Matyu 26 - Nobonob Baibel

Ikki danab ag Jesus qeppeg mauhkkunu nai qagappig

¹ Jesus nai amu oh mattia malom dimppa Nug nuhikkud ippunittak awak danab amelagppa aum.

² “Ag dootteb, deɗ aɗit uueb, Pasowanu Hobulnu ee lanaknu haen ana bekku amu ag Danab Bekkalag da kekeɗ eppelagppa meiɗna, ag ad emaitakppa atuliɗkkulag,” awa aum.

³ Haen amuppa mana mettak danab okkai amu Juda dilag ikki danab ele, ag oh mana mettak ikki danab onig Kaiapas nug laug enanagppa qagmeppig.

⁴ Qagmena ag ib attemuppa Jesus lokkumakppa aɗan, qeppeg mauhkkunu hettoɗina nai madippig.

⁵ Ag hettoɗiak hena amu ag appig. “Danab ah ag nug qemana, muttub ele qemananu amu, ig Pasowanu Hobul haenppa Jesus ii aɗamta,” aon appig.

Ah laa Jesus igippa goɗen gokkaɗom

⁶ Aria, Jesus Nug Betani appa danab onig Saimon, nug ⌊matu⌋ gaɗa oɗe nau ele, ⌊gemu iitta meum⌋ amu, nug laugppa dayeye,

⁷ ah laa nug men id enanag, leppu muttuɗig enanag, nob okkainab ele inak amu awa, Jesus gumitta uɗiom. Awa uɗia, Jesus Nug balalppa ee lanan dayeye, nug leppu amu Jesus igippa gokkaɗom.

⁸ Haen ippunittak awak danab ag amu anidna, ag oolag nauhe appig. “Nug aɗinu leppu muttuɗig enanag amu hamu kakittom?

⁹ Leppu muttuɗig enanag amu, laa ag men doɗo okkaippa daden melob. Ag anam helob amu, nug men doɗo amu daɗek danab mattalo am ena,” aon appig.

¹⁰ Am Jesus Nug nai ahilag doyom amunu, Nug ag amelagppa aum. “Ag aɗinu ah imu oo uug medatteb? Nug dahilppa kobol enanag heum.

¹¹ Daɗek danab amu, ag ag oolagppa hanhan daaglag, amge da ag ele haen oh ii daamta.

¹² Nug da beɗulppa leppu muttuɗig enanag imu gokkaɗom amu, nug da mauhe, moɗppa niikkulnu beɗul babaittom.

¹³ Da genab ag amelagppa attem. Dimppa danab ag wan atu ohppa dahilnu Nai Ena imu adeppa adeppa mehuqnana, ag ah imu keeke heum amu, ag amunu madippeg doon, ag nuhignu dabmekkulag,” awa aum.

Judas nug Jesus ikki danab eppelagppa mekkunu aum

¹⁴ Aria, haen amuppa ippunittak awak danab 12 ag oolagppan laa onig Judas Iskariot, nug mana mettak danab okkai gumatta ukkom.

¹⁵ Nug ukka oɗ meum. “Da Jesus ag eppelagppa meppi amu, ag aɗi meɗaglag,” awa oɗ meum. Nug anam a amu ag silwa men doɗo 30 mettaglagnu ebqeppig.

¹⁶ Ag anam heeg, haen amuppa nug digma, haen ena adekkuppa nug Jesus ag eppelagppa mekkunu ib mattiom.

Jesus Nug nuhikkud ippunittak awak danab ele Pasowanu ee lappig

¹⁷ Aria, Bret Yis Iitta Lanaknu Hobul Nakok deɗ tatamnu ne, Jesusnu ippunittak awak danab ag dona, Jesus oɗ medappig. “Na Pasowanu ee lakkutnu amu, ig amunu adeppa bappaidkkunignu oot daatte?” aon oɗ medappig.

¹⁸ Ag anam aeg, Nug ⌊ag oolagppan aɗit laa amelahppa⌋ aab okkaippan danab laanu awowa, Nug aum. “Aa aab okkaippa noya, danab amu gumidya goya, amegppa inam aiɗ! ‘Ippunittak danab ihinig Nug inam aum. “Dahil haen aakku miag daatte amunu, da dahilad ippunittak awak danab ele ig na lautppa Pasowa hobul gamag ahak ele hekkunig.” ’ Aa anam aoya aiɗ!” awa aum.

¹⁹ Jesus Nug anam a, nuhikkud ippunittak awak danab aa Nug oɗe dim lamidya, Pasowanu ee bappaidpiɗ.

²⁰ Aria tueb me, Jesus amu nuhikkud ippunittak awak danab 12 ele ag balalppa daappig.

