Nahum 2 - Nobonob Baibel

Niniwe na qekku

^1-2 He nauhak danab ag heeg, Jakop buɗub ag nauhakib daatteb. Ao, diig amunu, Yawe Nug heeb, Jakop buɗub ag anukka ɠagattag, onilag okkai ele daappig bia daaglag. Ge, Israel ag ɠagattag, onilag okkai ele daappig, amubia Jakop buɗub ag anam daaglag. Anam amunu, O Niniwe danab ah, kekeɗ ag ag ele ban hekkulagnu uɗitteb. Ag uɗitteb amunu, Niniwe danab, ag ahan, ag aab aɗ ɠagattagnab ele ahilag dabmenana, ag ib aɗan daan, ag oolag ɠagattag qettan, ag ɠagattag daaglagnu dabmak aon dayeg!

³ Kekeɗ ag banelag uɗin, ag ele ban hekkulag amu, ahilag guppiɗ am kokoɗ; lamen ahilag ele am kokoɗnab. Ahilkad bannu karisnu amu, ag ban hekkulagnu bappaidtteb, deɗ amuppa neekkak ahilag am enanag; amemɗiag awak ele. Ban danab ag ban gudkkud, ban laala ele aɗatteb amu, ag amu ohppa ban hekkulagnu tutukku aɗan daatteb.

⁴ ⌊Kekeɗ amu ag uɗin, ban hekkulag amu,⌋ ag ban hebeppeg, ag ahilkad bannu karisppa aabnu ibppa huana oiglag. Ge, ag aabnu haɗap ooppa qaiettan laih gona, laih uɗiglag. Ag hul eotte bia daaglag. Ao, ag paha paha, amemɗi bia wana dokkulag.

⁵ Kekeɗ dilag okkai nug nuhikkud daup ena ena onilagppa eeb dokkulag; ag ban hekkulagnu paha paha gonana, taataɗ qettaglag. Ag taataɗ qettan, eɗun ahan, ag qaiettan, aabnu aɗppa gokkulag; appa, ag aɗ dimittimnu guppiɗ naɗi okkai bappaidkkulag.

⁶ Kekeɗ ag amu hena, ag wagai mena, aɗnu od le guguittak daatteb matuladkkulag. Ao, ag aab ooppa nona gona oippeppeg, Niniwe dilag okkainu lag enanagnab, amuppan danab ah ag baɗak eheɗ nau dooglag.

⁷ Kekeɗ ag Niniwe eɗadna, danab ah appanu diin gona, diia ukka laih me dayak danab ah wan laappa daaglagnu laa ɗo meum daatte. Ao, amu daakkun daatte amunu, Niniwenu begbeg maɗi ah ag ai gayak oo doyak ele gaatte bia gaaglag. Gaanna momolag qeutkkulag.

⁸ Niniwe am le gottu bia daakku. Le gottu giɗo laa dayeb amu, le oh noa gotte, amubia Niniwenu ban danab oh ag ahilag ban haknu aben uun oolna gokkulag. Laa ag enan, “Aib goppig! Aib goppig!” anan daaglag, amge laa nug eɗua banppa daakkunu ii hema.

⁹ Ag anam hebeppeg, kekeɗ aab eɗidppig ele ag ekkulag. “Silwa huanaknab daatte amunu, ig aotu! Ao, gol ele huanaknab daatte amunu, ig aotu! En naɗi bodok iitta daatte. Ge, en imuam ebqaknu elele iitta,” enana akkulag.

¹⁰ Kekeɗ ag Niniwenu keeke oh aakku ban hena aoglag. Ag aon gokkulag. Ag anam hebeppeg, Niniwe danab ah ag beɗulag gai-iitta mekku. Oolagppa am ag ɠagattag laa ii doomna. Ag hahaɗppeppeg, ag iɗulag am hakkab ebakku.

¹¹ Laion ag nalkad teɗppa ee mattaeg latteb. Laion dawai, laion anig ele aa teɗppa ukkaeheh, nalti am baɗak laa iitta ele appa daatteb. Anukka Niniwe anam bia daye, appan danab ah ag baɗak iitta daappig, amge gemu am attemun? Gemu anambia iittanab iitta.

¹² ⌊Niniwe am laion laa bia dayom.⌋ Laion dawai amu nug nakkud ee madakkunu doɗ laala aqom. Ao, nug laion anig ele ee madakkunu doɗ laa qeum. Nug ee huan teɗppa meum. Ao, nug teɗppa ee elele meum. ⌊Niniwe anam bia heum, amge gemu am anam iitta.⌋

¹³ ⌊Amu bekkunu diig am⌋ Yawe Nukka Ɠagattag Oh Ele Nug inam atte. “Niniwe danab ah, da ahilag hak amunu eheɗ doyeye ool ii madattem. Da heppi, ahilag bannu karis eon, iitta mekkulag. Da heppi, kekeɗ ag nid bau ahilkad qep elabppa aqappeg mauhkkulag. Da heppi, ag baula wanppan laa, laion hetteb bia, guittak ii mattamna. Ag baula wan laappan danab ele ban hena eɗadna, ahilag wan aoglagnu nai awa ukkak danab maadppeg ii gomana.” Yawe Nug anam awa atte.