Namba 10 - Nobonob Baibel

Trampet silwappa haknu nai

¹ Amu Yawe Moses amegppa aum.

² “Na appe, danab laa trampet aɗit silwappa haataɗ! Nug hamappa silwa qeebeb bekkulah. Trampet aɗit amu, aa danab ah onilagppa epeɗ uɗin qagmekkulagnu, amu ag haen tutu dayaknu aab kalak anen anenppanu ahan, aben amu uun laih gokkulagnu iwalaknu ele daaglah.

³ Haen danab aɗit aa trampet aɗit amu oh iwalatpeɗ amu, danab ah oh ag doppeg, na ele dahil mettid haknu peh lag danab ah appa qagmetteb ele, ag peh amunu odppa qagmekkulag.

⁴ Amge danab nug trampet laippuib iwaleb amu, Israel dilag huu okkai anen anen dilag okkai danab, ag aakkuib uɗippeg, na ele qagmekkulag.

⁵ Haen Israel ag trampet huana iwalak ebqak 1 doona amu, Israel dilag huu okkai laa, ag laih aam bedeppa haen tutu dayaknu aab kalappig ele, ag digmen ahan gokkulag.

⁶ Haen Israel danab ag trampet huana iwalak ebqak 2 doon amu, Israel dilag huu okkai, ag laih yau uɗitteppanu haen tutu dayaknu aab kalappig ele, ag ahan dim lamadna gokkulag. Trampet huana iwalak am danab ah ag ahan bappaidna, laih gokkulagnu at aakku daakku.

⁷ Danab ah ag ahan, laih gokkulagnu haen dob amu, trampet huana iwalak anam daakku, amge haen ag qagmekkulagnu daatte amu, laa trampet iwalttep ele amu, aa iwalkkulah, amge aa baag piɗe piɗe iwalkkulah.

⁸ Aron bekkod, ag mana mettak danab, ag trampet aɗit iwalkkulag. Imuam ɗo hanhannu; ag, amu ag buɗulkad ele, ag hanhan dim lamidkkulagoitte.

⁹ Haen kekeɗ ag uɗippeg, ag ele ag wanelagppa ban hekkulagnu heppeg amu, ag kekeɗ amu ele ban hekkulagnu henana, ag trampet amu huana iwalppeg, da Yawe, ahilag Kayak, da amu doyen, da ag kekeɗ eppelagppanu eɗuen diikkul.

¹⁰ Trampet iwalak amu ehanatteb, ag da, ahilag Kayak, ag dahilnu ag daulagppa dokku amunu, ag qagmak gamag ahak ele haknu haenppa, amuam hobul dayaknu haen epeɗiak, aria kalam bau bettenu hobul ele, ag haen amuppa manaknu ofa hetteb, laippu dayaknu ofa ele hetteb, haen amuppa ag trampet ele iwaleg! Da am Yawe, ahilag Kayak,” awa aum.

Israel danab ah ag ahan, Sinai uuppig

¹¹ Amu Israel danab ah ag Isipnu ahan gona daaegeg, maɗ laa, am maɗ ebqak aɗitppa, kalam ebqak aɗitnu deɗ 20ppa, lombig mettid haknu peh lag men maha aɗit ɗo nai yaak niitte ele appa daattep, lombig amu igippanu aha dayom.

¹² Aria, lombig amu aha dayom amunu, Israel danab ah ag Sinai atu taɗakppanu ahan, aben abenppa gona oiyegeg ukke, Yawe Nug he, lombig atu taɗak onig Paran, appa eɗua na dayeye, ag appa daappig.

¹³ Ag gona, Sinai daaeg ukke, Kayak he, ag ahappig amu, amuam ahilag aha ukkak anuqak; ag haen amu ii nak Sinainu ahan ii goppig. Yawe Nug Moses amegppa haknunab aum bia heppig.

¹⁴ Juda huu, amu huu laa Juda guguittak haen tutu dayaknu aab kalan daappig ele amu, ag anuqna ahan goppig. Ag ahilag pilak maonna goppig. Aminadap bekka Nason, nug am Juda huunu ikki danab dayom.

¹⁵ Suar bekka Netanel, nug am Isakar huunu ikki dayom,

¹⁶ amu Helon bekka Eliap, nug am Seblon huunu ikki dayom.

¹⁷ Ag mettid haknu peh lag auteg ne, mawaknu babaitteg, Gerson buɗub, Merari buɗub ele ag maoppig. Ag Juda, amu laa ag Juda ele goppig, ag amu dim lamadppig.

¹⁸ Ruben huu, amu huu laa Ruben guguittak haen tutu dayaknu aab kalan daappig ele amu, ag ag dim lamadppig. Ag ahilag pilak maonna goppig. Sedeur bekka Elisur, nug am Ruben huunu ikki dayom.