²¹ Ag anam balalppa ee lanana, Jesus Nug aum. “Da genab ag amelagppa attem, ag oolagppanu laippu laa nug da kekeɗ eppelagppa meiɗkku,” awa aum.

²² Nug anam a, ag oolagppa uugnab doon, ag anen anen Jesus oɗ medappig. “Naɗi, na ame am date?” aon appig.

²³ Aeg amu Nug ag oɗelagppa awa aum. “Laippu laa nug da ele ee lattep amu, nug da kekeɗ eppelagppa meiɗkku.

²⁴ Danab Bekkalag da, Kayak nai atte amubianab da mauhkkul, amge danab nug Danab Bekkalag da, kekeɗ eppelagppa meiɗkku amu, nuhignu gadonnab gadon. Nug anig nug ii menulo am ena,” awa aum.

²⁵ Jesus anam a amu Judas nug Jesus kekeɗ eppelagppa mekkunu heum ele, nug aum. “Ippunittak danab, na ame am date?” awa aum. A amu Jesus aum. “Na ame,” awa aum.

²⁶ Jesus Nug anam a, ag ee lanana daanna, Jesus Nug bret awa, Mameg amegppa, “Ena heme” awowa, pane ne, pania nuhikkud ippunittak awak danab madatta, Nug aum. “Ag aon laig! Imuam da beɗul,” awa aum.

²⁷ Nug anam awowa amu, Nug kap wain awa, unuqittowa madatta Nug aum. “Ag oh aon laig!

²⁸ Imu da tiil, amuppa da nug tituana nai qakkak bau hettem. Da danab ah kuɗum dilag hipunin uhuqen madakkulnu gokkaɗttem.

²⁹ Amge da ag amelagppa attem, da wain geha iikku lattem imubia baula paha ii lapa. Iitta. Dimppa Mamanu ɗo maɗoɗ ooppa da ag ele baula lakkunig,” awa aum.

³⁰ Nug anam a amu ag ahi laa ettona, ag ahan, dimittim wana, ag Olipnu Qaukoppa goppig.

Pita Jesusnu, “Da nug ii doottem,” akkunu nai

³¹ Ag gona, Jesus Nug ag amelagppa aum. “Kayak naippa yaak laa niitte am inam. ‘Da sipsip gumak danab qeppi mauheb, sipsip ag oolna matatun gokkulag,’ amunu yaak amubia, gemu tuqan imu ag oh dahilnu uug doon, uuiɗna oolna gokkulag.

³² Amge dimppa da eɗuen hibaitten, da anuqen Galili goppi, ag da dim lamiɗna gokkulag,” awa aum.

³³ Amge Pita nug oɗeppa awa aum. “Danab laa oh ag nahipnu uug doon, uuidna oolna gokkulagtai, amge da am anam ii hepa,” awa aum.

³⁴ Pita nug anam a amu Jesus nug oɗeppa awa aum. “Da genab na amenppa attem. Na tuqan imuppanab na dahilnu, ‘Da Nug ii doottem,’ aon, haen ewam batak akkut. Na haen ewam anam appe, geha matuk dawai nug gaakku,” awa aum.

³⁵ Am Pita nug aum. “Iitta! Da na ele mauhkkunih dayeb amu, da amunu uug ii doottem, amge da nahipnu, ‘Da Nug ii doottem,’ ii apa! Iittanab iitta,” awa aum. Nug anam a amu, ippunittak awak danab laa oh ele ag anam appig.

Jesus Getsemani datta unuqittom

³⁶ Ag anam aeg amu, Jesus Nug ag ele oh aben laa onig Getsemani, ag appa goppig. Gona amu Nug ippunittak awak danab amelagppa aum. “Da uppa ukken unuqidppippi, ag iguppa dayeg!” awa aum.

³⁷ Nug anam ana amu, Nug Pita am Sebedi bekoɗ aɗit ele aakkuib diiatte, Nug ele goppig. Gona amu, Nug ooppa guittak nau, uugnab ele doyom.

³⁸ Nug anam doya, Nug ag amelagppa aum. “Da oolppa kahipan toɗe mauhak bianab doottem amunu, ag inam daappeg, da ele dabmettat daatu!” awa aum.

³⁹ Nug anam awowa, Nug nakok baula wana ukka, appa Nug laippun gateg qaun o, gomela, iɗu wanppa ma, unuqitta aum. “O Mama, uug oh da maokkul ele, amuam leppu mua eheɗ nau kap-ppa daatte bia, amu na ib laa anidna appe, da le kap amuppanu da ii lapa, amge na dahil dabmaknab aottem ii dim lamidmana. Iitta. Na nahip dabmaknab aottem amuib dim lamidkkutnu ool daatte!” awa aum.

