Nahum 3 - Nobonob Baibel

Aab Niniwe bu aokkun nai

¹ Niniwe, Asiria dilag aab okkai, nahipnu am gadonnab gadon. Appa amu ag danab ah huanaknab aqaeg mauhadppig. Appa nai hambuppuak ambak daatte. Appa laa dilag keeke banppan aoppig am ambak daatte. Appa ag hanhan laa eɗadna aqan, ahilkad keeke aoppig.

² ⌊Ag nau amu oh heppig amunu, uug naunab ahilagppa bekku; amu uug amuam inam.⌋ Kekeɗ ag uɗin, ban hena, aab ooppa uɗiglag. Ban danab karisppa ban hetteb ele ag hos ahilkad ag ban huan hekkulagnu muɗippa mataɗadppeppeg, oqotti okku. Karis baeg oqotti am huanak daakku. Hos ag qaiettan gokkulag. Bannu karis ag huan oina, oolna tena, oolna nebeppeg, oqotti okku.

³ Danab hosppa daan ban hetteb ele, ag heppeg, hos qaiettan gokkulag. Danab ag qep elab aɗaeg, amemɗi awewe, ban ikki aenppa hak ele anamib. Ag danab ah huanak aqadppeppeg mauhkkulag. Mauhak amu ag nug qaɗe qaɗe ambak anam daaglag. Ge, mauhak gaɗalkad ebqak iitta daaglag. Danab ag oinna, baelagppa mauhak beɗulkadppa taataɗ qattaglag.

⁴ Amu uug naunab amu oh ahilagppa bekkulagnu diig am, ag Niniwe danab ah ag ib baag ah hette bia heppig. Ib baag ah danab kuɗum diiadkkunu gappai huana hette, amu ag Niniwe, ag amubia heppig. Ib baag ah nug beɗu ena, danab eeɗadkkunu elelenab, nug ib amuppa amu hette, amu ag Niniwe, ag amubia heppig. Ib baag ah nug emaɗ kobol doya aut aut autanab awa, kobol amuppa danab diiadtte, amu ag Niniwe, ag amubia heppig. O gadon, ib baag ah nug nuhig gappai hak kobolppa danab kuɗum diiadtte, amubia ag Niniwe ag heppeg, wanppan wan kuɗum ag waalagppa daaglagnu heppig. Ao, ib baag ah nug emaɗ kobol nuhigppa ha, wanppan wan kuɗumnu danab nuhig pelemppa diiom, amubia ag Niniwe, ag huu kuɗumppan danab ah diippig.

⁵ Amu Yawe Nukka Ɠagattag Oh Ele Nug inam atte. “Niniwe danab ah, da ahilag hak amunu eheɗ doyeye ool ii madattem. Da heppi, ag uɗa nak naunab nau dooglag; laa nug ahnu lamen aɗe te, beɗu miag daye, danab kuɗum neegna antteg, ah nug uɗa eheɗ nette, amubia ag uɗalag nekku. Da heppi, wanppan wan ohnu danab ah ag uɗa nak ahilag anidkkulag. Ao, da heppi, wanppan ɗo maɗoɗnu danab ah ag uɗa nak ahilag miagib anidkkulag.

⁶ Da heppi, wan laappan danab ah ag kinipan nau agappeg uɗia, na nidakku. Ao, da heppi, ag, ag Niniwe danab ah, ag ahilagnu, ‘Keeke hamunab,’ dooglag. Ge, da heppi, ag Niniwe danab ah ag laa noolagppa keeke imaknu bia daaglag.

⁷ Uug naunab amu ag Niniwe, ahilagppa beeb, danab ah laa oh ag, ag guguittak dayaknu uun, oolna anen anen gona akkulag. ‘Niniwe nauhom daatte. Auntai laa Niniwe dilagnu mahikku? Da auntai laa ag oo mak madakkunu anidkkul?’ aon akkulag,” awa atte.

⁸ Niniwe danab ah, ag aab Tebes, le Nil daugppanu, ag aab amunu danab ah eɗadttebte? Le aab amu oh talilitta dayom. Appan danab ah ag, “Le Nil am ihinig guppiɗ daatte,” aon adappig. Ao, ag, “Le amuam ihinig aɗ daatte,” aon appig.

