Matyu 8 - Nobonob Baibel

Jesus danab laa gaɗa oɗe nau ele babaittom

¹ Jesus Nug nai mattia malowa, Nug qauko nakok attanppanu no, danab ah huanak Nug dim lamidppig.

² Dim lamittegeg, danab laa nug gaɗa oɗe nau ele, nug Jesus noobppa ukka, gateg qaun o, Jesus amegppa aum. “Naɗi, na oot heeb, na heppe, oɗe dahil iitta mekkunu amu, na elele daattem,” awa aum.

³ Nug anam a, Jesus Nug eppeg bahia, danab beɗu aɗa, amegppa aum. “Da ool anam daatte, na ena daye!” awa aum. Anam a amu, pahanab gaɗa oɗe nau amu iitta me, danab nug ena dayom.

⁴ Ena daye, Jesus Nug danab amu amegppa inam aum. “Doye! Na danab laa amegppa, da na bappaidminu aib ame. Iitta. Na gona, na beɗun mana mettak danab ippunidna, na Mosesnu ɗo atte bia, na doɗ main, Kayak mette! Aɗinu? Danab oh ag amuppa dooglag, na oɗe amu ele iitta,” awa aum. Jesus Nug anam awowa, Nug he ukkom.

Ban daup 100 dilag ikki laa nug Jesusnu ooppa genab doyom

⁵ Amu haen Jesus Nug ukka Kaperneam te amu, ban daup 100 dilag ikki laa nug uɗia, Jesus ehanidkkunu inam oɗ mettom.

⁶ “Naɗi, dahil maɗi nid nug baeg eppeg mauhe, guittak okkai ele doyaya, lakka uma niitte,” awa aum.

⁷ A amu, Jesus Nug amegppa aum. “Da ukken heppi ena daakku,” awa aum.

⁸ Jesus Nug anam aum, amge ban daup 100 dilag ikki nug aum. “Naɗi, da am danab enate na uɗin, da laul ooppa nekkut? Anam amu, na maɗi nid dahil ena daakkunu naiib appe amu, nug eɗua ena daakku.

⁹ Da amu doottemnu diig am, da ele uɗat imunu danab okkai waalagppa daaiyi, ag da gumiɗegeg, amu dahilad daup ag da waalppa ele daatteb. Amu da laa amegppa, ‘Na ukke!’ ai, aria nug gotte. Amu da laa amegppa, ‘Na do!’ ai, aria nug dotte. Da dahil maɗi nid ele amegppa, ‘Na uɗat imu he!’ ai, aria nug hette amunu, na naiib appe, keeke amuam bekku doottem,” awa aum.

¹⁰ Awa a amu, Jesus Nug amu doya, Nug ottaia dabmak kuɗum awawa, Nug danab ah Nug dim lamidppig, ag amelagppa inam aum. “Da genab ag amelagppa attem. Da Israel danab oolagppa, ooppa genab doyak imubia amu, da laa ii anidmi

¹¹ amunu, da ag amelagppa attem. Geha danab kuɗum aam bedeppanu, aam nodeppanu ele ag uɗippeg, Abraham, Aisak, Jakop ele ag Kayaknu ɗo maɗoɗppa daanna, hobulppa ee lanan, laippu daaglag,

¹² amge Israel danab ah ⌊kuɗum⌋, ag geɗattak daan, gatatuppa gokkulag. Appa danab ag gaanna, aelkad emalna daaglag,” awa aum.

¹³ Awowa, Nug ban daup 100 dilag ikki amegppa aum. “Na enad ukke! Na da maɗi nid nahip ehanidkkulnu ootppa genab doome amu, anam aakku bekku,” awa aum. Jesus Nug anam a, haen amuppaib ban daup 100 dilag ikkinu maɗi nid eɗua, ena dayom.

Pita nome ehanittak awom

¹⁴ Maɗi nid amu ena daye amu, Jesus Nug Pita laugppa noa, Pita nome nug beɗu gakkaɗak oɗe ele niieye anttom.

¹⁵ Antta, Nug gumitta wana, ah eppeg nakok aɗa he, beɗu gakkaɗak iitta me, ah amu nug aha digma, ehanittak keeke babaitta ehanittom.

Jesus danab ah kuɗum bappalattom

¹⁶ Aria, aam no, uudoowo, danab ag ahan, danab kuɗum ouɗi nau ele omaladna, Jesus toppa goppig. Ukkaeg, Jesus Nug laa ouɗi nau ele amu, Nug oɗeppaib anakppa, ouɗi nau lamattatta, oɗe danab oh ele amu bappalattom.

