Namba 11 - Nobonob Baibel

Aab ewak Israel danab ah oolagppa beum

¹ Amu Israel ag uug laala ag oolagppa beppig amu, ag amunu naittuɗ meppig. Ag naittuɗ meeg, Yawe Nug doya, Nug oo nauhe, Nug he, aab ewewe, peh lag laala, keeke ele haen tutu dayaknu aab kalak daugppa daappig am nauhppig.

² Anam be amu, haen danab ah ag Moses ehanadkkunu gaappig amu, Moses nug Yawe unuqitte, aab amu qauhom.

³ Yawe toppanu aab ag oolagppa ewom amunu, ag aben amu onig ataɗna, Tabera appig.

Israel danab ah ag doɗ teppu lakkulagnu appig

⁴ Hib guitta danab laala Israel danab ah oolagppa daappig, ag ee laa, Yawe hanhan mattom amu iitta, ee laanu oolag huanaknab dayom amunu, ag mattina, Israel danab ah ag oh naittuɗ mena appig. “Amu doɗ teppu lakkunignu daalo, ig elele doolom.

⁵ Isip uppa amu, ig kakai laut ukke, oonig aɗom. Ig daden meta ii lamut. Iitta! Hamu aot lamut. Ig amu latata, ig gudken, melen, anian digdig ele lamut.

⁶ Amge gemu ig ee laa oh ele lakkunignu laa iitta, maana imu aakkuib ele amunu, ig eenu ii baanig gotte,” aon naittuɗ meppig.

⁷ Maana amu keh onig koriander, amunu aeg, hakkab, lanlan gamagppa ele bia dayom.

⁸ Danab ah ag gona, akkan qagmena, amu ganuɗaknu ag eppelagppa men laa, men layag attan daye, maana gamagppa meeg, men attan itoɗieg ganuɗttom, o iitta amu menppa tututtappig. Dimppa ag waappa keeke uhippig; o iitta bret batappatak manappig. Amu lanak baag nuhig am bret goɗenppa manak bia dayom.

⁹ Tuqan haen baito, haen tutu dayaknu aab kalak amuppa nottom amu, maana ele nottom.

¹⁰ Israel danab ah ag ahilkad peh lag od od daanna, ag naittuɗ anam aakku heegeg, Moses ahilag nai doye, Yawe Nug oo nauhak huana be, Moses nug uug doyom.

¹¹ Amu Moses nug oo elele iitta doya, Yawe oɗ mettom. “Na uug imu aona, maɗi nid nahip da, da qaɗelppa meme amu, da amunu diig ii doottem. Aɗi eheɗ laa hemi amu he, na amunu oot elele ii daye, na danab ah imu oh atognoattaknu uɗat da meɗame?

¹² Na, na onin aon, amuppa nahip nai ɠagattag qettan, danab ah imu mamelkad aɗi Kanan wan madakkutnu ame. Amge danab ah imu oh da ii hattami; da ii menuadmi. Da amu ii hemi amunu, na da ag dabmatte, atognoatte aute awewe, wan na amenu, appa omalatten gokkulnu ame amu, da amunu diig ii doottem.

¹³ Ag, ‘Teppu lanaknu mekkeg!’ anana, naittuɗ menanaib daatteb amunu, da danab ah imu oh dilag teppu adeppanu aokkul?

¹⁴ Danab ah imu oh amu, da dakka dabmatte, atognokkulnu elele iitta. Aɗinu? Uɗat amu haknu am uug naunab ele, da maokkulnu elele iitta doottem.

¹⁵ Na tuɗidna, da uug naunab amubia maokkulnu akkutnu dabmettem dayeb amu, da hekkulnu elele iitta amunu, na dahilnu ena doottem dayeb, na iuppe mauhkkulnu oɗ medattem. Na dahilnu oot dootte dayeb amu, na heppe, da uug naunab waappa nauhak ii aopanu oɗ medattem,” awa aum.

¹⁶ Moses anam aakku a amu, Yawe Nug aum. “Na Israel danab 70, na ag oh am Israel danab ah dilag ikki danab, ahilkad ehanittak anuqak danab ele daatteb doottem amu, na amu dilag dabmena, na ag diin uɗin, dahil mettid haknu peh lag danab ah appa qagmetteb ele, na ag aguppa maadna heppe, ag na ele aguppa hippaidna daaglag.

¹⁷ Ag hippaidna daappeg, da geha noppi, appa na ele nai mattignih, amu da dahil Ouɗi nahip-ppa dayaya ehanidtte amu, da heppi, Nug danab 70 amu, ahilagppa dayaya ehanadkku. Geha da amu heppi, ag na ehanidna, uug danab ah imu na medatteb ele amu, ag uug amu ele maoglag. Geha ib amuppa na nakka ii hemana.” Yawe Nug Moses amegppa anam aum.

¹⁸ Amu Yawe Nug anam awowa, Nug tuɗitta Moses amegppa aum. “Na danab ah inam appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Ag buttinu, ag Yawenu tituana mettak daaglagnu hena dayeg! Ag amu hena, ag butti doɗ teppu lakkulag. Aɗinu? Ag Yawe noobppa gaanna, ‘Ig doɗ teppu latu! Ig Isip wanppa ena daamut; gemu ig nauhmut daattem,’ appig amunu, gemu amu, Yawe Nug heeb, ag genab doɗ teppu lakkulag.

¹⁹ Ag geha doɗ teppu lakkulag, amge deɗ laippuib iitta, o iitta deɗ aɗitib iitta, o iitta deɗ tanig eleib iitta, o iitta deɗ eblaih laih eleib iitta, o iitta deɗ 20ib ele ii lamana.

