danab ah ag hipunin qeppig amunu, da geha ag ii ehanadppi, ag danab amu ii eɗadmana⌋ amunu, ag butti eɗun aon, atu taɗakppa ib laa Le Kokoɗppa ukkak amu, ib amuppa ukkeg!” Yawe Nug anam aakku aum.

²⁶ Amu Yawe Nug tuɗitta, Moses, Aron ele amelahppa aum.

²⁷ “Danab ah nau imu ag da hettemnu haen kuɗum naittuɗ meegeg uɗie, gemu ele hetteb; amu haen gane laa ele ukkeb, ag amu hak uuglag. Israel danab ah imu, ag am naittuɗ mak danab ah, da ahilag naittuɗ mak amu doomi.

²⁸ Amunu na ag amelagppa appe doyeg! ‘Da Yawe, da attem. Da genab bau daattem, genab amubia da heppi, ag mattieg doomi, amubianab ahilagppa bekku.

²⁹ Ag atu taɗakppa mauhlob am ena appig amunu, ag geha atu taɗak imuppa mauhkkulag. Aun aɗi oh ag maɗ 20, o iitta maɗ 20 eɗittak ebaqappig ele, ag dahilppa naittuɗ mena appig ele, ag geha atu taɗak imuppa mauhkkulag.

³⁰ Da eppel humen, ag wan imu madappi, ag amuppa daaglagnu dahil nai ɠagattag qetten mattimi, amge ⌊ag da dimeɗan, dahil nai tappaeg ne, ag eɗun Isip gokkulagnu appig amunu,⌋ laippu laa wan amuppa iinab noma; Kalep, Jepune bekka amu Nan bekka Josua ele, aa aakkuib nokkulah.

³¹ Ag laa amu, ag wan amuppan danab ag ahilkad ah, nid ele diippeg, ag ag eppelagppa daaglanu appig amu, nid ahilkad amu da omaladppi, ag wan amuppa ena daan, ena dooglagnu gona daaglag. Ag gemu okkai daatteb amu, ag wan amu uuppig.

³² Amge ag amu, ag atu taɗakppa mauhadkkulag.

³³ Ag da, Yawe, ag da ippunadmi bia da dim lamiɗkkulagnu uun heppig amunu, diig amunu ag bekkalkad geha atu taɗakppa mauhnoak maɗ 40 oiglag. Ag geha anam oippeg ukkeb, ag laa oh mauhadkkulag.

³⁴ Lokkumakppa atu italak danab ag wan atu italkkulagnu maatteg goppig amu, ag deɗ 40 oippig. Anam bia, ag hipunin heeg, ag hipunin hak amunu guittak maɗ 40 batak doon oiglag. Maɗ laippu, amu deɗ anen anen, deɗ 40 wan italna oippig, am amu elele medakku. Ib amuppa amu, da ahilag hak amunu eheɗ doyeye ool ii madattem, ag amu dooglag.’

³⁵ Da, da Yawe, geha da keeke imu oh genab, danab oh ag da diimeɗan, nau heppig ele, da ahilagppa hekkulnunab ami amu hekkul. Ag oh tamanin, da nai ami amu tappaeg neum. Ag geha atu taɗakppa iitta mekkulag; ag geha aben amuppa mauhkkulag,” awa aum.

³⁶ Am Moses nug danab 12, ag lokkumakppa wan amu italna anidkkulagnu maatte goppig amu, danab amu oolagppa eblaih tanig ele, ag eɗun uɗin heeg, Israel laa oh ag Yawenu naittuɗ meppig. Ag wan amunu nai eheɗ mattieg,

³⁷ oɗe nau danab kuɗum aqe mauhtteb ele, oɗe amu ag aqe, ag Yawe noobppa mauhppig.

³⁸ Danab 12 ag wan amu italkkulagnu goppig, amge Nan bekka Josua, amu Jepune bekka Kalep ele aakkuib amu bau daapiɗ.

Israel ag Yawe aib aum doonna, ag Kanan wan aoglagnu wagai meppig

³⁹ Haen Moses nug Israel amelagppa Yawe aɗi aum amelagppa aum amu, ag naunab gaappig.

⁴⁰ Wagɗeb buttuanab amu ag ahan, Kanan wanppa laih qauko qauko ele, ag wan amuppa tena, ban hena, wan aoglagnu bappaidppig. Ag appig. “Ig hipunin hemut ⌊doottem, amge gemu ig oonig eɗuttem⌋ amunu, ig aakku gota, wan Yawe Nug ig megakkunu nai qakka aum, ig amuppa tekkunig,” aon appig.

⁴¹ Ag anam heppig, amge Moses nug aum. “Ag aɗinu Yawenu haknunab nai amu ii dim lamidtteb? Ag danab appa daatteb ele ii eɗadmana!

⁴² Yawe Nug ag oolagppa ii daatte amunu, ag aib goppig. Ag gokkulag dayeb amu, ahilag kekeɗ geha ag eɗadkkulag.

⁴³ Aɗinu? Amalek danab, amu Kanan danab ele ag appa, ag ele ban hekkulagnu daatteb. Ag Yawe dimedappig amunu, Nug ag ele ii daamna; diig amunu kekeɗ ag ag aqadppeg mauhkkulag,” awa aum.

⁴⁴ Moses nug anam aum, amge Israel danab ag hibguitta hena, ag Kanan wanppa qauko qauko ele, ag qauko amu igippa gona, appa ban hekkulagnu tekkulagnu goppig. Israel ban daup ag goppig, amge Moses nug ii ukkom, ban daup ag Yawenu Tituanak Nainu Kunup kontrak inak ele, ag amu ele aon ii goppig.

⁴⁵ Aria, Israel ban daup ag qauko nakok teegeg amu, Amalek, Kanan danab ele appa daappig, ag qaukoppan nona eɗadnana, lamadna gona, Horma appa wana uuadppig.