Namba 13 - Nobonob Baibel

Lokkumakppa atu italak danab ag Kanan wan tutukku anidkkulagnu goppig

¹ Amu Yawe Moses amegppa aum.

² “Danab laala ag Kanan wan, da ag Israel madattem amu, ag tutukku anidkkulagnu maadppe ukkeg! Israel dilag huu okkai anen anen, huu amu ag tatam beppig daatteb amu, na anen anen amuppanu, ikki danab laippu tituanadna maadppe, ag gona wan anidkkulag,” awa aum.

³ Yawe Nug anam haknunab aum amunu, Moses nug Paran atu taɗakppa, appanu danab amu maatte goppig. Danab amu oh ag Israel dilag ikki danab.

⁴ Ag onilag amu inam: Israel dilag huu okkai Rubennu am, Sakur bekka Samua.

⁵ Israel dilag huu okkai Simeonnu am, Hori bekka Sapat.

⁶ Israel dilag huu okkai Judanu am, Jepune bekka Kalep.

⁷ Israel dilag huu okkai Isakarnu am, Josep bekka Igal.

⁸ Israel dilag huu okkai Epraimnu am, Nan bekka Hosia.

⁹ Israel dilag huu okkai Benyaminnu am, Rapu bekka Palti.

¹⁰ Israel dilag huu okkai Seblonnu am, Sodi bekka Gadiel.

¹¹ Israel dilag huu okkai Manasenu amuam Josepnu huu laa, am Susi bekka Gadi.

¹² Israel dilag huu okkai Dannu am, Gemali bekka Amiel.

¹³ Israel dilag huu okkai Asernu am, Maikel bekka Setur.

¹⁴ Israel dilag huu okkai Naptalinu am, Wopsi bekka Nabi.

¹⁵ Israel dilag huu okkai Gadnu am, Maki bekka Geuel.

¹⁶ Danab amu ag, Moses nug ag Kanan wan tutukku neegna anidkkulagnu maatte goppig. Josua nug am Nan bekka. Tatam amu, nug onig Hosia dayom, amge Moses nug onig Josua ataɗom.

¹⁷ Haen Moses nug ag Kanan wan anidkkulagnu maatteb gokkulagnu heegeg amu, Moses nug ag amelagppa aum. “Ag gona, wan laih laa onig Negeb anttona, ag gona, wan qauko qauko ele, ag amu ele mattan teig!

¹⁸ Ag gonana, wan amu, nuhig anttak attemu amu antteg! Ag danab appa daatteb amu, ag ɠagattag elete, iittate, kuɗumte, o iitta kuɗum iittate, ag amu ele antteg!

¹⁹ Ag gona oinna neegnana, amu ag wan danab daatteb ele amu, wan amuam enate, iitta naute, ag amu antteg! Aab ag amuppa daatteb ele amu, aab amuam aɗ keeke elete daatteb, o iittate, ag amu ele antteg!

²⁰ Wan ele, ittag elete, ittag iittate, amu ad wan amuppa beppig daattebte, o iittate, ag amu ele neegna antteg! Ag eɗun uɗinna, ag ib nakok laa anidkkulag dayeb, ag wan amunu ad meu, keeke aon ele uɗiglag,” awa aum. Ag gokkulagnu daappig amu, haen amuam grep meu tatam lep meppignu haennab dayom.

²¹ Moses nug anam ha aum amunu, ag aakku gona, wan laih Sin atu taɗakppanu, laih Rehop aab okkaippanu ukkak, appa anidnan goppig. Rehop nug am aab okkai Lebo Hamat guguittak dayom.

²² Ag wan laih laa onig Negeb oppatna gona, Hebron aabppa teppig. Hebron appa amu Ahiman, Sesai amu Talmai, ag am Anak buɗub, ag appa daappig. Danab ag Hebron aab kalaeg, maɗ eblaih aɗit uue, Isip wanppa appa danab ag aab onig Soan kalappig.