⁹ Kus wan, Isip wan ele aab Tebes ehanitteh, Tebes aab am ɠagattagnab dayom. Put wan, Libia wan ele nug ehanidpiɗ.

¹⁰ Aab Tebes am ɠagattag anam dayom, amge kekeɗ ag uɗin, appan ban danab eɗadna, ag appan danab kuɗum aɗualadna, ag diia ukka laih me dayak danab ah daaglagnu wan laappa diin goppig. Aabnu ib oɗatle ohppa kekeɗ ag nid yuɗ aɗualadna, buɗiatteg wanppa noeg, beɗulag oh aoɗna, hupu hupu neppig. Ag anuqak danab dilagppa attem attem hekkulagnu om yaappig. Ao, kekeɗ ag aab amunu danab okkai senppa qakkaladppig.

¹¹ Niniwe danab ah, gemu am ahilag haen. Ag le ɠagattag lappeg, kaaka aqadkku. Ao, ag gona, lokkumkkulag. Ge, ag kekeɗ aɗualadmananu padal mak eɗitteb ena dayaknu aben mattiglag.

¹² Aab aɗ ɠagattagnab ele ahilkad oh am ad fig meu tatamnu lep meum bia daatteb; danab nug ad amu aɗa uɗaleb, meu paha na qa, danab lakkunu hette nug oɗeppanab gotte.

¹³ Niniwe danab ah, ag antteg! Ahilkad daup ag gai-iitta, ah bia. Kekeɗ ahilagppa uɗiglagnu am ib oonak laa iitta ele; aab okkainu aɗnu od manak qaknu keeke aab ewe, od matulak daatte bia daatte.

¹⁴ ⌊O gadon, Niniwe danab ah, kekeɗ ag uɗin, oo mattan aqaknu maadna daaglag amunu,⌋ ag haen amunu le huanak itan, aon uɗieg! Ag waa haknu wan aon, brik haknu babaitteg! Ag aɗ bappaidkkulagnu brik heig!

¹⁵ ⌊Ag amu hekkulag, amge amuppa ag ehanittak laa ii aomna.⌋ Aab ewakppa ag nauhkkulag. Ao, kekeɗ ag qep elabppa aqadppeg mauhkkulag. Ge, wit keeke tap-lokus heeg nauha, iitta mette, ag amubia daaglag. Ag Niniwe, ag tap-lokus bia huanaknab appatna daaglagtai; amge ag diig amunu ena ii daamna. Ag nauhkkulag.

¹⁶ Ag keeke laihnu awa dadennu mak danab kuɗumnab, hoɗoppai ebqak eɗittak ahilag aabppa daatteb. Ag huanak anam daatteb, amge ag Niniwe ii ehanidtteb. Iitta. Ag tap-lokus ag wanppan keeke lae nena, ahan hagagaɗna gotteb, danab amu ag ele amubia hetteb.

¹⁷ Niniwe danab ah, ahilkad ban danab keeke guman daaglagnu daatteb amu, ag am tap-lokus bia. Ao, ahilkad danab okkainu ehanittak anuqak danab, ag am tap-lokus huanak qagmeppig daatteb, amubia. Amu deɗ oug eleppa tap-lokus ag hamu gililppa daatteb, amge aam digma ne, ag ahan, hagagaɗna gotteb. Ag ukkaeg, auntai laa ag adeppa goppig ii dootte, ⌊amubia Niniwe danab amu ag ii daamna.⌋

¹⁸ O Asiria dilag king, nahipad ehanittak ag niitteb. Nahipad anuqak danab ag niiglagnu bet attan tetteb. Amu, diig amunu nahipad danab ah ag wana, qaukoppa tamtam tena daan oitteb. Ag anam daan oiyegeg, laa eɗua diiadkkunu laal iitta.

¹⁹ Ag ihi nau laa, eɗua ena daakkunu ib iitta, ag amubia daatteb. Ag mauhkkulag. Ag danab ah laih laih ohppanu guittak hamu hamu madappig amunu, danab ah amu ag ahilagnu nai imu doon, ag gamag ahak naɗi dooglag. Aɗinu? Ag Niniwe, ag laa guittak mettaknu uug laa ii doon, guittak hamu hamu eheɗ nau ag mattaeg, laa amu oh ag uug amu maoppig.