Matyu 7 - Nobonob Baibel

Lailkad hettoɗiaknu nai

¹ Ag laa dilag ⌊oo ɠagattagppa⌋ aib epeɗiadppig. Ag anam epeɗiadkkulag dayeb amu, ag ele epeɗiak amubia aoglag.

² Aɗinu? Ag laa dilagppa epeɗiak kobol attenppa epeɗiadppeg amu, ag epeɗiak kobol amuppa aoglag. Ag lailkad dilagnu aɗi melemelppa keeke hetteb, ag melemel amuppaib geha keeke aoglag.

³ Aɗinu na layap amegppa ad huppu nagnag gikkiakppanu daatte, na amunu neegttem, amge na nakka amenppa ad imuag laa daatte, na amunu dab-ii-mettem?

⁴ Na dabmak attem aona, na layap amegppa, ‘Lai, da ad huppu nagnag gikkiakppanu na amenppa daatte amu aokkulnu hettem,’ attem? Na anam attem, amge na nakka na amenppa ad imuag dayakib daatte.

⁵ Na am hambuppuak danab! Tatam na ad imuag na amenppa daatte mautppe na ukkeb, na pehettan neegnana, na layap amegppa ad huppu nagnag gikkiakppanu amu maute!

⁶ Qai ag eɗun eheɗ emaladmananu amu, ag ahilag keeke oppiaawak ele aib madappig. Amu laa ele, bo ag baelagppa tappamnanu amu, ag ahilag kalele ena ena perlppa heppig amu aib madappig.

Danab unuqittak ɠagattag hekkunu nai

⁷ Ag Kayak unuqidppeg, Nug ag madakku. Ag mattina, ag anidkkulag. Ag od qeqalppeg, Kayak Nug ahilagnu od matulkku.

⁸ Aun nug Kayak unuqidtte, nug aotte. Aun nug maditte, nug anidtte. Aun nug od qeqaltte, Kayak Nug od matultte.

⁹ Ag oolagppanu danab laa bekka nug mameg bret medakkunu oɗ metteb amu, mameg nug mente medakku? Iitta.

¹⁰ O nid amu nug mameg kakai laa medakkunu oɗ metteb amu, mameg nug mat nau medakkute? Amu ele iitta

¹¹ amunu, ag nau aɗi ag genab keeke ena ag nid ahilkad mattaglagnu dootteb dayeb, genabnab ag Mamelag, hab attan daatte, Nug danab ag Nug unuqidppeg, Nug keeke ena ag madakku.

¹² Anam amunu, ag dahilad ag danab ag kobol atten ahilagppa hekkulagnu oolag daatte, ag kobol amuib ahilagppa heig! Ɗo nai, amu propet nai ele amuib ippunigkkunu daatte.

Bauklel ibnu nai

¹³ Ag ib laa, ib amu oɗeppan od hogogdoak ele, ag amuppa noig! Aɗinu? Ib okkai padal mak abenppa gotte ele amu, nuhig od am okkainab, am danab ah kuɗum ag ib amu dim lamidtteb.

¹⁴ Amge ib bauklel abenppa ukkak amu, nuhig od am hogogdoak, ib ele am hogogdoak amunu, danab ah laippu laippuib ag ib amu anidna gotteb.

Propet hambuppuaknu nai

¹⁵ Ag propet hambuppuak dilag dabmeig! Propet hambuppuak ag, ‘Da Kayak ippu ippunadttem,’ aon atteb, amge amuam nai hambuppuak. Propet hambuppuak ag wulp sipsip emala lakkunu, sipsip gaɗa awa ma, sipsip oolagppa oitte, ag amubia oitteb.

¹⁶ Ag propet hambuppuak dilag hakppa ag am propet hambuppuak anadna dooglag. Danab ah ag grep meu ad naunau qaun eleppanute aotteb? O ag ad fig meu uud qaun eleppanute aotteb? Iittanab.

¹⁷ Anam amunu, ad ena oh ag meulkad ena otteb, amge ad nau ag meulkad nau otteb.

¹⁸ Ad ena nug meu nau okkunu elele iitta; aria, ad nau nug meu ena okkunu elele iitta.

¹⁹ Ad oh, ag meu ena ii otteb ele amu, danab ag oadna, aab aɗuppa akkaeg teeg eotteb.

²⁰ Amunu ag propet hambuppuak dilag hakppa ag am propet hambuppuak anadna dooglag.

²¹ Danab ah ag da amelppa, ‘O Naɗi, O Naɗi,’ atteb ele, amu oh ag dahil ɗo maɗoɗ ooppa ii nomana. Iitta. Danab nug da Mamel, hab aabppa daatte, nug nuhig dabmak dim lamidtte ele, nugib dahil ɗo maɗoɗ ooppa nokku.

²² Anam daatte amunu, epeɗiak deɗ naɗippa danab ah kuɗum ag da amelppa akkulag. ‘Naɗi, Naɗi, ig na oninppa propet nai iite mehuqmut? Na oninppa ele ouɗi nau iite lamadmut? Ig na oninppa kobol danab haknu elele iitta kuɗum laa iite hemut?’

²³ Ag anam akkulag, amge da haen amuppa miag appi dooglag. ‘Da ag nakoknab laa ii doyadttem. Ag am eheɗ hak danab amunu, ag uuiɗna ukkeg!’ awe akkul.

Jesus Nug doyak dabmak ena elenu ippunittak nai mattiom

²⁴ Amunu danab nug nai dahil imu doya dim lamidtte amu, nug danab laa doyak dabmak ena ele, nug danab laa men qaɗeppa lag ukku aɗe, men aɗa dayeye, aria dimppa nug amu attan lag heum bia daatte.

²⁵ Nug lag he, gu ne, ui o, ulah ɠagattagnab ele heum, amge lag amu ii na qeum. Aɗinu? Danab amu nug lag amu ukku men qaɗeppa heum.

²⁶ Amge danab nug nai dahil doya ii dim lamidtte amu, nug am dabmak tutukku iittappa keeke laa hak danab, nug danab laa ihi qaɗeppa lag ukku aɗe, ihi aɗa dayeye, aria dimppa nug amu attan lag heum bia daatte.

²⁷ Lag he, gu ne, ui o, ulah ɠagattagnab ele heehe, lag amu na qeum. Amu genab nug na qa nauha auta awom,” awa aum.

²⁸ Jesus Nug nai amu mattia male, danab ah kuɗumnab amu ag Nug nai mattiom, ag amunu dabmak kuɗum aoppig.

²⁹ Aɗinu? Nug ahilag ɗo mehuqak danab nai ippunadppig bia ag ii ippuanattom. Iitta. Nug danab nug anam hekkunu ehah ele, Nug amubia nai ippuanattom.