Matyu 9 - Nobonob Baibel

Jesus danab eppeg baeg mauhak babaittom

¹ Aria, Jesus Nug aha, eɗua uubppa ta, le ameg laih Nug appagppa, Kaperneam ukkom.

² Ukka, appa dayeye, danab laala ag lailag oɗe ele, nug baeg eppeg mauhak ele, ag nug qaɗaqaɗppa maon, Jesus toppa uɗippig. Uɗieg, Jesus Nug ooppa genab doyak ahilag antta, Nug oɗe danab amegppa aum. “O nan, na ootppa ɠagattag doye! Nahip hipunin oh amu da uhuqe medattem,” awa aum.

³ Nug anam a, amu ɗo mehuqak danab appa daana, ag akka akka dabmakppa inam appig. “Danab imu Nug Kayaknu dabittak nai maditte,” aon appig.

⁴ Ag dabmak amu aoegeg, Jesus Nug nuhig dabmakppa amu doya, Nug ag amelagppa aum. “Ag aɗinu dabmak nau anam aotteb?

⁵ Aɗi nai am anaknu uug iitta? Hipunin uhuqa mettaknu nai, amute am uug iitta, o, iitta, aha tappa ukkaknu nai, amutai am uug iitta. ⌊Amu oh iitta. Danabib am aɗit oh hekkunu elele iitta⌋

⁶ amunu, ag Danab Bekkalag da, da wan imuppa hipunin uhuqen madakkulnu ɠagattag ele, ag amu dooglagnu amu, da heppi aha gokku,” awa aum. Jesus Nug anam ana, Nug eɗua oɗe danab amegppa aum. “Na ahan, qaɗaqaɗ nahip aon, lakka ukke!” awa aum.

⁷ Nug anam a amu, oɗe danab nug aha, ag noolagppa dimittim wana, lakka ukkom.

⁸ Ugekke, danab ah kuɗum ag amu anidppig amu, ag Kayaknu ebehilkad oh bodoetta le me, ag Kayak, Nug danab uɗat amu hekkulagnu ɠagattag mattom ele amu, ag Nug binag meppig.

Jesus Matyu onigppa eum

⁹ Aria, Jesus Nug appanu aha oiyaya, takis awak danab laa onig Matyu, nug takis awak lakka dayeye anttom. Antta, Jesus Nug amegppa aum. “Na dona, da dim lamiɗe!” awa aum. Anam a amu, nug aha Jesus dim lamittom.

¹⁰ Dimppa Jesus Nug nuhikkud ippunittak awak danab ele ag Matyu laugppa ee laegeg, takis awak danab kuɗum, danab kuɗum ag Juda dilag ɗo oh ii dim lamidppig, ag ele uɗieg, Jesus, nuhikkud ippunittak awak danab ele ee lappig.

¹¹ Ag ee lanana daaegeg, ɗo gumak danab-Parasia ag anadna, ag Jesusnu ippunittak awak danab oɗ madappig. “Aɗinu ahilag ippunittak danab Nug takis awak danab, danab ag ihinig ɗo oh ii dim lamidtteb ele, Nug ag ele oh daanna ee latteb?” aon appig.

¹² Ag anam aon aeg amu, Jesus Nug doya, Nug amelagppa aum. “Danab oɗe iitta, nug dokta toppa ii gotte. Iitta. Danab nug oɗe ele, nug gotte.

¹³ Gemu ag nai imu Kayak Nug mattiom, nuhig naippa daatte, ag nai amu anidna doyeg! Nai am inam. ‘Da ag laanu oolag gai-iitta doon oolag mattan ehanadkkulagnu anuqak doottem. Da ag doɗ main meɗaglagnu anuqak ii doottem.’ ” Jesus Nug anam anana, Nug tuɗitta aum. “Da genab tutukku hak danab ag oolag eɗukkunu ii uɗimi. Iitta! Da hipunin danab ag oolag eɗukkunu uɗimi,” awa aum.

Ee ohnu kud ma dayaknu nai

¹⁴ Aria, Layattak Jonnu ippunittak awak danab ag Jesus gumidna gona appig. “Aɗinu ig, amu ɗo gumak danab-Parasia ele, ig ee ohnu kud meta daattem, amge nahipad ippunittak awak danab ag anam ii hetteb?” aon appig.

¹⁵ Ag Jesus amegppa anam appig amu, Jesus Nug aum. “Da am danab nug ah aotte bia. Aria, dahil ippunittak awak danab, ag am da lailad. Amu ig doottem, ewau matulak haen am oo gamag ahak ele amunu, danab nug ah aotte, nug daatte haenppa, nug laikkud ag uug doonna, ee ohnu kud mena daaglagnu am iitta. Ag oolag gamag ahak ele amunu, ag ee ii uumna, ag lakkulag. Anam aakku daatte, amge deɗ laa dimppa ag lailag, ah awom ele amu, nug laih ukkeb, haen amuppa ag oolag uug ele amunu, haen amuppa ag ee ohnu kud mena daaglag. Amu da ami, amubia. Da am danab ah aotte bia. Dahil ippunittak awak danab ag am da lailad bia. Da gemu ag ele daattem amunu, ag ee ohnu kud mena daaglagnu elele iitta. Dimppa da goppi, ag anam hekkulag,” awa aum.

¹⁶ Jesus Nug anam ana, Nug nai tuɗitta ippuanatta aum. “Danab nug lamen qatti bau awa, lamen alagnu giɗo amuppa tona ii koit-tte. Aɗinu? Nug anam helo amu, nug lamen iheb, lamen qatti bau ii ihak ele am nakok ma, lamen qatti amu aakku lamen alag eɗeb, lamen alag kattiɗa giɗo okkai ele daakku.

