Matyu 25 - Nobonob Baibel

Jesus Nug ah makkun 10 dilag nai mattiom

¹ Haen amuppa Kayaknu ɗo maɗoɗ amu ah makkun eblaih tanig ele, ahilag hak bia daakku. Amu ah makkun amu ag ahilkad lam aon, danab laa ah aokkun heum ele amu, nug ameg meegeg, nug ibppa uɗieye, ag ahan gona, ibppa uɗa tena anidna omalppeg, ah nuhig laugppa gokkulagnu daappig.

² Ah makkun tanig ele amu ag dabmak tutukku iitta ele, tanig ele laa amu ag doyak dabmak ena ele.

³ Ah makkun dabmak iitta amu, ahilag lam amahlaknu le inak ele aon goppig, amge amahlaknu le nippud laappa aon ii goppig.

⁴ Ah makkun doyak dabmak ena ele, ag amahlaknu le nippudppa mewona aɗanna, ahilkad lam amahlaknu le inak ele aon goppig.

⁵ Am danab ah aokkun heum ele nug paha ii uɗie, ah makkun ag oh amelag ne niippig.

⁶ Niiegeg, tuqan tugmag baag laa ewa aum. ‘Danab nug ah aokkunu hette ele, nug aakku uɗitte. Ag gona, nug uɗa teig!’ awa aum.

⁷ Baag laa anam doona, ah makkun eblaih tanig ele amu ag oh ahan, lam ahilag bappaidppig.

⁸ Bappaidna amu, ah makkun dabmak iitta ele ag ah makkun doyak dabmak ena ele amelagppa appig. ‘Ag lamnu le ahilag amu, ig laa mekkeg! Aɗinu? Ig ihinig amahlaknu le iitta meeme, lam qauhkkulagnu hetteb,’ aon appig.

⁹ Ah makkun dabmak iitta ele ag anam appig, amge ah makkun doyak dabmak ena ele ag appig. ‘Iitta. Ihinig amahlaknu le imuam ihinignu eleleib bia. Ahilagnu ele elele iittatai amunu, ag en lakka gona, nuhigppa ahilagnu aweg!’ aon appig.

¹⁰ Ah makkun doyak dabmak ena ele ag anam aeg, ah makkun dabmak iitta ele ag en lakka amahlaknu le aoglagnu ukkaegeg amu, danab ah aokkun heum ele aakku uɗiom. Uɗie amu, ah makkun dabmak ele ag nug ele ewau matulak hobulppa nona malaeg, maɗi nid ag od manappig.

¹¹ Dimppa ah makkun dabmak iitta ele ag ele uɗippig. Uɗin appig. ‘Naɗi, naɗi, od matulna mekke!’ aon appig.

¹² Ag anam appig amge nug aum. ‘Da genab ag amelagppa attem, da ag ii doyadttem,’ awa aum.” Jesus Nug anam aum.

¹³ Jesus Nug anam ana amu, Nug nai tuɗitta aum. “Anam daakku amunu, ag dabmenan dayeg! Aɗinu? Da eɗuen uɗikkulnu haen amu, ag deɗ, haen ele ii dootteb,” awa aum.

Maɗi nid men doɗo aona, tuɗidkkulagnu nai

¹⁴ Aria Jesus Nug nai anam awowa, Nug nai laa ele inam aum. “Kayaknu ɗo maɗoɗ amu danab okkai laa nug atu laappa gokkunu ha, nuhikkud maɗi nid onilagppa e uɗieg, nug enub ag eppelagppa meum, amubia.

¹⁵ Laa amu nug men doɗo onig talent tanig ele eppegppa meum, laa talent aɗit, laa talent laippu meum. Ag uɗat hekkulagnu eleleppa mattowa, nug ukkom.

¹⁶ Nug ukke, laa nug talent tanig ele awom amu, nug pahanab awa ukka, men doɗoppa uɗat haaha, talent tanig ele baula awom.

¹⁷ Amubiaib laa talent aɗit awom ele, nug ele anam ha, talent aɗit baula awom.

¹⁸ Amge danab nug talent laippu awom, nug awa ukka, wanppa moɗ awa, nuhig okkainu men doɗo lokkume dayom.

¹⁹ Amu haen elabnab ukke, dimppa maɗi nid dilag okkai nug eɗua uɗie, men doɗo ag mattom ele amunu nai mattin bappaidppig.

²⁰ Aria, danab nug talent tanig ele awom, nug aum. ‘Naɗi, antte, na da talent tanig ele meɗame, amu iikkud antte! Da uɗat heinne, talent tanig ele baula iikku aomi,’ awa aum.

²¹ Anam a amu nuhig okkai nug aum. ‘Na maɗi nid ena, na oo metta ii uuak kobol dim lamidna, uɗat enanag heme. Na keeke nakok amu dabmettan autna aome amunu da heppi, na keeke kuɗum dilag okkai daanna gumadkkut. Na doppe, da ele oonih gamag ahaɗ!’ awa aum.

²² Aria, danab nug talent aɗit awom nug ele doa aum. ‘Naɗi, na talent aɗit meɗame amu, da uɗat heinne, talent aɗit baula aomi,’ awa aum.

²³ Amu nuhig okkai nug aum. ‘Na maɗi nid ena, na oo metta ii uuak kobol dim lamidna, uɗat enanag heme. Na keeke nakok amu dabmettan autna aome amunu, da heppi, na keeke kuɗum dilag okkai daanna gumadkkut. Na doppe, da ele oonih gamag ahaɗ!’ awa aum.