¹⁹ Surisadai bekka Selumiel, nug am Simeon huunu ikki dayom,

²⁰ amu Deuel bekka Eliasap, nug Gad huunu ikki dayom.

²¹ Amu dim lamattak amu, Kohat buɗub ag ahan goppig. Ag mettid haknu peh lag ooppan keeke, Yawenu tituanak daatteb amu, ag amu mawadppig. Laa ag mettid haknu peh lag maoppig ele, ag anuqppig. Aɗinu? Peh lag amu ag tatam qabappeg amu, Kohat buɗub ag tekkulag. Yawe Nug aum bia, nuhig mettid haknu peh lag aben laappa tatam qappak dayeb, Kohat danab ag peh amunu keeke, keeke amuam Kayaknu tituanak daatte, ag amu maon tekkulag amunu, laa ag mettid haknu peh lag maoppig, ag anuqna goppig.

²² Aria, ag dim lamattak am Epraim huu, amu huu laa Epraim huu guguittak haen tutu dayaknu aab kalan daappig ele, ag ahan goppig. Ag ahilag pilak maonna goppig. Amihut bekka Elisama, nug am Epraim huunu ikki dayom.

²³ Pedasur bekka Gamaliel, nug am Manase huunu ikki dayom,

²⁴ amu Gideoni bekka Abidan, nug am Benyamin huunu ikki dayom.

²⁵ Dan huu, amu huu laa Dan guguittak haen tutu dayaknu aab kalan daappig ele, ag ahan, ag dim lamadppig. Ag kekeɗ ag Israel dim lamadnana, hadappeg nauhmananu dabmattak dim goppig. Ag ahilag pilak maonna goppig. Amisadai bekka Ahieser, nug am Dan huunu ikki dayom.

²⁶ Okran bekka Pagiel, nug am Aser huunu ikki dayom,

²⁷ amu Enan bekka Ahira, nug Naptali huunu ikki dayom.

²⁸ Israel danab ah ag huuppa anam aakku daan oidppig. Hanhan ag haen tutu dayaknu aab kalakppanu ahadppig amu, ag anam aakku daanna oidppig.

²⁹ Amu haen Israel ag ahan, Sinai uuglagnu heppig amu, danab laa onig Hobap, nug ag ele oh daanna, oidppig. Hobap nug amu Reuel bekka. Reuel nug am Midian danab, nug amu Moses tana. Amu Moses nug oeb Hobap amegppa aum. “Ig am wan laa Yawe Nug megakkunu, nuhig nai anan qakkom amu, ig ahat, amuppa gokkunig hettem. Yawe Nug ig wan amuppa enanag daagnignu nai ana qakkom amunu, na ig ele oh gotu! Ig geha nahipnu enaib hekkunig,” awa aum.

³⁰ Moses nug Hobap amegppa anam aum, amge Hobap nug nob ma aum. “Iitta. Da ii gopa. Da eɗue wanelppa, dahilad danab dilagppa gokkul,” awa aum.

³¹ Amge Moses aum. “O aɗem, na ig uuigna, eɗun na wanenppa gokkutnu ool ii daatte. Aɗinu? Atu taɗakppa ig haen tutu dayaknu aab adekkuppa kalagnig amu, na doottem amunu, na appa ig amenig bia daakkut.

³² Doppe, ig ele gotu! Yawe Nug keeke ena ena oh ig megakku amu, ig na ele oh amu aognig,” awa aum.

³³ Moses nug Hobap ele aa amu mattiya malaeh, dimppa amu Israel danab ah ag Sinai qauko uuna, ag digmena, deɗ ewam goppig. Laa ag Yawenu Tituanak Nainu Kunup kontrak inak ele, laa ag amu maoppig ele amu, ag Yawe Nug ag haen tutu dayak aab adekkuppa kalaglagnu ippuanatteb daaglagnu, ag danab ah noolag aon anuqna goppig.

³⁴ Amu deɗ anen anenppa Yawenu lombig, am ag aben adekkuppanu digmen ahan godappig amu, lombig am deɗ oh ag ikkilagppa alet anam dayeye anidnana godappig.

³⁵ Amu haen danab ag Tituanak Nainu Kunup maoppig ele amu, ag haen tutu dayaknu aab kalakppanu ahaeg, Moses nug aum. “O Yawe, na heppe, kekeɗ ag oolna, matatun gokkulagnu ool daatte. Ao, na heppe, danab ag nahipnu nau ninig ele dootteb ag na noomppanu oolna, nahipnu umanab gokkulagnu ool daatte.” Moses nug anam awa aum.

³⁶ Amu haen oh ag haen tutu dayaknu aab kalan, ag Tituanak Nainu Kunup appa mekkulagnu Yawe aben amu ippuanatte wana amu, Moses nug attom. “O Yawe, na eɗun Israel danab ah, laa ag ebaqadkkulagnu elele iitta, na ag oolagppa daakkutnu oɗ medattem,” awa aum.