⁴⁰ Nug anam unuqittowa eɗua ukka, nuhikkud ippunittak awak danab ewam niiegeg anatta, Nug Pita amegppa aum. “Ag da ele aua laippuib dabmettat daagnignu elele iittate?

⁴¹ Satan ag eeɗatteb eheɗppa gomananu ag dabmenan daanna, unuqitteg! Ag tutukku hekkulagnu dabmetteb, amge ag beɗulag am ɠagattag iitta,” awa aum.

⁴² Jesus Nug anam ana, Nug eɗua ukka, baula unuqitta aum. “O Mama, da le kap imunu ii lakkulnu amu, na ib laa anidkkutnu elele iitta dayeb, na nahip dabmak aakkuib dim lamitte!” awa aum.

⁴³ Nug anam unuqittowa, Nug eɗua ukka, ippunittak awak danab ag amelag eheɗ neum amunu, ag niiegeg anattom.

⁴⁴ Anam anatta amu Nug eɗua ukka, unuqittak aɗit tatam heum, amuib baula unuqittom.

⁴⁵ Unuqittak oh malak dimppa Jesus Nug eɗua ukka, ippunittak awak danab amelagppa aum. “Ag iite ahappig? Ag tuɗidna niin, hik ele aottebte? Antteg! Laa nug Danab Bekkalag da, hipunin danab eppelagppa meiɗkkunu haen miag aakku doum.

⁴⁶ Ahappeg gotu! Ag aakkud antteg! Danab nug da kekeɗ eppelagppa meiɗkku amu, nug aakku uɗitte,” awa aum.

Judas nug Jesus kekeɗ eppelagppa meum

⁴⁷ Jesus anam nai mattieye amu, ippunittak awak danab 12 oolagppanu laa onig Judas, amu danab kuɗum ele, danab amu ag qep elab, daɗib ele aɗappig amu, ag uɗippig. Mana mettak danab okkai amu Juda dilag ikki danab ele ag heeg, danab amu, Judas ele uɗippig.

⁴⁸ Amu Judas, nug Jesus dimug meum amu, nug tatam ag Jesus aɗaglagnu epponak keeke laa hekkunu amelagppa inam aum. “Da geha laa ootuqidkkul amu, danab amu aakkuib. Ag Nug aɗeg!” awa aum.

⁴⁹ Aria, ag uɗina, Judas nug pahanab Jesus gumitta ukka, “Tuqan ena Ippunittak Danab,” awowa, nug ootuqittom.

⁵⁰ Nug anam ootuqitte amu Jesus Nug amegppa aum. “O lai, aɗinu na uɗin, ippa ina daattem?” awa oɗ mettom. Jesus anam a, danab ag Jesus aɗappig.

⁵¹ Ag anam heegeg, laa Jesus ele daappig amu, ag oolagppanu laippu laa nug qep elab aokkunu eppeg bahia, eeɗa awa, mana mettak ikki danabnu maɗi nid laa daug hoiyom.

⁵² Hoiye amu Jesus aum. “Na nahip qep elab eɗun abenppa me. Aɗinu? Aun nug qep-ppa ban hette amu, nug qep-ppa mauhkku.

⁵³ Na iite doottem? Da Mama amegppa ehaniɗkkunu appi amu, pahanab nuhikkud engel daup kuɗumnab, ban danab ameg 12 eɗattak, da meɗakku.

⁵⁴ Amge da anam heppi amu, Kayak nai attem genab bekku? Kayak nai nug imu bekkunu atte amu, nug anamib bekku,” awa aum.

⁵⁵ Aria, haen amuppa Jesus Nug danab ameg naɗi amu amelagppa aum. “Da nai tappe nak danab naute daattem amunu ag qep elab, daɗib ele aon, aɗailkkulagnu uɗippig? Haen da deɗ oh Kayaknu mettid lagnu haɗap-ppa danab ah ippunittak madattami, amge ag da ii aɗailppig.

⁵⁶ Amge keeke imu oh amu propet nai yaappig, amu meu medatte,” awa aum. Anam a amu ippunittak awak danab oh ag Nug uuidna oolna goppig.

Ag Jesus hettoɗiak abenppa hettoɗippig

⁵⁷ Aria, danab ag Jesus aɗappig ele amu ag Nug aon, mana mettak ikki danab Kaiapas, nug toppa goppig. Appa amu ɗo mehuqak danab, Juda dilag ikki danab ele qagmena daappig.

