Matyu 3 - Nobonob Baibel

Layattak Jon nai mehuqom

¹ Jesus Nug Nasaret dayeye, Layattak Jon nug aha, Juda wanppa atu taɗakppa ukka, nug danab amelagppa nai mehuqom.

² Nug nai mehuqaqa inam aum. “Kayaknu ɗo maɗoɗ aakku miag doum daatte amunu, ag oolag eɗuaɗ!” awa aum.

³ Anukka propet Aisaia nug Jonnu inam mattia aum. “Nug am baag laa atu taɗakppa dayaya, nai inam ewa atte. ‘Ag Naɗi uɗikkunu ib babaitteg! Ao, ag ib tutukku, tak nak iitta ele nuhignu babaitteg!’ ” Aisaia nug Jonnu anam aum.

⁴ Amu Jon nug lamen kamel uɗigppa hak ma, nug imuagppa matagiɗ doɗ gaɗappa hak ele tagattom. Nuhig ee am atuppanu uppuh leppu, tap-lokus ele.

⁵ Anam amu, haen amuppa Israel danab, laa Jerusalemnu, laa Juda wanppa laih ohnu, laa ag Jodan lenu oolnu noak ohppa daappig ele amu, appan danab ele ag oh ahan, Jon gumidna gona,

⁶ ag hipunin ahilag miagib mattiegeg, Jon nug Jodan leppa layattom.

⁷ Layattette amu, ɗo gumak danab-Parasia, ɗo gumak danab-Sadyusi ele ag layattak aoglagnu kuɗum ukkaeg, Jon nug ag anatta, nug ag amelagppa inam aum. “Ag am danab nau, mat nau bia. Aun nug nau aomnanu nai ag amelagppa mattie, ag Kayaknu oppoɗi bak uɗitte ele ii aqamanu uɗippig?

⁸ Ag oolag eɗueb, kobol ena dim lamitteg!

⁹ Amu ele, ag oolagppa inam akkulagnu aib dabmeppig. ‘Abraham nug ig mamenig, nug am genab tutukku hak danab, ig nug buɗub daattem amunu, nuhig hak enappa ig nob ii aomta.’ Da ag amelagppa attem, Kayak Nug men imu ag eɗun, Abraham bekkod daaglagnu hekkunu elele.

¹⁰ Antteg! Epeɗiak haen am miag. Ad meu ii otte amu, nug mameg o qiie, aab aɗuppa mawe te eotte.

¹¹ Da ag oolag eɗuom Kayak dim lamidtteb ele leppa layadttem, amge laa Nug da dimulppa uɗitte amu, nuhig ɠagattag am dahil eɗidtte. Nug am danab okkainab, da am okkai iitta; dahil hak am nuhig bia iitta, dahil am elele iittanab iitta. Nug Kayak Ouɗi, aab aɗu eleppa ag layadkku.

¹² Nug ee aeg mumuɗaknu abenppa ulah ee aeg dappunkkeg iwale ukkaknu uɗat hekkunu daatte. Nug uɗat amu ha, elelenab mewowa, Nug wit meu oh ee aeg mumuɗaknu abenppanu awa ukka, ee maknu lakka mekku. Mewowa, Nug ee aeg dappunkkeg aab aɗu ii qauhtte eleppa maneb eweb, ee aeg mumuɗaknu aben amuam keeke iitta, oppiaawak daakku,” awa aum.

Jon Jesus laaittom

¹³ Jon nug uɗat anam heehe, haen amuppa Jesus Nug Galili uua, Nug Jon eppegppa layattak aokkunu Jodan leppa ukkom,

¹⁴ amge Jon nug Jesus am okkai, nug nukka nug am okkai iitta doya, nug Jesus nug eppegppa layattak ii aomanu haaha, nug Jesus amegppa aum. “Na da laaiɗkkutnu daatte, ge attemu am, na dahilppa uɗime?” awa aum.

¹⁵ A amu Jesus oɗeppa awa aum. “Iitta. Gemu amu na da ami bia hekkut. I amuppa kobol tutukku oh elele mettagnih,” awa aum. Awa a amu Jon nug Jesus oɗe dim lamittom.

¹⁶ Jesus layattak awa malowa, Nug leppanu beum. Amu haen amuppanab hab obata mette, Kayak Ouɗi Nug uppuɗil beɗulag nakok laabia naana, Nug qaɗeppa dayeye anttom.

¹⁷ Kayak Ouɗi anam ne amu, baag laa hab aabppanu aum. “Imuam da bekkal, da nuhignu ool mauhtte. Nuhignu ele da oolppa enanag doottem,” ewa aum.