¹⁷ Laa ele danab nug grep leppu bau, doɗ gaɗa nippud alagppa ii inatte. Nug anam helo amu, grep leppu nug eɗua, wain baaba, titiɗa heebeb, doɗ gaɗa nippud alag nug ɠagattag eppom, okkai mekkunu elele iitta amunu nug aoɗeb, wain amu doɗ gaɗa nippud ele oh iitta mekkulah. Anam amunu, grep leppu bau am doɗ gaɗa nippud bauppa inaeg, aa oh elele daattep,” awa aum.

Ikki danab aɗeg, amu ah lamen aɗom ele dilah nai

¹⁸ Jesus Nug anam nai mattieye, ikki danab laa Jesus gumitta uɗia, Nug noobppa gateg qaun o aum. “Nid ahin dahil nug geha iikku mauhom, amge na gona, eppenppa aɗappe, nug eɗua bau daakku,” awa aum.

¹⁹ Nug anam a amu, Jesus nug ele ukkaeheh, nuhikkud ippunittak awak danab ele oh goppig.

^20-21 Amu ah laa appa dayom ele, tiig nak oɗe maɗ 12 nuhigppa dayom. Nug anam dayaya, nug ooppa, “Da lamen elab nuhig nakokib aɗakkul amu, da ena daakkul,” aum amunu, nug Jesus dimugppa gumitta wana, lamen daug lauɗittom.

²² Lauɗitte amu, Jesus Nug eɗua neekka antta, amegppa aum. “O aɗel, na ootppa ɠagattag doye! Na ootppa genab doome amunu, na ena daattem,” awa aum. Awa a, haen amuppaib ah nug ena dayom.

²³ Ena daye amu, haen Jesus Nug ukka, ikki danab laug ooppa noa, Nug laa dumuttum iwalppig, danab ah kuɗum laa mahittak kobol heegeg ele anattom.

²⁴ Jesus anam anatta amu, Nug aum. “Ag ahan ukkeg! Nid ahin ii mauhom. Iitta. Nug niitte,” awa aum. Awa a amu, ag Nug imidppig,

²⁵ amge Jesus Nug danab ah kuɗum amu oh lamattowa, Nug lag ooppa noa, Nug nid ahin eppeg aɗe, nug eɗua ahom.

²⁶ Ahe, nai amu wan atu amu ohppa oiya malom.

Jesus amelah gaɗuak aɗit, oɗetup laa ele bappalattom

²⁷ Jesus Nug aab amu uua ugekke, danab aɗit amelah gaɗuak ele aa Nug dim lamidya, onigppa eyaya apiɗ. “Dawit bekka, na ihinihnu oot gai-iitta doona oot metan ehanite!” aoya epiɗ.

²⁸ Anam eeheh, Jesus Nug lakka no, amelah gaɗuak aɗit aa Jesus toppa uɗipiɗ. Uɗieh, Nug aa oɗ matom. “Da aa ehanatkkulnu elele oolahppa genab doottepte?” awa aum. Awa a amu aa, “Yo,” aoya apiɗ.

²⁹ Anam aeh amu, Jesus Nug eppeg amelahppa maama aum. “Aa dahilnu oolahppa genab doottep bia, anamnab ahilahppa bekku,” awa aum.

³⁰ Anam a amu, aa amelah oppatom. Oppate, Jesus Nug ɗo nai ɠagattag inam matom. “Dabmeiɗ! Aa keeke amunu danab laa apeɗ aib doyom,” awa aum.

³¹ Jesus Nug anam aum, amge danab aɗit amu aa dimittim goya, Jesusnu nai wan atu amu ohppa meeh oiyom.

³² Ameg gaɗuak aɗit Jesus ehanatom ele aa dimittim ukkaeheh, danab ouɗi nau ele, oɗetup dayom amu, ag nug omalna doeg, nug Jesus guguitta doum.

³³ Do amu, Jesus Nug ouɗi nau amu lamitte, oɗetup nug nai mattiom. Nai mattieye, danab ah kuɗum appa daappig ele ag dabmak kuɗum aonna appig. “Anukka keeke inam laa Israel ooppa ii beum,” aon appig.

³⁴ Ag anam appig, amge ɗo gumak danab-Parasia ag, “Nug ouɗi nau ikkilagnu ɠagattagppa ouɗi nau lamadtte,” aon appig.

Jesus danab ah dilagnu oo doyom

³⁵ Aria, Jesus Nug ukka, aab nakok okkai ohppa, amu aab nakok ele ohppa oiyaya, Nug Juda dilag nai doyak lakka nai ippuanatta, Kayaknu ɗo maɗoɗnu Nai Ena mehuqa, Nug oɗe oh, aria keeke nau danab ah beɗulag heeg nauhom, Nug amu oh bappalattom.

³⁶ Haen Nug danab ah kuɗumnab anam anatta amu, Nug oo bodoetta le meum. Aɗinu? Ag uug kuɗum ele dooppig, amge ehanittak laa iitta. Ag am doɗ sipsip ag gumak danab iitta, ag amubia daappig.

³⁷ Amu Jesus Nug anam anattowa, Nug nuhig ippunittak awak danab amelagppa aum. “Datta ee kuɗumnab oɗuppig daatteb, amge uɗat nid kuɗum iitta

³⁸ amunu, ag dad Mameg, Nug uɗat nid maatteb, ag gona ee nuhig qagmekkulagnu unuqitteg!” awa aum.