²⁰ Iitta! Geha ag kalam laippu, ag kalam amu ohppa teppu amu lakkulag. Ag geha lanakib lanan daappeg, bahilag yeeb, gahag bak doon, baula teppu amu anidna lakkulagnu uun autna aoglag. Anam bekkunu diig amu, ag Yawe, ag ele daatteb amu, ag Nug dimedappig. Ag Nug noobppa gaanna, ‘Aɗinu ig Isip uut, ahat uɗimut?’ aon appig,” awa aum.

²¹ Yawe Nug Moses amegppa anam a amu, Moses aum. “Gemu da danab 600,000 oolagppa daaiyi, na, ‘Da heppi, danab ah imu oh ag kalam laippu ohppa doɗ teppu lakkulag,’ attem. ⌊Na amu attem, amge da amu bekkunu ib iinab anidttem.⌋

²² ⌊Amu ig imu ii hemata,⌋ amge ig sipsip, makau ele ihinkad ohnab aqat lalom amu, amuam teppu amu haknu elele iitta. O iitta, ig yuppanu kakai oh aognig, amuam ig anam hekkunig elele iitta,” awa aum.

²³ Moses anam aum, amge Yawe nob ma aum. “Da anam hekkulnu dahil ɠagattag iittate? Gemu amu, na amenppanab keeke bekkute, iitta, iite bekku amu anidkkut,” awa aum.

²⁴ Yawe anam a amu, Moses nug ukka, nai Yawe Nug aum, nug nai amu danab ah amelagppa mattiom. Nai mattom dimppa, nug danab ah dilag ikki danab 70 amu diia he, ag mettid haknu peh lag talilidna hippaidna daappig.

²⁵ Ag appa daaegeg amu, Yawe Nug lombig mettid haknu peh lag tonom ele amuppa no, Nug Moses ele nai madipiɗ. Amu anukka haen laappa Yawe Nug a, nuhig Ouɗi Moses ehanidkkunu nuhigppa dayaya ehanitte, amu gemu Nug baula a, nuhig Ouɗi Nug ikki danab 70 amu ahilagppa ukka dayeye, ag propet nai madippig, amge ag haen laippu aakkuib heppig.

²⁶ Amu danab aɗit laa, aa onilah am Eldat, Medat ele, aa ele onilah ameg amuppa dayom, amge aa Yawenu peh laugppa ii daapiɗ. Aa haen tutu dayaknu aab kalappigppa, appa daapiɗ, amge Kayak a, nuhig Ouɗi ahilahppa ele ukka dayeye, aa haen tutu dayaknu aab kalappigppa propet nai madipiɗ.

²⁷ Aria, danab bau laa nug qaiqaɗ Moses toppa ukka, amegppa aum. “Eldat, Medat ele aa haen tutu dayaknu aab kalappigppa, uppa propet nai madittep,” awa aum.

²⁸ Amu danab bau anam a, amu Josua, Nan bekka, haen nug danab bau dayaya, nug digma, Moses ehanittatta dayom ele, nug aum. “Danab okkai dahil, appe uueɗ!” awa aum.

²⁹ Josua anam aum, amge Moses nug nai nob ma aum. “Na aa da abenal aomyanu baɗattemte? Yawenu danab ah oh ag propet daaglagnu, Yawe Nug nuhig Ouɗi nuhikkud danab ah oh madakkunu ool daatte,” awa aum.

³⁰ Aria, Moses, amu Israel dilag ikki danab ele ag eɗun, haen tutu dayaknu aab kalakppa goppig.

Yawe Nug he, ai kwel ag Israel dilag haen tutu dayaknu aab kalakppa uɗippig

³¹ Amu dimppa Yawe Nug he, ulah ɠagattag laa yuppanu uɗia, ai kwel huanaknab iwalatte, haen tutu dayaknu aab kalakppa uɗippig. Ai kwel ag uɗin, hagagaɗna attannab ii oippig, ag wanppanu attan tak 1 mita batak, anam hagagaɗna aben oh tonan malan oippig. Amu danab nug aha, deɗ laippu yau uɗitteppanu gokku, o iitta deɗ laippu yawalti uɗitteppanu gokku, o iitta deɗ laippu qaban uɗitteppanu gokku, o iitta deɗ laippu kaɗag uɗitteppanu gokku amu, nug ai kwel anidkkuib.

³² Aria, deɗ amu, amun tuqan ele, amu wagɗe deɗ amu amunppa ele, danab ah ag gona, ai kwel aqadna diippig. Danab anen anen ag ai kwel gane aqappig amu, ag oh laippu bia ii heppig, amge danab ag nakok honap aqappig, ag 1,000 kilogram aqan aoppig. Laa oh ag amu eɗittak aqan aoppig. Dimppa, ag ai kwel aqattona, amu teppu qaɗaiettaglagnu amu, ag haen tutu dayaknu aab kalappig daug daugppa madappig.

³³ Ag anam heppig, amge ai kwel uɗieg aqan, ⌊ag ahilag oo hak anuqak doon⌋ laattegeg, oɗelagppa dayeye, Yawe ahilagnu oo huana nauhe, Nug he, ahilagppa oɗe nau danab kuɗum aqe mauhtteb ele okkai ba aqom.

³⁴ Amu danab ah ag ee laa lakkulagnu oolag huanaknab dayom amu, ag ag aguppa boumppig amunu, ag onig Kibrot Hatawa ataɗppig.

³⁵ Aakku Israel danab ah ag Kibrot Hatawa uun, ahan gona, Haserot appa daappig.