¹⁷ Anam heum amunu, Kayaknu propet Aisaia, nug Kayak nai laa aum amu, nai amu elele mettom. Nug inam aum. “Nug ihinig oɗe, ig beɗunkadnu uug ele mawom.”

Jesus dim lamittaknu nai

¹⁸ Aria, haen Jesus Nug danab ah kuɗum ag Nug oo mettan talilidppig ele antta, Nug ippunittak awak danab nuhikkud amelagppa aum. “Ig le ameg mataɗta laih uppa gotu!” awa aum.

¹⁹ Awa a amu, ⌊ag gokkulagnu daaegeg,⌋ ɗo mehuqak danab laa doa, Jesus amegppa aum. “Ippunittak danab, na adep adep gokkut amu da na dim lamidkkul,” awa aum.

²⁰ A amu, Jesus Nug ɗo mehuqak danab amegppa aum. “Doɗ laa onig foks, biun bia, ag wan oɗeppa niiaknu aben ele, ai ag ele teɗ ele, amge Danab Bekkalag da amu, da niiaknu aben laa iitta,” awa aum.

²¹ Anam a amu, nuhikkud ippunittak awak danab oolagppan laa nug Jesus amegppa aum. “Naɗi, na appe amu, da tatam ukken, mama boumoya, da eɗuen na dim lamidkkul,” awa aum.

²² Nug anam aum amge Jesus Nug aum. “Uuppe! Mauhak aɗi, ⌊ag danab dahil uɗat haknu dab-ii-metteb ele amu,⌋ ag mauhak lailkad boumatteg! Na da dim lamiɗe!” awa aum.

Jesus ulah amegppa a, toettom

²³ Jesus anam awowa amu, Nug aha, uub attan te, nuhikkud ippunittak awak danab ag ele teeg goppig.

²⁴ Ukkaegeg, ulah okkainab digma heehe, le ameg koɗkoɗ huan qa, uub tona malom. Le anam heum, amge Jesus Nug uubppa niiom.

²⁵ Nug niieye, nuhikkud ippunittak awak danab ag Nug gumidna gona maɗettan appig. “Naɗi, ig mauhmatanu, na ehanikke!” aon appig.

²⁶ Ag anam aeg amu, Jesus Nug aum. “Ag aɗinu anam baɗatteb? Ag oolagppa genab nakokib dootteb.” Nug anam awowa, Nug aha, ulah le ele dilahnu, aa anam hemayanu amelahppa a, ulah nug iitta me, le ele toetta, manin niiom.

²⁷ Nug anam he amu, nuhikkud ippunittak awak danab ag dabmak kuɗum aonna, akka akka appig. “Danab imu am danab attemu? Ulah, le ele aa ele nuhig nai dim lamidttep!” aon appig.

Jesus Nug danab aɗit, aa ouɗi nau ele bappalatom

²⁸ Aria, ag gona, Galili le ameg laih Gadara danab dilag wan atuppa eeɗppig. Eeɗeg, danab aɗit ouɗi nau qalatak ele, aa matmatppanu Jesus gumidya uɗiya, Nug uɗa tepiɗ. Aa dakkuɗ meya autia aopiɗ amunu, danab ag ib amuppa oiyaknu elele iitta.

²⁹ Aa uɗiya, huanak eya apiɗ. “Kayak Bekka, na ihinihppa attem hekkutnu hettem? Guittak haen ihinih ii uɗiom, amge na paha guittak nau metakkutnute uɗime?” eya apiɗ.

³⁰ Anam aeh daaeg, bo ameg naɗi laa nakok uma ee lanan daaegeg,

³¹ ouɗi nau ag Jesus unuqna appig. “Na ig lamigna doona amu, lamigkkut amu, heppe ig gota bo oolagppa notu!” aon appig.

³² Aeg amu, Jesus Nug aum. “Ag ukkeg!” awa aum. Nug anam aum amunu, ag danab aɗit uuatna, ag gona, bo oolagppa noppig. Noeg, bo ameg naɗi amu ag oolna huana gona, aben oola noakppa, le amegppa nona, le lanan mauhadna malappig.

³³ Mauhadna malaeg amu, bo gumattak danab ag oolna goppig. Ag gona, aab miag dayom, amuppa ag keeke aɗi anidppig ohnu anana, ag danab aɗit ouɗi nau qalatak ele dilahppa kobol beum, ag amunu ele madippig.

³⁴ Mattieg amu, danab ah aabppanu oh Jesus uɗa tekkulagnu uɗin, ag Nug anidna, ag Nug ahilag wan atuppanu aha, laih gokkunu unuqppig.