²⁴ Am danab nug talent laippu awom nug ele doa, nuhig okkai amegppa aum. ‘Naɗi, da doottem, na am danab ɠagattag, na ii eppameppa meu aokkutnu doottem. Am na ee aeg ii tauɗmeppa ele meu aokkutnu doottem.

²⁵ Anam amunu, da baɗe, talent laippu nahip meɗame amu awe ukke, wanppa moɗ awe memi. Antte, nahip keeke iikku,’ awa aum.

²⁶ Nug anam a amu danab okkai nuhig aum. ‘Na maɗi nid nau, na bahin iitta! Na da ii eppamippa, ee aeg ii tauɗmippa ele meu aottem genabte doome?

²⁷ Anam genab daalo amu, haen da eɗue uɗien, da men doɗo dahil, tuɗittak baula, intres atteb, da amu ele aolomnu, na intres tuɗittaknu dahil men doɗo benk danab mattalom, amuam ena.

²⁸ Amunu ag talent laippu nug eppegppanu aona, laa talent 10 ele amu metteg!

²⁹ Aɗinu? Danab nug Kayaknu keeke awa, uɗat pehettak medatte amu, Kayak Nug amu laa ele medakku. Metteb, nug happiak ele daakku, amge danab nug Kayaknu keeke awa, uɗat pehettak ii medatte amu, Kayak nug nuhig keeke awom amu eɗua aɗidkku.

³⁰ Aria, maɗi nid nau amu ag buɗippeg, dimittim gatatuppa noaɗ! Appa danab ag gaanna, aelkad emalna daaglag,’ awa aum.” Jesus Nug ag amelagppa anam mattiom.

Danab Bekkalag Nug danab ah epeɗiadkku

³¹ Jesus Nug anam ana Nug nai tuɗitta aum. “Dimppa haen Danab Bekkalag da, da binal amahlak oppiaawak ele uɗippi, engel oh ele uɗignig, haen amuppa da sia king binag amahlak oppiaawak ele dahilppa daakkul.

³² Da anam daappi, danab ah oh da noolppa qagmekkulag. Qagmeppeg, da epeɗatten, ameg aɗit mekkul; sipsip gumak danab nug sipsip otia, ameg piɗe maama, amu meeme otia, ameg piɗe mette amubia.

³³ Da sipsip amu da heqol naɗiap-ppa maattette, meeme amu da heqol nanehppa maadkkul.

³⁴ Anam maattoya, da king daattem amunu, da danab ah naɗiap-ppa maadmi ele amelagppa akkul. ‘Ag inam doig! Mame Nug ag itittak ena mattom! Da Mamel Nug ɗo maɗoɗ ahilagnu haen wan bau beebe babaitta mattom.

³⁵ Aɗinu? Anukka da enug iwe, ag ee meɗappig. Da le baal diie, ag le meɗappig. Da aab diig danab iitta daami, ag da ag ele daagnignu onilppa eppig.

³⁶ Da lamen iitta daami, ag lamen meɗappig. Da oɗe ele daami, ag da atognoiɗppig. Da maniguittakppa daami, ag uɗin aniɗppig,’ awe akkul.

³⁷ Da anam appi amu, genab tutukku hak danab ah ag da oɗelppa aon akkulag. ‘Naɗi, na ganeb enug nitte, ig ee mettamut? Am na ganeb le baat diie, ig le mettamut?

³⁸ Haen adekkuppa na aab diig danab iitta daame, ig na ig ele daagnignu oninppa emut? Am haen adekkuppa na lamen iitta daame, ig na lamen mettamut?

³⁹ Haen adekkuppa na oɗe ele daame, o na maniguittakppa daame, ig gota na anidmut?’ aon akkulag.

⁴⁰ Ag anam appeg amu, da ag oɗelagppa awe akkul. ‘Da genab ag amelagppa attem. Ag keeke aɗi laa da lailad, onilag iitta ele, ag oolagppanu laippu laa ag nuhigppa heppig amu, ag dahilppa heppig,’ awe akkul.

⁴¹ Aria, laa nanehppa daatteb ele, da ag amelagppa akkul. ‘Ag laa ag eheɗ laa awaknu anak waappa daatteb amu, ag uuiɗna ukkeg! Ag aab aɗu ii qauha, hanhan eotte ele, Naɗi Nug Satan, amu nuhikkud engel ele dilag heum amu, ag amuppa ukkeg!

⁴² Aɗinu? Anukka da enug iwe, ag ee ii meɗappig. Da le baal diie, ag le ii meɗappig.

⁴³ Da aab diig danab iitta daami amu, ag da ag ele daagnignu onilppa ii eppig. Da lamen iitta daami, ag da lamen ii meɗappig. Da oɗe ele daami, ag da ii atognoiɗppig. Da maniguittakppa daami, ag gona ii aniɗppig,’ awe akkul.

⁴⁴ Da anam appi amu, ag akkulag. ‘Naɗi, na ganeb enug daame, o na le baat diiom, o na aab diig danab iitta daame, o na lamen iitta daame, o na oɗe daame, o iitta na maniguittakppa daame amu, ig na anidta ii ehanidmut?’ aon akkulag.

⁴⁵ Appeg amu, da ag oɗelagppa awe akkul. ‘Da genab ag amelagppa attem. Ag keeke aɗi laa da lailad, onilag iitta ele, ag oolagppanu laippu laa ag nuhigppa ii heppig amu, ag dahilppa ele ii heppig,’ awe akkul.

⁴⁶ Aria, danab amu ag gona, haen ohnu nau awak abenppa daaglag, amge genab tutukku hak danab ag bauklel hanhannu aon daaglag,” awa aum.