Namba 12 - Nobonob Baibel

Miriam, Aron ele Mosesnu nai eheɗ apiɗ

¹ Miriam, Aron ele aa digmeya Mosesnu nai nau madipiɗ. Aɗinu? Moses nug ah laa Kus buɗubppanu, nug wau daakkunu awom.

² Miriam, Aron ele aa ⌊anen anen aa laanu, dahilppa anam daalo dooya, aa oo aeg bak dooya,⌋ aa nai inam iikku apiɗ. “Moses nug aakkuibte, Yawe Nug, nug amegppa nai mattieye, nug nai amu danab ah amelagppa maditte? Nug i amenihppa ele iite nai mattieye, i danab ah amelagppa attep?” aoya apiɗ. Aa anam apiɗ amu, Yawe Nug doyom.

³ Aa anam apiɗ, amge Moses nug nukka nug onig qe nettom. Nug, nukka onig nakok laa ii humattom. Danab ah laala ag onilag qeeg neum, amge Moses nug onig qe na auta autanab awom.

⁴ Moses nug, nug am danab anam aakku, amu Miriam, Aron ele aa nai madipiɗ amunu, Yawe Nug pahanab Moses, Aron amu Miriam ele amelagppa aum. “Ag ewam oh, ag mettid haknu peh lag danab ah appa qagmetteb ele, ag peh amuppa uɗieg!” awa aum. Nug anam a amu, ag goppig.

⁵ Ag ukkaeg amu, Yawe Nug lombig teppu ele attan tak ooppa na, Nug mettid haknu peh lagnu od oɗeppa dayom. Dayaya amu, Nug Aron, Miriam ele dilah eum. E, aa oh gukkuidya waeh,

⁶ Nug aum. “Aa nai dahil doyeɗ! Haen dahil propet danab laa ag oolagppa daatte amu, da Yawe, da tuleglegppa da diil, dahil nai ele nug ippunidttem, tul niiakppa da nug amegppa nai madittem.

⁷ Amge Moses, dahil maɗi nid amu, nug dahilad danab ah oolagppa oo metta ii uuak kobol elelenab dim lamidtte amunu, da nug amegppa ib anamppa nai ii madittem.

⁸ Iitta. Haen da nug ele nai madittep amu, ii nug anidɗaɗa nai madittep. Da nai miagib madittem, nai tonak ii madittem. Nug da, da Yawe, nug da attemun amu aniɗtte. Anam aakku daatte amunu, aɗinu aa dahil maɗi nid Moses, aa nuhignu nai eheɗ akkulahnu ii baɗaya, nai eheɗ nuhignu apiɗ,” awa aum.

⁹ Amu Yawe Nug ahilahnu oo huana nauhe, ag uuattom.

¹⁰ Aria, haen lombig mettid haknu peh lag uuitta attan te amu, Miriam nug gaɗa oɗe nau ele hibaitta dayom. Nug beɗu oh hakkab eppa dayom. Aron nug Miriam nug noobppa daakkunu eɗua amu, nug Miriam gaɗa oɗe nau ele dayeye anttom.

¹¹ Antta, nug Moses amegppa aum. “Dahil naɗi, da Miriam ele i dabmak tutukku iittappa heɗa, kobol amu dim lamidɗa, hipunin imu hemuɗ, amu na hipunin amu uhuqna metakkutnu oɗ medattem.

¹² Na Kayak oɗ medappe, Nug heeb, Miriam nug nid laa anig ooppa okkai ii meum, mauhe, gaɗa laih beɗa dimittim dotte, anam bia ii daamanu oɗ medattem,” awa aum.

¹³ Aron nug anam Moses amegppa aum amunu, Moses nug Yawe unuqitta aum. “O Kayak, na nug ehanidppe, nug eɗua ena daakkunu oɗ medattem!” awa unuqittom.

¹⁴ Anam unuqitte amu, Yawe, Moses amegppa aum. “Nug eheɗ heeb, mameg nug iɗuppa hunulo, amu nug deɗ eblaih aɗit ele da noolppa daakkunu elele iitta daalo. Na heppe, nug deɗ eblaih aɗit ele haen tutu dayaknu aab kalak dimittim dayeb ukkeb, dimppa nug eɗua uɗikku,” awa aum.

¹⁵ Yawe Nug anam haknu aum amunu, deɗ eblaih aɗit amu Miriam meeg ukka, haen tutu dayaknu aab kalak dimittim dayeye, danab ah ag ahan ii oippig ukke, Miriam eɗun aon uɗieg, ag ahan oippig.

¹⁶ Miriam nug haen tutu dayaknu aab kalak amuppanu meeg, dimittim dayom ukke, ag eɗun aon doeg, Israel oh ele daappig dimppa, ag ahan, Haserot uuna gona, haen tutu dayaknu aab bau Paran atu taɗakppa, appa kalappig.