⁵⁸ Ag Jesus aɗan omalna teegeg amu, Pita nug dim lamattom, amge nug nakok piɗe dim lamattom. Dim lamatta, nug mana mettak ikki danab laugnu haɗap giginppa ukkom. Nug appa ukka, nug haɗap-ppa no, lag mamegnu daup ele daappig. Nug kobol aɗi hebeppeg, amu anidkkunu dayom.

⁵⁹ Pita nug appa dayeye amu, lag ooppa mana mettak danab okkai amu Juda dilag hettoɗiak okkai onig Sanhidren, amunu danab ele, ag oh Jesus qeppeg mauhkkunu nai hambuppuak laa nuhigppa yaaglagnu madippig, amge ag laa ii anidppig.

⁶⁰ Laa kuɗum ag ahan anam hambuppunna, Jesus eheɗ heumnu appig, amge ag Jesus keeke eheɗ heumnu qeppeg mauhkkunu ele laa ii anidppig. Ag anam heegeg dimppa danab aɗit laa

⁶¹ beya apiɗ. “Danab imu nug, ‘Da Kayaknu mettid lag heppi nauheb, deɗ ewam ooppa da eɗue hekkulnu elele,’ aum,” aoi apiɗ.

⁶² Aa anam aeh amu mana mettak ikki danab nug hibaitta, Jesus oɗ mettom. “Nai amunu amu, na nob iite memana? Nai anak amuam genab o genab iitta?” awa aum.

⁶³ Nug anam aum, amge Jesus Nug nai nakok laa ii mattiom. Aria, baula mana mettak ikki danab Nug amegppa aum. “Da Kayak bauklel onigppa da na amenppa attem. Na nai genab tutukku a! Na genab Kristus, Kayak Bekkate o iitta?” awa aum.

⁶⁴ Nug anam a amu, Jesus Nug oɗeppa awa aum. “Na ame. Amge da ag amelagppa attem. Dimppa Danab Bekkalag da, da Kayak Ɠagattag Oh Ele eppeg naɗiap-ppa daabppi aniɗna, amu ele ag lombig hab waappa daatteb, da lombig amuppa dayeye uɗippippi aniɗkkulag,” awa aum.

⁶⁵ Jesus anam a amu, mana mettak ikki danab nug lamen nuhig aɗa pattiɗa, nug aum. “Nug Kayaknu dabittak nai maditte! Ig aɗi heehe anttomnu mattiak danab laala danab imu eheɗ heumnu mattiglagnu ii mattimta. Iikku elele. Nug Kayaknu dabittak nai aum amu, ag aakku dooppig.

⁶⁶ Ag aɗi atteb?” awa aum. A amu ag appig. “Nug mauhkkun daatte,” aon appig.

⁶⁷ Anam ana, ag Jesus iɗuppa hununna, amu eppelkad bitakkana makkuɗppig. Laa ag eppelag oohap tena, mataɗnana

⁶⁸ appig. “Na am Kristusde! Kayak na ehanitteb amu, na propet nai appe dootu! Aun na oittom?” aon appig.

Pita Jesusnu, “Da Nug ii doottem,” aum

⁶⁹ Ag anam heegeg, Pita nug lag amunu haɗap-ppa heɗep na dayom. Dayeye, mana mettak ikki danab, nuhig maɗi nid ahin laa nug doa aum. “Na ele Galili ted Jesus, Nug ele oipiɗ,” awa aum.

⁷⁰ Amge Pita nug ag oh noolagppa hambuppua, “Na nai attem amu, da diig ii doottem,” awa aum.

⁷¹ Nug awona amu aha wana, lagnu haɗap odppa ukka dayeye, maɗi nid ahin laa na, nug danab appa daappig ele amelagppa aum. “Danab imu nug anukka Jesus, Nasaret ted ele oipiɗ,” awa aum.

⁷² Nug anam a, Pita nug nuhig nai ɠagattag qetta aum. “Da danab amu ii doottem!” awa aum.

⁷³ Nakok laa ele amu danab appa hippaidna daappig ele Pita gumidna dona appig. “Na genab danab umu layag laa aakku. Aɗinu? Nahip nai mattiak amu he, na miag atime,” aon appig.

⁷⁴ Ag anam aeg, Pita nug nai ɠagattag qeta inam aum. “Da nai genab ii appi amu Kayak Nug da nob nau meɗaɗ! Da genab iikku attem, da danab umu ii doottem!” Nug anam a amu, matuk paha gayom.

⁷⁵ Matuk gaye amu Jesusnu nai Pita daugppa doum. Nai amuam inam. “Tuqan imuppa na dahilnu, ‘Da Nug ii doottem,’ aon, ewam batak akkut. Na haen ewam anam appe, geha matuk dawai nug gaakku.” Nai amu Pita daugppa do, nug dimittim ukka, huanaknab gayom.