²³ Haen ag gona, oolnu noak aben laa onig Eskol, ag appa wana amu, ag muɗi grep eppegppanu grep meu aɗa auta awak laippu laa dayom amu anidna, okkulna aoppig. Danab aɗit tuqaippa maopiɗ. Ikki danab ag ad pomigranet, amu ad fig meu laala ele tuqappig.

²⁴ Tatam, Israel ag ii uɗippig haenppa, wan atu oolnu noak amu, nug onig Eskol ii dayom. Israel danab ag grep meu aɗa auta awak laippu amu appanu okkulna, aon goppig amunu, danab ah ag wan oolnu noak amu onig Eskol Oolnu Noak ataɗppig.

²⁵ Ag gona, deɗ 40 oinna, wan amu anttona amu, ag eɗun, Moses, amu Israel danab ah oh ag daappigppa goppig.

Lokkumakppa atu italak danab ag Moses, Israel ele atu anidppignu madippig

²⁶ Lokkumakppa atu italak danab ag Moses, Aron, amu Israel laa oh ele, ag Kades daaegeg, ag eɗun gona anadppig. Kades amu Paran atu taɗak, appa dayom. Ag eɗun gona, amu ag aɗi keeke anidppig Moses, Aron, amu Israel laa oh ele amelagppa madippig. Ag ad meu keeke, wan amuppanu aoppig ele ippunadppig.

²⁷ Ag Moses amegppa inam appig. “Wan na ig appa gokkunignu meigme amu, ig appa gomut. Wan amuam wan enanag, am wan ittag ele, amuppa ee meu huana otte. Antte! Ee meu laala wan amuppanu iikku akkat ele uɗimut.

²⁸ Amge danab ah ag appa daatteb, ag am ɠagattag ele. Ahilkad aab okkai am okkai okkai aɗ ele daatteb. Am keeke uug laa ele am, danab beɗu okkai onig Anak, nug buɗub am appa daaegeg ele anadmut

²⁹ Amu Amalek danab ag wan amuppa, wan laih onig Negeb, ag appa daatteb. Hit danab, Jebus danab, amu Amo danab, ag am wan laih qauko qauko eleppa, appa daatteb. Kanan danab, ag amu yu guguittak, amu Jodan le naɗi daugppa daatteb,” aon appig.

³⁰ ⌊Danab ah ag lokkumakppa atu italak danab ag mattieg doona, ag huana baɗappig,⌋ amge Kalep nug Moses noobppa, danab ah toettan daaglagnu anana, nug aum. “Yawe Nug ehanigkku amunu, ig hekkunignu elelenab. Anam amunu, ig gota, wan amu, ig aguppa daagnignu aotu!” awa aum.

³¹ Kalep nug anam aum, amge lokkumakppa atu italak danab laa ag nug ele goppig amu, ag appig. “Ig danab amu ele ban hekkunignu elele iitta. Aɗinu? Ahilag ɠagattag am ig eɗikkak,” aon appig.

³² Ag anam appig amunu, laa ag gona, wan atu anidppig ele amu, ag heeg, Israel danab ah wan amunu nai hambuppuak, ag nai amu genab dooppig. Amu lokkumakppa atu italak danab, Josua, Kalep ele, aa am iitta, danab amu laa, ag appig. “Wan ig anidmut ele, wan amuam doɗ laa nug aha, doɗ laa qa latte, amubia, wan amu danab ah ag appa daaglagnu gotteb ele he nauhtteb. Amu ele, appan danab ah oh ig anadmut ele, ag am danab okkai okkai, elabnab.

³³ Am ig Nepil buɗub anadmut. Anak nug Nepil buɗub amunu, Anak buɗub, ag ele Nepil buɗulkad. Ig am nakok, ag am okkainab. Ig ikka ihinig neekkakppa, ahilag neekkakppa ele amu, ig am tap bia daautut, ag am danab bia daatteb. Ig anam anadmut,” aon appig.